ຂ່າວຫຼ້າສຸດ

ເບິ່ງບ້ານເຂົາເອົາບົດຮຽນ 10-10-2019

368 10 ຕ.ລ. 2019 ຫົວຂໍ້ຂ່າວອື່ນໆ

   ຂ່າວ​ທີ່​ສັງ​ລວມ​ມາ​ໃນ​ບົດ​ນີ້ ລວມ​ມີ​ເລື່ອງ​ມາດ​ຕະ­ການ​ຄຸ້ມ​ຄອງ​ຢາ­ສູບ​ໃນ​ຍີ່­ປຸ່ນ  ແລະ  ລະ­ບຽບ​ການ​ແລ່ນ​ລົດ​ໃນ​ນະ­ຄອນ­ຫຼວງ​ນີວ​ເດລີ ເພື່ອ​ຫຼຸດ­ຜ່ອນ​ມົນ​ລະ​ພິດ.

   ທີ່ ຍີ່­ປຸ່ນ: ໃນ​ຊຸມ​ປີ​ຫຼັງໆ​ມາ​ນີ້ ຂ່າວ​ກ່ຽວ​ກັບ​ມາດ​ຕະ­ການ​ຕ່າງໆ​ຂອງ​ຍີ່­ປຸ່ນ ເພື່ອ​ຫຼຸດ­ຜ່ອນ​ບັນ­ຫາ​ຢາ­ສູບ​ໄດ້​ອອກ​ມາ​ອ່າວ​ຖີ່ ເຊັ່ນ ນະ­ໂຍ­ບາຍ​ຊ່ວຍ­ເຫຼືອ​ດ້ານ​ການ​ເງິນ​ໃຫ້​ບັນ­ດາ​ຮ້ານ​ອາ­ຫານ ບາ​ເຄື່ອງ​ດື່ມ​ສ້າງ​ເຂດ​ສູບ­ຢາ​ສະ­ເພາະ ເພື່ອ​ປ້ອງ​ກັນ​ບໍ່​ໃຫ້​ຄວັນ​ຢາ­ສູບ​ປີວ​ໄປ​ອູດ​ຜູ້​ບໍ່​ສູບ­ຢາ ນອກ­ຈາກ​ນັ້ນ ກໍ​ຍັງ​ມີ​ການ​ປະ­ກາດ​ເຂດ​ປອດ​ຢາ­ສູບ​ຕາມ​ສະ­ຖານ­ທີ່​ສາ­ທາ­ລະ­ນະ ສະ­ຖານ­ທີ່​ກາງ­ແຈ້ງ​ຕ່າງໆ​ໃນ​ທົ່ວ​ປະ­ເທດ ແຫຼ່ງ​ຂ່າວ ຂປລ ໄດ້​ໃຫ້​ຮູ້​ໃນ​ວັນ​ທີ 4 ເດືອນ​ກໍ­ລະ­ກົດ​ປີ​ນີ້​ວ່າ ກົດ­ໝາຍ​ຫ້າມ​ສູບ­ຢາ​ໃນ​ສະ­ຖານ­ທີ່​ສາ­ທາ­ລະ­ນະ​ທີ່​ຍີ່­ປຸ່ນ​ໄດ້​ມີ​ຜົນ​ບັງ­ຄັບ​ໃຊ້​ນັບ​ແຕ່​ວັນ​ທີ 1 ກໍ­ລະ­ກົດ​ປີ​ນີ້​ເປັນ­ຕົ້ນ​ມາ ໂດຍ​ໄດ້​ກຳ­ນົດ​ເຂດ​ຫ້າມ​ສູບ­ຢາ​ຕາມ​ໂຮງ­ຮຽນ ໂຮງ­ໝໍ ສຳ­ນັກ­ງານ​ເຮັດ​ວຽກ​ຂອງ​ທາງ​ການ​ຂັ້ນ​ຕ່າງໆ ພ້ອມ​ດຽວ​ກັນ ກົດ­ໝາຍ​ກໍ​ໄດ້​ອະ­ນຸ­ມັດ​ໃຫ້​ສຳ­ນັກ­ງານ​ຕ່າງໆ​ສ້າງ​ເຂດ​ສູບ­ຢາ​ກາງ­ແຈ້ງ​ສະ­ເພາະ ເພື່ອ​ບໍ­ລິ­ການ​ບັນ­ດາ​ສິງ​ອົມ​ຄວັນ ກົດ­ໝາຍ​ຫ້າມ​ສູບ­ຢາ​ສະ­ບັບ​ປັບ­ປຸງ​ນີ້ ໄດ້​ປັບ​ຂຶ້ນ​ມູນ​ຄ່າ​ການ​ປັບ​ໃໝ​ຕໍ່​ໜ່ວຍ​ງານ​ທີ່​ລະ­ເມີດ​ໃນ​ອັດ­ຕາ​ສູງ​ສຸດ 5 ແສນ​ເຢັນ ເທົ່າໆ ກັບ 4.600 ໂດ​ລາ​ສະ­ຫະ­ລັດ ສ່ວນ​ການ​ປັບ​ໃໝ​ບຸກ­ຄົນ​ທີ່​ລະ­ເມີດ​ນັ້ນ​ຕົກ​ເປັນ​ເງິນ 3 ແສນ​ເຢັນ (ເທົ່າ​ກັບ 2.700 ໂດ​ລາ​ສະ­ຫະ­ລັດ).

   ທີ່ ອິນ​ເດຍ: ນີວ​ເດລີ ນະ­ຄອນ­ຫຼວງ​ຂອງ​ອິນ​ເດຍ​ແຫ່ງ​ນີ້​ເປັນ​ໜຶ່ງ​ໃນ​ບັນ­ດາ​ເມືອງ​ໃຫຍ່​ໃນ​ທົ່ວ​ໂລກ​ທີ່​ປະ​ເຊີນ​ກັບ​ບັນ­ຫາ​ມົນ​ລະ​ພິດ​ທາງ​ອາ­ກາດ​ເຖິງ​ຂັ້ນ​ວິ​ກິດ ດັ່ງ­ນັ້ນ ຈຶ່ງ​ບໍ່​ແປກ​ທີ່​ທາງ​ການ​ອິນ​ເດຍ​ໄດ້​ເອົາ​ມາດ​ຕະ­ການ​ອັນ​ຈຳ­ເປັນ ຈຳ­ກັດ ແລະ ກຳ­ຈັດ​ບັນ­ຫາ​ດັ່ງ­ກ່າວ ແຕ່​ກໍ​ບໍ່​ແມ່ນ​ເລື່ອງ​ທີ່​ເຮັດ​ໄດ້​ງ່າຍໆ ມາດ​ຕະ­ການ​ທີ່​ວ່າ​ໃນ​ໄລ­ຍະ​ຜ່ານ​ມາ​ລວມ​ມີ ຄຳ​ສັ່ງ​ຫ້າມ​ລົດ​ເກົ່າໆ​ອອກ​ແລ່ນ​ຕາມ​ເສັ້ນ­ທາງ​ການ​ກຳ­ນົດ​ໃຫ້​ແລ່ນ​ລົດ​ບາ​ມື້​ຕາມ​ເລກ​ທະ­ບຽນ​ຄູ່-ຄີກ ການ​ສັ່ງ​ຫ້າມ​ລົດ​ຈາກ​ບັນ­ດາ​ເຂດ​ໃກ້​ຄຽງ​ແລ່ນ​ເຂົ້າ​ນະ­ຄອນ­ຫຼວງ ເວ­ລາ​ເກີດ​ມີ​ມົນ​ລະ​ພິດ​ທາງ​ອາ­ກາດ​ຂັ້ນ​ອັນ­ຕະ­ລາຍ ນອກ​ນັ້ນ ກໍ​ຍັງ​ມີ​ຂໍ້​ແນະ ນຳ​ໃຫ້​ລົດ​ແຕ່​ລະ​ຄັນ​ບັນ­ທຸກ​ຜູ້ ໂດຍ­ສານ​ຫຼາຍ​ຄົນ​ທີ່​ເດີນ­ທາງ​ໄປ​ທິດ​ທາງ​ດຽວ​ກັນ ຍັງ​ມີ​ອີກ​ມາດ­ຕະ­ຖານ​ໜຶ່ງ​ທີ່​ໜ້າ​ສົນ­ໃຈ ກໍ​ຄື ແຜນ​ເກັບ​ຄ່າ​ຜ່ານ​ສຳ­ລັບ​ລົດ​ສິນ­ຄ້າ​ທີ່​ແລ່ນ​ຜ່ານ​ ນະ­ຄອນ­ຫຼວງ​ນິວ​ເດລີ​ສູ່​ຈຸດ​ປາຍ­ທາງ ແຜນ­ທີ່​ວ່າ​ນີ້​ລິ​ເລີ່ມ​ໂດຍ­ສານ​ສູງ​ສຸດ (ແຫຼ່ງ​ຂ່າວ The Nation) ສ່ວນ​ເງິນ​ເສຍ​ຄ່າ​ຜ່ານ​ນັ້ນ​ຈະ​ຕົກ​ຢູ່​ລະ­ຫວ່າງ 700 ຣູ​ປີ (ປະ­ມານ 10,7 ໂດ​ລາ​ສະ­ຫະ­ລັດ) ຫາ 1.300 ຣູ​ປີ ແຕ່​ກໍ​ມີ​ກໍ­ລະ­ນີ​ຍົກ­ເວັ້ນ​ຄື​ຈະ​ບໍ່​ມີ​ການ​ເກັບ​ຄ່າ​ຜ່ານ​ສຳ­ລັບ​ລົດ​ການ​ຄ້າ​ທີ່​ຂົນ​ເຄື່ອງ­ໃຊ້​ສອຍ ລົດ​ຂົນ​ອາ­ຫານ ແລະ ຜູ້­ໂດຍ­ສານ ກໍ​ຄື ລົດ​ແກ້​ໄຂ​ບັນ­ຫາ​ສຸກ​ເສີນ​ເຊັ່ນ: ລົດ​ໂຮງ­ໝໍ​ເປັນ­ຕົ້ນ ຂ່າວ​ບອກ​ວ່າ ການ​ເກັບ​ຄ່າ​ຜ່ານ​ທີ່​ເອີ້ນ​ເປັນ​ທາງ​ການ​ວ່າ ຄ່າ​ຊົດ​ເຊີຍ​ສິ່ງ­ແວ­ດລ້ອມ ຫຼື ECC ນີ້​ຈະ​ເຮັດ​ທົດ​ລອງ​ກ່ອນ​ເປັນ​ເວ­ລາ 4 ເດືອນ ສ່ວນ​ເງິນ​ທີ່​ເກັບ​ໄດ້​ຈະ​ເປັນ​ຂອງ​ອົງ­ການ​ປົກ­ຄອງ​ນະ­ຄອນ­ຫຼວງ​ນີວ​ເດລີ ຂ່າວ​ນີ້​ອອກ​ມາ​ແຕ່​ປີ 2015 ພຸ້ນ ແຕ່​ຍັງ​ບໍ່​ມີ​ຂ່າວ​ກ່ຽວ​ກັບ​ຜົນ​ຂອງ​ການ​ປະ­ຕິ ບັດ​ມາດ​ຕະ­ການ​ຕົວ​ຈິງ​ເທື່ອ.

ຂ່າວທີ່ກ່ຽວຂ້ອງ