ຂ່າວຫຼ້າສຸດ

ຜູ້​ປະ​ທ້ວງ​​ໃນ​ຮົງ​ກົງ ຖືກ​ຈັບ​ຫຼາຍ​ສິນ​ຄົນ

565 10 ຕ.ລ. 2019 ຂ່າວຕ່າງປະເທດ
ຜູ້​ປະ​ທ້ວງ​​ໃນ​ຮົງ​ກົງ ຖືກ​ຈັບ​ຫຼາຍ​ສິນ​ຄົນ

    ຫຼັງ​ຈາກ​ທີ່​ນາງ ແຄ​ຣີ ແລມ ຫົວໜ້າ​ເຂດ​ບໍລິຫານ​ພິເສດ​ຮົງ​ກົງ (ຈີນ) ປະກາດ​ໃຊ້​ຄຳ​ສັ່ງ​ຫ້າມ​ປິດ​ບັງໃບ​ໜ້າ ໂດຍ​ຜ່ານ “ກົດໝາຍ​ສຸກ​ເສີນ” ເມື່ອ​ວັນ​ທີ 4 ຕຸລາ ແລະ ເລີ່ມ​ມີ​ຜົນ​ບັງຄັບ​ໃຊ້​ນັບ​ແຕ່​ວັນ​ທີ 5 ຕຸລາ​ທີ່​ຜ່ານ​ມາ ກໍ​ຍັງ​ມີ​ປະຊາຊົນ​ໃນ​ຮົງ​ກົງ ສືບຕໍ່​ສວມ​ໜ້າ​ກາກ​ປິດ​ບັງໃບ​ໜ້າ ເພື່ອ​ຄັດຄ້ານ​ຕໍ່​ຄຳ​ສັ່ງ​ຫ້າມ​ດັ່ງກ່າວ.

    ແຕ່​ວັນ​ທີ 5-7 ຕຸລາ​ນີ້ ບັນດາ​ເປົ້າ​ໝາຍ​ຜູ້​ປະ​ທ້ວງ​ຫົວ​ຮຸນ​ແຮງ ໄດ້​ຕັນ​ຖະໜົນ ວາງ​ເພີງ​ຢູ່​ໃນ​ຫຼາຍ​ຈຸດ ທຸບ​ທຳລາຍ​ສະຖານີ​ລົດໄຟ​ໃຕ້​ດິນ ເຮັດ​ໃຫ້​ເກີດ​ການ​ເປ່​ເພ​ຢ່າງ​ໜັກ​ໄປ​ທົ່ວ​ລະບົບ ແລະ ມາ​ຮອດ​ເວລາ​ນີ້ ມີ​ສະຖານີ​ລົດໄຟ​ໃຕ້​ດິນ​ຫຼາຍ​ແຫ່ງ ຕ້ອງ​ໄດ້​ງົດ​ການ​ໃຫ້​ບໍລິການ​ເປັນ​ການ​ຊົ່ວຄາວ​ເພື່ອ​ທຳ​ການ​ສ້ອມແປງ ສົ່ງ​ຜົນ​ໃຫ້​ລະບົບ​ການ​ຄົມມະນາຄົມ​ສາທາລະນະ​ຢູ່​ໃນ​ຮົງ​ກົງ ຖືກ​ຜົນ​ກະທົບ​ຢ່າງ​ຮ້າຍ​ແຮງ.

   ຜູ້​ປະ​ທ້ວງ​ຫົວ​ຮຸນ​ແຮງ​ຫຼາຍ​ຄົນ ຍັງ​ໄດ້​ແກວ່ງ​ລະເບີດ​ເຊື້ອ​ໄຟ​ເຂົ້າ​ໃສ່​ຕຳຫຼວດ ແລະ ນັກ​ຂ່າວ ສົ່ງ​ຜົນ​ໃຫ້​ຕຳຫຼວດ​ຕ້ອງ​ໄດ້​ຍິງ​ລະເບີດ​ນ້ຳ​ຕາ​ຫຼາຍ​ເທື່ອ ເພື່ອ​ສະຫຼາຍ​ກຸ່ມ​ຜູ້​ປະ​ທ້ວງ.  ຂ່າວ​ແຈ້ງວ່າ ໃນ​ການ​ປະ​ທ້ວງ​ສອງ​ວັນ​ດັ່ງກ່າວ ຕຳຫຼວດ​ໄດ້​ຈັບ​ກຸມ​ຜູ້​ປະ​ທ້ວງ​ຫົວ​ຮຸນ​ແຮງ 100 ກວ່າ​ຄົນ ໃນ​ນັ້ນ​ມີ​ປະມານ 60% ເປັນ​ນັກຮຽນ ນັກ​ສຶກ​ສາ ແລະ ມີ​ຜູ້​ທີ່​ມີ​ອາຍຸ​ນ້ອຍ​ທີ່​ສຸດ ກໍ​ແມ່ນ​ນັກຮຽນ​ເພດ​ຍິງ​ຊັ້ນ​ມັດທະຍົມ​ສຶກ​ສາ ທີ່​ມີ​ອາຍຸ 12 ປີ.

     ໃນ​ຂະນະ​ດຽວ​ກັນ ທ່ານ​ນາງ ແຄ​ຣີ ແລມ ກ່າວ​ຕໍ່​ກອງ​ປະຊຸມ​ຖະແຫຼງ​ຂ່າວ ເມື່ອ​ວັນ​ທີ 8 ກັນຍາ​ນີ້​ວ່າ ທາງ​ການ​ຮົງ​ກົງ ບໍ່​ມີ​ແຜນການ​ໃຊ້​ອຳນາດ​ສຸກ​ເສີນ ເພື່ອ​ປະກາດ​ໃຊ້​ກົດໝາຍ​ໃໝ່ ແລະ ວ່າ​ຮົງ​ກົງ​ໄດ້​ຮັບ​ການ​ປະກອບ​ເພື່ອ​ຮັບ​ມື​ກັບ​ສະພາບ​ການ​ໃນ​ປັດຈຸບັນ​ດ້ວຍ​ຕົນ​ເອງ.

ຂ່າວທີ່ກ່ຽວຂ້ອງ