ຂ່າວຫຼ້າສຸດ

ຈັດ​ເວທີ​ສົນທະນາ ໂອກາດ​ວັນ​ສັບປະດາ​ເຄຫາ​ສະຖານ​ໂລກ

865 11 ຕ.ລ. 2019 ຂ່າວໜ້າ​ໜຶ່ງ
ຈັດ​ເວທີ​ສົນທະນາ ໂອກາດ​ວັນ​ສັບປະດາ​ເຄຫາ​ສະຖານ​ໂລກ

    ສູນ​ກາງ​ຊາວ​ໜຸ່ມ​ປະຊາຊົນ​ປະຕິວັດ​ລາວ ໄດ້​ຈັດ​ເວທີ​ສົນທະນາ ເນື່ອງ​ໃນ​ໂອກາດ​ວັນ​ສັບປະດາ​ເຄຫາ​ສະຖານ​ໂລກ ປະຈຳ​ປີ 2019 ພາຍ​ໃຕ້​ຫົວຂໍ້ “ຊາວ​ໜຸ່ມ ນັກຮຽນ ນັກ​ສຶກ​ສາ ກັບ​ການ​ພັດ​ທະນາ​ຕົວ​ເມືອງ​ວຽງ​ຈັນ” ຂຶ້ນ​ວັນ​ທີ 10 ຕຸລາ 2019 ທີ່​ມະຫາວິທະຍາໄລ​ແຫ່ງ​ຊາດ (​ມຊ) ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ສິນ​ລະ​ວົງ ຄຸດ​ໄພທູນ ເຈົ້າ​ຄອງ​ນະຄອນຫຼວງ​ວຽງ​ຈັນ ທ່ານ ອາ​ລຸນ​ໄຊ ສູນ​ນະລາດ ເລຂາ​ຄະນະ​ບໍລິຫານ​ງານ​ສູນ​ກາງ​ຊາວ​ໜຸ່ມ​ປະຊາຊົນ​ປະຕິວັດ​ລາວ ທ່ານ ສົມ​ສີ ຍໍ​ພັນ​ໄຊ ອະທິການ​ບໍດີ ​ມຊ ພ້ອມ​ດ້ວຍ​ສະມາຊິກ​ຊາວ​ໜຸ່ມ​ອ້ອມ​ຂ້າງ​ສູນ​ກາງ.

   ທ່ານ ອາ​ລຸນ​ໄຊ ສູນ​ນະລາດ ໄດ້​ກ່າວ​ວ່າ: ເພື່ອ​ເປັນ​ການ​ສະເຫຼີມສະຫຼອງ​ວັນ​ສຳຄັນ​ດັ່ງກ່າວ ແລະ ວັນ​ຄູ​ແຫ່ງ​ຊາດ ຄົບຮອບ 25 ປີ ໃຫ້​ມີ​ບັນ​ຍາ​ກົດ​ຟົດຟື້ນ ແລະ ມີ​ຄວາມ​ໝາຍ​ສຳຄັນ​ຢ່າງ​ເລິກ ເຊິ່ງ ຕາງໜ້າ​ໃຫ້​ຄົນ​ຮຸ່ນ​ໜຸ່ມ​ທີ່​ກວມ​ເອົາ 60% ຂອງ​ພົນລະເມືອງ​ທົ່ວ​ປະເທດ​ໃນ​ທຸກ​ສາຂາ​ອາຊີບ ທຸກ​ກຸ່ມ​ຄົນ ແລະ ໃນ​ທຸກ​ຂົງເຂດ​ຂະແໜງການ ແລະ ທ້ອງຖິ່ນ ໄດ້​ມີ​ຄວາມ​ປິ​ຕິ​ຍິນ​ດີ​ເປັນ​ຢ່າງ​ຍິ່ງ​ຕໍ່​ການ​ຈັດ​ເວທີ​ສົນທະນາ​ນີ້​ຂຶ້ນ​ທີ່​ເໜາະ​ກັບ​ຄວາມ​ຕ້ອງການ ແລະ ຈິດຕະສາດ​ຂອງ​ຄົນ​ຮຸ່ນ​ໃໝ່ ພາຍ​ໃຕ້​ຫົວຂໍ້​ທີ່​ມີ​ຊື່ວ່າ: ຊາວ​ໜຸ່ມ​ນັກຮຽນ ນັກ​ສຶກ​ສາ ກັບ​ການ​ພັດທະນາ​ຕົວ​ເມືອງ​ວຽງ​ຈັນ ເຊິ່ງ​ເວທີ​ນີ້​ໄດ້​ຮັບ​ການ​ຊີ້​ນຳ​ຢ່າງ​ໃກ້ຊິດ​ຈາກ​ຄະນະ​ພັກ ແລະ ເຈົ້າ​ຄອງ​ນະຄອນຫຼວງ​ວຽງ​ຈັນ ເຊິ່ງ​ເປັນ​ຜູ້​ໜຶ່ງ​ທີ່​ມີ​ຫົວຄິດ ແລະ ລິ​ເລີ່ມ​ໃນ​ການ​ນຳພາ​ແຫ່ງ​ຍຸກ​ສະໄໝ​ຂອງ​ຊາວ​ໜຸ່ມ ໃນ​ການ​ອອກ​ແບບ​ຕົວ​ເມືອງ ເປັນ​ບັນຫາ​ພື້ນຖານ​ໃນ​ການ​ພັດທະນາ​ຕົວ​ເມືອງ ໂດຍ​ສະເພາະ ຄົນ​ຮຸ່ນ​ໜຸ່ມ​ຜູ້​ທີ່​ຈະ​ນຳ​ໃຊ້​ບົດຮຽນ​ຂອງ​ຕົນ​ໃຫ້​ເກີດ​ໜາກ ອອກ​ຜົນ​ຕໍ່​ການ​ພັດທະນາ​ຕົວ​ເມືອງ​ໃນຕໍ່ໜ້າ.

    ໂອກາດ​ນີ້ ທ່ານ ສິນ​ລະ​ວົງ ຄຸດ​ໄພທູນ ໄດ້​ມີ​ຄຳ​ເຫັນ ແລະ ເນັ້ນ​ຕື່ມ​ວ່າ: ການ​ມາ​ເຕົ້າໂຮມ​ຄັ້ງ​ນີ້​ຈະ​ເປັນ​ການ​ປຶກສາ​ຮ່ວມ​ກັນ ເຊິ່ງ​ປີ​ນີ້​ອົງການ​ສະຫະ​ປະຊາ​ຊາດ​ເພື່ອ​ການ​ພັດທະນາ (UNDP) ໄດ້​ໃຫ້​ຫົວຂໍ້​ໃຫ້​ພວກ​ເຮົາ​ຮ່ວມ​ກັນ​ຈັດ​ຕັ້ງ​ປະຕິບັດ ຄື: ນຳ​ໃຊ້​ວິທະຍາ​ການ​ແຖວ​ໜ້າ​ເປັນ​ເຄື່ອງມື​ປະດິດ​ສ້າງ​ຢ່າງ​ໜຶ່ງ ເພື່ອ​ຫັນປ່ຽນ​ສິ່ງ​ເສດ​ເຫຼືອ​ໃຫ້​ເປັນສົມ​ບັດ​ອັນ​ລ້ຳ​ຄ່າ ພວກ​ເຮົາ​ຈົ່ງ​ພ້ອມ​ກັນ​ອຸທິດ​ໃຫ້​ສັບປະດາ​ດັ່ງກ່າວ ເພື່ອ​ໃຫ້​ຜູ້​ອອກແຮງ​ງານ​ມີ​ຄວາມ​ຜາ​ສຸກ ມີ​ຄຸນ​ນະ​ພາບ​ຊີວິດ​ທີ່​ດີ​ຂຶ້ນ ເຊິ່ງ​ສະ​ຖາ​ບັນ​ການ​ສຶກ​ສາ​ກໍ​ແມ່ນ​ບ່ອນ​ສຳຄັນ​ທີ່​ສຸດ​ໃນ​ການ​ສ້າງ​ຊັບພະຍາກອນ​ມະນຸດ ຜູ້​ສືບ​ທອດ​ໃນ​ການ​ພັດທະນາ​ສັງຄົມ ກໍ​ຄື ທຸກ​ຄົນ​ໃນ​ທົ່ວ​ປະເທດ ເພື່ອ​ການ​ພັດທະນາ​ໃຫ້​ມີ​ຄວາມ​ຍືນ​ຍົງ ແລະ ຈະເລີນ​ກ້າວໜ້າ.

   ພ້ອມ​ດຽວ​ກັນ​ນີ້ ທ່ານ​ຍັງ​ໄດ້​ສະແດງ​ຄວາມ​ຍ້ອງຍໍ​ຊົມເຊີຍ​ຕໍ່​ຫົວຄິດ​ປະດິດ​ສ້າງ​ຂອງ​ຄະນະ​ບໍລິຫານ​ງານ​ຊາວ​ໜຸ່ມ 3 ພາກສ່ວນ​ໃນ​ການ​ຈັດ​ກິດຈະກຳ​ຄັ້ງ​ນີ້ ເປັນ​ການ​ເຕົ້າໂຮມ​ຖັນ​ແຖວ​ຊາວ​ໜຸ່ມ​ໃຫ້​ໄດ້​ມາ​ພົບພໍ້​ກັນ ແລະ ທັງ​ເປັນ​ການ​ສ້າງ​ບັນຍາກາດ​ສະເຫຼີມສະຫຼອງ​ວັນ​ປະກາດ​ເອກະລາດ 12 ຕຸລາ​ໃຫ້​ມີ​ຄວາມ​ໝາຍ​ສຳຄັນ​ອັນ​ເລິກເຊິ່ງ​ຍິ່ງ​ຂຶ້ນ.

 

ຂ່າວທີ່ກ່ຽວຂ້ອງ