ປະກາດ​ພະນັກງານ​ຂັ້ນ​ສູງ ຮັບ​ອຸດ​ໜູນ​ບຳນານ

1.203 11 ຕ.ລ. 2019 ຂ່າວໜ້າ​ໜຶ່ງ
ປະກາດ​ພະນັກງານ​ຂັ້ນ​ສູງ ຮັບ​ອຸດ​ໜູນ​ບຳນານ

    ພິທີ​ປະກາດ​ການຈັດຕັ້ງ​ພະນັກງານ​ຂັ້ນ​ສູນ​ກາງ​ຄຸ້ມ​ຄອງ​ເຂົ້າ​ພັກຜ່ອນ​ຮັບ​ອຸດ​ໜູນ​ບຳນານ​ຂອງ​ຫ້ອງ​ວ່າການ​ສຳນັກງານ​ນາຍົກລັດຖະມົນຕີ (​ສນຍ) ຈັດ​ຂຶ້ນ​ວັນ​ທີ 10 ຕຸລາ 2019 ຢູ່​ຫ້ອງ​ວ່າການ ​ສນຍ ໂດຍ​ເປັນ​ປະທານ​ຂອງ​ທ່ານ ສອນ​ໄຊ ສີ​ພັນ​ດອນ ຮອງ​ນາຍົກລັດຖະມົນຕີ ມີ​ທ່ານ​ລັດຖະມົນຕີ ຮອງ​ລັດຖະມົນຕີ ຫົວໜ້າ​ກົມ ຮອງ​ກົມ ຕາງໜ້າ​ຈາກ​ຄະນະ​ຈັດ​ຕັ້ງ​ສູນ​ກາງ ແລະ ພະນັກງານ​ຫຼັກ​ແຫຼ່ງ​ເຂົ້າ​ຮ່ວມ.

   ໂດຍ​ອີງ​ຕາມ​ມະຕິ​ຂໍ້​ຕົກລົງ​ຂອງ​ກົມ​ການເມືອງ​ສູນ​ກາງ​ພັກ ແລະ ດຳລັດ​ຂອງ​ທ່ານ​ນາຍົກລັດຖະມົນຕີ​ວ່າ​ດ້ວຍ​ການ​ອະນຸມັດ​ໃຫ້​ພະນັກງານ​ຂັ້ນ​ສູນ​ກາງ​ຄຸ້ມ​ຄອງ​ເຂົ້າ​ພັກຜ່ອນ-ຮັບ​ອຸດ​ໜູນ​ບຳນານ​ຄັ້ງ​ນີ້ ມີ​ທັງ​ໝົດ 5 ທ່ານ ຄື: ທ່ານ ສົມ​ພາວ ໄຟ​ສິດ ກຳມະການ​ສູນ​ກາງ​ພັກ ລັດຖະມົນຕີ​ປະຈຳ ​ສນຍ ທ່ານ ເພັດ​ສາຄອນ ຫຼວງ​ອາ​ໄພ ກຳມະການ​ສູນ​ກາງ​ພັກ ອະດີດ​ເຈົ້າແຂວງ​ອຸດົມ​ໄຊ ທ່ານ ສົມ​ສະ​ນິດ ສຸວັນນະ​ລາດ ທ່ານ​ນາງ ບຸບຜາ ເຄນ​ວົງ​ລາ​ດາ ແລະ ທ່ານ​ນາງ ວຽງ​ສະຫວັນ ດວງ​ສະຫວັນ ຮອງ​ລັດຖະມົນຕີ ຮອງ​ຫົວໜ້າ​ຫ້ອງ​ວ່າການ ​ສນຍ ເຊິ່ງ​ການ​ປະກາດ​ການຈັດຕັ້ງ​ຄັ້ງ​ນີ້​ເພື່ອ​ປະຕິບັດ​ຕາມ​ລະບຽບ​ການ ແລະ ເຖິງ​ອາຍຸ​ຄົບ​ຕາມ​ເງື່ອນໄຂ​ກະສຽນ​ຮັບ​ອຸດ​ໜູນ​ບຳນານ​ທີ່​ໄດ້​ກຳນົດ​ໄວ້​ໃນ​ກົດໝາຍ​ວ່າ​ດ້ວຍ​ພະນັກງານ-ລັດຖະກອນ.

   ໂອກາດ​ນີ້ ທ່ານ​ຮອງ​ນາຍົກລັດຖະມົນຕີ ໄດ້​ສະແດງ​ຄວາມ​ຍ້ອງຍໍ​ຊົມເຊີຍ​ທັງ 5 ທ່ານ​ໃນ​ການ​ປະກອບສ່ວນ​ອັນ​ສຳຄັນ ແລະ ສົມ​ກຽດ ທີ່​ພັກ ແລະ ລັດຖະບານ​ໄດ້​ມອບ​ໝາຍ​ໃຫ້​ໃນ​ພາລະກິດ​ຕໍ່ສູ້​ກູ້​ຊາດ ປົກ​ປັກ​ຮັກສາ ແລະ ສ້າງສາ​ພັດທະນາ​ປະເທດ​ຊາດ ສຶກ​ສາ​ອົບຮົມ​ລູກ​ຫຼານ​ຄົນ​ຮຸ່ນ​ໜຸ່ມ​ໃຫ້​ມີ​ທັດສະນະ​ຫຼັກ​ໝັ້ນ​ການເມືອງ​ທີ່​ໜັກ​ແໜ້ນ ມີ​ຄຸນສົມບັດ​ສິນ​ທຳ​ປະຕິວັດ ມີ​ນ້ຳໃຈ​ສາມັກຄີ ເອື້ອເຟື້ອ​ເພື່ອ​ແຜ່​ຊ່ວຍເຫຼືອ​ເຊິ່ງ​ກັນ ແລະ ກັນ ຮັກສາ​ມູນເຊື້ອ​ພິລະ​ອາດ​ຫານ ເດັດດ່ຽວ ແລະ ອົດທົນ ເຂົ້າ​ໃນ​ພາລະກິດ​ຕໍ່ສູ້​ກູ້​ຊາດ​ໃນ​ໄລຍະ​ທີ່​ຜ່ານ​ມາ ນັບ​ທັງ​ແບບ​ເກົ່າ ແລະ ແບບ​ໃໝ່​ທີ່​ແສນ​ຫຍຸ້ງຍາກ​ລຳບາກ ຍືດ​ເຍື້ອ​ຍາວ​ນານ ແຕ່​ກໍ​ບໍ່​ໄດ້​ລົດ​ຄວາມ​ພະຍາຍາມ ບໍ່​ມີ​ຄວາມ​ຄິດ​ທໍ້ຖອຍ​ແຕ່​ຢ່າງໃດ ແລະ ກົງກັນຂ້າມ​ພັດ​ໄດ້​ພ້ອມພຽງ​ກັນ​ສຸມ​ໝົດ​ເຫື່ອແຮງ ແລະ ສະຕິ​ປັນຍາ ຄວາມ​ສາມາດ ເພື່ອ​ອຸທິດ​ໃຫ້​ແກ່​ການ​ປະຕິວັດ​ຕະຫຼອດ​ໄລຍະ​ເວລາ​ແຫ່ງ​ການ​ຕໍ່ສູ້ ໂດຍ​ພາຍ​ໃຕ້​ການ​ຊີ້​ນຳ-ນຳພາ​ຂອງ​ພັກ​ທີ່​ສະຫຼາດ​ສ່ອງ​ໃສ ແລະ ເຮັດ​ໃຫ້​ວຽກ​ງານ​ທີ່​ໄດ້​ຊີ້​ນຳ-ນຳພາ​ມີ​ບົດບາດ​ອັນ​ໂດດ​ເດັ່ນ​ຫຼາຍ​ດ້ານ ທັງ​ພາຍ​ໃນ ແລະ ຕ່າງປະເທດ.

ຂ່າວທີ່ກ່ຽວຂ້ອງ