ຢ້ຽມຢາມ​ເຂດ​ພັດທະນາ​ໂຄງການ​ຈຸດ​ສຸມ​ໂພນ​ສະຫວາດ

1.836 11 ຕ.ລ. 2019 ຂ່າວໜ້າ​ໜຶ່ງ
ຢ້ຽມຢາມ​ເຂດ​ພັດທະນາ​ໂຄງການ​ຈຸດ​ສຸມ​ໂພນ​ສະຫວາດ

    ທ່ານ ຄຳໃບ ດຳລັດ ຮອງ​ປະທານ​ສູນ​ກາງ​ແນວ​ລາວ​ສ້າງ​ຊາດ ພ້ອມ​ດ້ວຍ​ບັນດາ​ຄະນະ​ຜູ້​ແທນ​ກອງ​ປະຊຸມ ຄະນະ​ປະຈຳ​ສູນ​ກາງ​ແນວ​ລາວ​ສ້າງ​ຊາດ ເປີດ​ກວ້າງ ຄັ້ງ​ທີ 4 ສະໄໝ​ທີ X ໄປ​ທັດສະນະ​ຢ້ຽມຢາມ​ເຂດ​ພັດທະນາ​ໂຄງການ​ສ້າງ​ຄອບຄົວ? ບ້ານ​ສາມັກຄີ​ປອງ​ດອງ ແນວ​ລາວ​ສ້າງ​ຊາດ ຕິດ​ພັນ​ກັບ​ການ​ແກ້​ໄຂ​ຄວາມທຸກ​ຍາກ​ຂອງ​ປະຊາຊົນ​ບັນດາເຜົ່າ ໃນ​ວັນ​ທີ 9 ຕຸລາ 2019 ຢູ່​ເຂດ​ຈຸດ​ສຸມ 516 ກຸ່ມ​ບ້ານ​ໂພນ​ສະຫວາດ ເມືອງ​ລ້ອງ​ຊານ ແຂວງ​ໄຊ​ສົມບູນ ມີ​ທ່ານ​ພົນ​ຕີ ຄຳ​ລຽງ ອຸ​ທະ​ໄກສອນ ເຈົ້າແຂວງ​ໄຊ​ສົມບູນ ພ້ອມ​ດ້ວຍ​ຄະນະ​ນຳ​ເມືອງ ອຳນາດ​ການ​ປົກຄອງ​ບ້ານ ຄະນະ​ບໍລິສັດ​ພົງ​ສະຫວັນ​ຈຳກັດ ພະນັກງານ​ຈາກ​ອົງການ?ບໍລິສັດ ແລະ ປະຊາຊົນ ເຂົ້າ​ຮ່ວມ.

    ທ່ານ ລີ​ວ່າງ ໄຊ​ຍະ​ຊ້າງ ປະທານ​ແນວ​ລາວ​ສ້າງ​ຊາດ​ເມືອງ​ລ້ອງ​ຊານ ຜູ້​ຊີ້​ນຳ​ອົງ​ການຈັດຕັ້ງ​ມະຫາຊົນ ໄດ້​ລາຍ​ງານ​ສະພາບ​ການຈັດຕັ້ງ​ປະຕິບັດ​ໂຄງການ​ສ້າງ​ຄອບຄົວ ແລະ ບ້ານ​ສາມັກຄີ​ປອງ​ດອງ ຕິດ​ພັນ​ກັບ​ການ​ແກ້​ໄຂ​ຄວາມທຸກ​ຍາກ​ຢູ່​ເຂດ​ພັດທະນາ​ຈຸດ​ສຸມ​ໂພນ​ສະຫວາດ ວ່າ: ຈຸດ​ສຸມ​ໂພນ​ສະຫວາດ​ຫ່າງ​ຈາກ​ເທສະ​ບານ​ເມືອງ 40 ກິໂລແມັດ ມີ 8 ບ້ານ 2 ເຜົ່າ 1.221 ຄອບຄົວ ມີ​ພົນລະເມືອງ 7.951 ຄົນ ຍິງ 3.847 ຄົນ ມີ​ໂຮງຮຽນ​ອະນຸ ບານ 1 ຫຼັງ ປະຖົມ​ສົມບູນ 7 ແຫ່ງ ມັດທະຍົມ​ສົມບູນ 1 ແຫ່ງ ໂຮງໝໍ 1 ແຫ່ງ ມີ​ໄຟຟ້າ ຕະຫຼາດ​ຊຸມ​ຊົນ ປະ ຊາ​ຊົນ​ມີ​ມູນເຊື້ອ​ວັດທະນະທຳ​ອັນ​ດີງາມ ເຊິ່ງ​ການຈັດຕັ້ງ​ປະຕິບັດ​ຂະ​ບວນ​ການ​ສ້າງ​ຄອບຄົວ ແລະ ບ້ານ​ສາມັກຄີ​ປອງ​ດອງ ໂດຍ​ໄດ້​ຈັດ​ຕັ້ງ​ຄະນະ​ຮັບຜິດຊອບ​ແຕ່​ລະ​ຂັ້ນ ໄດ້​ມີ​ການ​ຈັດ​ກອງ​ປະຊຸມ​ຄະນະ​ຮັບຜິດຊອບ 3 ຂັ້ນ ຮ່ວມ​ກັບ​ກຸ່ມ​ບໍລິສັດ​ພົງ​ສະຫວັນ ຈັດ​ເຝິກອົບຮົມ​ວຽກ​ງານ​ດັ່ງກ່າວ​ໃຫ້​ພະນັກງານ​ຫຼັກ​ແຫຼ່ງ ບັນດາ​ຫ້ອງການ​ອ້ອມ​ຂ້າງ​ເມືອງ ແລະ ບ້ານ​ກ່ຽວຂ້ອງ​ທົ່ວ​ເມືອງ​ລ້ອງ​ຊານ ພົບ​ປະ​ປະຊາຊົນ​ບັນດາເຜົ່າ​ຢູ່ 8 ບ້ານ​ເຂດ​ພັດທະນາ​ໂຄງການ​ຈຸດ​ສຸມ​ໂພນ​ສະຫວາດ ເຊື່ອມ​ຊຶມ​ນິຕິ​ກຳ​ກ່ຽວ​ກັບ​ການ​ສ້າງ​ຄອບຄົວ ແລະ ບ້ານ​ສາມັກຄີ​ປອງ​ດອງ ຕິດຕາມ​ຊຸກຍູ້​ຈັດ​ຕັ້ງ​ປະຕິບັດ​ໂຄງການ​ໃນ​ແຕ່​ລະ​ເດືອນ ແລະ ອື່ນໆ ສຳລັບ​ຜົນ​ໄດ້​ຮັບ​ເບື້ອງ​ຕົ້ນ​ຂອງ​ໂຄງການ​ປະກາດ​ຮັບຮອງ 8 ບ້ານ​ໃນ​ເຂດ​ພັດທະນາ​ໂຄງການ​ເປັນ​ບ້ານ​ສາມັກຄີ​ປອງ​ດອງ 1.159 ຄອບຄົວ ຍັງ 62 ຄອບຄົວ​ທີ່​ຍັງ​ສືບຕໍ່​ສ້າງ ຊ່ວຍ​ປຸກເຮືອນ​ຢູ່​ໃຫ້​ປະຊາຊົນ​ທີ່​ທຸກ​ຍາກ?ອະນາຖາ 6 ຫຼັງ ພ້ອມ​ກັບ​ຕຽງ​ນອນ ຜ້າ​ເສື້ອ ຜ້າຫົ່ມ ມຸ້ງ ສາດ ແລະ ເຄື່ອງ​ເຮືອນຄົວ​ຈຳນວນ​ໜຶ່ງ ຊື້​ໝູ​ລາດ 6 ໂຕ ງົວ​ພື້ນເມືອງ 9 ໂຕ ແລະ ສັດ​ປີກ​ຈຳນວນ​ໜຶ່ງ​ມອບ​ໃຫ້​ຄອບຄົວ​ທີ່​ທຸກ​ຍາກ ສ້າງ​ວຽກ​ເຮັດ​ງານ​ທຳ​ໃຫ້​ປະຊາຊົນ​ບັນດາເຜົ່າ​ຢູ່​ເຂດ​ພັດທະນາ​ໂຄງການ​ຫຼາຍ​ຂຶ້ນ.

    ທ່ານ ສີວິໄລ ພົມ​ມະ​ຈັກ ຜູ້ອຳນວຍການ​ໃຫຍ່​ກຸ່ມ​ບໍລິສັດ​ພົງ​ສະຫວັນ ຈຳກັດ ກ່າວ​ວ່າ: ໂຄງການ​ມີ​ເນື້ອທີ່ 161 ເຮັກຕາ ໄດ້​ລິ​ເລີ່ມ​ມາ​ແຕ່​ທ້າຍ​ປີ 2017 ແລະ ເລີ່ມ​ປະຕິບັດ​ຕົວ​ຈິງ​ເດືອນ​ມີນາ 2018 ເປັນຕົ້ນ​ມາ ຈຸດປະສົງ​ແມ່ນ​ລະດົມ​ໃຫ້​ປະຊາຊົນ​ຜະລິດ​ກະສິກຳ ປູກຝັງ?ລ້ຽງສັດ ສ້າງ​ເປັນ​ແຫຼ່ງ​ທ່ອງ​ທ່ຽວ​ທາງ​ກະສິກຳ ສ້າງ​ເປັນ​ສູນ​ຕົວ​ແບບ​ທາງ​ດ້ານ​ກະສິກຳ ຄັດ​ເລືອກ​ເອົາ​ຄອບຄົວ​ທີ່​ທຸກ​ຍາກ​ມາ​ອາໄສ​ຢູ່​ໃນ​ຂອບ​ເຂດ​ໂຄງການ ສ້າງ​ສູນ​ອົບຮົມ​ພັດທະນາ​ກະສິກຳ ແລະ ສວນ​ສາທາລະນະ​ຫາ​ຕະຫຼາດ​ເພື່ອ​ຈຳໜ່າຍ​ສິນຄ້າ​ກະສິກຳ ເນັ້ນ​ການ​ພັດທະນາ​ຊີວິດ​ການ​ເປັນ​ຢູ່​ຂອງ​ປະຊາຊົນ​ໃນ​ເຂດ​ຈຸດ​ສຸມ 516 ກຸ່ມ​ບ້ານ​ໂພນ​ສະຫວາດ​ໃຫ້​ມີ​ວິຖີ​ຊີວິດ​ທີ່​ດີ​ຂຶ້ນ ແລະ ອື່ນໆ.

   ຈາກ​ນັ້ນ ຄະນະ​ຜູ້​ແທນ ແລະ ພາກສ່ວນ​ກ່ຽວຂ້ອງ​ໄປ​ທັດສະນະ​ຢ້ຽມ​ຊົມ​ຕົວ​ຈິງ ໃນ​ນັ້ນ ໄປ​ຢ້ຽມ​ຊົມ​ເຮືອນ ເນື້ອທີ່​ປູກ​ໝາກ​ໄມ້​ໃຫ້​ໝາກ ເຮືອນ​ຮົ່ມ​ເພາະ​ເຫັດ ຟາມ​ງົວ ຟາມ​ໝູ ຟາມ​ໄກ່​ດູກ​ດຳ ແລະ ອື່ນໆ.

ຂ່າວທີ່ກ່ຽວຂ້ອງ