ຫວຽດນາມ ​ເປັນ​ປະ​ເທດ​ຜູ້​ສົ່ງ​ອອກ​ກາ​ເຟລາຍ​ໃຫຍ່​ອັນ​ດັບ​ສອງ​ຂອງ​ໂລກ

555 17 ຕ.ລ. 2019 ຂ່າວຕ່າງປະເທດ
ຫວຽດນາມ ​ເປັນ​ປະ​ເທດ​ຜູ້​ສົ່ງ​ອອກ​ກາ​ເຟລາຍ​ໃຫຍ່​ອັນ​ດັບ​ສອງ​ຂອງ​ໂລກ

   ຂ່າວສານ​ຫວຽດນາມ ອ້າງ​ຕາມ​ຂໍ້​ມູນ​ຈາກ​ບໍລິສັດ​ສື່ສານ CNBC ຂອງ ສ ອາ​ເມ​ຣິ​ກາ ທີ່​ລົງ​ພິມ​ບົດ​ອອກ​ມາ​ເມື່ອ​ບໍ່​ດົນ​ມາ​ນີ້ ໂດຍ​ຍົກ​ໃຫ້​ເຫັນ​ຢ່າງ​ເດັ່ນ​ຊັດ ເຖິງ​ຄວາມ​ເຕີບ​ໂຕ​ທີ່​ເຂັ້ມແຂງ ໃນ​ຂົງເຂດ​ການ​ສົ່ງ​ອອກ​ກາເຟ​ຂອງ​ຫວຽດນາມ.

    CNBC ອ້າງ​ຕາມ​ຕົວ​ເລກ​ສະຖິຕິ ຈາກ​ອົງການ​ສະຖິຕິ​ແຫ່ງ​ຊາດ​ອິນ​ໂດ​ເນ​ເຊຍ (BPS) ໃຫ້​ຮູ້​ວ່າ ບໍ​ລິ​ມາດ​ກາເຟ​ສົ່ງ​ອອກ​ຂອງ​ຫວຽດນາມ ໄດ້​ເພີ່ມ​ຂຶ້ນ​ຢ່າງ​ຕໍ່​ເນື່ອງ ໃນ​ຫຼາຍ​ປີ​ມໍ່​​ໆ​ມາ​ນີ້.  ໃນ​ນັ້ນ ເມື່ອ​ປີ 2014 ຫວຽດນາມ ສົ່ງ​ອອກ​ກາເຟ​ໄດ້ 1,69 ລ້ານ​ໂຕນ. ຕໍ່​ມາ​ໃນ​ປີ 2018 ບໍ​ລິ​ມາດ​ການ​ສົ່ງ​ອອກ​ກາເຟ​ຂອງ​ຫວຽດນາມ ບັນລຸ 1,87 ລ້ານ​ໂຕນ ບັນລຸ​ມູນ​ຄ່າ 3,53 ຕື້​ໂດ​ລາ​ສະຫະລັດ ແລະ ສູງ​ກວ່າ​ທົບ 4 ເທົ່າ ຂອງ​ມູນ​ຄ່າ​ການ​ສົ່ງ​ອອກ​ກາເຟ​ຂອງ​ອິນ​ໂດ​ເນ​ເຊຍ ຊຶ່ງ​ບັນລຸ 800 ລ້ານ​ໂດ​ລາ​ສະຫະລັດ ໃນ​ປີ 2018.

    ຂ່າວ​ແຈ້ງວ່າ ປັດຈຸບັນ​ນີ້ ຫວຽດນາມ ຢູ່​ໃນ​ອັນ​ດັບ​ສອງ​ຂອງ​ໂລກ ໃນ​ດ້ານ​ການ​ສົ່ງ​ອອກ​ກາເຟ ໂດຍ​ເປັນ​ຮອງ​ຈາກ ບຣາ​ຊີ​​ລ. ໃນ​ໝວດ 5 ປະເທດ​ອັນ​ດັບ​ຕົ້ນ​ໃນ​ການ​ສົ່ງ​ອອກ​ກາເຟ​ລາຍ​ໃຫຍ່​ໃນ​ໂລກ ຍັງ​ມີ​ໂກ​ລົມ​ບີ ອິນ​ໂດ​ເນ​ເຊຍ ແລະ ເອ​ທີ​ໂອ​ປີ. ໝາກຜົນ​ທີ່​ໄດ້​ມາ​ຄື​ດັ່ງກ່າວ ແມ່ນ​ຍ້ອນ​ວ່າ​ຫວຽດນາມ ໄດ້​ແກ້​ໄຂ​ດ້ານ​ສະມັດ​ຕະ​ພາບ​ການ​ຜະລິດ​ກາເຟ ຊຶ່ງ​ບັນລຸ​ເຖິງ 3 ໂຕນ/ເຮັກຕາ.

ຂ່າວທີ່ກ່ຽວຂ້ອງ