IMF ປັບ​ຫຼຸດ​ຄວາມ​ເຕີບ​ໂຕ​ເສດຖະກິດ​ທົ່ວ​ໂລກ​ໃນ​ປີ 2019

560 17 ຕ.ລ. 2019 ຂ່າວຕ່າງປະເທດ
IMF ປັບ​ຫຼຸດ​ຄວາມ​ເຕີບ​ໂຕ​ເສດຖະກິດ​ທົ່ວ​ໂລກ​ໃນ​ປີ 2019

    ວັນ​ທີ 15 ຕຸລາ​ນີ້ ອົງການ​ກອງ​ທຶນ​ເງິນຕາ​ສາກົນ (IMF) ໄດ້​ປະກາດ​ບົດ​ລາຍ​ງານ​ກ່ຽວ​ກັບ ຄວາມ​ຫວັງ​ຂອງ​ເສດຖະກິດ​ໂລກ​ໃນ​ປີ 2019 ຊຶ່ງ​ຕາມ​ນັ້ນແລ້ວ ແມ່ນ​ໄດ້​ປັບ​ຫຼຸດ​ຕົວ​ເລກ​ການ​ຄາດ​ຄະເນ​ຄວາມ​ເຕີບ​ໂຕ​ຂອງ​ເສດຖະກິດ​ທົ່ວ​ໂລກ ໃນ​ປີ 2019 ລົງ​ສູ່​ລະດັບ 3% ແລະ ລະດັບ 3,4% ສຳລັບ​ປີ 2020.

    ບົດ​ລາຍ​ງານ​ດັ່ງກ່າວ ລະບຸ​ວ່າ ເສດຖະກິດ​ໂລກ ພວມ​ພັດທະນາ​ໃນ​ຈັງຫວະ​ທີ່​ອ່ອນແອ​ທີ່​ສຸດ ນັບ​ແຕ່​ເວລາ​ທີ່​ເກີດ​ວິ​ກິດ​ການ​ການ​ເງິນ​ທົ່ວ​ໂລກ ເມື່ອ​ປີ 2008-2009 ເປັນຕົ້ນ​ມາ ໃນ​ຂະນະ​ທີ່​ການ​ພິພາດ​ດ້ານ​ການ​ຄ້າ​ເພີ່ມ​ຂຶ້ນ ເຮັດ​ໃຫ້​ຄວາມ​ເຊື່ອ​ໝັ້ນ​ຂອງ​ວົງ​ການ​ລົງທຶນ ແລະ ທຸລະ​ກິດ​ຫຼຸດ​ລົງ.

    ໃນ​ບົດ​ລາຍ​ງານ​ຂອງ IMF ນັ້ນ​ກໍ​ໄດ້​ປັບ​ຫຼຸດ​ຄວາມ​ຫວັງ​ເຕີບ​ໂຕ​ຂອງ​ເສດຖະກິດ ສ ອາ​ເມ​ຣິ​ກາ ໃນ​ປີ 2019 ລົງ​ໄປ​ຍັງ​ເຫຼືອ​ທີ່​ລະດັບ 2,4% ແລະ ທີ່​ລະດັບ 2,1% ໃນ​ປີ 2020. ໃນ​ຂະນະ​ດຽວ​ກັນ IMF ກໍ​ໄດ້​ປັບ​ຫຼຸດ​ການ​ຄາດ​ຄະເນ​ຄວາມ​ເຕີບ​ໂຕ​ຂອງ​ເສດຖະກິດ​ຈີນ ໃນ​ປີ 2019 ລົງ​ໄປ​ຢູ່​ທີ່​ລະດັບ 6,1% ແທນ​ທີ່​ຈະ​ແມ່ນ 6,2% ດັ່ງ​ທີ່​ໄດ້​ນຳ​ອອກ​ມາ​ກ່ອນ​ໜ້າ​ນີ້.

    ນອກຈາກ​ນັ້ນແລ້ວ IMF ຍັງ​ໄດ້​ປັບ​ຫຼຸດ​ການ​ຄາດ​ຄະເນ​ຄວາມ​ເຕີບ​ໂຕ​ເສດຖະກິດ ຂອງ​ເຂດ​ໃຊ້​ເງິນ​ເອີ​ໂຣ  (Eurozone) ທ່າມກາງ​ທີ່​ເສດຖະກິດ​ຂອງ​ເຢຍ​ລະ​ມັນ​ເຕີບ​ໂຕ​ຊັກ​ຊ້າ​ລົງ. ຕາມ​ນັ້ນແລ້ວ ຄວາມ​ເຕີບ​ໂຕ​ເສດຖະກິດ​ຂອງ Eurozone ໃນ​ປີ 2019 ໄດ້​ຮັບ​ການ​ຄາດ​ຄະເນ​ໄວ້​ທີ່​ລະດັບ 1,2% ຕ່ຳ​ກວ່າ 0,1% ເມື່ອ​ທຽບໃສ່​ລະດັບ​ຄາດ​ຄະເນ​ທີ່​ມີ​ອອກ​ມາ​ກ່ອນ​ໜ້າ​ນີ້ ແລະ ສຳລັບ​ປີ 2020 ຢູ່​ທີ່​ລະດັບ 1,4% ຫຼຸດ​ລົງ 0,2%.

ຂ່າວທີ່ກ່ຽວຂ້ອງ