ເດັກນ້ອຍກວ່າ 30% ​ໃນ​ທົ່ວ​ໂລກ ມີ​ບັນຫາ​ກ່ຽວ​ກັບ​ໂພ​ສະນາ​ການ

577 17 ຕ.ລ. 2019 ຂ່າວຕ່າງປະເທດ
ເດັກນ້ອຍກວ່າ 30% ​ໃນ​ທົ່ວ​ໂລກ ມີ​ບັນຫາ​ກ່ຽວ​ກັບ​ໂພ​ສະນາ​ການ

   ບົດ​ລາຍ​ງານ​ສະພາບ​ຄວາມ​ເປັນ​ຈິງ​ຂອງ​ເດັກນ້ອຍ​ໃນ​ໂລກ ຊຶ່ງ​ກອງ​ທຶນ​ສຳລັບ​ເດັກນ້ອຍ ຂອງ​ສະຫະ​ປະຊາ​ຊາດ (UNICEF) ນຳ​ອອກ​ມາ​ເປີດເຜີຍ​ເມື່ອ​ວັນ​ທີ 15 ຕຸລາ​ນີ້ ລະບຸ​ວ່າ ຈຳນວນ​ເດັກນ້ອຍ​ທີ່​ຂາດ​ໂພ​ສະ​ນາ​ການ (ຂາດ​ທາດ​ບຳລຸງ​ຮ່າງກາຍ) ຢູ່​ໃນ​ບັນດາ​ປະເທດ​ທີ່​ທຸກ​ຍາກ ໄດ້​ຫຼຸດ​ລົງ 40% ນັບ​ແຕ່​ປີ 1990-2015 ແຕ່​ວ່າ​ໃນ​ປັດຈຸບັນ​ນີ້ ຍັງ​ມີ​ເດັກນ້ອຍ​ເກືອບ  150 ລ້ານ​ຄົນ ໃນ​ໄວ 4 ປີ​ລົງ​ມາ ບໍ່​ບັນລຸ​ມາດຖານ​ດ້ານ​ລວງ​ສູງ ຕາມ​ເກນ​ອາຍຸ​ຂອງ​ເດັກນ້ອຍ ແລະ ນີ້​ກໍ​ເປັນ​ປັດ​ໄຈ ທີ່​ເປັນ​ຜົນ​ກະທົບ​ຕໍ່​ການ​ພັດທະນາ ທັງ​ທາງ​ດ້ານ​ຮ່າງກາຍ ແລະ ມັນສະໝອງ​ຂອງ​ເດັກນ້ອຍ.

   ໃນ​ຂະນະ​ດຽວ​ກັນ  50% ຂອງ​ຈຳນວນ​ເດັກນ້ອຍ​ໃນ​ທົ່ວ​ໂລກ ທີ່​ມີ​ອາຍຸ​ຕ່ຳ​ກວ່າ 5 ປີ ບໍ່​ໄດ້​ຮັບ​ການ​ສະໜອງ​ມີ​ຕາ​ມິນ ແລະ ແຮ່​ທາດ​ທີ່​ຈຳເປັນ. ມີ​ກວ່າ 30% ຈາກ​ຍອດ​ຈຳນວນ​ເດັກນ້ອຍ 700 ລ້ານ​ຄົນ ໃນ​ທົ່ວ​ໂລກ ທີ່​ມີ​ອາຍຸ​ຕຳ​ກວ່າ 5 ປີ ປະສົບ​ກັບ​ການ​ຂາດ​ໂພ​ສະ​ນາ​ການ ຫຼື​ນ້ຳໜັກ​ຕົວ​ເກີນ​ມາດຕະຖານ ແລະ ຕ້ອງ​ປະ​ເຊີນ​ກັບ​ບັນຫາ​ສຸຂະພາບ​ໃນ​ໄລຍະ​ຍາວ.

    ບົດ​ລາຍ​ງານ​ດັ່ງກ່າວ ໃຫ້​ຮູ້​ວ່າ ມີ​ກວ່າ 800 ລ້ານ​ຄົນ ໃນ​ທົ່ວ​ໂລກ ຢູ່​ໃນ​ທຸກໆ​ໄວ ພວມ​ອຶດຫີວ ໃນ​ຂະນະ​ທີ່​ມີ​ອີກ 2 ຕື້​ຄົນ ກິນ​ຫຼາຍ​ເກີນ​ໄປ ແລະ ທາດ​ອາຫານ​ການ​ກິນ​ເຫຼືອ​ເຟືອ ນຳໄປ​ສູ່​ການ​ມີ​ນ້ຳໜັກ​ຕົວ​ເກີນ​ມາດຕະຖານ (ຕູ້ຍ) ພະຍາດ​ເບົາຫວານ ແລະ ພະຍາດຫົວໃຈ-ເສັ້ນເລືອດ.

    ສຳລັບ​ເດັກນ້ອຍ​ໃນ​ໄວ​ຕ່ຳ​ກວ່າ 5 ປີ​ນັ້ນ ລະບອບ​ໂພ​ສະ​ນາ​ການ​ໃນ 1.000 ມື້​ທຳ​ອິດ​ຂອງ​ຊີວິດ ຖື​ວ່າ​ເປັນ​ປຶກ​ແຜ່ນ​ໃຫ້​ແກ່​ການ​ພັດທະນາ​ຮ່າງກາຍ ແລະ ຈິດໃຈ. ເຖິງ​ແນວໃດ​ກໍ​ຕາມ UNICEF ຊີ້​ແຈງ​ວ່າ ມີ​ເດັກນ້ອຍ​ພຽງ 2 ຄົນ ຈາກ​ຈຳນວນ 5 ຄົນ​ໃດ ທີ່​ມີ​ອາຍຸ​ຕ່ຳ​ກວ່າ 6 ເດືອນ ໄດ້​ດື່ມ​ນົມ​ແມ່​ລ້ວນໆ ຕາມ​ການ​ແນະນຳ​ຂອງ​ບັນດາ​ຊ່ຽວຊານ.

    ບົດ​ລາຍ​ງານ​ດັ່ງກ່າວ ນັບ​ວ່າ​ເປັນ​ສະບັບ​ທຳ​ອິດ​ຂອງ UNICEF ທີ່​ເວົ້າ​ເຖິງ​ສະພາບ​ຄວາມ​ເປັນ​ຈິງ​ຂອງ​ເດັກນ້ອຍ​ໃນ​ໂລກ ນັບ​ແຕ່​ປີ 1999 ເປັນຕົ້ນ​ມາ.

ຂ່າວທີ່ກ່ຽວຂ້ອງ