ເບິ່ງບ້ານເຂົາເອົາບົດຮຽນ 17-10-2019

1.243 17 ຕ.ລ. 2019 ຫົວຂໍ້ຂ່າວອື່ນໆ

    ຄໍ​ລຳ​ປະ­ຈຳ​ວັນ​ນີ້ ລວມ​ເອົາ​ຂ່າວ​ກ່ຽວ​ກັບ​ການ​ຢຸດ​ໃຊ້​ຖົງ ແລະ ພາ­ຊະ­ນະ​ເຮັດ​ດ້ວຍ​ຢາງ ເພື່ອ​ບໍ­ລິ­ການ​ນັກ​ທ່ອງ​ທ່ຽວ​ໃນ​ອ່າວ​ຮ່າ​ລອງ ເລື່ອງ​ສານ​ສູງ​ຈີນ​ຫ້າມ​ພະ­ນັກ­ງານ​ສານ​ທ້ອງ­ຖິ່ນ ເກັບ​ເງິນ​ຄ່າ​ເມື່ອຍ​ນຳ​ຜູ້​ມີ​ຄະ­ດີ​ຂຶ້ນ​ສານ ຂ່າວ​ກ່ຽວ​ກັບ​ແຜນ​ຂອງ​ມາ​ເລ​ເຊຍ ເພື່ອ​ບໍ່​ໃຫ້​ນັກ­ຮຽນ​ເປ້​ປຶ້ມ​ໜັກ​ໄປ​ໂຮງ­ຮຽນ.

    ທີ່ ຫວຽດ­ນາມ: ອ່າວ​ຮ່າ​ລອງ ສະ­ຖານ­ທີ່​ອັດ­ສະ­ຈັນ​ທາງ​ທຳ​ມະ​ຊາດ ທາງ​ເລືອກ​ຍອດ​ນິ­ຍົມ​ໜຶ່ງ​ຂອງ​ນັກ​ທ່ອງ​ທ່ຽວ ທົ່ວ​ມຸມ​ເລືອກ​ພວມ​ຢູ່​ໃນ​ຂັ້ນ​ຕອນ​ແຮກ­ສ່ຽວ​ກັບ​ສິ່ງ­ແວ­ດລ້ອມ ຢ່າງ​ແນບ​ແໜ້ນ​ດ້ວຍ​ນະ­ໂຍ­ບາຍ​ສີ­ຂຽວ ປາ­ສະ­ຈາກ​ກິ່ນ​ອາຍ​ຂອງ​ຖົງ​ຢາງ (ປຼັສ​ຕິກ) ຊະ­ນິດ​ໃຊ້​ເທື່ອ​ດຽວ​ແລ້ວ​ໂຍນ​ຖິ້ມ​ໂລດ ຂ່າວ​ຕ່າງ­ປະ­ເທດ​ຫວ່າງ​ບໍ່​ເຫິງ​ມາ​ນີ້​ບອກ​ວ່າ: ຄະ­ນະ​ຄຸ້ມ​ຄອງ​ອ່າວ​ຮ່າ​ລອງ ແຂວງ​ກວາງ​ນິກ ຫວຽດ­ນາມ ໄດ້​ແຈ້ງ​ໃຫ້​ຊາບ​ວ່າ: ໂດຍ​ເລີ່ມ​ແຕ່​ວັນ​ທີ 1 ກັນ­ຍາ​ປີ​ນີ້ ເມືອ​ໜ້າ​ຜະ­ລິດ​ຕະ​ພັນ​ຢາງ​ທຸກ​ຊະ­ນິດ ທີ່​ເຮັດ​ດ້ວຍ​ຢາງ​ແບບ​ໃຊ້​ເທື່ອ​ດຽວ​ນັ້ນ ຈະ​ຖືກ​ປ່ຽນ​ແທນ​ດ້ວຍ​ຜະ­ລິດ​ຕະ​ພັນ​ເຮັດ​ດ້ວຍ​ເຈ້ຍ​ແກ້ວ ວັດ​ສະ​ດຸ​ຊີ­ວະ​ພາບ​ທີ່​ຍ່ອຍ​ສະ­ຫຼາຍ​ໄດ້​ງ່າຍ ທັງ​ເປັນ​ມິດ​ກັບ​ສິ່ງ­ແວ­ດລ້ອມ ເປົ້າ​ໝາຍ​ຕົ້ນ ຕໍ​ໃນ​ການ​ຢຸດ​ໃຊ້​ຜະ­ລິດ​ຕະ​ພັນ​ປະ­ເພດ​ຢາງ ແມ່ນ​ເນັ້ນ​ໃສ່​ລະ­ບົບ​ການ​ໃຫ້​ບໍ­ລິ­ການ​ນັກ​ທ່ອງ​ທ່ຽວ​ພາຍ​ໃນ ແລະ ຕ່າງ­ປະ­ເທດ ເຊັ່ນ: ຢູ່​ຕາມ​ໂຮງ­ແຮມ ເຮືອນ​ພັກ ຮ້ານ​ອາ­ຫານ ພິ­ເສດ​ແມ່ນ​ກຳ­ປັ່ນ​ນຳ​ທ່ຽວ ສ່ວນ​ປະ­ເພດ​ເຄື່ອງ­ໃຊ້​ເຮັດ​ດ້ວຍ​ຢາງ​ທີ່​ຫ້າມ​ໃຊ້​ນັ້ນ ລວມ​ມີ ຈອກ ທໍ່­ດູດ ຖົງ ຈານ ບ່ວງ ສ້ອມ ໃນ​ການ​ປະ­ຕິ­ບັດ​ມາດ​ຕະ­ການ​ຢຸດ​ໃຊ້​ຜະ­ລິດ​ຕະ​ພັນ ທີ່​ເຮັດ​ດ້ວຍ​ຢາງ​ປະ­ເພດ​ໃຊ້​ເທື່ອ​ດຽວ­ນີ້ ມີ​ຂັ້ນ​ຕອນ​ດັ່ງ­ນີ້ ຄື: ເລີ່ມ​ຕົ້ນ​ດ້ວຍ​ການ​ໂຄ­ສະ­ນາ ແລະ ແຈ້ງ​ໃຫ້​ນັກ​ທ່ອງ​ທ່ຽວ​ຊາບ​ກ່ຽວ​ກັບ​ການ​ຫ້າມ​ໃຊ້​ຂວດ​ຢາງ​ຖົງ​ຢາງ... ໃນ​ເວ­ລາ​ຢ້ຽມ​ຊົມ​ອ່າວ ແນະ­ນຳ​ໃຫ້​ບັນ­ດາ​ຫົວ­ໜ່ວຍ​ທຸ­ລະ​ກິດ ບໍ­ລິ­ການ ຈອກ ທໍ່­ດູດ ຖົງ​ເຮັດ​ດ້ວຍ​ເຈ້ຍ ໃຫ້​ບັນ­ດາ​ນັກ​ທ່ອງ​ທ່ຽວ​ກ່ອນ​ຈະ​ຂຶ້ນ​ເຮືອ​ທ່ອງ​ທ່ຽວ ພ້ອມໆ​ກັບ​ມາດ​ຕະ­ການ​ດັ່ງ­ກ່າວ ຄະ­ນະ​ຄຸ້ມ​ຄອງ​ອ່າວ​ຮ່າ​ລອງ ກໍ​ໄດ້​ສ້າງ­ຕັ້ງ​ຄະ­ນະ​ກວດ­ກາ​ລະ­ຫວ່າງ​ຂະ­ແໜງ­ການ ເພື່ອ​ຕິດ­ຕາມ​ກວດ­ກາ​ການ​ປະ­ຕິ­ບັດ​ມາດ​ຕະ­ການ​ດັ່ງ­ກ່າວ.

    ທີ່ ສປ ຈີນ: ຂ່າວ​ຕ່າງ­ປະ­ເທດ​ໃນ​ເດືອນ​ຕຸ­ລາ​ປີ 2014 ໃຫ້​ຮູ້​ວ່າ: ສານ​ສູງ ສປ ຈີນ ໄດ້​ສະ­ເໜີ​ໃຫ້​ຫ້ອງ­ການ​ຄຸ້ມ​ຄອງ​ລະ­ບຽບ​ວິ­ໄນ​ຂອງ​ສານ​ທ້ອງ­ຖິ່ນ​ໃນ​ທົ່ວ​ປະ­ເທດ ເຮັດ​ບົດ­ບາດ​ຕິດ­ຕາມ​ກວດ­ກາ ເພື່ອ​ບໍ່​ໃຫ້​ພະ­ນັກ­ງານ​ສານ​ຮັບ​ເງິນ​ເປັນ​ຄ່າ​ຕອບ​ແທນ​ໃນ​ຖາ­ນະ​ເປັນ 6 ຕົວ​ແທນ​ວິ່ງ​ເຕັ້ນ​ພົວ­ພັນ​ກັບ​ສານ​ໃຫ້​ຜູ້​ທີ່​ມີ​ຄະ­ດີ ສານ​ສູງ​ໄດ້​ໃຫ້​ຮູ້​ວ່າ ພະ­ນັກ­ງານ​ໃນ​ຂົງ­ເຂດ​ຍຸ­ຕິ​ທຳ​ຈຳ­ນວນ​ໜຶ່ງ ໄດ້​ສວຍ­ໂອ­ກາດ​ນຳ​ໃຊ້​ຂະ​ບວນ​ການ​ຂອງ​ສານ​ເປັນ​ທຸ­ລະ​ກິດ​ຊອກ​ຫາ​ຜົນ​ປະ­ໂຫຍດ​ສ່ວນ​ຕົວ ໂດຍ​ຮຽກ­ຮ້ອງ​ເງິນ​ຄ່າ​ແລ່ນ​ເອ­ກະ­ສານ​ໃຫ້​ຄູ່​ກໍ­ລະ­ນີ ໃນ​ການ​ຟ້ອງ​ຮ້ອງ ດັ່ງ­ນັ້ນ ຫ້ອງ­ການ​ຄຸ້ມ​ຄອງ​ລະ­ບຽບ​ວິ­ໄນ​ຂອງ​ສານ​ຂັ້ນ​ທ້ອງ­ຖິ່ນ ຕ້ອງ​ຕິດ­ຕາມ​ກວດ­ກາ​ພະ­ນັກ­ງານ​ກົດ­ໝາຍ​ຢ່າງ​ເຄັ່ງ​ຄັດ ບໍ່​ໃຫ້​ພວກ​ເຂົາ­ເຈົ້າ​ເຮັດ​ບົດ­ບາດ​ເປັນ​ຂົວ​ຕໍ່​ລະ­ຫວ່າງ​ຄູ່​ກໍ­ລະ­ນີ​ກັບ​ສານ ເພື່ອ​ເອົາ​ເງິນ​ເຂົ້າ­ຖົງ.

    ທີ່ ມາ​ເລ​ເຊຍ: ມີ​ຂ່າວ​ອອກ​ມາ​ຈາກ​ມາ​ເລ​ເຊຍ​ໃນ​ຕົ້ນ​ເດືອນ​ມິ­ຖຸ­ນາ ປີ 2018 ກ່ຽວ​ກັບ​ແຜນ​ປະ­ຕິ​ຮູບ​ການ​ສຶກ​ສາ​ຂອງ​ປະ­ເທດ​ວ່າ ຫາງ​ສຽງ​ສ່ວນ​ໃຫຍ່​ຂອງ​ພໍ່​ແມ່​ຜູ້​ປົກ­ຄອງ​ນັກ­ຮຽນ ແມ່ນ​ຢາກ​ໃຫ້​ທາງ​ການ​ໃຊ້​ແນວ­ທາງ​ການ​ສຶກ​ສາ​ແບບ​ຊອກ​ຄົ້ນ​ຫາ​ຄວາມ​ຮູ້ ທີ່​ບໍ່​ຕ້ອງ​ອາ­ໄສ​ປຶ້ມ​ຕຳ­ລາ​ເປັນ­ຕົ້ນ​ຕໍ ຊຶ່ງ​ເປັນ​ລະ­ບົບ​ການ​ຮຽນ​ການ​ສອນ​ໃນ​ບັນ­ດາ​ປະ­ເທດ​ທີ່​ພັດ­ທະ­ນາ​ແລ້ວ ການ​ຮຽນ​ການ​ສອນ​ແບບ​ທີ່​ວ່າ​ນັ້ນ ເນັ້ນ​ການ​ຄົ້ນ­ຄວ້າ​ເປັນ​ກົກ ແທນ​ການ​ທ່ອງ​ຈຳ​ຕົວ​ເລກ ຂໍ້​ມູນ​ທີ່​ຈື່​ຍາກ ທີ່​ມີ​ຫາງ​ສຽງ​ແນວ​ນີ້​ອອກ​ມາ ກໍ​ເພາະ­ວ່າ​ຜູ້​ປົກ­ຄອງ​ເດັກ​ບໍ່​ຕ້ອງ­ການ​ໃຫ້​ພວກ​ລູກ​ຫຼານ​ຂອງ​ຕົນ​ແບກ​ປຶ້ມ​ຈຳ­ນວນ​ຫຼວງ­ຫຼາຍ ຈົນ​ຫຼັງ​ຂົດ​ຫຼັງ​ໂຂ​ໄປ​ໂຮງ­ຮຽນ​ທຸກໆ​ມື້ ໂດຍ​ສະ­ເພາະ​ແມ່ນ​ນັກ­ຮຽນ​ຊັ້ນ​ປະ­ຖົມ ຂ່າວ​ບອກ​ວ່າ ທາງ​ກະ­ຊວງ​ສຶກ​ສາ​ທິ​ການ​ມາ​ເລ​ເຊຍ ກຳ­ລັງ​ສຶກ​ສາ​ທາງ​ອອກ​ກ່ຽວ​ກັບ​ບັນ­ຫາ​ນີ້​ແລ້ວ.

ຂ່າວທີ່ກ່ຽວຂ້ອງ