ໂຮງຮຽນ​ຫຼາຍ​ແຫ່ງ​ໃນ​ອິນ​ໂດ​ເນ​ເຊຍ ສືບ​ຕໍ່​ປິດ​ການ​ຮຽນ​ການ​ສອນ ຍ້ອນ​ຝຸ່ນ​ຄັວນຈາກ​ໄຟ​ໄໝ້​ປ່າ

1.010 17 ຕ.ລ. 2019 ຂ່າວຕ່າງປະເທດ
ໂຮງຮຽນ​ຫຼາຍ​ແຫ່ງ​ໃນ​ອິນ​ໂດ​ເນ​ເຊຍ ສືບ​ຕໍ່​ປິດ​ການ​ຮຽນ​ການ​ສອນ ຍ້ອນ​ຝຸ່ນ​ຄັວນຈາກ​ໄຟ​ໄໝ້​ປ່າ

    ວັນ​ທີ 15 ຕຸລາ​ນີ້ ເຈົ້າ​ໜ້າທີ່​ອິນ​ໂດ​ເນ​ເຊຍ ໄດ້​ແຈ້ງ​ເຕືອນ​ໄປ​ຍັງ​ປະຊາຊົນ​ຂອງ​ປະເທດ​ນີ້ ກ່ຽວ​ກັບ​ສະພາບ​ຝຸ່ນ​ຄວັນ​ທີ່​ນັບ​ມື້​ນັບ​ໜາ​ຂຶ້ນ ຍ້ອນ​ເກີດ​ຈາກ​ໄຟ​ໄໝ້​ປ່າ ທ່າມກາງ​ທີ່​ບາງ​ທ້ອງຖິ່ນ​ໄດ້​ຕົກລົງ​ໃຫ້​ປິດ​ການ​ຮຽນ​ການ​ສອນ ຍ້ອນ​ຄຸນ​ນະ​ພາບ​ອາກາດ​ບໍ່​ດີ. ອົງການ​ພະຍາກອນ​ອາກາດ​ຂອງ​ອິນ​ໂດ​ເນ​ເຊຍ ໃຫ້​ຮູ້​ວ່າ ຈຸດ​ຕ່າງໆ​ທີ່​ມີ​ຄວາມ​ສ່ຽງ​ເກີດ​ໄຟ​ໄໝ້​ປ່າ ຢູ່​ໃນ​ເຂດ​ທີ່​ຂຶ້ນ​ກັບ​ເກາະ​ສຸ​ມາ​ຕຣາ ແລະ ບໍ​ນຽວ ພວມ​ສືບຕໍ່​ເພີ່ມ​ສູງ​ຂຶ້ນ ເຖິງ​ວ່າ​ໄດ້​ມີ​ຝົນຕົກ​ລົງ​ມາ​ແດ່​ແລ້ວ​ກໍ​ຕາມ.

    ປັດຈຸບັນ​ນີ້ ຢູ່​ໃນ 6 ແຂວງ​ຂອງ​ອິນ​ໂດ​ເນ​ເຊຍ ລວມ​ແລ້ວ​ມີ 1.547 ຈຸດ ທີ່​ມີ​ຄວາມ​ສ່ຽງ​ສູງ​ທີ່​ຈະ​ເກີດ​ໄຟ​ໄໝ້​ປ່າ ແລະ ເຈົ້າ​ໜ້າທີ່​ອິນ​ໂດ​ເນ​ເຊຍ ໄດ້​ແຈ້ງ​ເຕືອນ​ວ່າ ສະພາບ​ຝຸ່ນ​ຄວັນ ອາດ​ຈະ​ລາມ ກວ້າງ​ອອກ​ໄປ​ຍັງ​ແຂວງ​ອື່ນໆ​ອີກ ຍ້ອນ​ລົມ​ພັດ​ເອົາ​ຝຸ່ນ​ຄວັນ​ໄປ​ໄກ.

    ໃນ​ຂະນະ​ດຽວ​ກັນ ສຳນັກ​ຂ່າວສານ​ແຫ່ງ​ຊາດ​ລີ​ບັງ (NNA) ລາຍ​ງານ​ເມື່ອ​ວັນ​ທີ 15 ຕຸລາ​ນີ້​ວ່າ  ເນື້ອທີ່​ປ່າໄມ້​ອັນ​ກວ້າງ​ໃຫຍ່​ຢູ່​ໃນ​ປະເທດ​ນີ້ ໄດ້​ຖືກ​ທຳລາຍ ຫຼັງ​ຈາກ​ທີ່​ເກີດ​ໄຟ​ໄໝ້​ປ່າ​ກວ່າ 103 ກໍລະນີ ຢູ່​ໃນ​ຕົວ​ເມືອງ ແລະ ບ້ານ​ຫຼາຍ​ແຫ່ງ ໃນ​ລີ​ບັງ ນັບ​ແຕ່​ວັນ​ທີ 14 ຕຸລາ​ເປັນຕົ້ນ​ມາ. ສາເຫດ​ຕົ້ນຕໍ ທີ່​ພາໃຫ້​ເກີດ​ໄຟ​ໄໝ້​ປ່າ​ດັ່ງກ່າວ ແມ່ນ​ເປັນ​ຍ້ອນ​ອຸ່ນ​ຫະ​ພູມ​ເພີ່ມ​ຂຶ້ນ​ຢ່າງ​ກະທັນຫັນ ເຮັດ​ໃຫ້​ໄຟ​ລຸກ​ໄໝ້ ແລະ ລາມ​ໄປ​ສູ່​ເຮືອນ​ຫຼາຍ​ຫຼັງ​ຢ່າງ​ໄວວາ ຢູ່​ໃນ​ເຂດ​ຕ່າງໆ.

    ເຫດການ​ໄຟ​ໄໝ້​​ປ່າ​ຢູ່​ໃນ​ລີ​ບັງ​ໃນ​ເທື່ອ​ນີ້ ນັບ​ວ່າ​ຮ້າຍ​ແຮງ​ທີ່​ສຸດ​ໃນ​ຮອບ​ຫຼາຍ​ສິບ​ປີຜ່ານມາ ໃນ​ຂະນະ​ທີ່​ໃນ​ຫຼາຍ​ປີຜ່ານມາ ລີ​ບັງ​ບໍ່​ຄ່ອຍ​ປະ​ເຊີນ​ກັບ​ໄພພິບັດ​ທາງ​ທຳ​ມະ​ຊາດ ທີ່​ຮ້າຍ​ແຮງ​ຄື​ແນວ​ນີ້.

ຂ່າວທີ່ກ່ຽວຂ້ອງ