ໂຕໂຢຕ້າ ຈັດສະແດງດົນຕີ ນຳລາຍໄດ້ຊ່ວຍເຫຼືອຜູ້ປະສົບໄພນ້ຳຖ້ວມ

690 21 ຕ.ລ. 2019 ຂ່າວໜ້າ​ໜຶ່ງ
ໂຕໂຢຕ້າ ຈັດສະແດງດົນຕີ ນຳລາຍໄດ້ຊ່ວຍເຫຼືອຜູ້ປະສົບໄພນ້ຳຖ້ວມ

    ບໍ­ລິ­ສັດ ໂຕ​ໂຢ​ຕ້າ​ລາວ ຈຳ­ກັດ ຈັດ​ງານ​ສະ­ແດງ​ດົນ­ຕີ​ການ​ກຸ­ສົນ “ໂຕ​ໂຢ​ຕ້າ ຄລາ​ສ​ສິກ ຄັ້ງ​ທີ 30” ເຊິ່ງ​ບັນ­ເລງ​ໂດຍ​ວົງ ລອນ​ດອນ ແຊມ​ເບີ ອໍ​ເຄ​ສ​ຕຣ້າ ວົງ​ດົນ­ຕີ​ທີ່​ເກົ່າ​ແກ່​ທີ່​ສຸດ​ຈາກ​ປະ­ເທດ​ອັງ­ກິດ ແລະ ມີ​ຄວາມ​ສຳ­ຄັນ​ໃນ​ວົງ​ການ​ດົນ­ຕີ​ຄລາ​ສ​ສິກ ອຳ­ນວຍ​ເພງ​ໂດຍ​ທ່ານ Christopher Warren-Green.

    ງານ​ສະ­ແດງ​ດົນ­ຕີ​ຄັ້ງ​ນີ້ ຈັດ​ຂຶ້ນ​ວັນ​ທີ 18 ຕຸ­ລາ 2019 ຢູ່​ຫໍ​ວັດ­ທະ­ນະ­ທຳ​ແຫ່ງ​ຊາດ ໂດຍ​ມີ​ທ່ານ ສົມ​ດີ ດວງ​ດີ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ການ​ເງິນ ທ່ານ ຄຳ​ແພງ ໄຊ​ສົມ​ແພງ ລັດ­ຖະ­ມົນ­ຕີ​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ ທ່ານ ບົວ​ເງິນ ຊາ​ພູ​ວົງ ຮອງ​ລັດ­ຖະ­ມົນ­ຕີ​ກະ­ຊວງ​ຖະ­ແຫຼງ​ຂ່າວ ວັດ­ທະ­ນະ­ທຳ ແລະ ທ່ອງ​ທ່ຽວ ພ້ອມ​ດ້ວຍ​ແຂກ​ຖືກ​ເຊີນ ແລະ ຜູ້​ທີ່​ສົນ­ໃຈ​ເຂົ້າ​ຮ່ວມ.

    ໂຄງ­ການ​ໂຕ​ໂຢ​ຕ້າ​ຄລາ​ສ​ສິກ ສ້າງ­ຕັ້ງ​ປີ 1990 ເຊິ່ງ​ປີ​ນີ້​ເປັນ​ຄັ້ງ​ທີ 30 ຈະ​ສະ­ແດງ​ຢູ່​ລາວ ໄທ ບຣູ​ໄນ ມາ​ເລ​ເຊຍ ກຳ­ປູ­ເຈຍ ແລະ ຫວຽດ­ນາມ ຕາມ​ລຳ­ດັບ ສຳ­ລັບ​ຢູ່​ລາວ​ນອກ­ຈາກ​ການ​ບັນ­ເລງ​ດົນ­ຕີ​ພາຍ​ໃນ​ງານ​ແລ້ວ ວົງ​ລອນ​ດອນ ແຊມ​ເບີ ອໍ​ເຄ​ສ​ຕຣ້າ ຍັງ​ໄດ້​ໄປ​ເຝິກ​ສອນ​ການ​ຫຼິ້ນ​ດົນ­ຕີ​ຄລາ​ສ​ສິກ ໃຫ້​ນັກ­ຮຽນ​ໂຮງ­ຮຽນ​ສິ­ລະ​ປະ​ແຫ່ງ​ຊາດ ຕື່ມ​ອີກ.

    ໂອ­ກາດ​ນີ້ ບໍ­ລິ­ສັດ ໂຕ​ໂຢ​ຕ້າ​ລາວ ຈຳ­ກັດ ກໍ​ໄດ້​ນຳ​ລາຍ​ໄດ້​ທັງ​ໝົດ​ຈາກ​ການ​ຂາຍ​ບັດ​ເຂົ້າ​ຊົມ ພ້ອມ​ທຶນ​ສົມ­ທົບ​ຂອງ​ບໍ­ລິ­ສັດ​ໂຕ​ໂຢ​ຕ້າ​ລາວ​ຈຳ­ກັດ ລວມ 200 ລ້ານ ມອບ​ໃຫ້​ລັດ­ຖະ­ບານ​ລາວ ເພື່ອ​ນຳ­ໄປ​ຊ່ວຍ­ເຫຼືອ​ບັນ­ເທົາ​ທຸກ​ໃຫ້​ຜູ້​ໄດ້​ຮັບ​ຜົນ​ກະ­ທົບ​ຈາກ​ໄພ​ນ້ຳ​ຖ້ວມ​ຢູ່​ພາກ​ກາງ ແລະ ພາກ​ໃຕ້ ເຊິ່ງ​ມອບ​ໂດຍ​ທ່ານ Masaaki Kawabata ຜູ້­ອຳ­ນວຍ­ການ​ບໍ­ລິ­ສັດ​ໂຕ​ໂຢ​ຕ້າ​ລາວ​ຈຳ­ກັດ ແລະ ຮັບ​ໂດຍ​ທ່ານ ສົມ​ດີ ດວງ​ດີ.

ຂ່າວທີ່ກ່ຽວຂ້ອງ