ຕັດຮອນງ່າໄມ້ ເພື່ອຮັກສາຄວາມຈົບງາມຂອງຕົວເມືອງ

552 22 ຕ.ລ. 2019 ຂ່າວໜ້າ​ໜຶ່ງ
ຕັດຮອນງ່າໄມ້ ເພື່ອຮັກສາຄວາມຈົບງາມຂອງຕົວເມືອງ

    ຫ້ອງ­ການ​ຄຸ້ມ​ຄອງ ແລະ ບໍ­ລິ­ການ​ຕົວ​ເມືອງ​ວຽງ​ຈັນ (ຄບຕ) ໄດ້​ຕັ້ງ­ໜ້າ​ປະ­ຕິ­ບັດ​ຕາມ​ພາ­ລະ​ບົດ­ບາດ​ຂອງ​ຕົນ​ເອງ​ຢ່າງ​ເຕັມ​ສ່ວນ ໃນ​ການ​ຮັກ­ສາ​ຄວາມ​ເປັນ​ລະ­ບຽບ​ຮຽບ​ຮ້ອຍ ສ້າງ​ຄວາມ​ຈົບ­ງາມ​ໃຫ້​ນະ­ຄອນ­ຫຼວງ​ວຽງ​ຈັນ (ນວ) ທັງ​ເປັນ​ການ​ສ້າງ​ຂະ​ບວນ​ການ​ຕ້ອນ­ຮັບ​ວັນ​ສຳ­ຄັນ​ຕ່າງໆ​ຂອງ​ຊາດ ກໍ​ຄື ຂອງ ນວ ວັນ​ທີ 19 ຕຸ­ລາ 2019 ຫ້ອງ­ການ ຄບຕ ໄດ້​ສືບ­ຕໍ່​ສ້າງ​ຂະ​ບວນ​ອອກ­ແຮງ​ງານ​ລວມ​ຕາມ​ສາຍ​ທາງ ໂດຍ​ເນັ້ນ​ໃສ່​ຕັດ​ຮອນ​ງ່າ­ໄມ້ ກິ່ງ​ໄມ້ ທີ່​ປົກ​ຄຸມ​ເຂດ​ສະ­ຫງວນ​ຂອງ​ທາງ ທັງ​ປິດ​ບັງ​ປ້າຍ​ຈະ­ລາ­ຈອນ ແລະ ໄຟ​ອຳ­ນາດ​ຢູ່​ຖະ­ໜົນ ສຸ​ພາ­ນຸ​ວົງ ແລະ ທາງ​ຮ່ອມ​ຕ່າງໆ .

    ທ່ານ ບຸນ​ຈັນ ແກ້ວ​ສີ​ທຳ​ມະ ຫົວ­ໜ້າ​ຫ້ອງ­ການ ຄບຕ ໄດ້​ກ່າວ​ວ່າ: ການ​ສ້າງ​ຂະ​ບວນ​ການ​ອອກ­ແຮງ​ງານ​ຄັ້ງ​ນີ້ ແນ­ໃສ່​ສ້າງ​ຄວາມ​ເປັນ​ລະ­ບຽບ​ຮຽບ​ຮ້ອຍ ແລະ ຄວາມ​ສະ­ອາດ​ຈົບ­ງາມ​ໃຫ້​ຕົວ​ເມືອງ ທັງ​ເປັນ​ການ​ປ້ອງ​ກັນ​ອຸ­ບັດ­ເຫດ​ທີ່​ອາດ​ຈະ​ເກີດ​ຂຶ້ນ​ໃນ​ເວ­ລາ​ທີ່​ມີ​ພາ­ຍຸ​ຝົນ­ຕົກ ເພາະ​ຕົ້ນ­ໄມ້​ບາງ​ຕົ້ນ​ກໍ​ເປັນ­ຕົ້ນ​ໄມ້​ທີ່​ເກົ່າ​ແກ່ ເຊິ່ງ​ເຮັດ​ໃຫ້​ມີ​ມອດ​ແມງ​ຕ້ອງ​ໄດ້​ຕັດ​ຮອນ​ອອກ ທັງ​ເປັນ​ການ​ສືບ­ຕໍ່​ສ້າງ​ຂະ​ບວນ​ການ​ຕ້ອນ­ຮັບ​ກອງ​ປະ­ຊຸມ​ໃຫຍ່​ຄະ­ນະ​ພັກ​ຮາກ​ຖານ ຄບຕ ແລະ ກອງ​ປະ­ຊຸມ​ໃຫຍ່​ອົງ­ຄະ​ນະ​ພັກ ນວ ກໍ​ຄື ກອງ​ປະ­ຊຸມ​ໃຫຍ່​ຂັ້ນ​ສູນ​ກາງ ນອກ­ຈາກ​ອອກ­ແຮງ​ງານ​ຕັດ​ຮອນ​ງ່າ­ໄມ້ ແລະ ກິ່ງ​ໄມ້​ຄັ້ງ​ນີ້​ແລ້ວ ຄບຕ ຍັງ​ໄດ້​ສືບ­ຕໍ່​ຕັດ​ງ່າ­ໄມ້​ຢູ່​ຕາມ​ເສັ້ນ­ທາງ​ຫຼັກ​ໃນ 21 ເສັ້ນ­ທາງ​ຢູ່​ຕົວ​ເມືອງ ນວ ໄປ​ຄຽງ​ຄູ່​ກັບ​ການ​ອະ­ນາ­ໄມ​ປັດ­ກວາດ ຕັດ​ຫຍ້າ ແລະ​ອື່ນໆ ທັງ​ໝົດ​ນັ້ນ​ເພື່ອ​ສ້າງ​ຄວາມ​ສະ­ອາດ​ຈົບ­ງາມ​ຕ້ອນ­ຮັບ​ແຂກ​ທັງ​ພາຍ​ໃນ ແລະ ຕ່າງ­ປະ­ເທດ​ທີ່​ມາ​ຢ້ຽມ­ຢາມ ແລະ ທ່ອງ​ທ່ຽວ ນວ.

ຂ່າວທີ່ກ່ຽວຂ້ອງ