ປະເທດລຸ່ມແມ່ນ້ຳຂອງ ຮ່ວມມືຄົ້ນຄວ້າ-ພັດທະນາວຽກງານສາທາລະນະສຸກ

598 22 ຕ.ລ. 2019 ຂ່າວໜ້າ​ໜຶ່ງ
ປະເທດລຸ່ມແມ່ນ້ຳຂອງ ຮ່ວມມືຄົ້ນຄວ້າ-ພັດທະນາວຽກງານສາທາລະນະສຸກ

    ກອງ​ປະ­ຊຸມ​ວິ­ຊາ​ການ​ດ້ານ​ສາ­ທາ­ລະ­ນະ​ສຸກ ຂອງ​ບັນ­ດາ​ປະ­ເທດ​ລຸ່ມ​ແມ່­ນ້ຳ​ຂອງ ຫົວ­ຂໍ້: “ການ​ປັບ­ປຸງ​ຄວາມ​ເທົ່າ​ທຽມ​ກັນ ໃນ​ການ​ເຂົ້າ​ເຖິງ​ການ​ບໍ­ລິ­ການ​ດ້ານ​ການ​ຮັກ­ສາ​ສຸ­ຂະ­ພາບ​ຂອງ​ບັນ­ດາ​ປະ­ເທດ​ລຸ່ມ​ແມ່­ນ້ຳ​ຂອງ” ຈັດ​ຂຶ້ນ​ວັນ​ທີ 17-19 ຕຸ­ລາ 2019 ຢູ່​ນະ­ຄອນ­ຫຼວງ​ວຽງ​ຈັນ (ນວ) ໂດຍ​ມີ​ທ່ານ ພູ­ທອນ ວັງ​ກອນ​ວິ­ໄລ ອະ­ທິ­ການ​ບໍ­ດີ ມະ­ຫາ­ວິ­ທະ­ຍາ­ໄລ ວິ­ທະ­ຍາ­ສາດ ສຸ­ຂະ­ພາບ (ມວ​ສ) ທ່ານ​ນາງ ວັນ​ພອນ ສີ​ຈະ­ເລີນ ຄະ­ນະ­ບໍ­ດີ​ຄະ­ນະ​ສາ­ທາ­ລະ­ນະ​ສຸກ​ສາດ ພ້ອມ​ດ້ວຍ​ບັນ­ດາ​ອະ­ທິ­ການ​ບໍ­ດີ ຄະ­ນະ­ບໍ­ດີ​ສາ­ທາ­ລະ­ນະ​ສຸກ​ຂອງ​ບັນ­ດາ​ປະ­ເທດ​ລຸ່ມ​ແມ່​ນຳ​ຂອງ ແລະ ພາກ­ສ່ວນ​ກ່ຽວ­ຂ້ອງ​ເຂົ້າ​ຮ່ວມ.

    ທ່ານ​ນາງ ວັນ​ພອນ ສີ​ຈະ­ເລີນ ກ່າວ​ວ່າ: ກອງ​ປະ­ຊຸມ​ຄັ້ງ​ນີ້ ແມ່ນ​ສືບ­ຕໍ່​ຈາກ​ກອງ​ປະ­ຊຸມ​ທີ່​ເຄີຍ​ຈັດ​ຜ່ານ​ມາ ຕາມ​ວິ­ໄສ​ທັດ​ຂອງ​ສຸ­ຂະ­ພາບ ຮອດ 2030 ໂດຍ​ເນັ້ນ​ໃສ່​ການ​ເຂົ້າ​ເຖິງ​ການ​ບໍ­ລິ­ການ​ແບບ​ທົ່ວ​ເຖິງ ເຊິ່ງ​ມີ​ການ​ພົວ ພັນ​ເຖິງ​ເປົ້າ​ໝາຍ​ຍຸດ​ທະ​ສາດ​ຂອງ​ການ​ພັດ­ທະ­ນາ​ເພື່ອ​ຄວາມ​ຍືນ​ຍົງ (SDG3) ເຊິ່ງ​ພະ­ຍາ­ຍາມ​ຈະ​ບັນ­ລຸ​ໃຫ້​ໄດ້​ໃນ​ປີ 2030 ນອກ​ນີ້ ຍັງ​ມີ​ການ​ບັນ­ຍາຍ​ພິ­ເສດ ໃນ​ຫົວ­ຂໍ້: “ການ​ຮ່ວມ​ມື ແລະ ມີ​ສ່ວນ​ຮ່ວມ​ໃນ​ການ​ເຮັດ​ການ​ຄົ້ນ­ຄວ້າ ເພື່ອ​ພັດ­ທະ­ນາ ແລະ ການ​ປັບ­ປຸງ​ຄວາມ​ເທົ່າ​ທຽມ​ດ້ານ​ການ​ຮັກ­ສາ​ສຸ­ຂະ­ພາບ​ໃນ​ບັນ­ດາ​ປະ­ເທດ​ລຸ່ມ​ແມ່­ນ້ຳ​ຂອງ”.

    ທ່ານ ພູ­ທອນ ວັງ​ກອນ​ວິ­ໄລ ກ່າວ​ວ່າ: ການ​ຈັດ​ກອງ​ປະ­ຊຸມ​ຄັ້ງ​ນີ້ ມີ​ຄວາມ​ໝາຍ​ສຳ­ຄັນ​ຫຼາຍ ເປັນ​ການ​ເປີດ​ໂອ­ກາດ​ທີ່​ສຳ­ຄັນ​ສຳ­ລັບ​ຄູ່​ຮ່ວມ​ງານ​ຈາກ​ທຸກ​ພາກ­ສ່ວນ ໂດຍ​ສະ­ເພາະ ບັນ­ດາ​ທ່ານ​ທີ່​ເຮັດ​ວຽກ​ໃນ​ຂົງ­ເຂດ​ກ່ຽວ​ກັບ​ສຸ ຂະ​ພາບ ເປັນ​ການ​ແລກ­ປ່ຽນ​ປະ­ສົບ​ການ ຖອດ​ຖອນ​ບົດ­ຮຽນ​ຮ່ວມ​ກັນ ເພື່ອ​ປັບ­ປຸງ​ການ​ຮັກ­ສາ​ສຸ­ຂະ­ພາບ ແລະ ການ​ພັດ­ທະ­ນາ​ວຽກ​ງານ​ສາ­ທາ­ລະ­ນະ​ສຸກ​ໃນ​ຂົງ­ເຂດ​ພາກ​ພື້ນ ໂດຍ​ສະ­ເພາະ ຢູ່ ສປປ ລາວ ຕົນ​ຫວັງ​ວ່າ ກອງ​ປະ­ຊຸມ​ຄັ້ງ​ນີ້​ຈະ​ປະ­ກອບ­ສ່ວນ​ໃນ​ການ​ປັບ­ປຸງ​ຄວາມ​ເທົ່າ​ທຽມ ດ້ານ​ການ​ຮັກ­ສາ​ສຸ­ຂະ­ພາບ​ຂອງ​ບັນ­ດາ​ປະ­ເທດ​ຂົງ­ເຂດ​ລຸ່ມ​ແມ່­ນ້ຳ​ຂອງ ທີ່​ຈະ​ໄດ້​ຮັບ​ຮູ້​ປະ­ສົບ​ການ ມີ​ຄວາມ​ເຂົ້າ­ໃຈ​ເລິກ­ເຊິ່ງ​ໃນ​ຫຼາຍ​ຫົວ­ຂໍ້ ເພື່ອ​ປັບ­ປຸງ​ພັດ­ທະ­ນາ​ຍຸດ​ທະ​ສາດ​ດ້ານ​ການ​ຮັກ­ສາ​ສຸ­ຂະ­ພາບ.

ຂ່າວທີ່ກ່ຽວຂ້ອງ