ສອງບໍລິສັດ ຮ່ວມມືກັນດຳເນີນທຸລະກິດຢູ່ລາວ

1.187 22 ຕ.ລ. 2019 ຂ່າວໜ້າ​ໜຶ່ງ
ສອງບໍລິສັດ ຮ່ວມມືກັນດຳເນີນທຸລະກິດຢູ່ລາວ

    ວັນ​ທີ 18 ຕຸ­ລາ 2019 ທີ່​ໂຮງ­ແຮມ​ຄຣາວ​ພາ​ຊາ ນະ­ຄອນ­ຫຼວງ​ວຽງ​ຈັນ ບໍ­ລິ­ສັດ Rajah &Tann ລາວ ຮ່ວມ​ກັບ​ກຸ່ມ ບໍ­ລິ­ສັດ ພົງ​ສະ­ຫວັນ ຈຳ­ກັດ ໄດ້​ຈັດ​ງານ​ສະ­ເຫຼີມ­ສະ­ຫຼອງ​ສາຍ​ພົວ­ພັນ​ການ​ຮ່ວມ​ມື ເພື່ອ​ຂະ­ຫຍາຍ​ການ​ດຳ­ເນີນ​ທຸ­ລະ​ກິດ​ຢູ່​ລາວ ມີ​ທ່ານ ອາ​ລຸນ​ແກ້ວ ກິດ​ຕິ​ຄຸນ ລັດ­ຖະ­ມົນ­ຕີ​ປະ­ຈຳ​ສຳ­ນັກ­ງານ​ນາ­ຍົກ­ລັດ­ຖະ­ມົນ­ຕີ ທ່ານ ອັອດ ພົງ​ສະ­ຫວັນ ທີ່​ປຶກ­ສາ​ກິດ​ຕິ​ມະ​ສັກ ທັງ​ເປັນ​ຜູ້​ກໍ່​ຕັ້ງ​ທະ­ນາ­ຄານ​ພົງ​ສະ­ຫວັນ  ທ່ານ Lee EngBeng ປະ­ທານ​ບໍ­ລິ­ສັດ Rajah &Tann ອາ­ຊີ ຕະ­ຫຼອດ​ຮອດ​ຄະ­ນະ​ຜູ້­ອຳ­ນວຍ­ການ​ຂອງ​ສອງ​ບໍ­ລິ­ສັດ  ແລະ ແຂກ​ຖືກ​ເຊີນ​ເຂົ້າ​ຮ່ວມ.

    ທ່ານ Lee EngBeng ກ່າວ​ວ່າ: ຮູ້­ສຶກ​ເປັນ​ກຽດ​ຢ່າງ​ຍິ່ງ​ທີ່​ໄດ້​ຮັບ​ການ​ຮ່ວມ​ມື ກັບ​ກຸ່ມ​ບໍ­ລິ­ສັດ ພົງ​ສະ­ຫວັນ ຈຳ­ກັດ ເຊິ່ງ​ການ​ຮ່ວມ​ມື​ດັ່ງ­ກ່າວ​ເຮັດ​ໃຫ້­ການ​ເຊື່ອມ​ໂຍງ​ດ້ານ​ທຸ­ລະ​ກິດ ແລະ ການ​ຂະ­ຫຍາຍ​ຖານ​ລູກ​ຄ້າ​ຂອງ​ບໍ­ລິ­ສັດ Rajah &Tann ອາ­ຊີ​ໃນ​ຂົງ­ເຂດ​ພາກ​ພື້ນ​ອາ­ຊີ​ຕາ­ເວັນ​ອອກ­ສຽງ​ໃຕ້​ໃຫ້​ກວ້າງ­ຂວາງ​ຂຶ້ນ​ກວ່າ​ເກົ່າ ແລະ ຫວັງ​ວ່າ​ຈະ​ໄດ້​ຮຽນ​ຮູ້ ທັງ​ໄດ້​ຮັບ​ຜົນ​ປະ­ໂຫຍດ​ຄວາມ​ຊ່ຽວ­ຊານ​ດ້ານ​ອຸດ­ສາ­ຫະ­ກຳ ປະ­ສົບ​ການ ຄວາມ​ສາ­ມາດ​ທີ່​ເຂັ້ມ­ແຂງ​ຂອງ​ກຸ່ມ ບໍ­ລິ­ສັດ ພົງ​ສະ­ຫວັນ.

    ທ່ານ Lee Hock Chye ອຳ­ນວຍ​ການ​ໃຫຍ່​ບໍ­ລິ­ສັດ Rajah &Tann ລາວ  ກ່າວ​ວ່າ: ລາວ ແມ່ນ​ໜຶ່ງ​ໃນ​ບັນ­ດາ​ປະ­ເທດ​ທີ່​ມີ​ເສດ­ຖະ­ກິດ​ຂະ­ຫຍາຍ​ໂຕ​ໄວ​ທີ່​ສຸດ ໃນ​ຂົງ­ເຂດ​ພາກ​ພື້ນ ພວກ​ເຮົາ​ມີ​ຄວາມ​ຍິນ​ດີ​ເປັນ​ຢ່າງ​ຍິ່ງ​ທີ່​ໄດ້​ເຮັດ​ວຽກ​ຮ່ວມ​ກັບ ກຸ່ມ​ບໍ­ລິ­ສັດ ພົງ​ສະ­ຫວັນ  ເພື່ອ​ພ້ອມ​ກັນ​ສະ­ໜອງ​ການ​ບໍ­ລິ­ການ​ໃຫ້​ລູກ​ຄ້າ ເວົ້າ​ສະ­ເພາະ​ຢູ່​ລາວ ເວົ້າ​ລວມ​ແມ່ນ​ໃນ​ຂົງ­ເຂດ​ພາກ​ພື້ນ ເຊິ່ງ​ການ​ຮ່ວມ​ມື​ຈະ​ຊ່ວຍ​ໃຫ້​ສາ­ມາດ​ອາ­ໄສ​ເຄືອ​ຄ່າຍ ແລະ ຄວາມ​ຊ່ຽວ­ຊານ​ທາງ​ດ້ານ​ການ​ດຳ­ເນີນ​ທຸ­ລະ​ກິດ​ທີ່​ເຂັ້ມ­ແຂງ ຂອງ​ກຸ່ມ​ບໍ­ລິ­ສັດ ພົງ​ສະ­ຫວັນ ພ້ອມ​ນັ້ນ ຍັງ​ເປັນ​ການ​ເປີດ​ໂອ­ກາດ​ໃຫ້​ບັນ­ດາ​ບໍ­ລິ­ສັດ​ຕ່າງໆ​ຢູ່​ໃນ​ກຸ່ມ​ບໍ­ລິ­ສັດ ພົງ​ສະ­ຫວັນ ສາ­ມາດ​ເຂົ້າ​ເຖິງ​ການ​ບໍ­ລິ­ການ​ທາງ​ດ້ານ​ກົດ­ໝາຍ​ທີ່​ມີ​ຄຸນ​ນະ​ພາບ​ຂອງ​ບໍ­ລິ­ສັດ Rajah &Tann ອາ­ຊີ.

    ທ່ານ ສົມ­ບູນ ພົງ​ສະ­ຫວັນ ປະ­ທານ​ຂາ​ຮຸ້ນ​ໃຫຍ່ ກຸ່ມ​ບໍ­ລິ­ສັດ ພົງ​ສະ­ຫວັນ ຈຳ­ກັດ ກ່າວ​ວ່າ: ກຸ່ມ​ບໍ­ລິ­ສັດ ພົງ​ສະ­ຫວັນ ເປັນ​ບໍ­ລິ­ສັດ​ທີ່​ສະ­ແຫວງ­ຫາ​ໂອ­ກາດ ແລະ ຄູ່​ຮ່ວມ​ງານ​ເພື່ອ​ຂະ­ຫຍາຍ​ທຸ­ລະ​ກິດ​ໃນ ລາວ ແລະ ສາ­ກົນ ພ້ອມ​ທັງ​ເຊື່ອ​ໝັ້ນ​ວ່າ ການ​ຮ່ວມ​ມື​ກັບ Rajah &Tann ເຊິ່ງ​ເປັນ​ເຄືອ​ຄ່າຍ​ບໍ­ລິ­ສັດ ກົດ­ໝາຍ​ທີ່​ໃຫຍ່​ທີ່​ສຸດ​ຂອງ​ອາ­ຊີ​ຕາ­ເວັນ​ອອກ­ສຽງ​ໃຕ້ ຈະ​ຊ່ວຍ​ໃຫ້​ພວກ​ເຮົາ​ສາ­ມາດ​ພັດ­ທະ­ນາ​ທຸ­ລະ​ກິດ​ໄດ້​ຮັບ​ໝາກ­ຜົນ​ຕາມ​ເປົ້າ​ໝາຍ ແລະ ກ້າວ​ກະ­ໂດດ​ຂຶ້ນ​ຢ່າງ​ແຂງ­ແຮງ​ໃນ​ອະ­ນາ­ຄົດ.

ຂ່າວທີ່ກ່ຽວຂ້ອງ