ເສດຖະກິດ​ຈີນ ຍັງ​ມີ​ຄວາມ​ເຕີບ​ໂຕ​ທີ່​ໝັ້ນຄົງ

826 23 ຕ.ລ. 2019 ຂ່າວຕ່າງປະເທດ
ເສດຖະກິດ​ຈີນ ຍັງ​ມີ​ຄວາມ​ເຕີບ​ໂຕ​ທີ່​ໝັ້ນຄົງ

    ທ່ານ ຢີ​ກາງ ຜູ້​ວ່າການ​ທະນາຄານ​ປະຊາຊົນ​ຈີນ ຫຼື​ທະນາຄານ​ກາງ (PBoC) ກ່າວ​ເມື່ອ​ວັນ​ທີ 19 ຕຸລາ​ທີ່​ຜ່ານ​ມາ​ວ່າ ຈີນ​ຮັກສາ​ຄວາມ​ເຕີບ​ໂຕ​ເສດຖະກິດ​ເອົາ​ໄວ້​ໄດ້​ຢ່າງ​ໝັ້ນຄົງ ໃນ​ປີ 2019 ດ້ວຍ​ດັດ​ສະ​ນີ​ຕ່າງໆ​ທີ່​ສຳຄັນ​ຂອງ​ເສດຖະກິດ ຕ່າງ​ກໍ​ນອນ​ຢູ່​ໃນ​ເຂດ​ທີ່​ສົມ​ເຫດ​ສົມ​ຜົນ ເຖິງ​ວ່າ​ເສດຖະກິດ​ຈີນ ທີ່​ມີ​ຂະໜາດ​ໃຫຍ່​ເປັນ​ດັບ​ສອງ​ຂອງ​ໂລກ ຍັງ​ຄົງ​ປະ​ເຊີນ​ກັບ “ລົມ​ພັດ​ຕີ​ກັບ” ຂະ​​​ໜາດ​ໃຫຍ່​ຈາກ​ພາຍ​ນອກ ຍ້ອນ​ທ່າ​ອ່ຽງ​ການ​ປົກ​ປ້ອງ​ການ​ຄ້າ ຢູ່​ໃນ​ຫຼາຍ​ພື້ນຖານ​ເສດຖະກິດ​ຂະໜາດ​ໃຫຍ່​ກໍ​ຕາມ.

    ທ່ານ ຢີ​ກາງ ກ່າວ​ຢູ່​ໃນ​ກອງ​ປະຊຸມ​ລະດັບ​ລັດຖະມົນຕີ ຂອງ​ຄະນະ​ກຳມະການ​ການ​ເງິນ ແລະ ​ເງິນຕາ​ສາກົນ (IMFC) ຊຶ່ງ​ເປັນ​ອົງການ​ວາງ​ແຜນ​ກຳນົດ​ນະໂຍບາຍ ຂອງ​ອົງການ​ກອງ​ທຶນ​ເງິນຕາ​ສາກົນ (IMF) ວ່າ​ຈີນ​ໄດ້​ບັນລຸ​ຄວາມ​ຄືບ​ໜ້າ​ຫຼາຍ ໃນ​ການ​ປັບ​ໂຄງ​ສ້າງ​ເສດຖະກິດ ຄວາມ​ຕ້ອງການ ແລະ ​ການ​ສະໜອງ ຢູ່​ໃນ​ລະດັບ​ທີ່​ກ້ຳ​ເກິ່ງ​ໂດຍ​ພື້ນຖານ ແລະ ​ຄວາມ​ເຕີບ​ໂຕ​ມີ​ຄວາມ​ໝັ້ນຄົງ​ຫຼາຍ​ຂຶ້ນ.

    ທ່ານ ຢີ​ກາງ ໃຫ້​ຮູ້​ວ່າ​ໃນ​ສາມ​ໄຕ​ມາດ​ຕົ້ນ​ປີ 2019 ຍອດ​ຜະລິດ​ຕະ​ພັນ​ພາຍ​ໃນ​ປະເທດ (GDP) ຂອງ​ຈີນ​ໄດ້​ເພີ່ມ​ຂຶ້ນ 6,2% ໂດຍ​ຜ່ານ​ນັ້ນ​ກໍ​ເປັນ​ການ​ປະກອບສ່ວນ​ໃຫ້​ແກ່​ຄວາມ​ເຕີບ​ໂຕ​ໃນ​ທົ່ວ​ໂລກ.

    ກ່ອນ​ໜ້າ​ນັ້ນ ເມື່ອ​ວັນ​ທີ 18 ຕຸລາ​ທີ່​ຜ່ານ​ມາ ອົງການ​ສະຖິຕິ​ແຫ່ງ​ຊາດ​ຈີນ ກໍ​ໄດ້​ປະກາດ​ຕົວ​ເລກ​ສະຖິຕິ​ໂດຍ​ໄດ້​ໃຫ້​ຮູ້​ວ່າ ໃນ 9 ເດືອນ​ຕົ້ນ​ປີ​ນີ້ GDP ຂອງ​ຈີນ​ບັນລຸ​ມູນ​ຄ່າ 69.779,8 ຕື້​ຢວນ ເຕີບ​ໂຕ 6,2% ເມື່ອ​ທຽບໃສ່​ໄລຍະ​ດຽວ​ກັນ​ຂອງ​ປີ​ກາຍ ເມື່ອ​ເບິ່ງ​ຕົວ​ເລກ​ຕາມ​ໄຕ​ມາດ​ແລ້ວ​ເຫັນ​ວ່າ​ໄຕ ມາດ​ທີ 1 ຂອງ​ປີ​ນີ້ ເຕີບ​ໂຕ​ທີ່ 6,4% ໄຕ​ມາດ​ທີ 2 ເຕີບ​ໂຕ 6,2% ແລະ ​ໄຕ​ມາດ​ທີ 3 ເຕີບ​ໂຕ6%.

 

ຂ່າວທີ່ກ່ຽວຂ້ອງ