ຢູ-19 ລາວສົ່ງທ້າຍອຸ່ນເຄື່ອງຢູ່ໄທ ຊະນະ ນະຄອນຣາດຊະສີມາ

871 23 ຕ.ລ. 2019 ວົງຈອນກີລາ
ຢູ-19 ລາວສົ່ງທ້າຍອຸ່ນເຄື່ອງຢູ່ໄທ ຊະນະ ນະຄອນຣາດຊະສີມາ

    ທີມ​ນັກ­ກີ­ລາ​ບານ­ເຕະ​ຊາຍ ທີມຊາດ​ລາວ​ຮຸ່ນ​ອາ­ຍຸ​ບໍ່​ເກີນ 19 ປີ ຊຸດ​ກຽມ​ຄັດ​ເລືອກ​ຊີງ​ແຊັມອາ­ຊີ 2020 ໄດ້​ລົງ​ສະ­ໜາມ​ອຸ່ນເຄື່ອງ​ກຽມ​ທີມ​ນັດ​ທີ 3 ທີ່​ປະ­ເທດໄທ ໃນ​ວັນ​ທີ 21 ຕຸ­ລາ 2019 ພົບ​ກັບ ຢູ-19 ສະ­ໂມ­ສອນນະ­ຄອນຣາດ​ຊະ​ສີ­ມາ ຢູ່​ສະ­ໜາມ​ກີ­ລາ 80 ພັນ​ສາ ຜົນ​ປາ­ກົດ​ວ່າ: ຢູ-19 ທີມ​ຊາດ​ລາວ ເອົາ​ຊະ­ນະ 2-0 ຈາກ ນະ​ລົງ​ສິດ ຈັນ­ທະ​ລັງ­ສີ ນາ­ທີໆ 17 ແລະ ອາ​ນຸ​ສອນ ໄຊ​ປັນ­ຍາ ນາ­ທີໆ 65 ເຊິ່ງ​ການ​ແຂ່ງ­ຂັນ​ດັ່ງ­ກ່າວ ໃຊ້​ເວ­ລາ​ການ​ແຂ່ງຂັນ 3 ຕັ້ງ ຕັ້ງ​ລະ 30 ນາ­ທີ.

    ຜ່ານ​ການ​ອຸ່ນ​ເຄື່ອງ 3 ນັດ ທີ່​ປະ­ເທດ​ໄທ​ຄັ້ງ​ນີ້ ຢູ-19 ທີມຊາດ​ລາວ ຊະ­ນະ 2 ເສຍ 1 ຍິງ ໄດ້ 3 ປະ­ຕູ ເສຍ 1 ປະ­ຕູ​ຄື: ຊະ­ນະ ຢູ-19 ຂອນ​ແກ່ນ ເອັຟ​ຊີ ຈາກ​ປະ­ເທດ​ໄທ 1-0 ເສຍ​ໃຫ້ ຢູ-19 ສະ​ຣະ​ບູ​ລີ ຢູ​ໄນ​ເຕັດ 0-1 ແລະ ຊະ­ນະ ຢູ-19 ນະ­ຄອນ​ຣາດ​ຊະ​ສີ­ມາ 2-0 ຫຼັງ​ຈາກ​ນັ້ນ ໃນ​ລະ­ຫວ່າງວັນ​ທີ 26-28 ຕຸ­ລາ 2019 ຈະ​ອອກ​ເດີນ­ທາງ​ໄປອຸ່ນ​ເຄື່ອງກັບ ຢູ-19 ທີມ​ຊາດມຽນ​ມາ ທີ່​ມຽນ​ມາ.

    ທີມ​ຊາດ​ລາວ​ຊຸດ​ນີ້ ຄຸມ​ທີມ​ໂດຍ​ທ່ານ ຊຸນ​ດຣາມ ມູ​ຣ​ຕີ ຄູ​ເຝິກ​ທີມ​ຊາດ​ຊຸດ​ໃຫຍ່​ຊາວ​ສິງກະ​ໂປ ສຳ­ລັບ​ການ​ອຸ່ນ​ເຄື່ອງ​ຄັ້ງນີ້ ເພື່ອ​ຄວາມ​ພ້ອມ​ເຂົ້າ​ຮ່ວມການ​ແຂ່ງ­ຂັນ​ເຕະ­ບານ​ຊາຍ​ຊີງ​ແຊັມ​ອາ­ຊີ ຮຸ່ນ​ອາ­ຍຸ​ບໍ່​ເກີນ 19 ປີ ຮອບ​ຄັດ​ເລືອກ 2020 ກຸ່ມ H ປະ­ກອບ​ມີ: ອົດ​ສະ​ຕຣາ​ລີ ໄຕ້​ຫວັນ (ເຈົ້າ­ພາບ​ຮອບ​ຄັດ​ເລືອກ​ກຸ່ມ​ນີ້) ແລະ ມາ​ເກົ້າ ຈະ​ແຂ່ງ­ຂັນ​ໃນ​ວັນ ທີ 6-10 ພະ­ຈິກ 2019.

    ສຳ­ລັບ​ຕາ­ຕະ­ລາງ​ການ​ແຂ່ງຂັນ​ທີມ​ຊາດ​ລາວ ໃນ​ການ​ແຂ່ງຂັນ​ເຕະ­ບານ​ຊາຍ​ຊີງ​ແຊັມ​ອາ­ຊີ ຮຸ່ນ​ອາ­ຍຸ​ບໍ່​ເກີນ 19 ປີ ຮອບ​ຄັດເລືອກ 2020 ປະ­ກອບ​ມີ: ນັດ​ທຳອິດ ວັນ​ທີ 6 ພະ­ຈິກ 2019 ເວ­ລາ 16:00 ໂມງ ທີມ​ຊາດ​ລາວ ພົບ ອົດ​ສະ​ຕຣາ​ລີ ນັດ​ທີ​ສອງ ວັນ​ທີ 8 ພະ­ຈິກ 2019 ເວ­ລາ 19:00 ໂມງ ທີມ​ຊາດ​ລາວ ພົບ ໄຕ້​ຫວັນ ແລະ ນັດ​ສຸດ​ທ້າຍ ວັນ​ທີ 10 ພະຈິກ 2019 ເວ­ລາ 16:00 ໂມງ ທີມ​ຊາດ​ລາວ ພົບ​ມາ​ເກົ້າ ທັງ 3 ນັດ​ແຂ່ງ­ຂັນ​ທີ່​ສະ­ໜາມ​ກີ­ລາແຫ່ງ​ຊາດ​ໄຕ້​ຫວັນ.

     ຮູບ​ແບບ​ການ​ຄັດ​ເລືອກ​ທີມເຂົ້າ​ຮອບ​ພົບ​ກັນ​ໝົດ​ໃນ​ກຸ່ມ ແລ້ວ​ຄັດ​ເອົາ​ທີ 1 ຂອງ 11 ກຸ່ມ ແລະ ທີ 2 ດີ​ສຸດ 5 ທີມ ເຂົ້າ​ສູ່ຮອບ​ສຸດ​ທ້າຍ​ທີ່​ປະ­ເທດ​ອຸດ​ສະເບ​ກິດ​ສະ­ຖານ ເຊິ່ງ ຢູ-19 ທີມ ຊາດ​ລາວ​ເຄີຍ​ໄປ​ຫຼິ້ນ​ຮອບ​ສຸດ​ທ້າຍ 4 ຄັ້ງ ປີ 1969 ປີ 1970 ປີ 1972 ແລະ ປີ 1974 ແຕ່​ຕອນ​ນັ້ນ​ບໍ່​ມີ​ການ​ຄັດ​ເລືອກ ໂດຍ​ຜົນ­ງານ​ດີ​ສຸດ​ເຂົ້າ​ຮອບ 8 ທີມ​ສຸດ​ທ້າຍ ປີ 1970 ເສຍ​ໃຫ້​ອິນ​ໂດ​ເນເຊຍ 1-3 ແຕ່​ຫຼັງ​ຈາກ​ນັ້ນ ເມື່ອ​ມີການ​ຄັດ​ເລືອກ ຢູ-19 ທີມ​ຊາດລາວ ​ຍັງ​ບໍ່​ເຄີຍ​ຜ່ານ​ໄປ​ຫຼິ້ນ​ຮອບ​ສຸດ​ທ້າຍ.

ຂ່າວທີ່ກ່ຽວຂ້ອງ