ການມອມຢາ

756 23 ຕ.ລ. 2019 ຫົວຂໍ້ຂ່າວອື່ນໆ

    ຕາມ​ທີ່​ເຮົາ​ໄດ້​ຍິນ​ກັນ​ເປັນ​ເລື່ອງ​ເປັນ​ລາວ​ໃໝ່ໆ​ໝາດໆ ແມ່ນ​ການ​ມອມ​ຢາ ການ​ເອົາ​ຢາ​ປ້າຍ ເອົາ​ຢາ​ທາ ເອົາ​ໃຫ້​ດົມ ໃຫ້​ກິນ​ແບບ​ທີ່​ວ່າ​ຜູ້​ຖືກ​ມອມ ຜູ້​ຖືກ​ປ້າຍ​ຢາ ຜູ້​ຖືກ​ເອົາ​ຢາ​ທາໃຫ້​ດົມ ຫຼື ໃຫ້​ກິນ​ແບບ​ບໍ່​ໄດ້​ຕັ້ງ­ໃຈ ສ່ວນ​ຜູ້​ທີ່​ກະ­ທຳ​ໃນ​ລັກ­ສະ­ນະ​ນີ້ ຈຸດ­ປະ­ສົງແມ່ນ​ເພື່ອ​ໄດ້​ມາ​ໃນ​ສິ່ງ​ອື່ນໆ​ທີ່​ຕົນ​ຕ້ອງ­ການ​ເປັນ­ຕົ້ນ: ເພື່ອ​ເອົາ​ຊັບ​ສິ່ງ​ຂອງ​ບຸກ­ຄົນ​ອື່ນ ເອົາ​ໄປ​ທຳ​ສຳ​ເລົາ ເພື່ອ​ກະ­ທຳ​ອາ­ນາ​ຈານ ເພື່ອ​ເຜີຍ­ແຜ່​ສິ່ງ​ລ່າ​ມົກ​ດ້ວຍ​ການ​ຖ່າຍ​ວິ​ດີ​ໂອ ຖ່າຍ​ເປັນ​ຮູບ​ພາບ​ແລ້ວ​ເອົາ​ເປັນ​ສິ່ງ​ຕໍ່​ລອງ​ເພື່ອ​ຮຽກ​ຄ່າ​ໄຖ່ ຮຽກ​ຄ່າ​ຕອບ​ແທນ ສະ­ນັ້ນ ທຸກ​ຄົນ​ຕ້ອງ​ມີ​ສະ­ຕິ​ລະ­ວັງ​ຕົວ ໂດຍ​ສະ­ເພາະ ພວກ​ຍິງ​ສາວ​ທັງ­ຫຼາຍ... ພ້ອມໆ​ກັບ​ເລື່ອງ​ດັ່ງ­ກ່າວ​ນີ້ ກໍ​ຍັງ​ມີ​ເລື່ອງ​ຜູ້​ເລັກ​ເດັກ­ນ້ອຍ​ທີ່​ຖືກ​ລັກ​ໄປ​ແບບ​ບໍ່​ຮູ້​ຕົວ ເຖິງ​ວ່າ​ເລື່ອງ​ນີ້​ຍັງ​ບໍ່​ທັນ​ເກີດ​ຂຶ້ນ​ຈິງ ແຕ່​ກໍ​ຕ້ອງ​ມີ​ວິ­ທີ​ການ​ປ້ອງ​ກັນ​ໄວ້​ກ່ອນ ດີ​ກວ່າ​ທີ່​ບັນ­ຫາ​ມັນ​ເກີດ​ຂຶ້ນ​ແລ້ວ ຄວາມ​ເສຍ​ຫາຍ​ເກີດ​ຂຶ້ນ​ແລ້ວ ຈຶ່ງ​ຊອກ​ຫາ​ວິ­ທີ​ປ້ອງ​ກັນ ຫຼື ວິ­ທີ​ການ​ແກ້​ໄຂ​ນຳ​ຫຼັງ ມັນ​ກໍ​ຊ້າ​ເກີນ​ໄປ​ແລ້ວ ງົວ​ຫາຍ​ຈຶ່ງ​ລ້ອມ​ຄອກ ບູ­ຮານ​ວ່າ​ມັນ​ຄະ­ລຳ ໃນ​ໄລ­ຍະ​ຫຼັງ​ນີ້ ມີ​ຍິງ​ສາວ​ຫຼາຍ​ຄົນ​ໄດ້​ກາຍ­ເປັນ​ຜູ້​ຖືກ​ເຄາະ​ຮ້າຍ ຈາກ​ການ​ມອມ​ຢາ​ມາ​ແລ້ວ ໃນ​ນັ້ນ ຈະ​ມີ​ຜູ້​ເຖິງ​ຂັ້ນ​ເສຍ​ຊີ­ວິດ ສຳ­ລັບ​ຜູ້​ໂຊກ​ດີ​ກໍ​ພຽງ​ແຕ່​ເສຍ​ສຸ­ຂະ­ພາບ ຫຼື ເສຍ​ພົມ­ມະ­ຈາ­ລີ (ເສຍ​ຄວາມ​ເປັນ​ສາວ ຫຼື ເສຍ​ຄວາມ​ບໍ­ລິ­ສຸດ) ຂອງ​ຕົນ​ກ່ອນ​ການ​ແຕ່ງ­ງານ​ແບບ​ບໍ່​ຮູ້­ສຶກ​ຕົວ ແຕ່​ມັນ​ກໍ​ບໍ່​ໜ້າ­ທີ່​ຈະ​ເກີດ​ເລື່ອງ​ເກີດ​ບັນ­ຫາ​ແບບ​ນີ້​ຂຶ້ນ ແຕ່​ມັນ​ກໍ​ເກີດ​ຂຶ້ນ​ແລ້ວ​ຕົວ​ຈິງ ແລະ ມີ​ຄວາມ​ເສຍ​ຫາຍ​ຕົວ​ຈິງ ເພື່ອ​ເປັນ​ການ​ຕ້ານ ແລະ ສະ­ກັດ​ກັ້ນ ບັນ­ຫາ​ເຫຼົ່າ​ນີ້ ຕາມ​ປະ­ມວນ​ກົດ­ໝາຍ​ອາ­ຍາ ຖ້າ​ຜູ້​ກະ­ທຳ​ມີ​ເຈດ​ຕະ​ນາ​ເພື່ອ​ຮ່ວມ​ເພດ ຕາມ​ມາດ­ຕາ 248 ນີ້​ຈະ​ຖື​ເປັນ​ການ​ຂົ່ມ­ຂືນ​ທຳ​ຊຳ​ເລົາ​ຖ້າ​ບຸກ­ຄົນ​ໃດ​ຫາກ​ໃຊ້​ກຳ­ລັງ​ໃຊ້​ອາ­ວຸດ​ນາບ​ຂູ່ ໃຊ້​ຢາ​ສະ­ຫຼົບ ໃຊ້​ສິ່ງ​ມຶນ­ເມົາ ຫຼື ໃຊ້​ວິ­ທີ​ອື່ນ ທີ່​ເຮັດ​ໃຫ້​ຜູ້​ອື່ນ​ຕົກ​ຢູ່​ໃນ​ສະ­ພາບ​ບໍ່​ສາ­ມາດ​ຊ່ວຍ­ເຫຼືອ​ຕົນ​ເອງ​ໄດ້ ຫຼື ສວຍ­ໂອ­ກາດ​ເພື່ອ​ທຳ​ຊຳ​ເລົາ​ດ້ວຍ​ການ​ຂືນ​ໃຈ (ບໍ່​ຍິນ​ຍອມ) ຂອງ​ຜູ້­ກ່ຽວ ຈະ​ຖືກ​ລົງ­ໂທດ​ຕັດ​ອິດ​ສະ­ລະ​ພາບ​ແຕ່ ສີ່​ປີ ຫາ ຫົກ​ປີ ແລະ ຈະ​ຖືກ​ປັບ​ໃໝ​ແຕ່ 5.000.000 ກີບ ຫາ 30.000.000 ກີບ.

    ໃນ​ກໍ­ລະ­ນີ​ທີ່​ຜູ້​ກະ­ທຳ​ຜິດ ຫາກ​ໄດ້​ຂົ່ມ​ຂຶນ​ທຳ​ຊຳ​ເລົາ​ຜູ້­ຍິງ​ທີ່​ມີ​ອາ­ຍຸ​ແຕ່ ສິບ​ຫ້າ​ປີ ຫາ ຕ່ຳ​ກວ່າ ສິບ​ແປດ​ປີ ທີ່­ຢູ່​ໃນ​ການ​ຄຸ້ມ​ຄອງ​ດູ​ແລ​ຂອງ​ຕົນ ຫຼື ໃນ​ການ​ປິ່ນ­ປົວ​ຂອງ​ຕົນ ຈະ​ຖືກ​ລົງ­ໂທດ​ຕັດ​ອິດ​ສະ­ລະ​ພາບ​ແຕ່ ຫົກ​ປີ ຫາ ສິບ​ປີ ແລະ ຈະ​ຖືກ​ປັບ​ໃໝ​ແຕ່ 7.000.000 ກີບ ຫາ 50.000.000 ກີບ.

    ໃນ​ກໍ­ລະ­ນີ​ທີ່​ຜູ້​ກະ­ທຳ​ຜິດ ຫາກ​ໄດ້​ຂົ່ມ​ຂຶນ​ທຳ​ຊຳ​ເລົາ​ຜູ້­ຍິງ​ດ້ວຍ​ການ​ປ່ຽນ​ຜຽນ​ກັນ ຂົ່ມ­ຂືນ​ທຳ​ຊຳ​ເລົາ​ເດັກ​ທີ່​ມີ​ອາ­ຍຸ​ຕ່ຳ​ກວ່າ ສິບ​ຫ້າ​ປີ ໄດ້​ທຳ­ຮ້າຍ​ຮ່າງ­ກາຍ​ຜູ້­ຍິງ​ໃນ​ເວ­ລາ​ຂົ່ມ­ຂືນ ຫຼື ເຮັດ​ໃຫ້​ຜູ້­ຍິງ​ພິ­ການ​ຕະ­ຫຼອດ​ຊີ­ວິດ ຫຼື ເສຍ​ຊີ­ວິດ ຈະ​ຖືກ​ລົງ­ໂທດ​ຕັດ​ອິດ​ສະ­ລະ​ພາບ​ແຕ່ ສິບ​ປີ ຫາ ຊາວ​ປີ ຫຼື ຕັດ​ອິດ​ສະ­ລະ​ພາບ​ຕະ­ຫຼອດ​ຊີ­ວິດ ແລະ ຈະ​ຖືກ​ປັບ​ໃໝ​ແຕ່ 10.000.000 ກີບ ຫາ 70.000.000 ກີບ ການ​ພະ­ຍາ­ຍາມ​ກໍ່​ການ​ກະ­ທຳ​ຜິດ ກໍ​ຈະ​ຖືກ​ລົງ­ໂທດ.

    ແຕ່​ກໍ​ບໍ່​ໃຫ້​ເຂົ້າ­ໃຈ​ແຕ່​ລວງ​ດຽວ​ວ່າ ທຸກ​ຄັ້ງ​ທີ່​ມີ​ການ​ມອມ​ຢາ ປ້າຍ​ຢາ ເອົາ​ຢາ​ໃຫ້​ດົມ ໃຫ້​ກິນ ຫຼື ໃຫ້​ດື່ມ ຜູ້​ກະ­ທຳ​ມີ​ຈຸດ­ປະ­ສົງ​ເພື່ອ​ການ​ຂົ່ມ­ຂືນ​ທຳ​ຊຳ​ເລົາ​ເທົ່າ​ນັ້ນ ແຕ່​ບາງ​ກໍ­ລະ­ນີ​ຜູ້​ກະ­ທຳ​ອາດ​ຈະ​ຫວັງ​ເອົາ​ຊັບ ຫວັງ​ຄາດ​ຕະ​ກຳ ຫວັງ​ເພື່ອ​ການ​ຮຽກ​ຄ່າ​ໄຖ່ ເພື່ອ​ການ​ອະ­ນາ­ຈານ ເພື່ອ​ເຜີຍ­ແຜ່​ສິ່ງ​ລ່າ​ມົກ​ຕ່າງໆ ຊຶ່ງ​ກໍ​ຈະ​ມີ​ຄວາມ​ຜິດ​ຕາມ​ມາດ­ຕາ​ອື່ນໆ​ທີ່​ໄດ້​ກຳ­ນົດ​ໄວ້​ໃນ​ປະ­ມວນ​ກົດ­ໝາຍ​ອາ­ຍາ​ເຊັ່ນ​ດຽວ​ກັນ​ນີ້.

ໂດຍ: ໄມ້​ງັດ

ຂ່າວທີ່ກ່ຽວຂ້ອງ