ເບິ່ງບ້ານເຂົາເອົາບົດຮຽນ 23-10-2019

1.335 23 ຕ.ລ. 2019 ຫົວຂໍ້ຂ່າວອື່ນໆ

    ມື້­ນີ້​ໄດ້​ສັງ​ລວມ​ເອົາ​ຂ່າວ​ກ່ຽວ​ກັບ​ກົດ­ໝາຍ​ຄອບ­ຄົວ ສະ­ບັບ​ໃໝ່​ຂອງ​ມຽນ​ມາ ທີ່​ກຳ­ນົດ​ໂທດ​ໃສ່​ຜູ້​ຊາຍ​ໃຈ​ບ້ຽວ ແລະ ເລື່ອງ​ອາກ​ຊັງ​ຕີນ (ອາ​ເຈັນ​ຕີ​ນາ) ຊອກ​ທາງ​ເລືອກ​ໃໝ່ ເພື່ອ​ປ່ຽນ​ແທນ​ການ​ໃຊ້​ຖົງ​ຢາງ.

    ທີ່ ມຽນ​ມາ: ໃນ​ປີ 2016 ລັດ­ຖະ­ບານ​ມຽນ​ມາ ໄດ້​ຮ່າງ​ກົດ­ໝາຍ​ກ່ຽວ​ກັບ​ການ​ປົກ​ປ້ອງ​ສິດ­ທິ ແລະ ຜົນ​ປະ­ໂຫຍດ​ຂອງ​ແມ່­ຍິງ ຫຼື ເອີ້ນ​ວ່າ ກົດ­ໝາຍ​ຄອບ­ຄົວ ໂດຍ​ມີ​ບົດ​ກຳ­ນົດ​ໂທດ​ຕິດ​ຄຸກ​ສູງ​ສຸດ 7 ປີ ສຳ­ລັບ​ຜູ້​ຊາຍ​ຄົນ​ໃດ​ກໍ​ຕາມ ທີ່​ເຮັດ​ໃຫ້​ຝ່າຍ​ຍິງ​ຖື­ພາ​ຄາ​ທ້ອງ​ແລ້ວ​ບໍ່​ຍອມ​ແຕ່ງ­ດອງ​ກັບ​ນາງ ສ່ວນ​ຜູ້​ຊາຍ​ທີ່­ຢູ່​ກິນ​ກັບ​ຝ່າຍ​ຍິງ​ແບບ​ຜົວ​ເມຍ ແຕ່​ສຸດ​ທ້າຍ​ປະ­ຕິ­ເສດ​ບໍ່​ແຕ່ງ­ດອງ​ເອົາ​ນາງ​ເປັນ​ເມຍ ກໍ​ຈະ​ຖືກ​ຕັດ​ອິດ­ສະ­ຫຼະ­ພາບ​ສູງ​ສຸດ 5 ປີ ທາງ​ການ​ເຊື່ອ​ວ່າ​ກົດ­ໝາຍ​ສະ­ບັບ​ນີ້ ຈະ​ເຮັດ​ໃຫ້­ການ​ໃຊ້​ຄວາມ​ຮຸນ​ແຮງ​ໃນ​ຄອບ­ຄົວ ເປັນ​ອາ​ຊະ​ຍາ​ກຳ ແລະ ເຮັດ​ໃຫ້​ຄະ­ດີ​ການ​ຂົ່ມ­ຂືນ​ຝືນ​ໃຈ​ມີ​ໂທດ​ສູງ​ສຸດ ເຖິງ​ຂັ້ນ​ປະ­ຫານ​ຊີ­ວິດ ທ່ານ ນໍ​ທາ​ວາ (Nau The wah) ຫົວ­ໜ້າ​ກົມ​ສະ­ຫວັດ­ດີ​ການ​ສົງ​ຄົມ​ມຽນ​ມາ ໃຫ້​ຮູ້​ວ່າ ກົດ­ໝາຍ​ນີ້​ເລັ່ງ​ປົກ​ປ້ອງ​ແມ່­ຍິງ ​ຈາກ​ການ​ຕົກ​ເປັນ​ເຫຍື່ອ​ຂອງ​ການ​ໃຊ້​ຄວາມ​ຮຸນ​ແຮງ​ຕໍ່​ພວກ​ເຂົາ ພາຍ​ໃຕ້​ກົດ­ໝາຍ​ນີ້ ແມ່­ຍິງ​ມີ​ສິດ​ຮ້ອງ­ທຸກ​ຂໍ​ຄວາມ​ເປັນ​ທຳ ໃນ​ກໍ­ລະ­ນີ​ຖືກ​ບັງ­ຄັບ​ນາບ​ຂູ່​ໃຫ້​ຢ້ານ​ກົວ ເມື່ອ​ພວກ​ເຂົາ​ບໍ່​ຕ້ອງ­ການ​ແຕ່ງ­ດອງ ຂ່າວ​ບອກ​ວ່າ ທາງ​ການ​ມຽນ​ມາ ໄດ້​ມີ​ຄວາມ​ພະ­ຍາ­ຍາມ​ເພື່ອ​ກຳ​ຈັດ­ການ​ຈຳ­ແນກ​ຕໍ່​ເພດ​ຍິງ ຊຶ່ງ​ເກີດ​ມາ​ຈາກ​ອະ­ຄະ­ຕິ ກໍ​ຄື ປະ​ເພ​ນິ­ຍົມ​ທີ່​ສືບ​ທອດ​ກັນ​ມາ​ເປັນ​ເວ­ລາ​ນານ​ປີ ກົດ­ໝາຍ​ອາ­ຍາ​ທີ່​ໃຊ້​ໃນ​ເມື່ອ​ກ່ອນ​ໄດ້​ກຳ­ນົດ​ໂທດ ໃນ​ຄະ­ດີ​ຂົ່ມ­ຂືນ​ແຕ່​ບໍ່​ໄດ້​ກວມ​ເອົາ​ໂທດ​ຂອງ​ຜູ້​ເປັນ​ຜົວ ທີ່​ລ່ວງ​ລະ­ເມີດ​ທາງ​ເພດ​ຕໍ່​ຜູ້​ເປັນ​ເມຍ ຍົກ­ເວັ້ນ​ຜູ້​ເປັນ​ເມຍ​ທີ່​ມີ​ອາ­ຍຸ​ຕ່ຳ​ກວ່າ 13 ປີ ເທົ່າ​ນັ້ນ (ເນື້ອ​ໃນ​ຂອງ​ບົດ​ນີ້​ແກະ​ມາ​ຈາກ​ໜັງ­ສື​ພີມ ຜູ້​ແທນ​ປະ­ຊາ­ຊົນ​ຂອງ​ສະ­ພາ​ແຫ່ງ​ຊາດ ສະ­ບັບ​ອາ­ທິດ​ຕົ້ນ​ເດືອນ​ມັງ­ກອນ 2017).

    ທີ່ ອາກ​ຊັງ​ຕີນ (ອາ​ເຈັນ​ຕີ​ນາ): ເຊັ່ນ​ດຽວ​ກັນ​ຢູ່​ຫຼາຍ​ຕົວ​ເມືອງ​ໃຫຍ່ໆ​ໃນ​ໂລກ ທາງ​ການ​ຂອງ​ນະ­ຄອນ­ຫຼວງ ບູ​ເອ​ນົດ​ເອ​ເຣັດ ອາ​ເຈັນ​ຕີ​ນາ ໄດ້​ປະ­ກາດ​ໃນ​ຕົ້ນ​ເດືອນ​ມັງ­ກອນ 2017 ຫ້າມ​ໃຊ້​ຖົງ​ຢາງ (ປຼັສ​ຕິກ) ຢູ່​ຕາມ​ຮ້ານ​ຊັບ​ພະ​ສິນ­ຄ້າ​ຕ່າງໆ​ໃນ​ທົ່ວ​ນະ­ຄອນ ສະ­ຖິ­ຕິ​ຊີ້​ອອກ​ວ່າ­ການ​ໃຊ້​ຖົງ​ຢາງ​ສະ­ເພາະ​ໃນ​ນະ­ຄອນ­ຫຼວງ​ແຫ່ງ​ນີ້ ມີ​ຈຳ­ນວນ​ສູງ​ເຖິງ 500 ລ້ານ​ຖົງ​ຕໍ່​ປີ ທາງ​ການ​ເປັນ​ຫ່ວງ​ວ່າ​ເສດ​ຖົງ​ຢາງ​ເຫຼົ່າ​ນີ້ ນອກ­ຈາກ​ເປັນ​ສັດ­ຕູ​ຕົວ​ອັນ­ຕະ­ລາຍ​ຕໍ່​ສິ່ງ­ແວ­ດລ້ອມ​ແລ້ວ ມັນ​ຍັງ​ອາດ​ໄປ​ອຸດ​ຕັນ​ທໍ່​ລະ­ບາຍ​ນ້ຳ​ເຮັດ​ໃຫ້​ມີ​ສະ­ພາບ​ນ້ຳ​ຖ້ວມ​ຂັງ ອັ່ງ​ຕົວ​ນະ­ຄອນ ຖ້າ​ບໍ່​ລົງ­ມື​ກຳ­ຈັດ​ແຕ່​ດຽວ­ນີ້ ໃນ​ຄວາມ​ເປັນ​ຈິງ​ແລ້ວ ທາງ​ການ​ຂອງ​ນະ­ຄອນ­ຫຼວງ​ແຫ່ງ​ນີ້ ໄດ້​ເລີ່ມ​ໂຄງ­ການ​ຈຳ­ກັດ​ການ​ນຳ​ໃຊ້​ຖົງ​ຢາງ​ມາ​ແຕ່​ປີ 2009 ພຸ້ນ ໂດຍ​ມີ​ຂໍ້​ບັງ­ຄັບ​ໃຫ້​ລູກ​ຄ້າ​ຈົກ​ເງິນ​ຈ່າຍ​ຄ່າ​ຖົງ​ຢາງ​ໃສ່­ເຄື່ອງ​ຂອງ​ເອົາ​ເອງ (ບໍ່​ໄດ້​ລ້າ​ຈາກ​ທາງ​ຮ້ານ) ເພື່ອ​ບໍ່​ເປັນ​ການ​ສິ້ນ​ເປືອງ ລູກ​ຄ້າ​ຊາວ​ນະ­ຄອນ­ຫຼວງ ກໍ​ເລີຍ​ນຳ​ໃຊ້​ຖົງ​ປະ­ເພດ​ອື່ນ​ທີ່​ເປັນ​ມິດ​ກັບ​ສິ່ງ­ແວ­ດລ້ອມ ຫຼື ໃຊ້​ລໍ້​ເວ­ລາ​ໄປ​ຊື້​ເຄື່ອງ​ຢູ່​ຮ້ານ​ຄ້າ ປາ­ກົດ​ວ່າ​ມາດ​ຕະ­ການ​ນີ້​ສາ­ມາດ​ຊັກ​ຊວນ​ໃຫ້​ຊາວ​ນະ­ຄອນ­ຫຼວງ ຈຳ­ນວນ 60% ເຊົາ​ໃຊ້​ຖົງ​ຢາງ ຂ່າວ​ໃຫ້​ຮູ້​ເພີ່ມ​ຕື່ມ​ວ່າ ທາງ​ການ​ຂອງ​ນະ­ຄອນ­ຫຼວງ ບູ​ເອ​ນົດ​ເອ​ເຣັດ ໄດ້​ເປີດ​ສະ­ຖານ­ທີ່​ຫຼາຍ​ຈຸດ ເພື່ອ​ແຈກ​ລ້າ​ຖົງ​ສຳ­ລັບ​ລູກ​ຄ້າ​ທີ່​ໄປ​ຈັບ​ຈ່າຍ​ຢູ່​ຕາມ​ຮ້ານ ເປັນ​ຖົງ​ທີ່​ເຮັດ​ດ້ວຍ​ຝ້າຍ ຫຼື ພືດ​ທີ່​ລະ­ລາຍ​ງ່າຍ ທັງ​ເປັນ​ສ່ຽວ​ກັບ​ສິ່ງ­ແວ­ດລ້ອມ​ອີກ​ດ້ວຍ.

ຂ່າວທີ່ກ່ຽວຂ້ອງ