ນະຄອນຫຼວງ ຈະສຸມໃສ່ລ້ຽງສັດເປັນສະບຽງອາຫານ ແລະ ສິນຄ້າ

847 23 ຕ.ລ. 2019 ຂ່າວໜ້າ​ໜຶ່ງ
ນະຄອນຫຼວງ ຈະສຸມໃສ່ລ້ຽງສັດເປັນສະບຽງອາຫານ ແລະ ສິນຄ້າ

    ຕາມ​ການ​ລາຍ​ງານ​ຂອງ​ທ່ານ ດ່າຍ ສີ​ຫາ​ລາດ ຫົວ­ໜ້າ​ຂະ­ແໜງ​ລ້ຽງ­ສັດ ແລະ ການ​ປະ­ມົງ ພະ​ແນກ​ກະ­ສິ­ກຳ ແລະ ປ່າ­ໄມ້ ນະ­ຄອນ­ຫຼວງ​ວຽງ​ຈັນ (ນວ) ໃນ​ກອງ​ປະ­ຊຸມ​ເປີດ​ກວ້ງ ຄັ້ງ​ທີ 8 ສະ­ໄໝ​ທີ VI ຂອງ​ຄະ­ນະ​ພັກ​ຮາກ​ຖານ​ພະ​ແນກ​ກະ­ສິ­ກຳ ແລະ ປ່າ­ໄມ້ ນວ ໃຫ້​ຮູ້​ວ່າ: ຂະ­ແໜງ​ລ້ຽງ­ສັດ ແລະ ການ​ປະ­ມົງ ມີ​ພາ­ລະ​ບົດ­ບາດ​ໃນ​ການ​ຄຸ້ມ​ຄອງ​ສັດ­ລ້ຽງ ການ​ສັດ­ຕະ­ວະ­ແພດ ການ​ປະ­ມົງ​ຂອງ ນວ ເພື່ອ​ໃຫ້​ມີ​ການ​ພັດ­ທະ­ນາ​ການ​ຜະ­ລິດ ສັດ­ປ່າ-ສັດ​ນ້ຳ ໃຫ້​ມີ​ຜົນ​ຜະ­ລິດ​ພຽງ­ພໍ ມີ​ມາດ­ຕະ­ຖານ​ສຸ­ຂາ​ນາ​ໄມ ແລະ ປອດ​ໄພ​ຕໍ່​ຜູ້​ບໍ­ລິ­ໂພກ ແນ­ໃສ່​ຄ້ຳ­ປະ­ກັນ​ດ້ານ​ສະ­ບຽງ​ອາ­ຫານ ສົ່ງ­ເສີມ​ການ​ຜະ­ລິດ​ເປັນ​ສິນ­ຄ້າ ປີ 2019 ໄດ້​ຜະ ລິດ ແລະ ສະ­ໜອງ​ທາດ​ຊີ້ນ 60.728,39 ໂຕນ ສະ­ເລ່ຍ​ທາດ​ຊີ້ນ​ໃນ ນວ ບັນ­ລຸ​ໄດ້ 64,93 ກິ​ໂລ​ຕໍ່​ຄົນ​ຕໍ່​ປີ ທຽບ­ໃສ່​ແຜນ­ການ​ລື່ນ​ແຜນ 1,93 ກິ​ໂລ​ຕໍ່​ຄົນ​ຕໍ່​ປີ ເທົ່າ​ກັບ 3,06% (ແຜນ­ການ 63 ກິ​ໂລ) ພ້ອມ​ນີ້ ຍັງ​ໄດ້​ສົ່ງ​ທາດ​ຊິ້ນ​ໄປ​ຍັງ​ຕ່າງ​ແຂວງ​ອີກ​ດ້ວຍ.

    ເພື່ອ​ຕອບ​ສະ­ໜອງ​ການ​ຜະ­ລິດ​ສະ­ບຽງ​ອາ­ຫານ ແລະ ການ​ຜະ­ລິດ​ເປັນ​ສິນ­ຄ້າ ປີ 2020 ສືບ­ຕໍ່​ຊຸກ­ຍູ້​ການ​ລ້ຽງ­ສັດ ແລະ ການ​ປະ­ມົງ​ໃນ​ການ​ຜະ­ລິດ​ທາດ​ຊີ້ນ ແລະ ປາ ໃຫ້​ໄດ້ 61.500 ໂຕນ​ຕໍ່​ປີ ໃຫ້​ອັດ­ຕາ​ສ່ວນ​ສະ­ເລ່ຍ​ເພີ່ມ​ຂຶ້ນ 4% ສູ້​ຊົນ​ສະ­ໜອງ​ທາດ​ຊີ້ນ​ໃສ່​ຫົວ​ຄົນ​ໃຫ້​ໄດ້ 65 ກິ​ໂລ​ຕໍ່​ຄົນ​ຕໍ່​ປີ ແລະ ສາ­ມາດ​ສົ່ງ​ອອກ​ທາດ​ຊີ້ນ​ໄປ​ຕ່າງ​ແຂວງ​ບໍ່​ຫຼຸດ 2.000 ໂຕນ​ຕໍ່​ປີ ສ່ວນ​ການ​ຜະ­ລິດ​ເປັນ​ສິນ­ຄ້າ​ຕ້ອງ​ໄດ້​ສູ້​ຊົນ​ຊຸກ­ຍູ້​ການ​ລ້ຽງ­ສັດ​ຂອງ​ຟາມ ແລະ ປະ­ຊາ­ຊົນ​ໃຫ້​ເປັນ​ສິນ­ຄ້າ ເຊັ່ນ: ການ​ສະ­ໜອງ​ງົວ​ໃຫ້​ໄດ້ 15.500 ໂຕ ຄວາຍ 2.200 ໂຕ ໝູ 325.000 ໂຕ ສັດ​ປີກ 3.000 ໂຕນ ໄຂ່ 12.800 ໂຕນ ແລະ ປາ ຊິ້ນ​ໃຫ້​ໄດ້ 23.000 ໂຕນ.

ຂ່າວທີ່ກ່ຽວຂ້ອງ