ລົດໄຟຟ້າບີວາຍດີ ເປັນມິດກັບສິ່ງແວດລ້ອມມີຈຳໜ່າຍຢູ່ລາວ

824 23 ຕ.ລ. 2019 ຂ່າວໜ້າ​ໜຶ່ງ
ລົດໄຟຟ້າບີວາຍດີ ເປັນມິດກັບສິ່ງແວດລ້ອມມີຈຳໜ່າຍຢູ່ລາວ

    ບໍ­ລິ­ສັດ ໂມກ ຈຳ­ກັດ ໄດ້​ຈັດ​ພິ­ທີ​ເປີດ​ຫ້ອງ​ຂາຍ​ລົດ ບີ​ວາຍ​ດີ (BYD) ພ້ອມ​ນຳ​ສະ­ເໜີ​ລົດ­ໄຟ​ຟ້າ ບີ​ວາຍ​ດີ ລຸ້ນ TANGEV ເຂົ້າ​ມາ​ຈຳ­ໜ່າຍ​ໃນ​ປະ­ເທດ​ລາວ ເພື່ອ​ຮອງ​ຮັບ​ການ​ຊົມ­ໃຊ້​ພະ­ລັງ­ງານ​ໄຟ­ຟ້າ​ໃຫ້​ເພີ່ມ​ຂຶ້ນ ພິ­ທີ​ໄດ້​ຈັດ​ຂຶ້ນ​ວັນ​ທີ 19 ຕຸ­ລາ 2019 ທີ່​ຫ້ອງ​ຂາຍ​ລົດ ບີ​ວາຍ​ດີ ບ້ານ​ໂພນ​ພະ​ເນົາ ເມືອງ​ໄຊ​ເສດ​ຖາ ນະ­ຄອນ­ຫຼວງ​ວຽງ​ຈັນ ມີ​ທ່ານ ສຸ­ລິ­ຍົນ ພິ­ລາ​ວົງ ຫົວ­ໜ້າ​ກົມ​ນຳ​ເຂົ້າ ແລະ ສົ່ງ​ອອກ ກະ­ຊວງ​ອຸດ­ສາ­ຫະ­ກຳ ແລະ ການ​ຄ້າ ຜູ້­ຕາງ­ໜ້າ​ຈາກ ບໍ­ລິ­ສັດ ບີ​ວາຍ​ດີ ຕົວ​ແທນ​ຜູ້​ຈຳ­ໜ່າຍ ແລະ ນັກ­ທຸ­ລະ­ກິດ​ທັງ​ພາຍ​ໃນ ແລະ ຕ່າງ­ປະ­ເທດ​ເຂົ້າ​ຮ່ວມ.

    ບໍ­ລິ­ສັດ ບີ​ວາຍ​ດີ ສ້າງ​ຂຶ້ນ​ປີ 1995 ລິ​ເລີ່ມ​ດ້ວຍ​ການ​ຜະ­ລິດ​ໝໍ້​ໄຟ​ໃຫ້​ບໍ­ລິ­ສັດ​ຕ່າງໆ​ທົ່ວ​ໂລກ ດ້ວຍ​ປະ­ສົບ​ການ ຫຼາຍ​ກວ່າ 20 ປີ ໃນ​ການ​ຄົ້ນ­ຄວ້າ​ວິ­ໄຈ ແລະ ຜະ­ລິດ​ໝໍ້​ໄຟ​ໃຫ້​ບໍ­ລິ­ສັດ​ຂຶ້ນ​ຊື່­ວ່າ ເປັນ​ແຫຼ່ງ​ທີ່​ມີ​ກຳ­ລັງ​ການ​ຜະ­ລິດ​ໝໍ້​ໄຟ Iron-Phosphate ຫຼາຍ​ທີ່​ສຸດ​ໃນ​ໂລກ ປັດ­ຈຸ­ບັນ ມີ​ຄວາມ​ຊ່ຽວ­ຊານ​ໃນ 4 ຂະ­ແໜງ ການ​ໃຫຍ່ ຄື: ດ້ານ​ອຸ­ປະ­ກອນ​ເອ​ເລັກ​ໂຕຣ​ນິກ ລົດ​ພາ­ຫະ­ນະ ພະ­ລັງ­ງານ​ໃໝ່ ແລະ ລົດ​ໂດຍ­ສານ ເຊິ່ງ​ເປັນ​ຜູ້​ບຸກ­ເບີກ​ດ້ານ​ຄວາມ​ສຳ­ເລັດ​ໃນ​ການ​ສ້າງ​ສະ­ພາບ​ແວດ​ລ້ອມ​ທີ່​ປາ­ສະ­ຈາກ​ມົນ​ລະ​ພິດ ພະ­ລັງ­ງານ​ແສງ​ອາ­ທິດ​ທີ່​ມີ​ລາ­ຄາ​ຕ່ຳ ອຸ­ປະ­ກອນ​ເກັບ​ພະ­ລັງ­ງານ​ທີ່​ມີ​ຄຸນ​ນະ​ພາບ ແລະ ລົດ­ໄຟ​ຟ້າ.

    ລົດ​ບີ​ວາຍ ດີ ແມ່ນ​ການ​ນຳ​ໃຊ້​ເຕັກ​ໂນ​ໂລ​ຊີ​ທີ່​ທັນ​ສະ­ໄໝ ເຊິ່ງ​ຈະ​ນຳ​ການ​ປະ­ຕິ​ຮູບ​ໃໝ່​ເຂົ້າ​ສູ່​ຕະ­ຫຼາດ​ລົດ​ຂອງ​ປະ­ເທດ​ລາວ ສຳ­ລັບ​ສາ­ຂາ​ຂາຍ​ລົດ ບີ​ວາຍ​ດີ​ແຫ່ງ​ທຳ​ອິດ​ນີ້ ໄດ້​ກຽມ​ຄວາມ​ພ້ອມ​ດ້ານ​ທີມ​ງານ​ທີ່​ເປັນ​ມື​ອາ­ຊີບ​ທັງ​ການ​ຂາຍ ການ​ບໍ­ລິ­ການ​ຫຼັງ​ການ​ຂາຍ ສ່ວນ​ສາ­ຂາ​ຕໍ່​ໄປ​ແມ່ນ​ວາງ​ເປົ້າ​ໄປ​ທີ່​ແຂວງ​ຫຼວງ​ພະ​ບາງ ສະ­ຫວັນ​ນະ​ເຂດ ແລະ ແຂວງ​ຈຳ­ປາ​ສັກ ໃຫ້​ໄດ້​ພາຍ​ໃນ​ປີ 2020 ແລະ ຈະ​ຂະ­ຫຍາຍ​ໄປ​ບັນ­ດາ​ເມືອງ​ຂອບ​ເຂດ​ທົ່ວ​ປະ­ເທດ ເຖິງ 20 ຈຸດ ໂດຍ​ຍົກ​ສູງ​ຄຸນ​ນະ​ພາບ​ດ້ານ​ການ​ບໍ­ລິ­ການ​ໃຫ້​ດີ​ທີ່​ສຸດ ເພື່ອ​ດຶງ​ດູດ ແລະ ອຳ ນວຍ​ຄວາມ​ສະ­ດວກ​ດ້ານ​ຕ່າງໆ​ໃຫ້​ລູກ​ຄ້າ

    ລົດ­ໄຟ​ຟ້າ​ທີ່​ນຳ​ມາ​ສະ­ເໜີ​ຄັ້ງ​ນີ້ ແມ່ນ​ລົດ​ຍີ່­ຫໍ້ ບີ​ວາຍ​ດີ ລຸ້ນ TANGEV ທີ່​ສາກ​ໄຟ­ຟ້າ​ໃນ​ເຮືອນ​ທົ່ວ​ໄປ 220 ໂວນ ສາກ 1 ຄັ້ງ ສາ­ມາດ​ແລ່ນ​ໄດ້​ເຖິງ 500 ກິ­ໂລ­ແມັດ ລົດ​ລຸ້ນ​ນີ້ ມີ 486 ແຮງ​ມ້າ ຂັບ​ເຄື່ອນ 4 ລໍ້ ຮັບ­ປະ­ກັນ​ໝໍ້​ໄຟ 8 ປີ ຫຼື 150.000 ກິ­ໂລ­ແມັດ ສ່ວນ​ຕົວ​ລົດ​ຮັບ­ປະ­ກັນ 4 ປີ ຫຼື 1 ແສນ​ກິ­ໂລ­ແມັດ ລໍ້​ແມັກ ຂອບ 22 ນີ້ວ ລະ­ບົບ​ເບກ​ແມ່ນ​ດິ​ສ​ເບກ​ໜ້າ​ຫຼັງ ເຊິ່ງ​ນຳ​ໃຊ້​ເບກ​ຈາກ​ບໍ­ລິ­ສັດ​ບອດ​ທີ່​ໄດ້​ຄຸນ​ນະ​ພາບ ສ່ວນ​ພາຍ​ໃນ​ເບາະ​ເປັນ​ເບາະ​ໄຟ­ຟ້າ​ມີ​ຖົງ​ລົມ​ນິ­ລະ​ໄພ 8 ຈຸດ ລະ­ບົບ​ເຊັນ​ເຊີ ແລະ ກ້ອງ 360 ຮອບ​ຄັນ ມີ​ກະ­ແຈ​ເປັນ​ລະ­ບົບ​ອັດ​ສະ​ລິ​ຍະ ສາ­ມາດ​ສັ່ງ​ງານ​ລົດ​ໃຫ້​ຂັບ​ເຄື່ອນ​ໄດ້​ເອງ ຖື​ວ່າ​ເປັນ​ລົດ­ໄຟ​ຟ້າ​ທີ່​ມີ​ການ​ພັດ­ທະ­ນາ ມາ​ໃນ​ຮູບ​ແບບ​ທີ່​ເໝາະ​ສົມ​ກັບ​ການ​ນຳ​ໃຊ້​ເປັນ​ຢ່າງ​ດີ ເປັນ​ມິດ​ກັບ​ສິ່ງ­ແວ­ດລ້ອມ.

ຂ່າວທີ່ກ່ຽວຂ້ອງ