ປາກຊ່ອງພັດທະນາ ໄດ້ຮັບລາງວັນຜູ້ປະກອບການຍິງດີເດັ່ນ

937 23 ຕ.ລ. 2019 ຂ່າວໜ້າ​ໜຶ່ງ
ປາກຊ່ອງພັດທະນາ ໄດ້ຮັບລາງວັນຜູ້ປະກອບການຍິງດີເດັ່ນ

    ບໍ­ລິ­ສັດ​ປາກ​ຊ່ອງ​ພັດ­ທະ­ນາ ຂາ​ອອກ-ຂາ​ເຂົ້າ ຈຳ­ກັດ​ຜູ້​ດຽວ ໜຶ່ງ​ໃນ 16 ຫົວ­ໜ່ວຍ​ທຸ­ລະ​ກິດ ທີ່​ໄດ້​ຮັບ​ລາ­ງວັນ​ທຸ­ລະ​ກິດ​ດີ­ເດັ່ນ​ອາ​ຊຽນ​ແຫ່ງ ສປປ ລາວ ປະ­ຈຳ​ປີ 2019 ເຊິ່ງ​ລາ­ງວັນ​ທີ່​ບໍ­ລິ­ສັດ​ດັ່ງ­ກ່າວ​ໄດ້​ຮັບ​ແມ່ນ​ປະ­ເພດ​ລາ­ງວັນ​ຜູ້​ປະ­ກອບ​ການ​ຍິງ​ດີ­ເດັ່ນ.

    ທ່ານ ນາງ ອິນ​ແປງ ຊາ​ມຸນ­ຕີ ປະ­ທານ​ບໍ­ລິ­ສັດ ປາກ​ຊ່ອງ​ພັດ​ນາ ຂາ​ອອກ-ຂາ​ເຂົ້າ ຈຳ­ກັດ​ຜູ້​ດຽວ ໃຫ້​ສຳ­ພາດ​ໂອ­ກາດ​ທີ່​ຮັບ​ລາ­ງວັນ ວັນ​ທີ 4 ຕຸ­ລາ 2019 ທີ່​ໂຮງ­ແຮມ​ຄຣາວ​ພລາ​ຊາ ນະ­ຄອນ­ຫຼວງ​ວຽງ​ຈັນ ວ່າ: ລາ­ງວັນ​ຜູ້​ປະ­ກອບ​ການ​ຍິງ​ດີ­ເດັ່ນ​ເປັນ​ລາ­ງວັນ​ອັນ​ຊົງ​ກຽດ ເປັນ​ລາ­ງວັນ​ທຳ​ອິດ ແລະ ເປັນ​ປີ​ທຳ​ອິດ​ທີ່​ພັກ ແລະ ລັດ­ຖະ­ບານ ກໍ​ຄື ສະ­ພາ​ການ​ຄ້າ ແລະ ອຸດ­ສາ­ຫະ­ກຳ​ແຫ່ງ​ຊາດ​ລາວ ຕະ­ຫຼອດ​ຮອດ​ຄູ່​ຮ່ວມ​ທຸ­ລະ​ກິດ​ດ້ວຍ​ກັນ​ທີ່​ເຫັນ​ໄດ້​ເຖິງ​ຄວາມ​ສຳ­ຄັນ ແລະ ຄວາມ​ສາ­ມາດ​ໃນ​ການ​ທຸ້ມ​ເຫື່ອ­ແຮງ​ກາຍ ແລະ ແຮງ​ໃຈ​ເຂົ້າ​ໃນ​ການ​ດຳ­ເນີນ​ທຸ­ລະ​ກິດ ໄປ​ຄຽງ​ຄູ່​ກັບ​ການ​ຊຸກ­ຍູ້​ສົ່ງ­ເສີມ​ປະ­ຊາ­ຊົນ​ຢູ່​ເຂດ​ຊົນ­ນະ­ບົດ​ໃຫ້​ມີ​ຊີ­ວິດ​ການ​ເປັນ​ຢູ່​ທີ່​ດີ​ຂຶ້ນ ຫຼັງ​ຈາກ​ທີ່​ໄດ້​ຮັບ​ລາ­ງວັນ​ດັ່ງ­ກ່າວ ຕົນ​ເອງ​ຈະ​ສູ້​ຊົນ​ຂົນ­ຂວາຍ​ຊຸກ­ຍູ້​ການ​ຜະ­ລິດ​ຂະ­ຫຍາຍ​ອອກ​ໄປ​ພາກ​ກາງ ແລະ ພາກ​ເໜືອ​ຕື່ມ​ອີກ ປັດ­ຈຸ­ບັນ ກຳ­ລັງ​ຂຽນ​ໂຄງ­ການ​ລຶ­ບລ້າງ​ຄວາມ­ທຸກ​ຍາກ​ຮ່ວມ​ກັບ​ຄອບ­ຄົວ​ການ​ນຳ ເພື່ອ​ຊ່ວຍ­ເຫຼືອ​ປະ­ຊາ­ຊົນ​ທຸກ​ຍາກ​ຢູ່​ບ້ານ​ຜາ​ລະ­ແວກ ເມືອງ​ຮົ່ມ ແຂວງ​ໄຊ​ສົມ­ບູນ ຈາກ​ການ​ໄປ​ສຳ​ຫຼວດ​ເຫັນ​ວ່າ ປະ­ຊາ­ຊົນ​ຍັງ​ມີ​ຄວາມ­ທຸກ​ຍາກ​ຢູ່ ດັ່ງ­ນັ້ນ ເພື່ອ​ຊ່ວຍ​ໃຫ້​ເຂົາ­ເຈົ້າ​ມີ​ຊີ­ວິດ​ການ​ເປັນ​ຢູ່​ດີ​ຂຶ້ນ ຕົນ​ເອງ​ຈະ​ໄປ​ຊຸກ­ຍູ້​ປະ­ຊາ­ຊົນ​ເຮັດ​ການ​ຜະ­ລິດ​ມາ­ສູ່​ຕະ­ຫຼາດ ເພື່ອ​ສ້າງ​ລາຍ​ຮັບ​ໃຫ້​ເຂົາ­ເຈົ້າ ແລະ ນຳ­ພາ​ຫຼຸດ​ພົ້ນ​ອອກ​ຈາກ​ຄວາມ­ທຸກ​ຍາກ​ເທື່ອ​ລະ​ກ້າວ.

    ສຳ­ລັບ​ບໍ­ລິ­ສັດ ປາກ​ຊ່ອງ​ພັດ­ທະ­ນາ ຂາ​ອອກ-ຂາ​ເຂົ້າ ຈຳ­ກັດ​ຜູ້​ດຽວ ໄດ້​ເຄື່ອນ​ໄຫວ​ທຸ­ລະ​ກິດ​ໂດຍ​ການ​ຊຸກ­ຍູ້​ສົ່ງ­ເສີມ​ປະ­ຊາ­ຊົນ​ປູກ​ພືດ​ກະ­ສິ­ກຳ​ປະ­ກອບ​ມີ ພືດ​ຜັກ ໝາກ­ຖົ່ວ ໝາກ­ກ້ວຍ ແລະ ພືດ​ຜັກ​ຕາມ​ລະ­ດູ​ການ ພ້ອມ​ນັ້ນ ໄດ້​ເນັ້ນ​ໜັກ​ໂຄງ­ການ​ປູກ​ມັນ­ຕົ້ນ​ອິນ​ຊີ ທີ່​ໄດ້​ປະ­ຕິ­ບັດ​ໃນ​ຮູບ​ແບບ 2+3 ໃນ​ນີ້ ປະ­ຊາ­ຊົນ​ເປັນ​ດິນ ແລະ ແຮງ​ງານ ສ່ວນ​ບໍ­ລິ­ສັດ​ຈະ​ເປັນ​ຜູ້​ສະ­ໜອງ​ທຶນ ຫຼື ປັດ​ໄຈ​ການ​ຜະ­ລິດ ພ້ອມ​ນັ້ນ ໄດ້​ຊຸກ­ຍູ້​ສົ່ງ­ເສີມ​ດ້ວຍ​ການ​ເຝິກ​ເຕັກ­ນິກ​ດ້ານ​ວິ­ຊາ​ການ​ຕ່າງໆ ເພື່ອ​ໃຫ້​ປະ­ຊາ­ຊົນ​ເຂົ້າ​ຮ່ວມ​ໂຄງ­ການ ທັງ​ເປັນ​ຕະ­ຫຼາດ​ຮັບ​ຊື້​ທີ່​ແນ່­ນອນ ສະ­ແດງ​ອອກ​ຜົນ​ຜະ­ລິດ​ສ່ວນ​ຫຼາຍ ແມ່ນ​ສົ່ງ​ອອກ​ໄປ​ປະ­ເທດ​ໄທ​ຜ່ານ​ດ່ານ​ຊ່ອງ​ເມັກ ແຂວງ​ຈຳ­ປາ​ສັກ 85% ແລະ ບໍ­ລິ­ສັດ​ໄດ້​ເຮັດ​ສັນ­ຍາ​ຊື້​ສິນ­ຄ້າ​ກະ­ສິ­ກຳ​ກັບ​ຕ່າງ­ປະ­ເທດ​ມີ​ກຳ­ນົດ 10 ປີ.

ຂ່າວທີ່ກ່ຽວຂ້ອງ