ຫາລືບັນຫາສຳຄັນ ກຽມໃຫ້ກອງປະຊຸມລັດຖະມົນຕີໄອຊີທີອາຊຽນ

966 23 ຕ.ລ. 2019 ຂ່າວໜ້າ​ໜຶ່ງ
ຫາລືບັນຫາສຳຄັນ ກຽມໃຫ້ກອງປະຊຸມລັດຖະມົນຕີໄອຊີທີອາຊຽນ

    ສປປ ລາວ ກໍ​ຄື ກະ­ຊວງ​ໄປ­ສະ­ນີ ໂທລະ​ຄົມ­ມະ­ນາ­ຄົມ ແລະ ການ​ສື່­ສານ (ປທສ) ໄດ້​ຮັບ​ກຽດ​ເປັນ​ເຈົ້າ­ພາບ​ຈັດ​ກອງ​ປະ­ຊຸມ​ເຈົ້າ​ໜ້າ­ທີ່​ອາ­ວຸ­ໂສ​ໂທລະ​ຄົມ​ອາ​ຊຽນ ຄັ້ງ​ທີ 20 (The 20th ASEAN Telecommunications and Information Technology Senior Officials’ Meeting-TELSOM) ແລະ ກອງ​ປະ­ຊຸມ​ປິ່ນ​ອ້ອມ​ຂຶ້ນ​ທີ່​ໂຮງ­ແຮມ​ແລນ​ມາກ ນະ­ຄອນ­ຫຼວງ​ວຽງ​ຈັນ ວັນ​ທີ 22?23 ຕຸ­ລາ 2019 ເປັນ​ປະ­ທານ​ຂອງ​ທ່ານ ພູ​ຂົງ ຈິດ​ຮູບ​ໂລກ ຫົວ­ໜ້າ​ກົມ​ແຜນ­ການ ແລະ ການ​ຮ່ວມ​ມື​ກະ­ຊວງ ປທສ ມີ​ບັນ­ດາ​ເຈົ້າ​ໜ້າ­ທີ່​ອາ­ວຸ­ໂສ​ໂທລະ​ຄົມ ຂອງ 10 ປະ­ເທດ​ອາ​ຊຽນ ແລະ ບັນ­ດາ​ປະ­ເທດ​ຄູ່​ຮ່ວມ​ເຈລະ­ຈາ​ເຂົ້າ​ຮ່ວມ.

    ກອງ​ປະ­ຊຸມ​ຄັ້ງ​ນີ້ ເຈົ້າ​ໜ້າ­ທີ່​ອາ­ວຸ­ໂສ​ໄດ້​ສຸມ​ໃສ່​ປືກ​ສາ​ຫາ­ລື ບັນ­ຫາ​ທີ່​ສຳ­ຄັນ​ໃນ​ການ​ກະ­ກຽມ​ເນື້ອ​ໃນ​ທີ່​ຈະ​ນຳ­ໄປ​ສະ­ເໜີ​ຮັບ­ຮອງ​ໃນ​ກອງ​ປະ­ຊຸມ​ລັດ­ຖະ­ມົນ­ຕີ ໄອ​ຊີ​ທີ​ອາ​ຊຽນ ຄັ້ງ​ທີ 19 (TELMIN 19) ທີ່​ຈະ​ຈັດ​ຂຶ້ນ​ວັນ​ທີ 24 ຕຸ­ລາ 2019  ເປັນ­ຕົ້ນ ທົບ​ທວນ­ຄືນ​ຄວາມ​ຄືບ​ໜ້າ​ການ­ຈັດ­ຕັ້ງ​ປະ­ຕິ­ບັດ ບັນ­ດາ​ກິດ­ຈະ­ກຳ​ຕ່າງໆ​ປະ­ຈຳ​ປີ 2019 ທີ່​ນອນ​ໃນ​ແຜນ​ແມ່​ບົດ ໄອ​ຊີ​ທີ​ອາ​ຊຽນ (AIM 2020) ແລະ ການ​ກຳ­ນົດ​ບັນ­ດາ​ຕົວ​ຊີ້​ວັດ ຜົນ​ການ­ຈັດ­ຕັ້ງ​ປະ­ຕິ­ບັດ​ກິດ­ຈະ­ກຳ ແລະ ການ​ແຂ່ງ­ຂັນ​ຜະ­ລິດ​ຕະ​ພັນ ໄອ​ຊີ​ທີ​ອາ​ຊຽນ ປະ­ຈຳ​ປີ 2019 ພ້ອມ​ນີ້ ຍັງ​ໄດ້​ຜ່ານ​ຮ່າງ​ຂອບ​ການ​ຮ່ວມ​ມື​ອາ​ຊຽນ ດ້ານ​ການ​ຄຸ້ມ​ຄອງ​ຂໍ້​ມູນ​ດິ​ຈິ​ຕອນ ແລະ ຮ່າງ ເອ­ກະ­ສານ​ແນວ­ທາງ​ຂອງ​ອາ​ຊຽນ​ໃນ​ການ​ສ້າງ​ຄວາມ​ເຂັ້ມ­ແຂງ ແລະ ການ​ປັບ­ປຸງ​ລະ­ບົບ​ສາຍ​ສົ່ງ​ໃຕ້​ທະ­ເລ​ຂອງ​ອາ​ຊຽນ ພິ­ຈາ­ລະ­ນາ​ຕໍ່​ກັບ​ເອ­ກະ­ສານ​ແນວ​ຄວາມ​ຄິດ ກ່ຽວ​ກັບ​ແຜນ​ແມ່​ບົດ​ດິ​ຈິ​ຕອນ​ອາ​ຊຽນ 2025 ປະ­ກອບ​ມີ​ບັນ­ດາ​ຍຸດ​ທະ​ສາດ ແລະ ຂໍ້​ລິ​ເລີ່ມ​ທີ່​ສາ­ມາດ​ຂັບ​ເຄື່ອນ​ການ​ຫັນ​ເປັນ​ເສດ­ຖະ­ກິດ ແລະ ສັງ­ຄົມ​ດິ​ຈິ​ຕອນ ແຕ່​ປີ 2020 ຮອດ​ປີ 2025 ທົບ​ທວນ­ຄືນ​ກ່ຽວ​ກັບ​ຮ່າງ​ພາ­ລະ​ບົດ­ບາດ​ໃໝ່ ຂອງ​ກອງ​ປະ­ຊຸມ​ລັດ­ຖະ­ມົນ­ຕີ​ດິ​ຈິ​ຕອນ​ອາ​ຊຽນ ແລະ ກອງ​ປະ­ຊຸມ​ເຈົ້າ​ໜ້າ­ທີ່​ອາ­ວຸ­ໂສ​ດິ​ຈິ​ຕອນ​ອາ​ຊຽນ ຕາມ​ລຳ­ດັບ ເພື່ອ​ນຳ­ໄປ​ສະ­ເໜີ​ຮັບ­ຮອງ​ໃນ​ກອງ​ປະ­ຊຸມ TELMIN 19 ປຶກ­ສາ​ຫາ­ລື​ກ່ຽວ​ກັບ​ການ​ກະ­ກຽມ​ເນື້ອ​ໃນ​ສຳ­ລັບ​ກອງ​ປະ­ຊຸມ TELMIN 19 ເຊັ່ນ: ວາ­ລະ​ກອງ​ປະ­ຊຸມ​ຂອງ​ບັນ­ດາ​ລັດ­ຖະ­ມົນ­ຕີ​ອາ​ຊຽນ ລັດ­ຖະ­ມົນ­ຕີ​ບວກ​ປະ­ເທດ​ຄູ່​ຮ່ວມ​ເຈລະ­ຈາ ແລະ ສະ­ຫະ­ພາບ​ໂທລະ​ຄົມ­ມະ­ນາ­ຄົມ​ສາ­ກົນ (ITU) ຮ່າງ​ຖະ­ແຫຼງ­ການ​ວຽງ​ຈັນ ແລະ ບົດ​ຖະ­ແຫຼງ​ຂ່າວ​ຮ່ວມ.

    ນອກ​ນີ້ ຍັງ​ໄດ້​ທົບ​ທວນ­ຄືນ​ການ​ຮ່ວມ​ມື​ໃນ​ໄລ­ຍະ​ຜ່ານ​ມາ ແລະ ແຜນ­ການ​ຮ່ວມ​ມື​ປີ 2019 ກັບ​ບັນ­ດາ​ປະ­ເທດ​ຄູ່​ຮ່ວມ​ເຈລະ­ຈາ (ຈີນ ຍີ່­ປຸ່ນ ສ ເກົາ­ຫຼີ ອິນ​ເດຍ ອາ​ເມ​ຣິ​ກາ ເອີ​ລົບ (EU) ແລະ ສະ­ຫະ­ພາບ​ໂທລະ​ຄົມ­ມະ­ນາ­ຄົມ​ສາ­ກົນ) ພ້ອມ​ນັ້ນ ໄດ້​ຄົ້ນ­ຄວ້າ​ເຫັນ​ດີ​ຕໍ່​ຂໍ້​ສະ­ເໜີ​ຂອງ​ຍີ່­ປຸ່ນ ໃນ​ການ​ສືບ­ຕໍ່​ຈັດ​ກິດ­ຈະ­ກຳ​ເຝິກ­ອົບ­ຮົມ​ວຽກ​ງານ​ຄວາມ​ປອດ​ໄພ​ທາງ​ໄຊ​ເບີ​ໃຫ້​ບັນ­ດາ​ປະ­ເທດ​ສະ­ມາ­ຊິກ​ທີ່​ສູນ ASEAN-Japan Cybersecurity Capacity Building Centre (AJCCBC) ປະ­ເທດ​ໄທ ໄລ­ຍະ​ທີ 2.

    ຕອນ​ທ້າຍ​ຄະ­ນະ​ຜູ້​ແທນ​ຈາກ​ບັນ­ດາ​ປະ­ເທດ​ສະ­ມາ­ຊິກ​ອາ​ຊຽນ ໄດ້​ສະ­ແດງ​ຄວາມ​ຮູ້​ບູນ​ຄຸນ​ມາ​ຍັງ​ລັດ­ຖະ­ບານ ແລະ ປະ­ຊາ­ຊົນ​ລາວ​ທີ່​ໄດ້​ຕ້ອນ­ຮັບ​ຢ່າງ​ອົບ​ອຸ່ນ ແລະ ກະ­ກຽມ​ດ້ານ​ຕ່າງໆ​ໃນ​ການ​ເປັນ​ເຈົ້າ­ພາບ​ຈັດ​ກອງ​ປະ­ຊຸມ TELSOM ຄັ້ງ​ທີ 20 ແລະ ກອງ​ປະ­ຊຸມ​ປິ່ນ​ອ້ອມ​ຄັ້ງ​ນີ້​ຕື່ມ​ອີກ

ຂ່າວທີ່ກ່ຽວຂ້ອງ