ທ່ານ ໄຊສົມພອນ ພົມວິຫານ ຊຸກຍູ້ການພັດທະນາເສດຖະກິດຢູ່ເມືອງສັງທອງ

1.047 23 ຕ.ລ. 2019 ຂ່າວໜ້າ​ໜຶ່ງ
ທ່ານ ໄຊສົມພອນ ພົມວິຫານ ຊຸກຍູ້ການພັດທະນາເສດຖະກິດຢູ່ເມືອງສັງທອງ

    ທ່ານ ໄຊ​ສົມ​ພອນ ພົມ­ວິ­ຫານ ປະ­ທານ​ສູນ​ກາງ​ແນວ​ລາວ​ສ້າງ​ຊາດ ພ້ອມ​ຄະ­ນະ ເຄື່ອນ​ໄຫວ​ຢ້ຽມ­ຢາມ​ ແລະ ຊຸກ­ຍູ້​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແລະ ການ​ຜະ­ລິດ​ເປັນ​ສິນ­ຄ້າ ຢູ່​ເມືອງ​ສັງ​ທອງ ນະ­ຄອນ­ຫຼວງ​ວຽງ​ຈັນ ວັນ​ທີ 20 ຕຸ­ລາ 2019 ໂດຍ​ໄດ້​ຮັບ​ການ​ຕ້ອນ­ຮັບ​ຈາກ​ທ່ານ ດາວ​ເພັດ ອາ​ລຸນ ເຈົ້າ­ເມືອງ​ສັງ​ທອງ ພ້ອມ​ດ້ວຍ​ພາກ­ສ່ວນ​ກ່ຽວ­ຂ້ອງ.

    ທ່ານ ໄຊ​ສົມ​ພອນ ພົມ­ວິ­ຫານ ກໍ​ໄດ້​ຮັບ​ຟັງ​ການ​ລາຍ​ງານ​ສະ­ພາບ​ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ ແລະ ການ​ຜະ­ລິດ​ເປັນ​ສິນ­ຄ້າ​ຂອງ​ເມືອງ​ສັງ​ທອງ ໂດຍ​ສະ­ເພາະ ວຽກ​ງານ​ກະ­ສິ­ກຳ ຈາກ​ທ່ານ​ເຈົ້າ­ເມືອງ ຈາກ​ນັ້ນ ທ່ານ​ປະ­ທານ​ສູນ​ກາງ​ແນວ​ລາວ​ສ້າງ​ຊາດ ກໍ​ໄດ້​ສະ­ແດງ​ຄວາມ​ຊົມ­ເຊີຍ ແລະ ຕີ​ລາ­ຄາ​ສູງ​ຕໍ່​ຜົນ ສຳ­ເລັດ ໃນ​ການ­ຈັດ­ຕັ້ງ​ປະ­ຕິ­ບັດ​ແຜນ​ພັດ­ທະ­ນາ ເສດ­ຖະ­ກິດ-ສັງ­ຄົມ ທີ່​ຄະ­ນະ​ພັກ-ຄະ­ນະ​ນຳ ກໍ​ຄື ປະ­ຊາ­ຊົນ​ຊາວ​ເມືອງ​ສັງ​ທອງ​ຍາດ​ມາ​ໄດ້​ໃນ​ໄລ­ຍະ​ຜ່ານ​ມາ ພ້ອມ​ທັງ​ໄດ້​ຍົກ​ໃຫ້​ເຫັນ​ຄວາມ​ສຳ­ຄັນ​ຂອງ​ວຽກ​ງານ​ແນວ​ລາວ​ສ້າງ​ຊາດ ແລະ ເນັ້ນ​ຫຼາຍ​ບັນ­ຫາ​ໃຫ້​ຄະ­ນະ​ກຳ­ມະ­ການ​ແນວ​ລາວ​ສ້າງ​ຊາດ​ເມືອງ ບ້ານ ແລະ ພາກ­ສ່ວນ​ກ່ຽວ­ຂ້ອງ ເພີ່ມ​ທະ­ວີ​ກ້ອນ​ກຳ­ລັງ​ມະ­ຫາ​ສາ­ມັກ­ຄີ​ທຸກ​ຊົນ­ເຜົ່າ ຊັ້ນ​ຄົນ ສາ­ສະ­ໜາ ເພດ ໄວ ໃຫ້​ໜັກ​ແໜ້ນ​ເຂັ້ມ ແຂງ ເອົາ­ໃຈ­ໃສ່​ໂຄ­ສະ­ນາ​ປຸກ­ລະ­ດົມ ເສີມ​ຂະ­ຫຍາຍ​ສິດ​ເປັນ​ເຈົ້າ​ຂອງ​ປະ­ຊາ­ຊົນ ໃນ​ການ​ປະ­ຕິ­ບັດ​ແນວ­ທາງ​ນະ­ໂຍ­ບາຍ​ຂອງ​ພັກ ແລະ ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ລັດ ຄົ້ນ­ຄວ້າ​ຜັນ​ຂະ­ຫຍາຍ​ບັນ­ດາ​ແນວ ທາງ​ນະ­ໂຍ­ບາຍ​ຂອງ​ພັກ-ລັດ​ຫັນ​ເປັນ​ແຜນ​ງານ ເປັນ​ໂຄງ­ການ​ລະ­ອຽດ ເອົາ­ໃຈ­ໃສ່​ຫັນ​ລົງ​ຮາກ​ຖານ​ທ້ອງ­ຖິ່ນ ຕິດ​ພັນ​ກັບ​ວຽກ​ງານ​ສາມ​ສ້າງ ຕາມ 4 ເນື້ອ​ໃນ 4 ຄາດ­ໝາຍ ສືບ­ຕໍ່​ປະ­ສານ​ສົມ­ທົບ​ກັບ​ພາກ­ສ່ວນ​ກ່ຽວ­ຂ້ອງ ແກ້​ໄຂ​ປາ­ກົດ­ການ​ຫຍໍ້­ທໍ້ ແລະ ຂໍ້​ຂັດ​ແຍ້ງ​ຕ່າງໆ​ໃນ​ສັງ­ຄົມ​ໃຫ້​ໝົດ​ໄປ.

    ໂອ­ກາດ​ນີ້ ທ່ານ​ປະ­ທານ​ສູນ​ກາງ​ແນວ​ລາວ​ສ້າງ​ຊາດ ພ້ອມ​ຄະ­ນະ​ກໍ​ໄດ້​ເດີນ​ໄປ​ຢ້ຽມ­ຢາມ​ຄອບ­ຄົວ​ຕົວ​ແບບ​ໃນ​ການ​ປູກ​ຕົ້ນ­ໄມ້​ກິນ​ໝາກ ຢ້ຽມ­ຢາມ​ພື້ນ​ທີ່​ປູກ​ເຂົ້າ​ອິນ​ຊີ ປູກ​ຫຍ້າ​ຫວານ (ຫຍ້າ​ງົວ) ແລະ ການ​ລ້ຽງ​ງົວ​ຂອງ​ເມືອງ​ສັງ​ທອງ ຕື່ມ​ອີກ.

ຂ່າວທີ່ກ່ຽວຂ້ອງ