ເບິ່ງບ້ານເຂົາເອົາບົດຮຽນ 24-10-2019

1.296 24 ຕ.ລ. 2019 ຫົວຂໍ້ຂ່າວອື່ນໆ

    ມື້­ນີ້ ມີ​ຂ່າວ​ກ່ຽວ​ກັບ​ການ​ຕັດ­ສິນ​ລົງ­ໂທດ ລັດ­ຖະ­ມົນ­ຕີ​ຄົນ​ໜຶ່ງ ຢູ່​ປະ­ເທດ​ພູ​ຖານ ຍ້ອນ​ໄດ້​ສ້າງ​ເອ­ກະ­ສານ​ປອມ​ຮຽກ­ຮ້ອງ​ເງິນ​ປະ­ກັນ​ໄພ ຕໍ່​ໃສ່​ມາດ​ຕະ­ການ​ຂອງ​ຈີນ ໃນ​ການ​ຫ້າມ​ຄ້າ​ງາ​ຊ້າງ ແລະ ບັນ­ຫາ​ພະ­ນັກ­ງານ​ຜີ.

    ທີ່ ພູ​ຖານ: ຂ່າວ​ຕ່າງ­ປະ­ເທດ​ໃນ​ທ້າຍ​ເດືອນ​ສິງ­ຫາ​ປີ​ນີ້ ໄດ້​ເວົ້າ​ກ່ຽວ​ກັບ​ຄະ­ດີ​ລັດ­ຖະ­ມົນ­ຕີ​ທ່ານ​ໜຶ່ງ​ຂອງ​ປະ­ເທດ​ພູ​ຖານ ທີ່​ສ້າງ​ເອ­ກະ­ສານ​ປອມ​ແປງ​ກ່ຽວ​ກັບ​ການ​ປະ­ກັນ​ໄພ​ລົດ​ຂອງ​ທ່ານ ເລື່ອງ​ມີ​ຢູ່​ວ່າ ທ່ານ ເຊຣັບ ກະ​ເຢັນ​ເຊັນ (Sherub Gyeltshen) ລັດ­ຖະ­ມົນ­ຕີ​ກະ­ຊວງ​ພາຍ​ໃນ​ພູ​ຖານ ຖືກ​ສານ​ຕັດ­ສິນ​ໃຫ້​ໄປ​ນອນ​ໃຊ້​ກຳ​ຢູ່​ຄຸກ​ເປັນ​ເວ­ລາ​ສອງ​ເດືອນ ຍ້ອນ​ໄດ້​ນຳ​ໃຊ້​ເອ­ກະ­ສານ​ປະ­ກັນ​ໄພ​ລົດ​ປອມ ເພື່ອ​ທວງ​ຄ່າ​ທົດ​ແທນ​ເປັນ​ຈຳ­ນວນ​ເງິນ 226.546 Nu (ສະ­ກຸນ​ເງິນ​ພູ​ຖານ​ມີ​ມູນ​ຄ່າ​ເທົ່າ​ກັບ 3.236 ໂດ​ລາ​ສະ­ຫະ­ລັດ) ໂດຍ​ທ່ານ​ລັດ­ຖະ­ມົນ­ຕີ​ອ້າງ​ວ່າ ລົດ​ໂຕ​ໂຍ​ຕ້າ​ປຼາ​ໂດ​ຂອງ​ທ່ານ ໄດ້​ປະ­ສົບ​ອຸ­ປະ­ຕິ­ເຫດ​ຢູ່​ເຂດ​ເມືອງ​ລຳ​ເປຣີ ບົນ​ເສັ້ນ­ທາງ​ຫຼວງ​ແຕ່​ນະ­ຄອນ­ຫຼວງ​ທິມ​ພຸ ຫາ​ເມືອງ​ວາງ​ດູ ໃນ​ປີ 2016 ຂ່າວ​ບອກ​ວ່າ​ພາຍ­ຫຼັງ​ສືບ­ສວນ ແລະ ສອບ​ສວນ​ລະ­ອຽດ​ຄວາມ​ຈິງ​ກໍ​ໂປ­ໂລ​ອອກ​ມາ​ໃຫ້​ເຫັນ​ວ່າ ການ​ກ່າວ​ອ້າງ​ກ່ຽວ​ກັບ​ອຸ­ປະ­ຕິ­ເຫດ​ນັ້ນ ບໍ່​ມີ​ມູນ​ຄວາມ​ຈິງ ມັນ​ເປັນ​ການ​ເສກ​ສັນ​ປັ້ນ​ເລື່ອງ​ເພື່ອ​ໃຫ້​ໄດ້​ເງິນ​ແບບ​ງ່າຍໆ ເລື່ອງ​ນີ້​ຄວນ​ເປັນ​ບົດ­ຮຽນ​ເຕືອນ​ຜູ້​ບຸນ​ໜັກ​ສັກ​ໃຫຍ່​ວ່າ ເມື່ອ​ມີ​ຄວາມ​ຜິດ​ແລ້ວ ແນ່­ນອນ​ຕ້ອງ​ໜີ​ບໍ່​ມົ້ມ​ມື​ກົດ­ໝາຍ ບໍ່​ວ່າ​ຜູ້­ກ່ຽວ​ຈະ​ຢູ່​ສູງ​ພຽງ​ຟ້າ ຫຼື ຢູ່​ຕ່ຳ​ຈຳ​ດິນ​ກໍ​ຕາມ.

    ທີ່ ສປ ຈີນ: ຂ່າວ​ເກົ່າ​ທີ່​ເລົ່າ­ຄືນ​ໃໝ່​ໃນ​ວັນ​ນີ້ ແມ່ນ​ເລື່ອງ​ມາດ​ຕະ­ການ​ຂອງ​ທາງ​ການ​ຈີນ ເພື່ອ​ກຳ­ຈັດ​ພະ­ນັກ­ງານ​ຜີ (Phantom Staffess) (ໜັງ­ສື​ພີມ China Daily Asia Week 10-16/04/2014) ມາດ​ຕະ­ການ​ກຳ­ຈັດ​ພະ­ນັກ­ງານ​ຜີ ທີ່​ມີ​ແຕ່​ຊື່​ກິນ​ເງິນ­ເດືອນ​ແຕ່​ບໍ່​ມີ​ຕົນ​ໂຕ​ເຮັດ​ວຽກ​ຕົວ​ຈິງ ນອນ​ຢູ່​ໃນ​ສະ­ໜາມ­ຮົບ​ລວມ ເພື່ອ​ຕ້ານ​ພະ­ຍາດ​ສໍ້​ລາດ​ບັງ​ຫຼວງ ກໍ​ຄື ການ​ໃຊ້​ຈ່າຍ​ຟຸມ​ເຟືອຍ​ງົບ­ປະ­ມານ​ຂອງ​ລັດ ຂ່າວ​ບອກ​ວ່າ​ແຂວງ ເຮີ​ເປ (Hebei) ນັ້ນ ມີ​ພະ­ນັກ­ງານ​ຜີ​ຫຼາຍ​ກວ່າ​ໝູ່​ຄື​ມີ​ຈຳ­ນວນ 55.793 ຄົນ ຖັດ​ມາ​ກໍ​ແມ່ນ​ແຂວງ​ສີ​ຈວນ (Sichuan) ມີ​ຈຳ­ນວນ 28.466 ຄົນ ແລະ ແຂວງ​ເຮີ​ນານ ມີ 15.022 ຄົນ ພະ­ນັກ­ງານ​ຜີ​ຈຳ­ພວກ​ນີ້ ເວົ້າ​ແທ້​ກໍ​ແມ່ນ​ເສືອ​ນອນ​ກິນ​ບໍ່​ມີ­ໜ້າ​ເຮັດ​ວຽກ​ແຕ່​ໄດ້​ເງິນ­ເດືອນ​ກິນ​ສະ­ບາຍ ຮອງ​ລົງ​ມາ​ຈາກ 3 ແຂວງ​ທີ່​ກ່າວ​ມາ​ຂ້າງ​ເທິງ​ນັ້ນ ກໍ​ມີ​ນະ­ຄອນ­ຫຼວງ​ປັກ​ກິ່ງ ຊຶ່ງ​ມີ​ພະ­ນັກ­ງານ​ຜີ ຈຳ­ນວນ 531 ຄົນ ແລະ ວ່າ​ໃນ​ນັ້ນ 327 ຄົນ​ຖືກ​ປັດ​ເຂ່ຍ​ອອກ​ຈາກ​ບັນ­ຊີ​ຮັບ​ເງິນ­ເດືອນ​ແລ້ວ ທີ່​ເປັນ​ໜ້າ​ສັນ­ລະ­ເສີນ ກໍ​ຄື ນະ­ຄອນ​ຊຽງ​ໄຮ ແລະ ຕີ​ເບດ (ເຂດ​ປົກ­ຄອງ​ຕົນ​ເອງ) ຢູ່ 2 ແຫ່ງ​ນີ້ ບໍ່​ພົບ​ເຫັນ​ພະ­ນັກ­ງານ​ຜີ​ຈັກ​ຄົນ​ເລີຍ ອີກ​ຂ່າວ​ໜຶ່ງ​ກ່ຽວ​ກັບ ສປ ຈີນ ນັ້ນ ກໍ​ແມ່ນ​ເລື່ອງ​ການ​ສັ່ງ​ຫ້າມ​ຄ້າ­ຂາຍ​ງາ​ຊ້າງ ຊຶ່ງ​ເລີ່ມ​ມີ​ຜົນ​ສັກ­ສິດ​ໃນ​ວັນ​ທີ 31 ເດືອນ​ທັນ­ວາ ປີ 2017 ທາງ​ການ​ກ່ຽວ­ຂ້ອງ​ຂອງ​ຈີນ ໄດ້​ປະ­ກາດ​ໃຫ້​ທົ່ວ​ສັງ­ຄົມ​ຊາບ​ວ່າ ນັບ​ແຕ່​ເວ­ລາ​ນີ້​ເປັນ­ຕົ້ນ​ໄປ ການ​ຂາຍ ແລະ ຊື້​ງາ​ຊ້າງ ຜະ­ລິດ​ຕະ​ພັນ​ຈາກ​ງາ​ຊ້າງ​ຢູ່​ຕະ­ຫຼາດ ຮ້ານ ກໍ​ຄື ຈາກ​ບຸກ­ຄົນ​ແມ່ນ​ການ​ລະ­ເມີດ​ກົດ­ໝາຍ ຜູ້​ຄ້າ​ຄົນ​ໃດ​ກໍ​ຕາມ​ທີ່​ອ້າງ​ວ່າ​ເຂົາ​ເປັນ​ຜູ້​ຄ້າ​ງາ​ຊ້າງ ທີ່​ໄດ້​ຮັບ​ອະ­ນຸ­ຍາດ​ຈາກ​ທາງ​ການ ຂໍ​ໃຫ້​ຮູ້​ໂລດ​ວ່າ​ເຂົາ​ກຳ­ລັງ​ເວົ້າ​ຕົວະ​ແບບ​ຕາ​ດຳໆ...ເຂົາ​ກຳ­ລັງ​ລະ­ເມີດ​ກົດ­ໝາຍ !.

ຂ່າວທີ່ກ່ຽວຂ້ອງ