ນະຄອນຫຼວງ ເລັ່ງຄັດເລືອກນັກກີລາຮ່ວມຊຽງຂວາງເກມ

933 25 ຕ.ລ. 2019 ວົງຈອນກີລາ
ນະຄອນຫຼວງ ເລັ່ງຄັດເລືອກນັກກີລາຮ່ວມຊຽງຂວາງເກມ

    ກອງ​ປະ­ຊຸມ​ປືກ​ສາ​ຫາ­ລື ຫ້າງ​ຫາ​ກະ­ກຽມ​ຄວາມ​ພ້ອມ​ກຳ­ນົດ​ລາຍ­ການ​ກີ­ລາ​ທີ່​ເປັນ​ປາຍ​ແຫຼມ ເພື່ອ​ທວງ​ຕຳ­ແໜ່ງ​ແຊັມ​ເຈົ້າ​ຫຼຽນ​ຄຳ ການ​ແຂ່ງ­ຂັນ​ງານ​ມະ​ຫະ​ກຳ​ກີ­ລາ​ແຫ່ງ​ຊາດ ຄັ້ງ​ທີ XI ຫຼື ຊຽງ​ຂວາງ​ເກມ ທີ່​ແຂວງ​ຊຽງ​ຂວາງ ເປັນ​ເຈົ້າ­ພາບ​ຈັດ​ຂຶ້ນ​ວັນ​ທີ 23 ຕຸ­ລາ 2019 ທີ່​ພະ​ແນກ​ສຶກ​ສາ​ທິ​ການ ແລະ ກີ­ລາ ນະ­ຄອນ­ຫຼວງ​ວຽງ​ຈັນ (ນວ) ເປັນ​ປະ­ທານ​ຂອງ​ທ່ານ ສົມ​ພອນ ສອນ​ດາ­ລາ ຮອງ​ຫົວ­ໜ້າ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ມີ​ທ່ານ ກອງ​ແກ້ວ ແຫ່ງ ດາ​ວົງ​ໄຊ ຫົວ­ໜ້າ​ຂະ­ແໜງ​ກີ­ລາ​ລະ­ດັບ​ສູງ ພ້ອມ​ດ້ວຍ​ຜູ້­ຕາງ­ໜ້າ​ຂະ­ແໜງ​ກີ­ລາ​ມວນ​ຊົນ ແລະ ຂະ­ແໜງ​ພະ­ລະ ແລະ ສິ­ລະ​ປະ​ສຶກ​ສາ ບັນ­ດາ​ຄະ­ນະ​ຄູ​ເຝິກ​ກີ­ລາ 28 ປະ­ເພດ​ເຂົ້າ​ຮ່ວມ.

    ໂອ­ກາດ​ນີ້ ທ່ານ ສົມ​ພອນ ສອນ​ດາ­ລາ ເນັ້ນ​ໃຫ້​ບັນ­ດາ​ຄູ​ເຝິກ​ກີ­ລາ 28 ປະ­ເພດ ຈົ່ງ​ພ້ອມ­ພຽງ​ກັນ​ຮີບ​ຮ້ອນ­ໃຈ ແລະ ເພີ່ມ​ທະ­ວີ​ຄວາມ​ເອົາ­ໃຈ­ໃສ່​ໃນ​ການ­ຈັດ­ຕັ້ງ​ປະ­ຕິ­ບັດ ຕາມ​ແນວ­ທາງ​ນະ­ໂຍ­ບາຍ​ການ​ຊີ້​ນຳ-ນຳ­ພາ​ຂອງ​ການ​ນຳ ນວ ກໍ​ຄື​ແບບ­ແຜນ​ການ​ກະ­ກຽມ​ຄວາມ​ພ້ອມ​ຂອງ​ພະ​ແນກ​ສຶກ​ສາ​ທິ​ການ ແລະ ກີ­ລາ ນວ ມອບ​ໝາຍ​ໃຫ້​ປາ­ກົດ​ຜົນ​ເປັນ​ຈິງ ແນ­ໃສ່​ເຂົ້າ​ຮ່ວມ​ກອບ​ກູ້​ກຽດ​ສັກ​ສີ​ໃຫ້​ທັບ​ນັກ­ກີ­ລາ ນວ ໃນ​ງານ​ກີ­ລາ​ຊຽງ​ຂວາງ​ເກມ 2020 ກັບ​ຄືນ​ມາ​ຍິ່ງ​ໃຫຍ່​ອີກ​ຄັ້ງ.

    ກອງ​ປະ­ຊຸມ​ຄັ້ງ​ນີ້ ເພື່ອ​ເປັນ​ການ​ກຳ­ນົດ​ລາຍ­ການ​ແຂ່ງ­ຂັນ​ຂອງ​ແຕ່​ລະ​ປະ­ເພດ​ກີ­ລາ​ທີ່​ເປັນ​ປາຍ​ແຫຼມ​ຂອງ ນວ ເພື່ອ​ກຽມ​ສົ່ງ​ເຂົ້າ​ຮ່ວມ​ລ່າ​ຫຼຽນ​ຄຳ​ໃນ​ຊຽງ​ຂວາງ ເກມ 2020 ພ້ອມ​ທັງ​ກຳ­ນົດ​ສະ­ຖານ­ທີ່​ເຝິກ­ແອບ​ສ້າງ​ຄວາມ​ສະ­ດວກ​ໃຫ້​ທັບ​ນັກ­ກີ­ລາ ນວ ທັງ 28 ປະ­ເພດ​ກີ­ລາ​ດັ່ງ­ກ່າວ ໂດຍ​ຈຸດ​ເປົ້າ​ໝາຍ​ສະ­ຖານ­ທີ່​ເຝິກ­ແອບ​ທີ່​ສຳ­ຄັນ​ຫຼັກ​ແມ່ນ​ສະ­ໂມ­ສອນ​ກີ­ລາ ໃນ​ຮົ່ມ ພະ​ແນກ​ສຶກ​ສາ​ທິ​ການ ແລະ ກີ­ລາ ນວ (ບ້ານ​ບຶງ​ຂະ​ຫຍອງ) ສະ­ໜາມ​ກີ­ລາ​ເຈົ້າ​ອາ​ນຸ​ວົງ ເມືອງ​ຈັນ­ທະ​ບູ​ລີ ສະ­ໜາມ​ກີ­ລາ​ມະ­ຫາ­ວິ­ທະ­ຍາ­ໄລ​ແຫ່ງ​ຊາດ (ວິ­ທະ­ຍາ​ເຂດ​ດົງ​ໂດກ) ແລະ ສະ­ໂມ­ສອນ​ອື່ນໆ ເປັນ­ຕົ້ນ ໂຮງ­ຮຽນ​ທີ່​ປິ່ນ​ອ້ອມ 9 ຕົວ​ເມືອງ ນອກ​ນັ້ນ​ຍັງ​ມີ​ການ​ກຳ­ນົດ​ໃຫ້​ສະ­ຫະ­ພັນ​ກີ­ລາ​ຕ່າງໆ ເລີ່ມ​ດຳ­ເນີນ​ການ­ຈັດ­ຕັ້ງ​ປະ­ຕິ­ບັດ​ນຳ­ພາ​ນັກ­ກີ­ລາ​ເຄື່ອນ​ໄຫວ​ແຂ່ງ­ຂັນ​ທົດ​ສອບ​ຄວາມ​ສາ­ມາດ ເພື່ອ​ຄັດ​ເລືອກ​ໃຫ້​ໄດ້​ນັກ­ກີ­ລາ​ທີ່​ນອນ​ໃນ​ເປົ້າ​ໝາຍ​ຕົວ​ຈິງ ແນ­ໃສ່​ໃຫ້​ເປັນ​ຂະ​ບວນ​ການ ແລະ ມີ​ບັນ­ຍາ­ກາດ​ຢ່າງ​ຟົດ­ຟື້ນ.

ຂ່າວທີ່ກ່ຽວຂ້ອງ