ປະທານາທິບໍດີ ທຣຳ ປະກາດ​ຍົກ​ເລີກ​ການ​ປິດ​ລ້ອມ​ຕໍ່​ຕວກ​ກີ

1.516 25 ຕ.ລ. 2019 ຂ່າວຕ່າງປະເທດ
ປະທານາທິບໍດີ ທຣຳ ປະກາດ​ຍົກ​ເລີກ​ການ​ປິດ​ລ້ອມ​ຕໍ່​ຕວກ​ກີ

   ໃນ​ການ​ກ່າວ​ປາ​ໄສ​ຢູ່​ທີ່​ທຳ​ນຽບ​ຂາວ​ເມື່ອ​ວັນ​ທີ 23 ຕຸລາ​ນີ້ ປະທານາທິບໍດີ ໂດ​ນາ​​ລ ທຣຳ ຜູ້ນຳ ສ ອາ​ເມ​ຣິ​ກາ ໃຫ້​ຮູ້​ວ່າ ຈະ​ຍົກເລີກ​ການ​ປິດ​ລ້ອມ ທີ່​ໄດ້​ປະຕິບັດ​ຕໍ່​ຕວກ​ກີ ຫຼັງ​ຈາກ​ທີ່​ຕວກ​ກີ​ເປີດ​ສາກ​ໂຈມ​ຕີ​ໂດຍ​ມຸ່ງ​ໃສ່​ກອງ​ກຳລັງ​ຊາວ​ເຄີດ ຢູ່​ໃນ​ຊີ​ຣີ ຕັ້ງແຕ່​ວັນ​ທີ 9 ຕຸລາ​ເປັນຕົ້ນ​ມາ.

    ປະທານາທິບໍດີ ທຣຳ ເວົ້າ​ວ່າ: “ໃນ​ມື້ນີ້​ເອງ ທາງ​ການ​ຕວກ​ກີ ແຈ້ງ​ໃຫ້​ຮູ້​ວ່າ ເຂົາເຈົ້າ​ຈະ​ຢຸດຕິ​ບັ້ນ​ໂຈມ​ຕີ​ຢູ່​ໃນ​ຊີ​ຣີ ແລະ ວ່າ​ຄຳ​ສັ່ງ​ຢຸດ​ຍິງ​ຈະ​ມີ​ຜົນ​ສັກສິດ​ຍາວ​ນານ. ດັ່ງນັ້ນ ພວກ​ເຮົາ​ຈຶ່ງ​ໄດ້​ແຈ້ງ​ໄປ​ຍັງ​ກະຊວງ​ການ​ເງິນ (ຂອງ ສ ອາ​ເມ​ຣິ​ກາ) ໃຫ້​ຍົກເລີກ​ທຸກໆ​ມາດ​ຕະການ​ປິດ​ລ້ອມ (ຕໍ່​ຕວກ​ກີ) ທີ່​ໄດ້​ເລີ່ມ​ປະຕິບັດ​ແຕ່​ວັນ​ທີ 14 ຕຸລາ ເປັນຕົ້ນ​ມາ.”

    ຫຼັງ​ຈາກ​ທີ່​ຕວກ​ກີ ເປີດ​ສາກ​ໂຈມ​ຕີ​ເຂົ້າ​ໃສ່​ເຂດ​ພາກ​ຕາເວັນ​ອອກ​ສ່ຽງ​ເໜືອ​ຊີ​ຣີ ເມື່ອ​ວັນ​ທີ 14 ຕຸລາ ປະທານາທິບໍດີ ທຣຳ ກໍ​ໄດ້​ລົງ​ນາມ​ລັດ​ຖະ​ດຳລັດ ກ່ຽວ​ກັບ​ການ​ປະຕິບັດ​ມາດ​ຕະການ​ປິດ​ລ້ອມ ແລະ ຫ້າມ​ການ​ອອກ​ວີ​ຊາ ໃຫ້​ແກ່​ສະມາຊິກ​ຈຳນວນ​ໜຶ່ງ ຂອງ​ລັດຖະບານ​ຕວກ​ກີ. ຫຼັງ​ຈາກ​ການ​ກ່າວ​ປາ​ໄສ​ຫຼ້າ​ສຸດ​ດັ່ງກ່າວ ຂອງ​ປະທານາທິບໍດີ​ທຣຳ ເວບ​ໄຊ​ຂອງ​ກະຊວງ​ການ​ເງິນ ສ ອາ​ເມ​ຣິ​ກາ ກໍ​ໄດ້​ຢັ້ງຢືນ​ເຖິງ​ການ​ຍົກເລີກ​ການ​ປິດ​ລ້ອມ​ຕໍ່​ກະຊວງ​ປ້ອງ​ກັນ​ປະເທດ ແລະ ກະຊວງ​ພະລັງງານ​ຂອງ​ຕວກ​ກີ.

ຂ່າວທີ່ກ່ຽວຂ້ອງ