ຈັດ​ກອງ​ປະຊຸມ​ສຸດ​ຍອດ ຣັດ​ເຊຍ - ອາ​ຟະ​ຣິກ​ກາ

1.683 25 ຕ.ລ. 2019 ຂ່າວຕ່າງປະເທດ
ຈັດ​ກອງ​ປະຊຸມ​ສຸດ​ຍອດ ຣັດ​ເຊຍ - ອາ​ຟະ​ຣິກ​ກາ

   ການ​ນຳ​ຈາກ​ບັນດາ​ປະເທດ​ໃນ​ທະວີບ​ອາ​ຟະ​ຣິກ​ກາ ບັນດາ​ພັນທະ​ພາບ ແລະ ອົງການ ຂະໜາດ​ໃຫຍ່​ໃນ​ພາກ​ພື້ນ ໄດ້​ເຂົ້າ​ຮ່ວມ​ກອງ​ປະຊຸມ​ຂັ້ນ​ສູງ ຣັດ​ເຊຍ - ອາ​ຟະ​ຣິກ​ກາ ຄັ້ງ​ທີ​ໜຶ່ງ ຊຶ່ງ​ຈັດ​ຂຶ້ນ​ໃນ​ວັນ​ທີ 23 ຕຸລາ​ນີ້ ທີ່​ນະຄອນ ໂຊ​ຈີ (ຣັດ​ເຊຍ) ພາຍ​ໃຕ້​ການ​ເປັນ​ປະທານ​ຮ່ວມ​ຂອງ​ປະທານາທິບໍດີ​ຣັດ​ເຊຍ ວາ​ລາ​ດີ​ເມຍ ປູ​ຕິນ ແລະ ປະທານາທິບໍດີ​ເອ​ຢິບ ອັບ​ແດລ ຟາ​ຕາ ອາ​​ລ ຊີ​ຊີ ທີ່​ດຳລົງ​ຕຳແໜ່ງ​ປະທານ​ຊົ່ວຄາວ​ຂອງ​ສະຫະພາບ ອາ​ຟະ​ຣິກ​ກາ  (AU).

    ຄະນະ​ຈັດ​ຕັ້ງ​ກອງ​ປະຊຸມ​ໃຫ້​ຮູ້​ວ່າ ມີ​ປະທານາທິບໍດີ ແລະ ນາຍົກລັດຖະມົນຕີ 43 ທ່ານ ຮອງ​ປະທານາທິບໍດີ ລັດຖະມົນຕີ​ການ​ຕ່າງປະເທດ ແລະ ເອກ​ອັກ​ຄະ​ລັດ​ຖະ​ທູດ 11 ທ່ານ ເຂົ້າ​ຮ່ວມ​ກອງ​ປະຊຸມ​ດັ່ງກ່າວ. ໃນ​ການ​ປະຊຸມ​ເປັນ​ເວລາ 2 ວັນ​ນັ້ນ ບັນດາ​ເຈົ້າ​ໜ້າທີ່​ຈະ​ສຸມ​ໃສ່​ປຶກສາ​ຫາລື​ບັນຫາ​ການ​ຮ່ວມ​ມື​ໃນ​ຫຼາຍ​ຂົງເຂດ.

    ປະທານາທິບໍດີ ປູ​ຕິນ ກ່າວ​ປາ​ໄສ​ໄຂ​ກອງ​ປະຊຸມ ໂດຍ​ຖະແຫຼງ​ວ່າ ຣັດ​ເຊຍ​ມີ​ກຳນົດ​ທີ່​ຈະ​ເພີ່ມ​ທະວີ​ການ​ມີໜ້າ​ຂອງ​ຕົນ ຢູ່​ໃນ​ທະວີບ​ອາ​ຟະ​ຣິກ​ກາ ພ້ອມ​ກັນ​ນັ້ນ​ທ່ານ​ກໍ​ໃຫ້​ສັນຍາ​ເຖິງ​ການ​ສະໜັບສະໜູນ ຕໍ່​ບັນດາ​ວິ​ສາ​ຫະ​ກິດ​ຂອງ​ຣັດ​ເຊຍ ໃນ​ການ​ປະກອບ​ທຸລະ​ກິດ​ກັບ​ບັນດາ​ຄູ່​ຮ່ວມ​ໃນ​ທະວີບ​ອາ​ຟະ​ຣິກ​ກາ. ໃນ​ຂະນະ​ດຽວ​ກັນ ປະທານາທິບໍດີ ອາ​​ລ ຊີ​ຊີ ກ່າວ​ຢືນຢັນ​ວ່າ ບັນດາ​ປະເທດ​ໃນ​ທະວີບ​ອາ​ຟະ​ຣິກ​ກາ ຄອງ​ຄອຍ​ການ​ປະກອບສ່ວນ​ຈາກ​ຣັດ​ເຊຍ ໃນ​ການ​ພັດທະນາ​ຢູ່​ໃນ​ທະວີບ​ນີ້ ແລະ ຫວັງ​ວ່າການ​ປະຊຸມ​ໃນ​ເທື່ອ​ນີ້ ຈະ​ຕັ້ງ​ຄວາມ​ຫວັງ​ອອກ​ມາ​ໃນ​ອະນາຄົດ ໃຫ້​ແກ່​ການ​ພົວພັນ​ທີ່​ມີ​ຜົນ​ປະໂຫຍດ​ໃຫ້​ແກ່​ທັງ​ສອງ​ຝ່າຍ.

    ການ​ຕີ​ລາຄາ​ຂອງ​ບັນດາ​ຊ່ຽວຊານ ຊີ້​ໃຫ້​ເຫັນ​ວ່າ ເມື່ອ​ຮອດ​ປີ 2050 ຍອດ​ຜະລິດ​ຕະ​ພັນ​ພາຍ​ໃນ​ປະເທດ (GDP) ຂອງ​ທົ່ວ​ທະວີບ​ອາ​ຟະ​ຣິກ​ກາ ຈະ​ບັນລຸ 29.000 ຕື້​ໂດ​ລາ​ສະຫະລັດ. ນັບ​ແຕ່​ປີ 2010 ເປັນຕົ້ນ​ມາ ມູນ​ຄ່າ​ການ​ແລກປ່ຽນ​ສິນຄ້າ ລະຫວ່າງ​ຣັດ​ເຊຍ ກັບ​ອາ​ຟະ​ຣິກ​ກາ ໄດ້​ເພີ່ມ​ຂຶ້ນ​ເກືອບ​ທົບ​ເທົ່າ​ຕົວ ແລະ ບັນລຸ​ກວ່າ 20 ຕື້​ໂດ​ລາ​ສະຫະລັດ ໃນ​ປີ 2018. ຣັດ​ເຊຍ ພວມ​ປະຕິບັດ​ສັນຍາ​ກ່ຽວ​ກັບ​ການ​ສະໜອງ​ອາວຸດ​ໄປ​ຍັງ 20 ປະເທດ​ໃນ​ທະວີບ​ອາ​ຟະ​ຣິກ​ກາ. ນັບ​ແຕ່​ຕົ້ນ​ປີ​ນີ້​ເປັນຕົ້ນ​ມາ ການ​ສົ່ງ​ອອກ​ອາວຸດ​ຂອງ​ຣັດ​ເຊຍ ໄປ​ຍັງ​ທະວີບ​ອາ​ຟະ​ຣິກ​ກາ ຄາດ​ວ່າ​ບັນລຸ​ທີ່​ລະດັບ 4 ຕື້​ໂດ​ລາ​ສະຫະລັດ.

ຂ່າວທີ່ກ່ຽວຂ້ອງ