ທົ່ວ​ໂລກ​ຕ້ອງການ​ເງິນ 300 ຕື້​ໂດ​ລາ ​ເພື່ອ​ຢັບ​ຢັ້ງ​ການ​ຮ້ອນ​ຂຶ້ນ​ຂອງ​ໜ່ວຍ​ໂລກ

393 29 ຕ.ລ. 2019 ຂ່າວຕ່າງປະເທດ
ທົ່ວ​ໂລກ​ຕ້ອງການ​ເງິນ 300 ຕື້​ໂດ​ລາ ​ເພື່ອ​ຢັບ​ຢັ້ງ​ການ​ຮ້ອນ​ຂຶ້ນ​ຂອງ​ໜ່ວຍ​ໂລກ

   ບັນດາ​ນັກວິທະຍາສາດ​ກ່ຽວ​ກັບ​ສິ່ງແວດລ້ອມ​ຂອງ​ສະຫະ​ປະຊາ​ຊາດ (​ສປຊ) ແຈ້ງ​ໃຫ້​ຮູ້ເມື່ອ​ອາທິດ​ທີ່​ຜ່ານ​ມາ​ວ່າ ທົ່ວ​ໂລກ​ຕ້ອງການ​ເງິນ 300 ຕື້​ໂດ​ລາ​ສະຫະລັດ ເພື່ອ​ສະກັດ​ກັ້ນ​ການ​ເພີ່ມ​ຂຶ້ນ​ຂອງ​ການ​ປ່ອຍ​ແກ​​ັສ​ເຮືອນ​ແກ້ວ ແລະ ອາດ​ເຮັດ​ໃຫ້​ຂະ​ບວນ​ການ​ຮ້ອນ​ຂຶ້ນ​ຂອງ​ໜ່ວຍ​ໂລກ ຊັກ​ຊ້າ​ລົງ​ໄດ້ 20 ປີ. ຕົວ​ເລກ​ດັ່ງກ່າວ ເທົ່າ​ກັບ​ຍອດ​ຜະລິດ​ຕະ​ພັນ​ພາຍ​ໃນ​ປະເທດ (GDP) ຂອງ​ປະເທດ​ຊີ​ເລ ຫຼື​ເທົ່າ​ກັບ​ການ​ໃຊ້​ຈ່າຍ​ໃຫ້​ແກ່​ການ​ທະຫານ​ຂອງ​ທົ່ວ​ໂລກ​ພາຍ​ໃນ​ເວລາ 60 ວັນ.

    ພວກ​ນັກວິທະຍາສາດ​ດັ່ງກ່າວ ໃຫ້​ຮູ້​ວ່າ ເງິນ​ຈຳນວນ​ດັ່ງກ່າວ ອາດ​ຈະ​ຖືກ​ນຳໄປ​ໃຊ້​ເພື່ອ​ຜັນ​ຂະຫຍາຍ​ບັນດາ​ມາດ​ຕະການ​ທີ່​ງ່າຍດາຍ ແລະ ມີ​ມາ​ແຕ່​ດົນ​ນານ ເພື່ອ​ຮັກສາ​ກາກ​ບອນ​ຫຼາຍ​ລ້ານ​ໂຕນ​ໄວ້​ຢູ່​ໃນ​ດິນ ຊຶ່ງ​ເປັນ​ຊັບພະຍາກອນ​ທີ່​ພວມ​ຖືກ​ຂຸດ​ຄົ້ນ​ເກີນ​ຂອບ​ເຂດ.

    ເມື່ອ​ເດືອນ​ທີ່​ຜ່ານ​ມາ ກອງ​ປະຊຸມ​ຂອງ ​ສປຊ ກ່ຽວ​ກັບ​ການ​ກາຍເປັນ​ທະເລຊາຍ ຊຶ່ງ​ຈັດ​ຂຶ້ນ​ທີ່​ນະຄອນຫຼວງ ນີວ ແດນ​ລີ ຂອງ​ອິນ​ເດຍ ນັ້ນ 196 ປະເທດ ແລະ ສະຫະພາບ​ເອີ​ຣົບ (EU) ໄດ້​ມີ​ຄຳ​ສັນຍາ​ຮ່ວມ​ກັນ​ອອກ​ມາ ໃນ​ນັ້ນ​ລະບຸ​ວ່າ ແຕ່​ລະ​ປະເທດ​ຈະ​ນຳ​ໃຊ້​ມາດ​ຕະການ​ທີ່​ຈຳເປັນ ເພື່ອ​ຟື້ນ​ຟູ​ທີ່​ດິນ​ທີ່​ຖືກ​ແຫ້ງ​ກະແດ້ງ​ໄປ​ນັ້ນ ພາຍ​ໃນ​ປີ 2030.

ຂ່າວທີ່ກ່ຽວຂ້ອງ