ສະພາ​ຕ່ຳ​ອົດ​ສະ​ຕຣາ​ລີ ຮັບຮອງ​ຮ່າງ​ກົດໝາຍ​ວ່າ​ດ້ວຍ​ການ​ຈຳກັດ​ການ​ໃຊ້​ເງິນສົດ

3.657 29 ຕ.ລ. 2019 ຂ່າວຕ່າງປະເທດ
ສະພາ​ຕ່ຳ​ອົດ​ສະ​ຕຣາ​ລີ ຮັບຮອງ​ຮ່າງ​ກົດໝາຍ​ວ່າ​ດ້ວຍ​ການ​ຈຳກັດ​ການ​ໃຊ້​ເງິນສົດ

   ເມື່ອ​ບໍ່​ດົນ​ມາ​ນີ້ ສະພາ​ຕ່ຳ​ອົດ​ສະ​ຕຣາ​ລີ ໄດ້​ຮັບຮອງ​ຮ່າງ​ກົດໝາຍ​ວ່າ​ດ້ວຍ​ການ​ຫ້າມ​ຊຳ ລະ​ດ້ວຍ​ເງິນສົດ​ເປັນ​ມູນ​ຄ່າ​ເກີນ 10.000 ໂດ​ລາ​ອົດ​ສະ​ຕຣາ​ລີ (ເທົ່າ​ກັບ 6.700 ໂດ​ລາ​ສະຫະລັດ) ແລະ ມີ​ໂທດ​ຈຳ​ຄຸກ​ເປັນ​ເວລາ 2 ປີ ຕໍ່​ຜູ້​ທີ່​ໃຊ້​ເງິນສົດ​ຊຳລະ​ເກີນ​ກຳນົດ​ນີ້ ສຳລັບ​ການ​ຈັດ​ຊື້.

   ຮ່າງ​ກົດໝາຍ​ດັ່ງກ່າວ ເປັນ​ການ​ບັງຄັບ​ໃຫ້​ຊາວ​ອົດ​ສະ​ຕຣາ​ລີ ນຳ​ໃຊ້​ການ​ແລກປ່ຽນ​ຊື້​ຂາຍ ທາງ​ເອ​ເລັກ​ໂຕຣ​ນິກ ຫຼື​ດ້ວຍ ເຊັກ ສຳລັບ​ບັນດາ​ບ້ວງ​ຊຳລະ​ທີ່​ມີ​ມູນ​ຄ່າ​ກວ່າ 10.000 ໂດ​ລາ​ອົດ​ສະ​ຕຣາ​ລີ ແລະ ມີ​ໂທດ​ຈຳ​ຄຸກ 2 ປີ ພ້ອມ​ດ້ວຍ​ເງິນ​ຄ່າ​ປັບ​ໃໝ 25.200 ໂດ​ລາ​ອົດ​ສະ​ຕຣາ​ລີ (ເທົ່າ​ກັບ 17.000 ໂດ​ລາ​ສະຫະລັດ) ຕໍ່​ເປົ້າ​ໝາຍ​ທີ່​ບໍ່​ປະຕິບັດ​ຕາມ​ຂໍ້​ຫ້າມ​ນັ້ນ.

    ຮ່າງ​ກົດໝາຍ​ດັ່ງກ່າວ ຈະ​ນຳ​ໃຊ້​ສຳລັບ​ທຸກໆ​ບ້ວງ​ຊຳລະ​ໃຫ້​ແກ່​ສິນຄ້າ ຫຼື​ການ​ບໍລິການ ເຊັ່ນ​ລົດຍົນ ກຳປັ່ນ​ເຮືອ​ແພ ເຮືອນ​ຢູ່ ແລະ ການ​ດັດແປງ​ເຮືອນ ຂອງ​ບັນດາ​ວິ​ສາ​ຫະ​ກິດ ທີ່​ມີ​ເລກ​ລະຫັດ​ທຸລະ​ກິດ. ເຖິງ​ຢ່າງໃດ​ກໍ​ຕາມ ລັດຖະບານ​ອົດ​ສະ​​ຕຣ​ລີ ໃຫ້​ຮູ້​ວ່າ ມາດ​ຕະການ​ດັ່ງກ່າວ ຈະ​ບໍ່​ນຳ​ໃຊ້​ສຳລັບ​ການ​ແລກປ່ຽນ​ຊື້​ຂາຍ ລະຫວ່າງ​ບຸກຄົນ​ກັບ​ບຸກຄົນ ຕົວຢ່າງ​ວ່າການ​ຄ້າຂາຍ ຂອງ​ສ່ວນ​ບຸກຄົນ ຊຶ່ງ​ຜູ້​ຂາຍ​ບໍ່​ມີ​ເລກ​ລະຫັດ​ທຸລະ​ກິດ ຫຼື​ການ​ຈ່າຍ​ດ້ວຍ​ເງິນສົດ ໃຫ້​ແກ່​ບັນດາ ອົງການ​ການ​ເງິນ. ໃນ​ຂະນະ​ດຽວ​ກັນ ຮ່າງ​ກົດໝາຍ​ດັ່ງກ່າວ ກໍ​ບໍ່​ນຳ​ໃຊ້​ສຳລັບ​ບັນດາ​ປະເພດ​ເງິນ ດີ​ຈີ​​ຕອລ ເຊັ່ນ​ວ່າ ເງິນ ບິດ​ຄອຍ ດັ່ງນີ້​ເປັນຕົ້ນ.

    ຂໍ້​ກຳນົດ​ຕ່າງໆ​ທີ່​ກ່າວ​ມາ​ນັ້ນ ໄດ້​ຮັບ​ການ​ສະເໜີ​ອອກ​ມາ​ຈາກ ກຸ່ມ​ປະຕິບັດ​ໜ້າທີ່​ພິເສດ ທາງ​ດ້ານ​ເສດຖະກິດ ຂອງ​ລັດຖະບານ​ອົດ​ສະ​ຕຣາ​ລີ ຄື​ກັບ​ວ່າ​ເປັນ​ມາດ​ຕະການ​ເພື່ອ​ສະກັດ​ກັ້ນ ບັນດາ​ກຸ່ມ​ແກ້ງ​ອາ​ສະ​ຍາ​ກຳ ໃນ​ການ​ນຳ​ໃຊ້​ເງິນສົດ​ອັນ​ໃຫຍ່​ໂຕ ໃຫ້​ແກ່​ການ​ຊື້​ລົດຍົນ ຊື້​ເຮືອນ ແລະ ເຄື່ອງ​ປະດັບ​ເອ້ ເພື່ອ​ຟອກ​ເງິນ​ທີ່​ໄດ້​ມາ​ຈາກ​ການເຄື່ອນໄຫວ​ທີ່​ຜິດ​ກົດໝາຍ.

    ຫຼັງ​ຈາກ​ທີ່​ສະພາ​ຕ່ຳ​ຮັບຮອງ​ໄປ​ແລ້ວ ສະພາ​ສູງ​ອົດ​ສະ​ຕຣາ​ລີ ກໍ​ຈະ​ພິຈາລະນາ​ຮ່າງ​ກົດໝາຍ ດັ່ງກ່າວ ໃນ​ເດືອນ​ພະຈິກ​ໜ້າ​ນີ້ ໂດຍ​ອີງໃສ່​ການ​ປະກອບ​ຄວາມ​ເຫັນ​ຂອງ​ປະຊາຊົນ ແລະ  ວິ​ສາ​ຫະ​ກິດ.

ຂ່າວທີ່ກ່ຽວຂ້ອງ