ສຳເລັດແຂ່ງຂັນກີລາລົດຖີບມິດຕະພາບ 3 ຊາດ

461 30 ຕ.ລ. 2019 ວົງຈອນກີລາ
ສຳເລັດແຂ່ງຂັນກີລາລົດຖີບມິດຕະພາບ 3 ຊາດ

    ການ​ແຂ່ງຂັນ​ກີລາ​ລົດຖີບ​ມິດຕະພາບ 3 ຊາດ​ຄື: ລາວ ຫວຽດນາມ ແລະ ກຳປູເຈຍ ຊີງ​ຂັນ​ສະຖານີ​ວິທະຍຸ​ກະຈາຍສຽງ ນະຄອນ​ໂຮ່​ຈິ​ມິງ ​ສສ ຫວຽດນາມ ຄັ້ງ​ທີ XXII ປີ 2019 ໄດ້​ເດີນທາງ​ມາ​ເຖິງ​ນະຄອນຫຼວງ​ວຽງ​ຈັນ (ນວ) ຖືກ​ຕ້ອນຮັບ​ຢ່າງ​ອົບ​ອຸ່ນ​ຈາກ​ການ​ນຳ ນວ.

    ພິທີ​ຕ້ອນຮັບ​ຂະ​ບວນ​ລົດຖີບ​ດັ່ງກ່າວ​ຈັດ​ຂຶ້ນ​ວັນ​ທີ 28 ຕຸລາ 2019 ຢູ່​ເດີ່ນ​ພະ​ທາດຫຼວງ ມີ​ທ່ານ ສີ​ຫຸນ ສິດທິ​ລື​ໄຊ ຮອງ​ເຈົ້າ​ຄອງ ນວ ປະທານ​ສະມາຄົມ​ກີລາ-ກາຍຍະກຳ ນວ ທ່ານ ສິງ​ຄຳ ນາ​ລິນ ຮອງ​ຫົວໜ້າ​ກົມ​ກີລາ​ລະດັບ​ສູງ ກະຊວງ​ສຶກ​ສາ​ທິ​ການ ແລະ ກີລາ ຄະນະ​ພະແນກ​ສຶກ​ສາ​ທິ​ການ ແລະ ກີລາ ນວ ພະນັກງານ​ທີ່​ກ່ຽວຂ້ອງ ຄູ​ອາຈານ ນັກ​ສຶກ​ສາ-ນັກຮຽນ ຕະຫຼອດ​ຮອດ​ປະຊາຊົນ ນວ ແລະ ຊາວ​ຕ່າງ​ຊາດ ເຂົ້າ​ຮ່ວມ.

    ຫຼັງ​ຈາກ​ພິທີ​ຕ້ອນຮັບ​ໄດ້​ສິ້ນ​ສຸດ​ລົງ ຂະ​ບວນ​ລົດຖີບ 3 ຊາດ ມີ​ນັກກີລາ​ລົດຖີບ​ຊາວ​ຫວຽດນາມ ທີ່​ມາ​ຈາກ​ນະຄອນ​ໂຮ່​ຈິ​ມິງ​ເກືອບ 300 ຄົນ ແລະ ນັກກີລາ​ລົດຖີບ​ລາວ 5 ຄົນ (ສ່ວນ​ກຳປູເຈຍ ບໍ່​ສາມາດ​ເດີນທາງ​ຮ່ວມ​ຂະ​ບວນ​ການ​ດັ່ງກ່າວ​ໄດ້) ກໍ​ໄດ້​ສືບຕໍ່​ຮ່ວມ​ແຂ່ງຂັນ​ລົດຖີບ​ໃນຕອນ​ເຊົ້າ​ວັນ​ທີ 29 ຕຸລາ 2019 ເລີ່ມ​ຈາກ​ຈຸດ​ປ່ອຍ​ທີ່​ເດີ່ນ​ພະທາດຫຼວງ​ໄລຍະ​ທາງ 60 ກິໂລແມັດ ມຸ່ງ​ໜ້າ​ໄປ​ໂຄ້ງ​ກັບເຂດ​ຊ້າງ 3 ຫົວ (ຕໍ່ໜ້າ​ໂຮງແຮມ​ເມີ​ກຽວ) ເມືອງ​ສີ​ໂຄດ​ຕະບອງ ກ່ອນ​ໄປ​ຕາມ​ຖະໜົນ​ມິດຕະ​ພາບ​ລາວ-ໄທ ຖະໜົນ 450 ປີ ເພື່ອ​ກັບ​ມາ​ຢູ່​ຈຸດ​ເດີມ​ເດີ່ນ​ພະທາດຫຼວງ ຜ່ານ​ການ​ແຂ່ງຂັນ​ຜົນ​ປາກົດ​ວ່າອັນ​ດັບ 1 ທ້າວ ທອງ​ມະນີ ໄຊ​ຍະ​ລາດ ນັກກີລາ​ລົດຖີບ​ລາວ ສ່ວນ​ອັນ​ດັບ 2 ແລະ ອັນ​ດັບ 3 ຕົກ​ເປັນຂອງ​ນັກກີລາ​ຫວຽດນາມ.

    ພາຍຫຼັງ​ທີ່​ສຳເລັດ​ພາລະກິດ​ທີ່ ນວ ຂະ​ບວນ​ດັ່ງກ່າວ​ໄດ້​ສືບຕໍ່​ແຂ່ງຂັນສະໜາມ​ທີ 8 ທີ່​ເຂດ​ຊາຍ​ແດນ​ລາວ-ຫວຽດນາມ (ຫຼັກ 20) ເມືອງຄຳ​ເກີດ ແຂວງ​ບໍ​ລິ​ຄຳ​ໄຊ ກ່ອນ​ຈະ​ກັບ​ບ້ານ​ເກີດ ນະຄອນ​ໂຮ່​ຈິ​ມິງ.

ຂ່າວທີ່ກ່ຽວຂ້ອງ