ເບິ່ງບ້ານເຂົາເອົາບົດຮຽນ 31-10-2019

143 31 ຕ.ລ. 2019 ຫົວຂໍ້ຂ່າວອື່ນໆ

    ມື້­ນີ້ ຂໍ​ຊວນ​ທ່ານ​ຜູ້​ອ່ານ​ໄປ​ເບິ່ງ​ບົດ­ຮຽນ​ຂອງ​ອິນ​ເດຍ ໃນ​ການ​ຕ້ານ​ການ​ຄ້າ​ແມ່­ຍິງ ແລະ ເດັກ­ນ້ອຍ ແລະ ຂ່າວ​ກ່ຽວ​ກັບ​ນະ­ໂຍ­ບາຍ​ຂອງ​ຍີ່­ປຸ່ນ ເພື່ອ​ໃຫ້​ແມ່­ຍິງ​ລົງ​ສະ­ໝັກ​ຮັບ​ເລືອກ​ຕັ້ງ​ຫຼາຍ​ຂຶ້ນ.

    ທີ່ ອິນ​ເດຍ: ຂ່າວ​ນີ້​ອອກ​ມາ​ແຕ່​ອິນ​ເດຍ​ເມື່ອ 3 ປີ​ກວ່າໆ​ຜ່ານ​ມາ ແຕ່​ເນື້ອ​ໃນ​ຂອງ​ຂ່າວ​ຍັງ​ເປັນ​ສິ່ງ​ທ້າ​ທາຍ​ທີ່​ຫຼາຍ​ປະ­ເທດ​ເລັ່ງ​ແກ້​ໄຂ​ນັ້ນ ກໍ​ຄື ບັນ­ຫາ​ການ​ຄ້າ​ມະ­ນຸດ ໂດຍ​ສະ­ເພາະ ແມ່ນ​ການ​ຄ້າ​ແມ່­ຍິງ ແລະ ເດັກ­ນ້ອຍ ອິນ​ເດຍ​ເປັນ​ປະ­ເທດ​ໜຶ່ງ​ທີ່​ຢືນ​ແຖວ​ໜ້າ​ໃນ​ການ​ປົກ​ປ້ອງ​ສິດ­ທິ​ຂອງ​ແມ່­ຍິງ ແລະ ເດັກ­ນ້ອຍ ບໍ່​ພຽງ​ແຕ່​ໃນ​ຂອບ​ເຂດ​ພາຍ​ໃນ​ປະ­ເທດ​ເທົ່າ​ນັ້ນ ແຕ່​ຍັງ​ມີ​ເຄືອ​ຄ່າຍ​ຮ່ວມ​ມື​ກັບ​ຫຼາຍໆ​ປະ­ເທດ ກໍ​ຄື ອົງ​ການ­ຈັດ­ຕັ້ງ​ສາ­ກົນ​ອີກ​ດ້ວຍ ສຳ­ລັບ​ຂ່າວ​ນີ້​ໄດ້​ເວົ້າ​ເຖິງ​ການ​ຮ່ວມ​ມື​ລະ­ຫວ່າງ ອິນ​ເດຍ ກັບ ເນ​ປານ ບັງ​ກະ­ລາ​ເທດ ແລະ ປາ​ກິດ​ສະ­ຖານ ທີ່​ເປັນ​ປະ­ເທດ​ມີ​ຊາຍ​ແດນ​ຕິດ​ກັບ​ອິນ​ເດຍ ແລະ ເປັນ​ປະ­ເທດ​ທີ່​ແມ່­ຍິງ ແລະ ເດັກ­ນ້ອຍ ຖືກ​ຄ້າ​ເຂົ້າ​ໄປ​ອິນ​ເດຍ​ຫຼາຍ​ທີ່​ສຸດ ຫຼື ຜ່ານ​ອິນ​ເດຍ​ເຂົ້າ​ໄປ​ບັນ­ດາ​ປະ­ເທດ​ໃນ​ອາ­ຊີ​ຕາ­ເວັນ​ອອກ­ສຽງ​ໃຕ້ ເຊັ່ນ: ມາ​ເລ​ເຊຍ ແລະ ໄທ ຂ່າວ​ບອກ​ວ່າ​ໃນ​ເດືອນ​ເມ­ສາ ປີ 2016 ໄດ້​ມີ​ກອງ​ປະ­ຊຸມ​ບັນ­ດາ​ຕົວ​ແທນ​ອົງ­ການ​ທີ່​ບໍ່​ຂຶ້ນ​ກັບ​ລັດ­ຖະ­ບານ (NGO) ຂອງ​ບັນ­ດາ​ປະ­ເທດ​ຕາ­ເວັນ​ອອກ­ສຽງ​ເໜືອ (ໝາຍ​ເຖິງ​ເນ​ປານ ບັງ​ກະ­ລາ​ເທດ ແລະ ປາ​ກິດ​ສະ­ຖານ ຊຶ່ງ​ທ່ານ​ນາງ ມາ​ເນ​ກາ​ຄານ​ທີ (Maneka Gandhi) ລັດ­ຖະ­ມົນ­ຕີ​ກະ­ຊວງ​ພັດ­ທະ­ນາ​ແມ່­ຍິງ ແລະ ເດັກ­ນ້ອຍ​ອິນ​ເດຍ​ໃຫ້​ກຽດ​ເຂົ້າ​ຮ່ວມ​ເປີດ ໂດຍ​ທ່ານ ລັດ­ຖະ­ມົນ­ຕີ​ໄດ້​ຊີ້​ໃຫ້​ເຫັນ​ວ່າ​ມີ​ແມ່­ຍິງ ແລະ ເດັກ­ນ້ອຍ ຈາກ​ປະ­ເທດ​ຕາ­ເວັນ​ອອກ­ສຽງ​ເໜືອ​ຕົກ​ເປັນ​ເຫຍື່ອ​ການ​ຄ້າ​ມະ­ນຸດ​ເຂົ້າ​ໄປ​ອິນ​ເດຍ​ຢ່າງ​ຫຼວງ­ຫຼາຍ ທີ່​ພົບ​ເຫັນ​ຢູ່​ລັດ ເກ​ຣາ​ລາ ແລະ ຕາ​ມິນ​ນາດ ແລະ ອີກ​ຈຳ­ນວນ​ຫຼວງ­ຫຼາຍ​ທີ່​ຜ່ານ​ອິນ​ເດຍ​ໄປ​ມາ​ເລ​ເຊຍ ແລະ ໄທ ທ່ານ​ໄດ້​ຮຽກ­ຮ້ອງ​ໃຫ້ 3 ປະ­ເທດ​ນີ້​ຈັດ​ຕັ້ງ​ກອງ​ກຳ­ລັງ​ຕຳ­ຫຼວດ ອາ­ສາ​ສະ­ໝັກ​ເພດ​ຍິງ​ປະ­ຈຳ​ຢູ່​ທຸກໆ​ບ້ານ ໃຫ້​ສຳ­ເລັດ​ພາຍ​ໃນ​ທ້າຍ​ປີ 2016 ໜ້າ­ທີ່​ຕົ້ນ­ຕໍ​ຂອງ​ກອງ​ກຳ­ລັງ​ຕຳ­ຫຼວດ​ອາ­ສາ​ສະ­ໝັກ​ເພດ​ຍິງ​ເຫຼົ່າ​ນີ້ ກໍ​ຄື ເຝົ້າ​ລະ­ວັງ​ບໍ່​ໃຫ້​ເດັກ­ນ້ອຍ​ຫາຍ​ສາບ​ສູນ​ໄປ​ຈາກ​ຄອບ­ຄົວ ແລະ ບໍ່​ໃຫ້​ແມ່­ຍິງ​ຖືກ​ຕົບ​ຕີ​ຈາກ​ຜູ້​ເປັນ​ຜົວ ແລະ ຕ້ອງ​ຮັບ­ປະ­ກັນ​ໃຫ້​ເດັກ​ຍິງ​ທຸກ​ຄົນ​ໄດ້​ເຂົ້າ​ໂຮງ­ຮຽນ ຕຳ­ຫຼວດ​ຍິງ​ອາ­ສາ​ສະ­ໝັກ​ຕ້ອງ​ແມ່ນ​ກອງ​ບັນ­ຊາ​ກຳ­ລັງ​ຕຳ­ຫຼວດ​ຮັບ­ຜິດ­ຊອບ​ຄັດ​ເລືອກ ແລະ ໃຫ້­ການ​ເຝິກ­ອົບ­ຮົມ ອິນ​ເດຍ​ມີ​ບົດ ຮຽນ​ທີ່​ດີ​ກ່ຽວ​ກັບ​ການ​ສ້າງ­ຕັ້ງ​ກອງ​ກຳ­ລັງ​ຕຳ­ຫຼວດ​ອາ­ສາ​ສະ ໝັກ​ເພດ​ຍິງ ເພື່ອ​ປ້ອງ​ກັນ​ການ​ຄ້າ​ແມ່­ຍິງ ແລະ ເດັກ­ນ້ອຍ​ມາ​ແລ້ວ ເຊັ່ນ ຢູ່​ລັດ​ມາ​ທິ​ຢາ​ປຼາ​ເດດ (Madhya Pradesh).

    ທີ່ ຍີ່­ປຸ່ນ: ຍີ່­ປຸ່ນ​ໃນ​ຍຸກ​ຂອງ​ທ່ານ​ນາ­ຍົກ­ລັດ­ຖະ­ມົນ­ຕີ ຊິນ​ໂຊ​ອາ​ເບະ ນີ້​ໄດ້​ມີ​ຫຼາຍໆ​ນະ­ໂຍ­ບາຍ​ສົ່ງ­ເສີມ​ບົດ­ບາດ​ຂອງ​ແມ່­ຍິງ​ຍີ່­ປຸ່ນ ທາງ​ດ້ານ​ການ­ເມືອງ ເສດ­ຖະ­ກິດ ແລະ ສັງ­ຄົມ ເຊັ່ນ ມີ​ຂ່າວ​ອອກ​ມາ​ໃນ​ວັນ​ທີ 16 ພຶດ­ສະ­ພາ ປີ 2018 (ໜັງ­ສື­ພິມ​ຜູ້​ແທນ​ປະ­ຊາ­ຊົນ ສະ­ບັບ 486 ກາງ​ເດືອນ​ພຶດ­ສະ­ພາ 2018) ທີ່​ບອກ​ວ່າ ຍີ່­ປຸ່ນ​ໄດ້​ຮັບ​ຜ່ານ​ກົດ­ໝາຍ​ໃໝ່​ທີ່​ຊຸກ­ຍູ້​ໃຫ້​ແມ່­ຍິງ​ລົງ​ສະ­ໝັກ​ຮັບ​ເລືອກ​ຕັ້ງ​ໃນ​ຈຳ­ນວນ​ຫຼາຍ​ຂຶ້ນ ໂດຍ​ໄດ້​ຮຽກ­ຮ້ອງ​ໃຫ້​ບັນ­ດາ​ພັກ​ການ­ເມືອງ​ສົ່ງ​ຕົວ​ແທນ​ເພດ​ຊາຍ ແລະ ຍິງ ລົງ​ສະ­ໝັກ​ໃນ​ຈຳ­ນວນ​ເທົ່າ​ທຽມ​ກັນ ຕາມ​ຕົວ​ເລກ​ເກົ່າ ໃນ​ປີ 2018 ນັ້ນ ຢູ່​ສະ­ພາ​ຜູ້​ແທນ​ລາ­ຊະ​ດອນ​ຍີ່­ປຸ່ນ ມີ​ຜູ້​ແທນ​ທັງ​ໝົດ 465 ທ່ານ ໃນ​ນັ້ນ ຜູ້​ແທນ​ເພດ​ຍິງ​ມີ​ພຽງ 47 ທ່ານ ເຊື່ອ​ກັນ​ວ່າ​ກົດ­ໝາຍ​ໃໝ່​ນີ້​ຈະ​ຊ່ວຍ​ກະ​ຕຸ້ນ​ໃຫ້​ມີ​ແມ່­ຍິງ​ລົງ​ສະ­ໝັກ​ຫຼາຍ​ຂຶ້ນ ໃນ​ນັ້ນ ເລືອກ​ຕັ້ງ​ຂັ້ນ​ຕ່າງໆ​ທີ່​ຍີ່­ປຸ່ນ ໃນ​ປີ 2019 ນີ້​ເອງ.

ຂ່າວທີ່ກ່ຽວຂ້ອງ