ສຸມ​ໃສ່ 11 ໜ້າ​ວຽກ​ຮີບ​ດ່ວນ ເພື່ອ​ໃຫ້​ມະ​ຫະ​ກຳ​ກີລາ​ແຫ່ງ​ຊາດ ທັນ​ກຳນົດ​ເວລາ

347 06 ພ.ຈ. 2019 ວົງຈອນກີລາ
ສຸມ​ໃສ່ 11 ໜ້າ​ວຽກ​ຮີບ​ດ່ວນ ເພື່ອ​ໃຫ້​ມະ​ຫະ​ກຳ​ກີລາ​ແຫ່ງ​ຊາດ ທັນ​ກຳນົດ​ເວລາ

   ແຂວງ​ຊຽງ​ຂວາງ ຈັດ​ກອງ​ປະຊຸມ​ສະຫຼຸບ​ຕີ​ລາຄາ​ຄວາມ​ຄືບ​ໜ້າ​ການຈັດຕັ້ງ​ປະຕິບັດ​ວຽກ​ງານ​ຂອງ​ແຕ່​ລະ​ກຳມະການ ແລະ ອະນຸ​ກຳມະການ ທີ່​ຮັບຜິດຊອບ​ໃນ​ການ​ກະກຽມ​ຄວາມ​ພ້ອມ​ຈັດ​ມະ​ຫະ​ກຳ​ກີລາ​ແຫ່ງ​ຊາດ ຄັ້ງ​ທີ XI ຢູ່​ແຂວງ​ຊຽງ​ຂວາງ ໃນ​ອາທິດ​ຜ່ານ​ມາ ໂດຍ​ເປັນ​ປະທານ​ຂອງ​ທ່ານ ບຸນ​ຕົ້ນ ຈັນທະ​ພອນ ເຈົ້າແຂວງ​ຊຽງ​ຂວາງ ປະທານ​ຈັດ​ງານ​ຊຽງ​ຂວາງ​ເກມ ມີ​ທ່ານ ສົມ​ພູ ພົງສາ ຜູ້​ຊ່ວຍ​ລັດຖະມົນຕີ​ກະຊວງ​ສຶກ​ສາ​ທິ​ການ ແລະ ກີລາ ຮອງ​ປະທານ ແລະ ເລຂາທິການ​ຄະນະ​ກຳມະການ​ໂອ​ແລມ​ປິກ​ແຫ່ງ​ຊາດ​ລາວ ພ້ອມ​ດ້ວຍ​ພາກສ່ວນ​ກ່ຽວຂ້ອງ ເຂົ້າ​ຮ່ວມ.

    ທ່ານ ທອງ​ສີ ພັນທະ​ວົງ ຮອງ​ຫົວໜ້າ​ພະ​ແນກ​ສຶກ​ສາ​ທິ​ການ ແລະ ກີລາ​ແຂວງ​ຊຽງ​ຂວາງ ຄະນະ​ກອງ​ເລຂາ​ຜູ້​ປະຈຳການ​ຈັດ​ງານ​ຊຽງ​ຂວາງ​ເກມ ກ່າວ​ວ່າ: ເພື່ອ​ສະຫຼຸບ​ຕີ​ລາຄາ​ຄວາມ​ຄືບ​ໜ້າ​ການຈັດຕັ້ງ​ປະຕິ​ບັດ​ວຽກ​ງານ​ຂອງ​ແຕ່​ລະ​ກຳມະການ ແລະ ອະນຸ​ກຳມະການ ທີ່​ຮັບຜິດຊອບ​ແຕ່​ລະ​ໜ້າ​ວຽກ​ໃນ​ການ​ກະ ກຽມ​ຈັດ​ງານ​ຊຽງ​ຂວາງ​ເກມ ໃນ​ຕົ້ນ​ປີໜ້າ​ພາຍຫຼັງ​ສຳເລັດ​ກອງ​ປະຊຸມ​ວິສາມັນ ຄັ້ງ​ທີ IV ຂອງ​ຄະນະ​ຮັບ ຜິດ​ຊອບ​ລະດັບ​ຊາດ​ຜ່ານ​ມາ ເພື່ອ​ຕີ​ລາຄາ​ຄືນ​ໜ້າ​ວຽກ​ທີ່​ປະຕິບັດ​ໄດ້ ແລະ ຍັງ​ໜ້າ​ວຽກ​ໃດ​ທີ່​ຈະ​ຕ້ອງ​ໄດ້​ສືບຕໍ່​ຈັດ​ຕັ້ງ​ປະຕິບັດ​ຢ່າງ​ຮີບ​ດ່ວນ ເພື່ອ​ໃຫ້​ທັນ​ກຳນົດ​ເວລາ​ຂອງ​ການ​ເປີດ​ງານ.

    ສຳລັບ​ວຽກ​ທີ່​ຈະ​ຕ້ອງ​ໄດ້​ສືບຕໍ່​ຈັດ​ຕັ້ງ​ປະຕິບັດ ແລະ ແກ້​ໄຂ​ຢ່າງ​ຮີບ​ດ່ວນ​ມີ 11 ໜ້າ​ວຽກ​ຄື: ການ​ສ້າງ​ແຜນ​ດຳເນີນ​ງານ​ຂອງ​ແຕ່​ລະ​ກຳມະການ ອະນຸ​ກຳມະການ ແຕ່​ລະ​ກຳມະການ-ອະນຸ​ກຳມະການ ໃຫ້​ຄັດ​ເລືອກ​ເອົາ​ຜູ້​ຮັບຜິດຊອບ​ວຽກ​ງານ​ການ​ເງິນ​ພາຍ​ໃນ​ບຸ​ຄະລາ​ກອນ​ຂອງ​ຕົນ ເພາະ​ກະຊວງ​ການ​ເງິນ​ຈະ​ມາ​ເຝິກອົບຮມ​ວິທີ​ການ​ບໍລິຫານ​ຄຸ້ມ​ຄອງ​ນຳ​ໃຊ້​ເງິນ​ໃຫ້​ບຸ​ຄະລາ​ກອນ​ດັ່ງກ່າວ ພ້ອມ​ນີ້​ແຕ່​ລະ​ກຳມະການ​ໃຫ້​ກວດກາ​ຄືນ​ແຜນ​ງົບປະມານ​ຮັບ​ໃຊ້​ແຕ່​ລະ​ໜ້າ​ວຽກ ໃນ​ຂອບ​ເຂດ​ຄວາມ​ຮັບຜິດຊອບ​ໃຫ້​ລະອຽດ-ຊັດ​ເຈນ ກຳມະການ​ທີ່​ກ່ຽວຂ້ອງ​ສືບຕໍ່​ປະສານ​ສົມທົບ​ກັບ​ບໍລິສັດ​ເບຍ​ລາວ ແລະ ພາກສ່ວນ​ຕ່າງໆ ເພື່ອ​ຂໍ​ອຸປະຖຳ​ຕາມ​ຄວາມ​ສາມາດ ອອກ​ແບບ​ປ້າຍ​ໂຄສະນາ ປະດັບ​ປະດາ​ຕາມ​ຕົວ​ເມືອງ ແລະ ສະຖານທີ່-ທີ່  ເໝາະ​ສົມ ເຮັດ​ໜັງສື​ສະເໜີ​ເຖິງ​ກະຊວງ​ປ້ອງ​ກັນ​ປະເທດ​ຂໍ​ນັກກີລາ​ໂດດ​ຈ້ອງ ແລະ ຍົນ​ຮັບ​ໃຊ້​ການສະແດງ​ໃນ​ມື້​ເປີດ-ປິດ ປະສານ​ຫາ​ພາກສ່ວນ​ກ່ຽວຂ້ອງ​ພົວພັນ​ເລື່ອງ​ດອກ​ໄມ້​ໄຟ ການ​ປູກ​ຫຍ້າ​ທຽມ​ໃນ​ສະໜາມ​ກີລາ​ເປີດ-ປິດ ຕິດຕາມ​ການ​ກໍ່ສ້າງ​ສະໜາມ​ແຂ່ງຂັນ​ຕ່າງໆ ທີ່​ທາງ​ພາກ​ລັດ ແລະ ເອກະ​ຊົນ​ລົງທຶນ​ກໍ່ສ້າງ​ໃຫ້​ທັນ​ຕາມ​ກຳນົດ​ເວລາ ສືບຕໍ່​ຈັດ​ຊື້-ຈັດ​ຈ້າງ ເຄື່ອງຮັບ​ໃຊ້​ຕ່າງໆ​ຂອງ​ແຕ່​ລະ​ກຳມະການ-ອະນຸ​ກຳມະການ ໃຫ້​ຖືກຕ້ອງ​ກັບ​ລະບຽບ​ຫຼັກການ.

ຂ່າວທີ່ກ່ຽວຂ້ອງ