ນາຊາຍທອງ ເກັບກ່ຽວເຂົ້ານາປີສຳເລັດແລ້ວ 2.870 ເຮັກຕາ

813 07 ພ.ຈ. 2019 ຂ່າວໜ້າ​ໜຶ່ງ

    ປັດ­ຈຸ­ບັນ​ຊາວ​ກະ­ສິ­ກອນ​ໃນ​ນະ­ຄອນ­ຫຼວງ​ວຽງ​ຈັນ ກໍ​ຄື ທົ່ວ​ປະ­ເທດ ໄດ້​ຂຸ້ນ­ຂ້ຽວ​ເກັບ​ກ່ຽວ​ຜົນ​ຜະ­ລິດ​ເຂົ້າ­ນາ​ປີ ແລະ ພືດ​ຜັກ​ລະ­ດູ­ຝົນ​ຢ່າງ​ຕັ້ງ­ໜ້າ ເພື່ອ​ໃຫ້​ທັນ​ກັບ​ລະ­ດູ​ການ ແລະ ໃຫ້​ໄດ້​ຮັບ​ຜົນ​ຜະ­ລິດ​ສູງ ສະ­ເພາະ​ຊາວ​ກະ­ສິ­ກອນ​ເມືອງ​ນາ​ຊາຍ​ທອງ ນະ­ຄອນ­ຫຼວງ​ວຽງ​ຈັນ ກໍ​ໄດ້​ພ້ອມ​ກັນ​ສຸມ​ໃສ່​ຂຸ້ນ­ຂ້ຽວ​ການ​ເກັບ​ກ່ຽວ​ເຂົ້າ­ນາ​ປີ ແລະ ພືດ​ລະ­ດູ­ຝົນ​ຢ່າງ​ຫ້າວ­ຫັນ ແນ­ໃສ່​ຮັບ­ປະ­ກັນ​ຜົນ​ຜະ­ລິດ​ໃຫ້​ໄດ້​ທັງ​ປະ­ລິ­ມານ ແລະ ຄຸນ​ນະ ພາບ ແລະ ໃຫ້​ສຳ­ເລັດ​ຕາມ​ແຜນ­ການ​ທີ່​ວາງ​ໄວ້.

    ທ່ານ ຄຳ​ໄຜ່ ພົມ­ມະ­ຈັນ ຫົວ­ໜ້າ​ຫ້ອງ­ການ​ກະ­ສິ­ກຳ ແລະ ປ່າ­ໄມ້ ເມືອງ​ນາ​ຊາຍ​ທອງ ໃຫ້​ສຳ­ພາດ​ເມື່ອ​ບໍ່​ດົນ​ມາ​ນີ້​ວ່າ: ເມືອງ​ນາ​ຊາຍ​ທອງ ມີ​ແຜນ​ປູກ​ເຂົ້າ­ນາ​ປີ 7.994 ເຮັກ­ຕາ ແຜນ­ການ​ຕົກ­ກ້າ 639,52 ໂຕນ ຜ່ານ​ການ­ຈັດ­ຕັ້ງ​ປະ­ຕິ­ບັດ​ຕົວ​ຈິງ ປະ­ຕິ­ບັດ 7.901 ເຮັກ­ຕາ ໃນ​ນີ້ ປັກ​ດຳ​ໄດ້ 1.351 ເຮັກ­ຕາ ນາ ຫວ່ານ 6.550 ເຮັກ­ຕາ ທຽບ­ໃສ່​ແຜນ­ການ ເທົ່າ​ກັບ 98,83% ປັດ­ຈຸ­ບັນ​ເກັບ​ກ່ຽວ​ເຂົ້າ­ນາ​ປີ​ສຳ­ເລັດ​ແລ້ວ 2.870 ເຮັກ­ຕາ ໃນ​ນີ້ ເກັບ​ກ່ຽວ​ດ້ວຍ​ກົນ​ຈັກ 2.560 ເຮັກ­ຕາ ຄາດ​ວ່າ​ຈະ​ໃຫ້​ສຳ­ເລັດ​ທ້າຍ​ເດືອນ​ພະ­ຈິກ​ນີ້.

    ສ່ວນ​ການ​ປູກ​ພືດ​ຜັກ​ລະ­ດູ­ຝົນ ປະ­ເພດ​ຜັກ​ກິນ​ໃບ ໝາກ­ແຕງ ໝາກ­ຖົ່ວ ໝາກ​ມະ­ລະ ໝາກ­ເຜັດ  ໝາກ­ເຂືອ ສາ­ລີ​ຫວານ ຂ່າ ຂີງ ຫົວ​ສີ​ໄຄ ແລະ ໜໍ່­ໄມ້​ຝຣັ່ງ ເນື້ອ­ທີ່​ແຜນ­ການ​ແມ່ນ 340 ເຮັກ­ຕາ ປະ­ຕິ ບັດ​ໄດ້ 293,86 ເຮັກ­ຕາ ເທົ່າ​ກັບ 86,35% ໄມ້​ໃຫ້​ໝາກ ມີ​ໝາກ­ກ້ວຍ ໝາກ​ຮຸ່ງ ໝາກ​ນັດ ໝາກ​ນາວ ໝາກ­ມີ້ ແຜນ­ການ​ປູກ 135 ເຮັກ­ຕາ ປະ­ຕິ­ບັດ​ໄດ້ 237 ເຮັກ­ຕາ ເທົ່າ​ກັບ 175,55% ປະ­ເພດ​ພືດ​ອຸດ​ສາ ຫະ​ກຳ ແຜນ­ການ 500 ເຮັກ­ຕາ ປະ­ຕິ­ບັດ​ໄດ້ 531 ເຮັກ­ຕາ ເທົ່າ​ກັບ 106,2%.

ຂ່າວທີ່ກ່ຽວຂ້ອງ