ຕຳຫຼວດຈະລາຈອນ ເຂັ້ມງວດປ້ອງກັນຄວາມສະຫງົບໄລຍະບຸນທາດຫຼວງ

868 07 ພ.ຈ. 2019 ຂ່າວໜ້າ​ໜຶ່ງ
ຕຳຫຼວດຈະລາຈອນ ເຂັ້ມງວດປ້ອງກັນຄວາມສະຫງົບໄລຍະບຸນທາດຫຼວງ

    ບຸນ​ນະ­ມັດ­ສະ­ການ​ພະ​ທາດ­ຫຼວງ ແລະ ງານ​ວາງ­ສະ­ແດງ​ສິນ­ຄ້າ ປະ­ຈຳ​ປີ 2019 ເລີ່ມ​ແຕ່​ວັນ​ທີ 5-11 ພະ­ຈິກ 2019 ສະ­ພາບ​ການ​ສັນ­ຈອນ​ຈະ​ມີ​ຄວາມ​ແອ​ອັດ ສັບ­ສົນ ເວົ້າ​ສະ­ເພາະ ຢູ່​ຖະ­ໜົນ​ໜອງ​ບອນ ຖະ­ໜົນ​ທາດ­ຫຼວງ ຖະ­ໜົນ​ກຳ­ແພງ​ເມືອງ ເຊິ່ງ​ຜູ້​ທີ່​ໃຊ້​ລົດ​ໃຊ້​ຖະ­ໜົນ​ອາດ​ມີ​ການ​ລະ­ເມີດ​ກົດ​ລະບຽບ​ຈະ­ລາ­ຈອນ ແລະ ເປັນ​ສາ­ເຫດ​ພາ­ໃຫ້​ເກີດ​ອຸ­ບັດ­ເຫດ ກອງ­ຮ້ອຍ​ຕຳ­ຫຼວດ​ຈະ­ລາ­ຈອນ​ເມືອງ​ໄຊ​ເສດ​ຖາ ຈຶ່ງ​ໄດ້​ເອົາ­ໃຈ­ໃສ່​ເປັນ​ພິ­ເສດ​ຢູ່​ເຂດ​ດັ່ງ­ກ່າວ ດ້ວຍ​ການ​ເຂັ້ມ​ງວດ​ຕະ­ຫຼອດ​ໄລ­ຍະ​ບຸນ​ດັ່ງ­ກ່າວ.

    ທ່ານ ພັນ​ໂທ ສີ​ສົມ​ພູ ພົງ​ລາດ​ສະ­ສີ ຮອງ​ພະ​ແນກ​ຕຳ­ຫຼວດ​ຊີ້​ນຳ​ວຽກ​ງານ​ຈະ­ລາ­ຈອນ ເມືອງ​ໄຊ ເສດ​ຖາ ໃຫ້​ສຳ­ພາດ​ວັນ​ທີ 5 ພະ­ຈິກ 2019 ວ່າ: ເພື່ອ​ຮັບ­ປະ­ກັນ​ຄວາມ​ສະ­ຫງົບ​ປອດ​ໄພ​ຮອດ​ດ້ານ​ໃຫ້​ນັກ​ທ່ອງ​ທ່ຽວ​ພາຍ​ໃນ ແລະ ຕ່າງ­ປະ­ເທດ ທີ່​ເຂົ້າ​ມາ​ທ່ຽວ​ຊົມ​ບຸນ​ນະ­ມັດ­ສະ­ການ​ພະ​ທາດ­ຫຼວງ ແລະ ງານ​ວາງ­ສະ­ແດງ​ສິນ­ຄ້າ ປະ­ຈຳ​ປີ 2019 ມີ​ຄວາມ​ເບີກ­ບານ​ມ່ວນ­ຊື່ນ ສະ­ຫງົບ ປອດ​ໄພ ແລະ ເປັນ​ລະ­ບຽບ​ຮຽບ​ຮ້ອຍ ປາ­ສະ­ຈາກ​ຄວາມ​ເສຍ​ຫາຍ​ດ້ານ​ຊີ­ວິດ ແລະ ຊັບ​ສິນ ການ​ສັນ­ຈອນ​ມີ​ຄວາມ​ສະ ດວກ ປອດ​ໄພ ກອງ­ຮ້ອຍ​ຕຳ­ຫຼວດ​ຈະ­ລາ­ຈອນ​ເມືອງ​ໄຊ​ເສດ​ຖາ ຈຶ່ງ​ໄດ້​ວາງ​ກຳ­ລັງ​ເຈົ້າ​ໜ້າ­ທີ່​ເຂົ້າ​ປະ­ຈຳ ການ ເລີ່ມ​ແຕ່​ເວ­ລາ 14:00 ໂມງ ຂອງ​ວັນ​ທີ 5 ພະ­ຈິກ​ເປັນ­ຕົ້ນ​ໄປ ໂດຍ​ປະ­ຈຳ​ຢູ່​ຕາມ​ຈຸດ​ສາມ​ແຍກ ສີ່​ແຍກ ແລະ ວົງ­ວຽນ​ທັງ​ໝົດ 19 ຈຸດ ມີ​ກຳ­ລັງ 66 ສະ­ຫາຍ ໃນ​ນີ້ ໄດ້​ເນັ້ນ​ໜັກ​ຢູ່ 4 ຈຸດ​ຫຼັກ ທີ່​ມີ​ຄວາມ​ແອ​ອັດ ແລະ ສັບ­ສົນ ຄື: ຢູ່​ສີ່​ແຍກ​ໄຟ​ອຳ­ນາດ​ໜອງ​ບອນ ໄຟ​ອຳ­ນາດ​ທາດ­ຫຼວງ ໄຟ​ອຳ­ນາດ​ໂພນ​ທັນ ແລະ ວົງ­ວຽນ 450 ປີ ເພາະ 4 ຈຸດ​ນີ້ ທຸກໆ​ປີ​ຈະ​ມີ​ຄວາມ​ແອ​ອັດ​ຫຼາຍ​ຍ້ອນ​ມີ​ຜູ້​ປະ­ກອບ​ການ​ຈຳ­ນວນ​ໜຶ່ງ​ສ້າງ​ຄວາມ​ກີດ­ຂວາງ​ໃຫ້­ການ​ສັນ­ຈອນ ເຊັ່ນ: ຕັ້ງ​ຄອກ​ຝາກ​ລົດ​ເທິງ​ທາງ​ຍ່າງ ຕັ້ງ​ຮ້ານ​ຂາຍ­ເຄື່ອງ​ໃສ່​ແຄມ​ທາງ ເປັນ​ສາ­ເຫດ​ເຮັດ​ໃຫ້­ການ​ສັນ­ຈອນ​ແອ​ອັດ ແລະ ພາ­ໃຫ້​ເກີດ​ມີ​ອຸ­ບັດ­ເຫດ.

    ເພື່ອ​ເຮັດ​ໃຫ້​ງານ​ບຸນ​ດັ່ງ­ກ່າວ ໄດ້​ດຳ­ເນີນ​ໄປ​ດ້ວຍ​ບັນ­ຍາ­ກາດ​ມີ​ຄວາມ​ສະ­ຫງົບ ປອດ​ໄພ ມີ​ຄວາມ​ເປັນ​ລະ­ບຽບ​ຮຽບ​ຮ້ອຍ ແລະ ຫຼຸດ­ຜ່ອນ​ບັນ­ຫາ​ອຸ­ບັດ­ເຫດ ຈຶ່ງ​ຂໍ​ຮຽກ­ຮ້ອງ​ມາ​ຍັງ​ຜູ້​ທີ່​ໃຊ້​ລົດ​ໃຊ້​ຖະ­ໜົນ ຈົ່ງ​ມີ​ສະ­ຕິ ແລະ ພ້ອມ​ໃຈ​ກັນ​ປະ­ຕິ­ບັດ​ກົດ​ລະ­ບຽບ​ຈະ­ລາ­ຈອນ ແລະ ແຈ້ງ​ການ​ຂອງ​ເຈົ້າ​ໜ້າ­ທີ່​ຢ່າງ​ເຂັ້ມ​ງວດ.

ຂ່າວທີ່ກ່ຽວຂ້ອງ