ແລກປ່ຽນຄວາມຮູ້ດ້ານໂພຊະນາການ ສຳລັບພະຍາດເບົາຫວານ

945 07 ພ.ຈ. 2019 ຂ່າວໜ້າ​ໜຶ່ງ

    ໂຮງ­ໝໍ​ເສດ​ຖາ​ທິ​ຣາດ ຮ່ວມ​ກັບ​ມະ­ຫາ­ວິ­ທະ­ຍາ­ໄລ​ວິ­ທະ­ຍາ­ສາດ​ສຸ­ຂະ­ພາບ (ມວ​ສ) ແລະ ຄະ­ນະ​ຊ່ຽວ­ຊານ​ຈາກ​ມະ­ຫາ­ວິ­ທະ­ຍາ­ໄລ​ນິ​ຮົງ ປະ­ເທດ​ຍີ່­ປຸ່ນ ຈັດ​ກອງ​ປະ­ຊຸມ​ນາໆຊາດ​ດ້ານ​ໂພ­ຊະ​ນາ​ການ​ສຳ­ລັບ​ພະ­ຍາດ​ເບົາ­ຫວານ ເພື່ອ​ແລກ­ປ່ຽນ​ຄວາມ​ຮູ້​ດ້ານ​ວິ­ຊາ​ການ​ແພດ ຂຶ້ນ​ວັນ​ທີ 5-6 ພະ­ຈິກ 2019 ຢູ່​ໂຮງ­ໝໍ​ເສດ​ຖາ​ທິ​ຣາດ ໂດຍ​ເປັນ​ປະ­ທານ​ຂອງ​ທ່ານ ບຸນ​ມີ ສີ​ສາ​ພອນ ຮອງ​ຜູ້­ອຳ­ນວຍ­ການ​ໂຮງ­ໝໍ​ເສດ​ຖາ​ທິ​ຣາດ ທ່ານ ອາ​ກາວ ລີ​ວົງ­ສາ ຮອງ​ອະ­ທິ­ການ​ບໍ­ດີ ມວ​ສ ປະ­ທານ​ໂຄງ­ການ​ຮ່ວມ​ມື ລາວ-ຍີ່­ປຸ່ນ ມີ​ທ່ານ ອິ​ຈິ​ໂຣ ນາ​ກາ​ຈິ​ມະ ຜູ້​ຈັດ­ການ​ໂຄງ­ການ​ຄົ້ນ­ຄວ້າ​ການ​ນຳ​ໃຊ້​ເຕັກ​ໂນ​ໂລ​ຊີ​ຂໍ້​ມູນ​ຂ່າວ­ສານ​ເຂົ້າ​ໃນ​ການ​ຮັກ­ສາ​ສຸ­ຂະ­ພາບ (ຜົ້ງ​ປາກ) ໃຫ້​ປະ­ຊາ­ຊົນ​ໃນ​ພາກ​ພື້ນ​ອາ­ຊີ​ຕາ­ເວັນ​ອອກ­ສຽງ​ໃຕ້ ພ້ອມ​ດ້ວຍ​ຜູ້­ຕາງ­ໜ້າ​ຈາກ​ໂຮງ­ໝໍ​ສູນ​ກາງ ໂຮງ­ໝໍ​ເມືອງ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ກອງ​ປະ­ຊຸມ​ຄັ້ງ​ນີ້ ຜູ້​ເຂົ້າ​ຮ່ວມ​ໄດ້​ຮັບ​ຟັງ​ການ​ລາຍ​ງານ​ສະ­ພາບ​ການ​ຄວບ​ຄຸມ­ພະ​ຍາດ​ເບົາ­ຫວານ ແລະ ການ​ຮ່ວມ​ມື​ລະ­ຫວ່າງ​ຄະ ນະ​ຊ່ຽວ­ຊານ​ແພດ​ລາວ ແລະ ຊ່ຽວ­ຊານ​ແພດ​ຍີ່­ປຸ່ນ ໃນ​ດ້ານ​ວຽກ​ງານ​ໂພ­ຊະ​ນາ​ການ​ສຳ­ລັບ​ພະ­ຍາດ​ດັ່ງ­ກ່າວ ແລະ ສະ­ພາບ​ການ​ຕົວ​ຈິງ​ໃນ​ປັດ­ຈຸ­ບັນ ເປັນ­ຕົ້ນ ການ​ຮ່ວມ​ມື​ໃນ​ການ​ຄວບ​ຄຸມ​ຄົນ​ເຈັບ​ທີ່​ເປັນ​ພະ­ຍາດ​ເບົາ­ຫວານ​ໃນ​ລາວ ສະ­ພາບ​ຂອງ​ສູນ​ໂພ­ຊະ​ນາ​ການ ກະ­ຊວງ​ສາ ທາ​ລະ­ນະ​ສຸກ​ຕໍ່​ຄົນ​ເຈັບ ແລະ ຄວາມ​ຮູ້​ກ່ຽວ​ກັບ​ການ​ເປັນ​ພະ­ຍາດ​ກະ­ທັນ­ຫັນ​ໃນ​ຄົນ​ເຈັບ​ທີ່​ເປັນ​ພະ­ຍາດ​ເບົາ­ຫວານ.

    ຄະ­ນະ​ຊ່ຽວ­ຊານ​ແພດ​ປະ­ເທດ​ຍີ່­ປຸ່ນ ຍັງ​ໄດ້​ສະ­ເໜີ​ແລກ­ປ່ຽນ​ບາງ​ຫົວ­ຂໍ້​ທີ່​ເປັນ​ປະ­ໂຫຍດ​ແກ່​ຊ່ຽວ ຊານ​ແພດ​ລາວ ເປັນ­ຕົ້ນ ໄດ້​ສົມ​ທຽບ​ໃຫ້​ເຫັນ​ສະ­ພາບ​ການ​ຄວບ​ຄຸມ​ຄົນ​ເຈັບ​ທີ່​ເປັນ​ພະ­ຍາດ​ເບົາ­ຫວານ​ຢູ່​ປະ­ເທດ​ຍີ່­ປຸ່ນ ຍຸດ​ທະ​ສາດ ແລະ ແຜນ​ນະ­ໂຍ­ບາຍ​ຂອງ​ລັດ ຖະ​ບານ​ຍີ່­ປຸ່ນ​ທີ່​ມີ​ຕໍ່​ຄົນ​ເຈັບ ການ​ແນະ­ນຳ​ດ້ານ​ໂພ­ຊະ​ນາ​ການ​ຕໍ່​ຄົນ​ເຈັບ ການ​ສົ່ງ ແລະ ຕິດ­ຕໍ່​ຂໍ້​ມູນ​ຂ່າວ­ສານ​ຈາກ​ທ່ານ­ໝໍ​ໄປ​ຫາ​ຄົນ​ເຈັບ ທີ່­ຢູ່​ບ່ອນ​ຫ່າງ​ໄກ​ສອກ­ຫຼີກ ເພື່ອ​ແນ­ໃສ່​ການ​ບໍ­ລິ­ການ​ຄົນ​ເຈັບ​ໃຫ້​ທົ່ວ​ເຖິງ ແລະ ມີ​ຄວາມ​ຮູ້​ດ້ານ​ໂພ­ຊະ​ນາ​ການ​ສຳ­ລັບ​ພະ­ຍາດ​ເບົາ­ຫວານ ຫຼາຍ​ຂຶ້ນ.

ຂ່າວທີ່ກ່ຽວຂ້ອງ