ວາງສີລາລຶກ ສ້າງສູນການຄຸ້ມຄອງບໍລິຫານເຂດບຶງທາດຫຼວງ

989 07 ພ.ຈ. 2019 ຂ່າວໜ້າ​ໜຶ່ງ
ວາງສີລາລຶກ ສ້າງສູນການຄຸ້ມຄອງບໍລິຫານເຂດບຶງທາດຫຼວງ

    ພິ­ທີ​ວາງ​ສີ​ລາ​ລຶກ​ໂຄງ­ການ​ກໍ່­ສ້າງ​ສູນ​ການ​ຄຸ້ມ​ຄອງ​ບໍ­ລິ­ຫານ​ເຂດ​ບຶງ​ທາດ­ຫຼວງ ໂຄງ­ການ​ວຽງ​ຈັນ​ນະ­ຄອນ​ສີ­ຂຽວ ແລະ ພິ­ທີ​ເປີດ​ໂຮງ­ແຮມ ໂປ​ລີ ວຽງ​ຈັນ ໃນ​ເຂດ​ເສດ­ຖະ­ກິດ​ສະ­ເພາະ​ບຶງ​ທາດ­ຫຼວງ ຈັດ​ຂຶ້ນ​ວັນ​ທີ 5 ພະ­ຈິກ 2019 ທີ່​ນະ­ຄອນ­ຫຼວງ​ວຽງ​ຈັນ ໃຫ້​ກຽດ​ເຂົ້າ​ຮ່ວມ​ໂດຍ​ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ ທ່ານ​ນາງ ຄຳ​ຈັນ ວົງ​ແສນ​ບູນ ຮອງ​ລັດ­ຖະ­ມົນ­ຕີ​ກະ­ຊວງ​ແຜນ­ການ ແລະ ການ​ລົງ­ທຶນ ມີ​ບັນ­ດາ​ທ່ານ​ຮອງ​ລັດ­ຖະ­ມົນ­ຕີ ທ່ານ ຮວງ ກົວ​ຜິງ ປະ­ທານ​ເຂດ​ເສດ­ຖະ­ກິດ​ສະ­ເພາະ ບຶງ​ທາດ­ຫຼວງ ທ່ານ ຈ້າວ ເຜີຍ​ຈົ່ງ ປະ­ທານ​ຄະ­ນະ​ກຳ­ມະ­ການ​ບໍ­ລິ­ສັດ ລາວ​ລົງ­ທຶນ​ທາດ­ຫຼວງ​ພັດ­ທະ­ນາ ຈຳ­ກັດ ທ່ານ ຫຼິນ​ຈຽງ ຜູ້​ຈັດ­ການ​ທົ່ວ​ໄປ ກຸ່ມ​ບໍ­ລິ­ສັດ ໂຮງ­ແຮມ​ການ­ທ່ອງ­ທ່ຽວ​ສີ­ຂຽວ ພ້ອມ​ດ້ວຍ​ບັນ­ດາ​ແຂກ​ຮັບ​ເຊີນ​ຈາກ​ພາກ­ສ່ວນ​ກ່ຽວ­ຂ້ອງ.

    ທິວ​ທັດ​ເມືອງ​ລາວ​ມີ​ຄວາມ​ດຶງ​ດູດ​ຜູ້​ຄົນ​ສູງ ປະ­ຊາ­ຊົນ​ປອງ​ດອງ​ສາ­ມັກ­ຄີ​ກັນ​ດີ ໃນ​ໄລ­ຍະ​ຜ່ານ​ມາ ເສດ­ຖະ­ກິດ​ຂອງ​ລາວ​ໄດ້​ເຕີບ​ໃຫຍ່​ຂະ­ຫຍາຍ­ຕົວ​ຢ່າງ​ໝັ້ນ​ທ່ຽງ ແລະ ວ່ອງ­ໄວ ພາຍ​ໃຕ້​ການ​ເອົາ­ໃຈ­ໃສ່ ແລະ ໃຫ້­ການ​ສະ­ໜັບ­ສະ­ໜູນ​ຈາກ​ລັດ­ຖະ­ບານ​ລາວ ເຮັດ​ໃຫ້​ເຂດ​ບໍ­ລິ­ຫານ​ສະ­ເພາະ​ບຶງ​ທາດ­ຫຼວງ​ໄດ້​ຮັບ​ການ​ພັດ­ທະ­ນາ​ຢ່າງ​ວ່ອງ­ໄວ ເຂດ​ບໍ­ລິ­ຫານ​ສະ­ເພາະ​ບຶງ​ທາດ­ຫຼວງ ໃນ​ຖາ­ນະ​ເປັນ​ເມືອງ​ທ່ອງ​ທ່ຽວ​ທີ່​ທັນ​ສະ­ໄໝ ເຊິ່ງ​ອ້ອມ​ຮອບ​ໄປ​ດ້ວຍ​ບຶງ​ທາດ­ຫຼວງ ໂດຍ​ໄດ້​ວາງ​ແຜນ​ນຳ​ໃຊ້​ທີ່​ດິນ​ເພື່ອ​ທຸ­ລະ​ກິດ​ແບບ​ປະ­ສົມ​ປະ­ສານ ນຳ​ໃຊ້​ທີ່​ດິນ​ເພື່ອ​ທີ່­ຢູ່​ອາ­ໄສ​ແບບ​ປະ­ສົມ​ປະ­ສານ ນຳ​ໃຊ້​ທີ່​ດິນ​ເພື່ອ​ດຳ­ເນີນ​ທຸ­ລະ​ກິດ ນຳ​ໃຊ້​ທີ່​ດິນ​ເພື່ອ​ກໍ່­ສ້າງ​ອາ­ພາດ​ເມັນ ນຳ​ໃຊ້​ທີ່​ດິນ​ເພື່ອ​ທາງ​ສາ­ສະ­ໜາ ນຳ​ໃຊ້​ທີ່​ດິນ​ເພື່ອ​ທາງ​ການ​ແພດ ແລະ ນຳ​ໃຊ້​ທີ່​ດິນ​ເພື່ອ​ທາງ​ການ​ສຶກ​ສາ ເປັນ­ຕົ້ນ.

    ໂຄງ­ການ​ວຽງ​ຈັນ​ນະ­ຄອນ​ສີ­ຂຽວ ໃນ​ເຂດ​ເສດ­ຖະ­ກິດ​ສະ­ເພາະ​ບຶງ​ທາດ­ຫຼວງ ທີ່​ມີ​ຄວາມ​ໝາຍ​ຄວາມ​ສຳ­ຄັນ​ຫຼາຍ ໂດຍ​ໂຄງ­ການ​ສູນ​ບໍ­ລິ­ຫານ​ແມ່ນ​ສູນ​ບັນ­ຊາ​ການ​ຂອງ​ເຂດ​ເສດ­ຖະ­ກິດ​ສະ­ເພາະ​ບຶງ​ທາດ­ຫຼວງ​ວຽງ​ຈັນ ນະ­ຄອນ​ສີ­ຂຽວ ແມ່ນ​ໂຄງ­ການ​ພັກ​ອາ­ໄສ​ທີ່​ມີ​ແນວ​ຄວາມ​ຄິດ​ໃໝ່ ແລະ ການ​ດຳ­ລົງ​ຊີ­ວິດ​ສີ­ຂຽວ​ທີ່​ໄດ້​ມອບ​ໃຫ້​ແກ່​ປະ­ຊາ­ຊົນ​ລາວ ການ​ລົງ­ມື​ກໍ່­ສ້າງ​ຂອງ​ສອງ​ໂຄງ­ການ​ດັ່ງ­ກ່າວ ຈະ​ເປັນ​ການ​ເປີດ​ໂຕ​ລ່ວງ​ໜ້າ​ຢ່າງ­ຮອບ­ດ້ານ​ຂອງ​ໂຄງ­ການ ​ໃນ​ເຂດ​ເສດ­ຖະ­ກິດ​ສະ­ເພາະ​ບຶງ​ທາດ­ຫຼວງ ສິ່ງ​ດັ່ງ­ກ່າວ​ຈະ​ເປັນ​ການ​ປະ­ກອບ­ສ່ວນ​ທາງ​ປະ­ຫວັດ­ສາດ​ໃນ​ການ​ປັບ­ປຸງ​ຊີ­ວິດ​ການ​ເປັນ​ຢູ່​ຂອງ​ປະ­ຊາ­ຊົນ​ເຂດ​ນະ­ຄອນ­ຫຼວງ​ວຽງ​ຈັນ ເລັ່ງ​ລັດ​ການ​ກໍ່­ສ້າງ​ຕົວ​ເມືອງ ຍົກ​ສູງ​ລາຍ​ຮັບ​ດ້ານ​ພາ­ສີ​ອາ­ກອນ​ຂອງ​ນະ­ຄອນ­ຫຼວງ​ວຽງ​ຈັນ ແລະ ຍົກ​ສູງ​ປະ­ລິ­ມານ​ເສດ­ຖະ­ກິດ​ທັງ​ໝົດ ໃນ​ອະ­ນາ­ຄົດ​ຈະ​ກາຍ­ເປັນ​ສູນ​ລວມ​ຂອງ​ການ­ທ່ອງ­ທ່ຽວ ການ​ເງິນ ການ​ຄ້າ ການ​ຂົນ­ສົ່ງ ແລະ ອຸດ­ສາ­ຫະ­ກຳ​ອື່ນໆ ໃນ​ວົງ​ການ​ເສດ­ຖະ­ກິດ​ອາ­ຊີ.

    ພ້ອມ​ດຽວ​ກັນ​ນີ້ ກໍ​ໄດ້​ເປີດ​ໂຮງ­ແຮມ​ໂປ​ລີ​ວຽງ​ຈັນ ຢ່າງ​ເປັນ​ທາງ​ການ ໂຮງ­ແຮມ​ໂປ​ລີ​ວຽງ​ຈັນ ແມ່ນ​ໂຮງ­ແຮມ​ຫຼູ​ຫຼາ​ລະ­ດັບ​ຫ້າ​ດາວ​ຂອງ​ກຸ່ມ​ບໍ­ລິ­ສັດ​ຫຸ້ນ​ສ່ວນ​ສີ­ຂຽວ​ທີ່​ຈັດ​ເຂົ້າ​ເປັນ​ບໍ­ລິ­ສັດ​ຍັກ​ໃຫຍ່​ໃນ 500 ຂອງ​ໂລກ ທີ່​ນອນ​ໃນ​ການ​ຄຸ້ມ​ຄອງ​ຂອງ​ກຸ່ມ​ບໍ­ລິ­ສັດ​ບໍ­ລິ­ຫານ​ໂຮງ­ແຮມ​ສາ­ກົນ​ສີ­ຂຽວ ເຊິ່ງ​ໂຮງ­ແຮມ​ດັ່ງ­ກ່າວ​ຕັ້ງ​ຢູ່​ເຂດ​ສູນ​ກາງ­ຂອງ​ເຂດ​ເສດ­ຖະ­ກິດ​ສະ­ເພາະ ບຶງ​ທາດ­ຫຼວງ ສິ່ງ​ອຳ­ນວຍ​ຄວາມ​ສະ­ດວກ ສະ­ບາຍ ໂຄງ​ລ່າງ​ການ​ພັກ­ຜ່ອນ​ເພື່ອ​ສຸ­ຂະ­ພາບ​ທີ່​ຫຼູ​ຫຼາ ເປັນ​ສະ­ຖານ­ທີ່­ພັກ­ຜ່ອນ​ຢ່ອນ​ໃຈ​ຢ່າງ​ແທ້​ຈິງ​ໃຫ້​ແກ່​ທ່ານ.

    ເຂດ​ຄຸ້ມ​ຄອງ​ບໍ­ລິ­ຫານ​ບຶງ​ທາດ­ຫຼວງ ແມ່ນ​ໄດ້​ເປີດ​ຮັບ​ການ​ລົງ­ທຶນ​ຈາກ​ທົ່ວ​ໂລກ ຫວັງ​ວ່າ​ຜູ້​ປະ­ກອບ​ການ​ທຸ­ລະ​ກິດ​ຫຼາຍ​ທ່ານ ​ສາ­ມາດ​ບັນ­ລຸ​ການ​ຮ່ວມ​ມື​ກັບ​ເຂດ​ເສດ­ຖະ­ກິດ​ສະ­ເພາະ​ບຶງ​ທາດ­ຫຼວງ ຮ່ວມ​ກັນ​ພັດ­ທະ­ນາ ຮ່ວມ​ກັນ​ກໍ່­ສ້າງ ຮ່ວມ​ກັນ​ພະ­ຍາ­ຍາມ​ກໍ່­ສ້າງ​ເສດ­ຖະ­ກິດ​ສະ­ເພາະ​ບຶງ​ທາດ­ຫຼວງ​ໃຫ້​ກາຍ­ເປັນ​ເມືອງ​ໃໝ່​ທີ່​ທັນ​ສະ­ໄໝ​ຄົບ​ວົງ​ຈອນ​ລະ­ດັບ​ຊັ້ນ​ນຳ​ໜຶ່ງ​ດຽວ​ໃນ​ການ­ທ່ອງ­ທ່ຽວ​ສາ­ກົນ ການ​ເງິນ ການ​ດຳ­ລົງ​ຊີ­ວິດ ການ​ຄ້າ ແລະ ການ​ຂົນ­ສົ່ງ.

ຂ່າວທີ່ກ່ຽວຂ້ອງ