ທົບທວນແຜນດຳເນີນງານແຫ່ງຊາດ ເພື່ອຄວາມສະເໝີພາບ ຍິງ-ຊາຍ

1.262 07 ພ.ຈ. 2019 ຂ່າວໜ້າ​ໜຶ່ງ

    ຄະ­ນະ​ກຳ­ມາ​ທິ​ການ​ແຫ່ງ​ຊາດ ເພື່ອ​ຄວາມ​ກ້າວ­ໜ້າ​ຂອງ​ແມ່­ຍິງ ແລະ ແມ່-ເດັກ (ຄຊກມດ) ຈັດ​ກອງ​ປະ­ຊຸມ​ທົບ​ທວນ​ການ­ຈັດ­ຕັ້ງ​ປະ­ຕິ­ບັດ​ແຜນ​ດຳ­ເນີນ​ງານ​ແຫ່ງ​ຊາດ ເພື່ອ​ຄວາມ​ສະ­ເໝີ­ພາບ ຍິງ-ຊາຍ 5 ປີ ຄັ້ງ​ທີ III (2016-2020) ຈັດ​ຂຶ້ນ​ວັນ​ທີ 5-6 ພະ­ຈິກ 2019 ຢູ່​ສູນ​ເຝິກ­ອົບ­ຮົມ​ແມ່­ຍິງ​ລາວ ໂດຍ​ເປັນ​ປະ­ທານ​ຂອງ​ທ່ານ​ນາງ ບັນ­ດິດ ປະ­ທຸມ​ວັນ ຮອງ​ປະ­ທານ​ຄະ­ນະ​ບໍ­ລິ­ຫານ​ງານ​ສູນ​ກາງ​ສະ­ຫະ­ພັນ​ແມ່­ຍິງ​ລາວ ຮອງ​ປະ­ທານ ຄຊກມດ ມີ​ຜູ້­ຕາງ­ໜ້າ​ຈາກ​ບັນ­ດາ​ກະ­ຊວງ ອົງ­ການ ແລະ ນະ­ຄອນ­ຫຼວງ ເຂົ້າ​ຮ່ວມ.

    ເພື່ອ​ແລກ­ປ່ຽນ​ບົດ­ຮຽນ ຜົນ​ໄດ້​ຮັບ ບົດ­ຮຽນ​ທີ່​ຖອດ​ຖອນ​ໄດ້ ແລະ ບົດ­ຮຽນ​ອັນ​ດີ​ທີ່​ເຮັດ​ໃຫ້​ການ­ຈັດ­ຕັ້ງ​ປະ­ຕິ­ບັດ​ແຜນ​ດຳ­ເນີນ​ງານ​ແຫ່ງ​ຊາດ ເພື່ອ​ຄວາມ​ສະ­ເໝີ­ພາບ ຍິງ-ຊາຍ ບັນ­ລຸ​ຜົນ­ສຳ­ເລັດ ກຳ­ນົດ​ສິ່ງ​ຂໍ້­ຄົງ­ຄ້າງ​ໃນ​ການ­ຈັດ­ຕັ້ງ​ປະ­ຕິ­ບັດ ແລະ ຊອກ​ຫາ​ວິ­ທີ​ການ​ແກ້​ໄຂ​ໃນ­ຕໍ່­ໜ້າ ກຳ­ນົດ​ແຜນ­ການ​ໃນ­ຕໍ່­ໜ້າ ກໍ​ຄື ການ​ກຳ­ນົດ​ແຜນ​ງານ ແຜນ​ວຽກ​ຈຸດ​ສຸມ ຕົວ​ຊີ້​ບອກ ກິດ­ຈະ­ກຳ ໄລ­ຍະ​ການ­ຈັດ­ຕັ້ງ​ປະ­ຕິ­ບັດ ງົບ­ປະ­ມານ ຜູ້​ຮັບ­ຜິດ­ຊອບ​ກິດ­ຈະ­ກຳ ລວມ​ທັງ​ວິ­ທີ​ການ​ເຊື່ອມ​ບົດ­ບາດ ຍິງ-ຊາຍ ໃນ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ຄວາມ​ສະ­ເໝີ­ພາບ ຍິງ-ຊາຍ ໃນ­ຕໍ່­ໜ້າ.

    ຜ່ານ​ການ​ຄົ້ນ­ຄວ້າ ແລະ ແລກ­ປ່ຽນ​ບົດ­ຮຽນ​ເຊິ່ງ​ກັນ ແລະ ກັນ ສາ­ມາດ​ສັງ​ລວມ​ໄດ້ ແຕ່​ລະ​ພາກ­ສ່ວນ​ມີ​ການ​ຜັນ​ຂະ­ຫຍາຍ ແລະ ຈັດ​ຕັ້ງ​ປະ­ຕິ­ບັດ​ວຽກ​ງານ​ຄວາມ​ສະ­ເໝີ­ພາບ ຍິງ-ຊາຍ ສ້າງ​ກົດ­ໝາຍ​ວ່າ​ດ້ວຍ​ຄວາມ​ສະ­ເໝີ­ພາບ ຍິງ-ຊາຍ ຈັດ​ຕັ້ງ​ເຜີຍ­ແຜ່​ນະ­ໂຍ­ບາຍ ນິ­ຕິ​ກຳ​ຕ່າງໆ ໂດຍ​ສະ­ເພາະ ຂໍ້​ສະ­ເໜີ​ແນະ​ຂອງ​ນິ­ຕິ​ກຳ​ສາ­ກົນ ພາກ​ພື້ນ ແລະ ພາຍ​ໃນ ໃນ​ການ​ສົ່ງ­ເສີມ​ຄວາມ​ສະ­ເໝີ­ພາບ ຍິງ-ຊາຍ ບົດ​ລາຍ​ງານ​ຂອງ​ອົງ­ການ​ສະ­ຫະ​ປະ­ຊາ​ຊາດ ເພື່ອ​ການ​ພັດ­ທະ­ນາ ປະ­ຈຳ​ປີ 2018 ດັດ​ສະ​ນີ​ການ​ພັດ­ທະ­ນາ​ຄວາມ​ສະ­ເໝີ­ພາບ ຍິງ-ຊາຍ ຂອງ​ລາວ ເທົ່າ​ກັບ 0,934 ດັດ​ສະ​ນີ ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ​ເພດ​ຍິງ 0,579 ເພດ​ຊາຍ 0,62 ດັດ​ສະ​ນີ​ຄວາມ​ບໍ່​ສະ­ເໝີ­ພາບ ຍິງ-ຊາຍ 0,461  ຢູ່​ອັນ​ດັບ 109 ໃນ 189 ປະ­ເທດ ບົດ​ລາຍ​ງານ​ຊ່ອງ​ຫວ່າງ​ບົດ­ບາດ ຍິງ-ຊາຍ ຢູ່​ໃນ​ໂລກ​ຂອງ​ກອງ​ປະ­ຊຸມ​ເສດ­ຖະ­ກິດ​ໂລກ ລາວ ມີ​ດັດ​ສະ​ນີ​ຊ່ອງ​ຫວ່າງ​ຄວາມ​ສະ­ເໝີ­ພາບ ຍິງ-ຊາຍ 0,948 ຢູ່​ອັນ​ດັບ 26 ຈາກ​ປີ 2015 ຢູ່​ອັນ​ດັບ 52 ໃນ 145 ປະ­ເທດ.

    ກອງ​ປະ­ຊຸມ​ຄັ້ງ​ນີ້ ຍັງ​ໄດ້​ຄົ້ນ­ຄວ້າ ແລະ ເປັນ​ເອ­ກະ​ພາບ​ກັນ​ຕໍ່​ໂຄງ​ຮ່າງ​ແຜນ​ດຳ­ເນີນ​ງານ​ແຫ່ງ​ຊາດ ເພື່ອ​ຄວາມ​ສະ­ເໝີ­ພາບ ຍິງ-ຊາຍ 5 ປີ ຄັ້ງ​ທີ IV (2021-2025) ໂດຍ​ການ​ກຳ­ນົດ​ທິດ​ທາງ ຄາດ­ໝາຍ ແລະ ກິດ­ຈະ­ກຳ​ໃນ­ຕໍ່­ໜ້າ ເຊິ່ງ​ຈະ​ໄດ້​ສຸມ​ໃສ່​ການ​ພັດ­ທະ­ນາ​ຄວາມ​ສະ­ເໝີ­ພາບ ຍິງ-ຊາຍ ແລະ ສົ່ງ­ເສີມ​ແມ່­ຍິງ ຜູ້​ຊາຍ​ໃນ​ການ​ເຂົ້າ​ເຖິງ ແລະ ປະ­ກອບ­ສ່ວນ​ປະ­ຕິ­ບັດ​ໃນ​ຂົງ­ເຂດ​ການ­ເມືອງ ເສດ­ຖະ­ກິດ ວັດ­ທະ­ນະ­ທຳ-ສັງ­ຄົມ ແລະ ຄອບ­ຄົວ ປະ­ຕິ­ບັດ​ພັນ­ທະ​ຕໍ່​ສົນ­ທິ­ສັນ­ຍາ ແລະ ຖະ­ແຫຼງ­ການ​ຂອງ​ສາ­ກົນ ແລະ ພາກ​ພື້ນ​ກ່ຽວ​ກັບ​ສິດ­ທິ​ຂອງ​ແມ່­ຍິງ​ຢູ່​ລາວ ເປັນ​ພາ­ຄີ ແລະ ການ​ສ້າງ​ຄວາມ​ເຂັ້ມ­ແຂງ​ໃຫ້​ກົງ­ຈັກ​ການ­ຈັດ­ຕັ້ງ ແລະ ບຸ​ຄະ­ລາ​ກອນ ທີ່​ຮັບ­ຜິດ­ຊອບ​ວຽກ​ງານ​ຄວາມ​ສະ­ເໝີ­ພາບ ຍິງ-ຊາຍ ແມ່ ແລະ ເດັກ ເພື່ອ​ຮັບ­ປະ­ກັນ​ການ​ພັດ­ທະ­ນາ​ຄວາມ​ສະ­ເໝີ­ພາບ ຍິງ-ຊາຍ ແລະ ຫຼຸດ­ຜ່ອນ​ຄວາມ​ແຕກ​ໂຕນ​ຄວາມ​ສະ­ເໝີ­ພາບ ຍິງ-ຊາຍ ເຮັດ​ໃຫ້ ຍິງ-ຊາຍ ມີ​ໂອ­ກາດ​ເທົ່າ​ທຽມ​ກັນ​ດ້ານ​ສິດ­ຜົນ­ປະ­ໂຫຍດ ການ​ເຂົ້າ​ເຖິງ​ການ​ສຶກ​ສາ ການ​ຮັກ­ສາ​ສຸ­ຂະ­ພາບ ແລະ ແຫຼ່ງ​ຊັບ­ພະ­ຍາ­ກອນ ລວມ​ທັງ​ການ​ສ້າງ​ຄວາມ​ເຂັ້ມ­ແຂງ​ໃນ​ດ້ານ​ຕ່າງໆ.

ຂ່າວທີ່ກ່ຽວຂ້ອງ