ເພີ່ມທະວີການກຽມພ້ອມຮັບມືຊ່ວຍເຫຼືອໄລຍະສຸກເສີນ ແລະ ຟື້ນຟູຫຼັງໄພພິບັດ

1.390 07 ພ.ຈ. 2019 ຂ່າວໜ້າ​ໜຶ່ງ

    ກອງ​ປະ­ຊຸມ​ກະ­ກຽມ​ກ່ອນ​ກອງ​ປະ­ຊຸມ​ໂຕະ­ມົນ​ຂອງ​ລັດ­ຖະ­ບານ ປະ­ຈຳ​ປີ 2019 ກ່ຽວ​ກັບ​ການ​ຟື້ນ​ຟູ​ຫຼັງ​ໄພ­ພິ­ບັດ ແລະ ການ​ຫຼຸດ­ຜ່ອນ​ຄວາມ​ສ່ຽງ​ໄພ­ພິ­ບັດ ທ່າ­ແຮງ​ສະ­ໜັບ­ສະ­ໜູນ ແລະ ເຊື່ອມ​ສານ​ໃນ​ແຜນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ແຫ່ງ​ຊາດ ຄັ້ງ​ທີ 9 ຈັດ​ຂຶ້ນ​ວັນ​ທີ 5 ພະ­ຈິກ 2019 ຢູ່​ເຮືອນ​ຮັບ­ແຂກ​ກະ­ຊວງ​ແຮງ​ງານ ແລະ ສະ­ຫວັດ­ດີ​ການ​ສັງ­ຄົມ (ຮສສ) ໂດຍ​ເປັນ​ປະ­ທານ​ຂອງ​ທ່ານ ຄຳ​ແພງ ໄຊ​ສົມ​ແພງ ລັດ­ຖະ­ມົນ­ຕີ​ກະ­ຊວງ ຮສສ ມີ​ທ່ານ​ນາງ ລີ​ຄາ​ລາ ຣີ​ເຈີ ຜູ້­ຕາງ­ໜ້າ​ອົງ­ການ​ສະ­ຫະ​ປະ­ຊາ​ຊາດ ເພື່ອ​ການ​ພັດ­ທະ­ນາ ປະ­ຈຳ​ລາວ ພ້ອມ​ດ້ວຍ​ຜູ້​ປະ­ສານ​ງານ​ຄະ­ນະ​ກຳ­ມະ­ການ​ປ້ອງ​ກັນ ແລະ ຄວບ​ຄຸມ​ໄພ­ພິ­ບັດ​ແຫ່ງ​ຊາດ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

    ທ່ານ ຄຳ​ແພງ ໄຊ​ສົມ​ແພງ ກ່າວ​ວ່າ: ລັດ­ຖະ­ບານ ໂດຍ​ສະ­ເພາະ ຄະ­ນະ​ກຳ­ມະ­ການ​ປ້ອງ​ກັນ​ແລະ ຄວບ​ຄຸມ​ໄພ­ພິ­ບັດ​ແຫ່ງ​ຊາດ ໄດ້​ເອົາ­ໃຈ­ໃສ່​ປະ­ຕິ­ບັດ​ມາດ​ຕະ­ການ​ປ້ອງ​ກັນ​ໄພ­ພິ­ບັດ ໂດຍ​ຖື​ເອົາ​ຫຼັກ­ການ​ກໍ່­ສ້າງ​ຄືນ­ໃໝ່​ໃຫ້​ດີ​ກວ່າ​ເກົ່າ​ເຂົ້າ​ໃນ​ຂະ​ບວນ​ການ​ຟື້ນ​ຟູ ແລະ ກໍ່­ສ້າງ​ຄືນ­ໃໝ່​ຫຼັງ​ໄພ­ພິ­ບັດ ສ້າງ​ຄວາມ​ພະ­ຍາ­ຍາມ​ໃນ​ການ​ປ້ອງ​ກັນ ແລະ ປົກ​ປັກ​ຮັກ­ສາ​ສິ່ງ­ແວ­ດລ້ອມ​ທຳ​ມະ​ຊາດ ໂດຍ​ສະ­ເພາະ ສຸມ​ໃສ່​ປົກ​ປັກ​ຮັກ­ສາ​ປ່າ­ໄມ້ ແລະ ພື້ນ​ທີ່​ສັນ​ປັນ​ນ້ຳ ເຊິ່ງ​ເປັນ​ມາດ​ຕະ­ການ​ທີ່​ມີ​ປະ​ສິດ­ທິ​ຜົນ ເພື່ອ​ຫຼຸດ­ຜ່ອນ​ໄພ­ພິ­ບັດ​ຈາກ​ທຳ​ມະ​ຊາດ ແລະ ຜົນ​ກະ­ທົບ​ຈາກ​ການ​ປ່ຽນ­ແປງ​ຂອງ​ດິນ​ຟ້າ​ອາ­ກາດ ກະ­ຊວງ ຮສສ ໃນ​ນາມ​ປະ­ທານ​ຄະ­ນະ​ກຳ­ມະ­ການ​ປ້ອງ​ກັນ ແລະ ຄວບ​ຄຸມ​ໄພ­ພິ­ບັດ​ແຫ່ງ​ຊາດ ໄດ້​ພະ­ຍາ­ຍາມ​ຊຸກ­ຍູ້ ແລະ ກະ­ກຽມ​ສ້າງ​ກົດ­ໝາຍ​ວ່າ​ດ້ວຍ​ການ​ຄຸ້ມ​ຄອງ​ໄພ­ພິ­ບັດ ຈົນ​ສາ­ມາດ​ຮັບ­ຮອງ ແລະ ປະ­ກາດ​ໃຊ້ ໃນ​ວັນ​ທີ 5 ສິງ­ຫາ 2019 ເຊິ່ງ​ເປັນ​ນິ­ຕິ​ກຳ​ຂັ້ນ​ກົດ­ໝາຍ​ທຳ​ອິດ​ຂອງ ສປປ ລາວ ກ່ຽວ​ກັບ​ວຽກ​ງານ​ໄພ­ພິ­ບັດ ຮັບ ປະ­ກັນ​ໃຫ້​ການ­ເຄື່ອນ­ໄຫວ​ວຽກ​ງານ​ປ້ອງ​ກັນ ຄວບ​ຄຸມ ແລະ ຟື້ນ​ຟູ​ຄືນ​ຫຼັງ​ໄພ­ພິ­ບັດ​ມີ​ຄວາມ​ວ່ອງ­ໄວ ສະ­ດວກ ແລະ ມີ​ປະ​ສິດ­ທິ​ຜົນ​ຂຶ້ນ.

    ກອງ​ປະ­ຊຸມ​ຄັ້ງ​ນີ້ ມີ​ຄວາມ​ໝາຍ​ສຳ­ຄັນ​ຢ່າງ​ຍິ່ງ ເຊິ່ງ​ຈະ​ໄດ້​ຮ່ວມ​ກັນ​ນຳ​ສະ­ເໜີ​ແລກ­ປ່ຽນ​ບົດ­ຮຽນ ແລະ ມີ​ຄຳ​ຄິດ​ເຫັນ​ຕໍ່​ວຽກ​ງານ​ຫຼຸດ­ຜ່ອນ​ຄວາມ​ສ່ຽງ​ໄພ­ພິ­ບັດ ແລະ ຂອບ​ແຜນ​ວຽກ​ການ​ຟື້ນ​ຟູ​ຄືນ​ຫຼັງ​ໄພ ພິ­ບັດ​ຢູ່ ສປປ ລາວ ເຊິ່ງ​ຈະ​ເປັນ​ພື້ນ­ຖານ​ດ້ານ​ເນື້ອ​ໃນ​ໃຫ້​ກອງ​ປະ­ຊຸມ​ໂຕະ­ມົນ ປະ­ຈຳ​ປີ 2019 ທີ່​ຈະ​ມີ​ຂຶ້ນ​ທ້າຍ​ເດືອນ​ພະ­ຈິກ 2019 ຢູ່​ແຂວງ​ຫຼວງ​ພະ​ບາງ ທັງ​ຈະ​ເປັນ​ຂໍ້​ມູນ​ສຳ­ຄັນ​ຮັບ​ໃຊ້​ໃຫ້­ການ​ຄົ້ນ­ຄວ້າ ແລະ ນຳ​ເອົາ​ເນື້ອ​ໃນ​ດັ່ງ­ກ່າວ​ເຂົ້າ​ໃນ​ແຜນ­ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ 5 ປີ ຄັ້ງ​ທີ 9 ຂອງ ລັດ­ຖະ­ບານ ໄລ­ຍະ​ປີ 2021-2025.

    ສຳ­ລັບ​ແຜນ­ການ​ໃນ­ຕໍ່­ໜ້າ ຈະ​ໄດ້​ເພີ່ມ​ທະ­ວີ​ເອົາ­ໃຈ­ໃສ່​ປ້ອງ​ກັນ ກຽມ­ພ້ອມ​ຮັບ​ມື ແລະ ປະ­ຕິ­ບັດ​ໃຫ້­ການ​ຊ່ວຍ­ເຫຼືອ​ແກ້​ໄຂ​ໂດຍ​ໄວ ທັງ​ໄລ­ຍະ​ສຸກ​ເສີນ ແລະ ຟຶ້ນ​ຟູ​ຄືນ​ຫຼັງ​ໄພ­ພິ­ບັດ ໂດຍ​ສະ­ເພາະ ການ​ຟື້ນ​ຟູ​ຄືນ​ຫຼັງ​ໄພ­ພິ­ບັດ​ປີ 2019 ສືບ­ຕໍ່​ຈັດ​ຕັ້ງ​ປະ­ຕິ­ບັດ​ຍຸດ​ທະ​ສາດ ແຜນ​ງານ ແລະ ໂຄງ­ການ ທີ່​ໄດ້​ກຳ­ນົດ​ຢູ່​ໃນ​ແຜນ­ການ​ພັດ­ທະ­ນາ​ເສດ­ຖະ­ກິດ-ສັງ­ຄົມ 5 ປີ ຄັ້ງ​ທີ 8 ຂອງ​ລັດ­ຖະ­ບານ ໃຫ້​ສຳ­ເລັດ.

ຂ່າວທີ່ກ່ຽວຂ້ອງ