ຈີນ ຮ່ວມກັບ ເອັສຊີຈີ ພັດທະນາເຕັກໂນໂລຊີແຫ່ງອະນາຄົດ

1.235 08 ພ.ຈ. 2019 ຂ່າວໜ້າ​ໜຶ່ງ
ຈີນ ຮ່ວມກັບ ເອັສຊີຈີ ພັດທະນາເຕັກໂນໂລຊີແຫ່ງອະນາຄົດ

    ສະ​ຖາ​ບັນ​ບັນ­ດິດ​ວິ­ທະ­ຍາ­ສາດ​ຈີນ ອົງ​ກອນ​ດ້ານ​ການ​ວິ­ໄຈ ແລະ ການ​ພັດ­ທະ­ນາ​ຊັ້ນ​ນຳ​ລະ­ດັບ​ໂລກ ຮ່ວມ​ມື​ກັບ ເອັສ​ຊີ​ຈີ ຜ່ານ​ສຳ­ນັກ­ງານ​ນະ​ວັດ­ຕະ​ກຳ ແລະ ການ​ຮ່ວມ​ມື (ບາງ­ກອກ) ສະ​ຖາ​ບັນ​ບັນ­ດິດ​ວິ​ທະຍາ​ສາດ​ຈີນ ພັດ­ທະ­ນາ ແລະ ແລກ­ປ່ຽນ​ຄວາມ​ຮູ້​ດ້ານ​ເຕັກ​ໂນ​ໂລ​ຊີ ແລະ ນະ​ວັດ­ຕະ​ກຳ​ໃນ 5 ອຸດ­ສາ­ຫະ­ກຳ​ຄື: ເມືອງ​ອັດ​ສະ​ລິ​ຍະ ປັນ­ຍາ​ປະ­ດິດ ແລະ ຫຸ່ນ​ຍົນ ສານ​ເຄ​ມີ​ທີ່​ມີ​ມູນ​ຄ່າ​ສູງ ທຸ­ລະ​ກິດ​ພະ­ລັງ­ງານ​ໃໝ່ ສິ່ງແວດ​ລ້ອມ ແລະ ການ​ພັດ­ທະ­ນາ​ແບບ​ຍືນ​ຍົງ ໂດຍ​ຕັ້ງ​ສູນ​ຮ່ວມ​ມື “SCG-CAS ICCB Innovation Hub” ໃນ​ໄທ ນຳ​ເອົາ​ເຕັກ​ໂນ​ໂລ​ຊີ​ມາ​ປະ­ຍຸກ​ໃຊ້ ຮ່ວມ​ວິ­ໄຈ ແລະ ພັດ­ທະ­ນາ​ນະ​ວັດ­ຕະ​ກຳ ພັດ­ທະ­ນາ​ບຸ​ຄະ­ລາ​ກອນ ແລະ ຮ່ວມ​ມື​ດ້ານ​ການ​ລົງ­ທຶນ ເພື່ອ​ຫວັງ​ສານ​ຕໍ່​ກົນ­ລະ­ຍຸດ​ນະ​ວັດ­ຕະ​ກຳ ເພີ່ມ​ຄວາມ​ສາ­ມາດ​ດ້ານ​ການ​ແຂ່ງ­ຂັນ ຊຸກ­ຍູ້​ນະ​ວັດ­ຕະ​ກຳ​ພາກ​ທຸ­ລະ​ກິດ ແລະ ອຸດ­ສາ­ຫະ­ກຳ ໄທ-ຈີນ ຕອບ​ສະ­ໜອງ​ຕະ­ຫຼາດ ແລະ ແນວ­ທາງ​ດ້ານ​ທຸ­ລະ​ກິດ​ໃນ​ອະ­ນາ­ຄົດ ດ້ວຍ​ມູນ​ຄ່າ​ໂຄງ­ການ​ເລີ່ມ​ຕົ້ນ 100 ລ້ານ​ຢວນ ຫຼື ປະ­ມານ 126 ຕື້​ກີບ.

    ທ່ານ ລຸ້ງ​ໂລດ ລັງ­ສີ​ໂຍ​ພາດ ກຳ­ມະ­ການ​ຜູ້​ຈັດ­ການ​ໃຫຍ່ ເອັສ​ຊີ​ຈີ ກ່າວ​ວັນ​ທີ 5 ພະ­ຈິກ 2019 ວ່າ: ເອັສ​ຊີ​ຈີ ເນັ້ນ​ສ້າງ​ການ​ຮ່ວມ​ມື​ກັບ​ສະ​ຖາ​ບັນ ແລະ ອົງ​ກອນ​ຊັ້ນ​ນຳ​ຕ່າງໆ​ທັງ​ໃນ ແລະ ຕ່າງ­ປະ­ເທດ ເພື່ອ​ສ້າງ​ທ່າ­ແຮງ ແລະ ການ​ແລກ­ປ່ຽນ​ຄວາມ​ຮູ້​ດ້ານ​ການ​ພັດ­ທະ­ນາ​ນະ​ວັດ­ຕະ​ກຳ​ຢ່າງ​ຕໍ່​ເນື່ອງ ເຊິ່ງ​ຊ່ວຍ​ໃຫ້​ເອັສ​ຊີ​ຈີ ມີ​ສິນ­ຄ້າ ແລະ ການ​ບໍ­ລິ­ການ​ທີ່​ສາ­ມາດ​ຕອບ​ສະ­ໜອງ​ຄວາມ​ຕ້ອງ­ການ​ຂອງ​ລູກ​ຄ້າ ​ທົ່ວ​ພາກ​ພື້ນ​ອາ​ຊຽນ​ໄດ້​ຢ່າງ​ວ່ອງ­ໄວ ແລະ ຖືກ​ຈຸດ ເຊັ່ນ: ການ​ຫໍ່​ຫຸ້ມ​ສິນ­ຄ້າ​ຕ່າງໆ​ທີ່​ຊ່ວຍ​ເພີ່ມ​ຄວາມ​ສະ­ດວກ​ ໃຫ້​ທຸກ​ຮູບ​ແບບ​ການ​ໃຊ້​ຊີ­ວິດ ເມັດ​ປລາດ​ສະ​ຕິກ​ທີ່​ມີ​ຄວາມ​ແຂງ­ແຮງ​ແຕ່​ໃຊ້​ເມັດ​ປລາດ​ສະ​ຕິກ​ໃຫ້​ໜ້ອຍ​ລົງ ແລະ ແນວ­ທາງ​ທີ່​ຊ່ວຍ​ແກ້​ບັນ­ຫາ​ການ​ກໍ່­ສ້າງ​ໃນ​ຮູບ​ແບບ​ຕ່າງໆ​ຄົບ​ວົງ​ຈອນ.

    ທ່ານ ຈຽງ ປຽວ ຜູ້­ອຳ­ນວຍ­ການ​ສຳ­ນັກ­ງານ​ນະ​ວັດ­ຕະ​ກຳ ແລະ ການ​ຮ່ວມ​ມື (ບາງ­ກອກ) ສະ​ຖາ​ບັນ​ບັນ­ດິດ​ວິ­ທະ­ຍາ­ສາດ​ຈີນ ກ່າວ​ວ່າ: CAS ICCB ເປັນ​ໜຶ່ງ​ໃນ​ສຳ­ນັກ­ງານ​ຕ່າງ­ປະ­ເທດ 9 ສາ­ຂາ​ຂອງ CAS ທີ່​ມີ​ບົດ­ບາດ​ສຳ­ຄັນ​ໃນ​ການ​ສະ­ແຫວງ­ຫາ​ການ​ຮ່ວມ​ມື​ກັບ​ອົງ​ກອນ​ຊັ້ນ​ນຳ​ຕ່າງໆ​ໃນ​ແຕ່​ລະ​ປະ­ເທດ ເພື່ອ​ຖ່າຍ​ທອດ​ຜົນ­ງານ​ດ້ານ​ວິ​ທະ​ສາດ​ຂອງ CAS ເຊິ່ງ​ມີ​ສະ​ຖາ​ບັນ​ວິ­ໄຈ​ຫຼາຍ​ກວ່າ 100 ແຫ່ງ​ໃນ​ຈີນ ນັກ​ວິ­ໄຈ ແລະ ທີມ​ງານ​ຫຼາຍ​ກວ່າ 70 ພັນ​ຄົນ ເຄືອ​ຄ່າຍ​ນັກ​ຄົ້ນ­ຄວ້າ​ວິ­ທະ­ຍາ­ສາດ​ລະ­ດັບ​ອາ­ວຸ­ໂສ​ຫຼາຍ​ກວ່າ 800 ຄົນ ແລະ ມະ­ຫາ­ວິ­ທະ­ຍາ­ໄລ​ໃນ​ສັງ­ກັດ 3 ແຫ່ງ.

ຂ່າວທີ່ກ່ຽວຂ້ອງ