ເລັ່ງກວດອາຫານ-ເຄື່ອງດື່ມ ໃນງານບຸນນະມັດສະການພະທາດຫຼວງ

1.267 08 ພ.ຈ. 2019 ຂ່າວໜ້າ​ໜຶ່ງ

   ທ່ານ ບຸນ​ທະ­ວີ ເດດ​ບັນ­ດິດ ຮອງ​ອະ­ນຸ​ກຳ­ມະ­ການ​ຮັກ­ສາ​ສຸ­ຂະ­ພາບ ແລະ ສະ­ຫວັດ­ດີ​ການ​ສັງ­ຄົມ ຮອງ​ຫົວ­ໜ້າ​ພະ​ແນກ​ສາ­ທາ­ລະ­ນະ​ສຸກ ນະ­ຄອນ­ຫຼວງ​ວຽງ​ຈັນ (ນວ) ໃຫ້​ສຳ­ພາດ​ວັນ​ທີ 6 ພະ­ຈິກ 2019 ວ່າ: ອະ­ນຸ​ກຳ­ມະ­ການ​ສຸ­ຂະ­ພາບ ແລະ ສະ­ຫວັດ­ດີ​ການ​ສັງ­ຄົມ ເປັນ​ອະ­ນຸ​ກຳ­ມະ­ການ​ໜຶ່ງ​ທີ່​ເຮັດ​ໜ້າ­ທີ່​ປະ­ກອບ­ສ່ວນ​ໃນ​ບຸນ​ນະ­ມັດ­ສະ­ການ​ພະ​ທາດ­ຫຼວງ ໂດຍ​ສະ­ເພາະ ການ​ຮັກ­ສາ​ສຸ­ຂະ­ພາບ​ຂອງ​ປະ ຊາ​ຊົນ​ທີ່​ມາ​ທ່ຽວ​ຊົມ​ງານ​ບຸນ​ພະ​ທາດ­ຫຼວງ ລວມ​ທັງ​ພະ­ນັກ­ງານ​ທີ່​ຮັບ​ໃຊ້​ໃນ​ງານ​ດັ່ງ­ກ່າວ ເຊິ່ງ​ພະ​ແນກ ສາ­ທາ­ລະ­ນະ​ສຸກ ນວ ໄດ້​ຈັດ​ຕັ້ງ​ທີມ​ແພດ​ປະ­ຈຳ­ການ​ຢູ່ 2 ຈຸດ ຄື: ຢູ່​ເດີ່ນ​ພະ​ທາດ­ຫຼວງ ແລະ ສູນ​ການ​ຄ້າ​ລາວ-ໄອ​ເຕັກ.

   ສະ­ເພາະ​ຢູ່​ເດີ່ນ​ພະ​ທາດ­ຫຼວງ ປະ­ກອບ​ທີມ​ແພດ​ເຂົ້າ​ປະ­ຈຳ­ການ 20 ຄົນ ສ່ວນ​ຢູ່​ສູນ​ການ​ຄ້າ​ລາວ​ໄອ​ເຕັກ 10 ຄົນ​ຕໍ່​ມື້ ໃນ​ນີ້ ໄດ້​ແບ່ງ​ເປັນ​ໜ່ວຍ​ແພດ​ປະ­ຖົມ­ພະ­ຍາ­ບານ​ຮັບ​ໃຊ້​ກວດ​ຢູ່​ກັບ​ທີ່ ໜ່ວຍ​ລົດ​ແພດ ໜ່ວຍ​ອາ­ຫານ ແລະ ຢາ ເຊິ່ງ​ໜ່ວຍ​ດັ່ງ­ກ່າວ​ໄດ້​ເຄື່ອນ​ໄຫວ​ກວດ​ອາ­ຫານ​ຕາມ​ຮ້ານ​ອາ­ຫານ​ຕ່າງໆ​ທີ່­ຢູ່​ໃນ​ງານ​ບຸນ ເພື່ອ​ກວດ​ຄຸນ​ນະ​ພາບ​ຂອງ​ອາ­ຫານ ແລະ ເຄື່ອງ​ດື່ມ ເພື່ອ​ຄວາມ​ປອດ​ໄພ​ຂອງ​ປະ­ຊາ­ຊົນ​ທີ່​ເຂົ້າ​ມາ​ຮ່ວມ​ງານ ໃນ​ນີ້ ໄດ້​ເນັ້ນ​ກວດ​ວັນ​ໝົດ​ອາ­ຍຸ ສີ­ສະ​ສົມ​ໃນ​ອາ­ຫານ ແລະ ສານ​ເຈືອ​ປົນ​ຕ່າງໆ ໂດຍ​ສະ­ເພາະ ເຂົ້າ­ຫຼາມ ປີ້ງ​ໄກ່ ຖ້າ​ກໍ­ລະ­ນີ​ກວດ​ພົບ​ມີ​ສິ່ງ​ເຈືອ​ປົນ​ມາ​ນຳ​ອາ­ຫານ ຈະ​ສັ່ງ​ໃຫ້​ຢຸດ​ຈຳ­ໜ່າຍ ແລະ ຖ້າ​ພົບ​ອາ­ຫານ​ໝົດ​ອາ­ຍຸ ກໍ​ຈະ​ຢຶດ ພ້ອມ​ທັງ​ຕັກ­ເຕືອນ ນອກ​ນີ້ ຍັງ​ມີ​ໜ່ວຍ​ສຸ​ຂະ​ສຶກ​ສາ​ໂຄ­ສະ­ນາ​ພະ­ຍາດ​ຕາມ​ລະ­ດູ​ການ ພ້ອມ​ທັງ​ໜ່ວຍ​ກາ­ແດງ ເຊິ່ງ​ໄດ້​ເຄື່ອນ​ໄຫວ​ຕາມ​ຈຸດ​ຕ່າງໆ ເພື່ອ​ຮັບ­ປະ­ກັນ​ໄດ້​ສຸ­ຂະ­ພາບ​ຂອງ​ປະ­ຊາ­ຊົນ​ທີ່​ມາ​ທ່ຽວ​ງານ​ບຸນ ໃນ​ເວ­ລາ​ເກີດ​ອາ­ການ​ວິນ​ຫົວ ເປັນ​ລົມ ເຊິ່ງ​ບໍ່​ສາ­ມາດ​ເຂົ້າ​ເຖິງ​ຈຸດ​ບໍ­ລິ­ການ​ສາ­ທາ­ລະ­ນະ​ສຸກ​ຂອງ​ພວກ​ເຮົາ ໜ່ວຍ​ດັ່ງ­ກ່າວ​ກໍ​ຈະ​ໄດ້​ປະ­ຖົມ­ພະ­ຍາ­ບານ​ກັບ​ທີ່ ແລະ ຢາຍ​ຢາ​ເພື່ອ​ແກ້​ໄຂ​ອາ­ການ​ເບື້ອງ​ຕົ້ນ ນອກ​ນີ້ ອະ­ນຸ​ກຳ­ມະ­ການ​ພວກ​ເຮົາ​ຍັງ​ໄດ້​ປະ­ກອບ­ສ່ວນ​ແກ້​ໄຂ​ບັນ­ຫາ​ຄົນ​ຂໍ­ທານ ບ້າ​ໄບ້ ເສຍ​ຈິດ ທີ່​ມາ​ໃນ​ບໍ­ລິ­ເວນ​ອ້ອມ​ຮອບ​ເດີ່ນ​ພະ​ທາດ­ຫຼວງ ພາກ­ສ່ວນ​ດັ່ງ­ກ່າວ​ຈະ​ໄດ້​ຮັບ​ການ​ເບິ່ງ­ແຍງ​ສົ່ງ​ເຂົ້າ​ໄປ​ຢູ່​ສູນ​ສົງ­ເຄາະ​ສົມ​ສະ­ຫງ່າ.

   ສະ­ພາບ​ລວມ​ກ່ຽວ​ກັບ​ການ​ຮັບ​ໃຊ້​ບຸນ​ດັ່ງ­ກ່າວ ອີງ­ໃສ່​ບົດ­ຮຽນ​ໃນ​ປີ­ຜ່ານ­ມາ ການ​ໃຫ້​ບໍ­ລິ­ການ​ປະ ຊາ​ຊົນ​ແມ່ນ​ເຮັດ​ໄດ້​ຢ່າງ​ທົ່ວ​ເຖິງ ເວົ້າ​ສະ­ເພາະ ແມ່ນ​ສາ­ມາດ​ແກ້​ໄຂ​ໄດ້​ຕໍ່​ປະ­ຊາ­ຊົນ​ທີ່​ມີ​ບັນ­ຫາ​ດ້ານ​ສຸ​ຂະ ພາບ ກໍ­ລະ­ນີ​ທີ່​ໜັກ ກໍ​ໄດ້​ນຳ​ສົ່ງ​ໂຮງ­ໝໍ​ທີ່­ຢູ່​ໃກ້​ຄຽງ.

   ດ້ານ​ທ່ານ ສົມ​ຈີນ ສິງ­ຫາ​ຣາ​ຊ ຫົວ­ໜ້າ​ຂະ­ແໜງ​ອາ­ຫານ ແລະ ຢາ ພະ​ແນກ​ສາ­ທາ­ລະ­ນະ​ສຸກ ນວ ກໍ​ໄດ້​ກ່າວ​ວ່າ: ບຸນ​ນະ­ມັດ­ສະ­ການ​ພະ​ທາດ­ຫຼວງ ເປັນ​ງານ​ທີ່​ສຳ­ຄັນ ເປັນ​ປີ​ທ່ອງ​ທ່ຽວ ລາວ-ຈີນ​ເພື່ອ​ຮັບ­ປະ­ກັນ​ອາ­ຫານ​ປອດ​ໄພ ແລະ ຮັບ­ປະ­ກັນ​ອາ­ຫານ​ມີ​ຄຸນ​ນະ​ພາບ ພວກ​ເຮົາ​ໄດ້​ເປັນ​ຫ່ວງ​ເປັນ​ໄຍ​ຕໍ່​ສຸ­ຂະ­ພາບ​ປະ­ຊາ­ຊົນ ຈຶ່ງ​ໄດ້​ສົ່ງ​ທີມ​ງານ​ແພດ​ລົງ​ຕິດ­ຕາມ​ກວດ­ກາ​ປະ­ຈຳ​ທຸກ​ວັນ​ໃນ​ງານ​ດັ່ງ­ກ່າວ ເຊິ່ງ​ແບ່ງ​ທີມ​ງານ​ແພດ​ລົງ​ກວດ­ກາ​ມື້​ລະ 6 ຄົນ ຢູ່​ເດີ່ນ​ພະ​ທາດ­ຫຼວງ ແລະ 4 ຄົນ ຢູ່​ສູນ​ການ​ຄ້າ​ລາວ-ໄອ​ເຕັກ ໂດຍ​ໄດ້​ເລີ່ມ​ລົງ​ກວດ​ວັນ​ທີ 5 ພະ­ຈິກ ເປັນ­ຕົ້ນ​ມາ ໃນ​ນີ້ ກວດ­ກາ​ວັນ​ໝົດ​ອາ­ຍຸ​ຂອງ​ເຄື່ອງ​ດື່ມ ແລະ ອາ­ຫານ ພ້ອມ​ທັງ​ໄດ້​ແນະ­ນຳ​ໃຫ້​ຊາວ​ຄ້າ-ຂາຍ​ໃຫ້​ນຳ​ໃຊ້​ເຈ້ຍ​ທີ່​ສະ­ອາດ ແລະ ໃບ­ຕອງ ກໍ​ຄື​ພາ­ຊະ­ນະ​ອື່ນໆ​ທີ່​ປອດ​ໄພ ມາ​ຮອງ ຫຼື ຫໍ່​ອາ­ຫານ​ໃຫ້​ຜູ້​ບໍ­ລິ­ໂພກ ຜ່ານ​ການ​ຕິດ­ຕາມ​ກວດ­ກາ​ອາ­ຫານ​ແລະ ເຄື່ອງ​ດື່ມ ພາຍ​ໃນ​ງານ​ບຸນ​ແມ່ນ​ມີ​ຄວາມ​ປອດ​ໄພ.

ຂ່າວທີ່ກ່ຽວຂ້ອງ