ADB ຊ່ວຍສ້າງຄວາມເຂັ້ມແຂງ ດ້ານການພັດທະນາຊັບພະຍາກອນມະນຸດ

1.345 08 ພ.ຈ. 2019 ຂ່າວໜ້າ​ໜຶ່ງ
ADB ຊ່ວຍສ້າງຄວາມເຂັ້ມແຂງ ດ້ານການພັດທະນາຊັບພະຍາກອນມະນຸດ

    ທ່ານ ຢາ​ຊູ​ຊິ ເນ​ກິ​ຊິ ຜູ້­ອຳ­ນວຍ­ການ​ຫ້ອງ­ການ​ທະ­ນາ­ຄານ​ພັດ­ທະ­ນາ​ອາ­ຊີ (ADB) ປະ­ຈຳ​ລາວ ນຳ­ພາຄະ­ນະ ແລະ ສື່​ມວນ​ຊົນ​ຈາກ​ສູນ​ກາງ ເຂົ້າ​ພົບ​ປະ​ທ່ານ ບຸນ​ຖອງ ດີ​ວິ​ໄຊ ເຈົ້າ­ແຂວງ​ຈຳ­ປາ​ສັກ ວັນ​ທີ 6 ພະຈິກ 2019 ຢູ່​ຫ້ອງ​ວ່າ­ການ​ແຂວງ​ດັ່ງ­ກ່າວ ໃນ​ໂອ­ກາດ​ທີ່​ເດີນ­ທາງ​ມາ​ຕິດ­ຕາມ​ໂຄງ­ການ​ເຂັ້ມ­ແຂງ​ການ​ສຶກ​ສາ​ຊັ້ນ​ສູງ ແລະ ໂຄງ­ການ​ດ້ານ​ອະ​ຊີ­ວະ​ສຶກ​ສາ​ທີ່ ADB ໃຫ້­ການ​ສະ­ໜັບ­ສະ­ໜູນ​ຢູ່​ແຂວງ​ຈຳ­ປາ​ສັກ.

    ໂອ­ກາດ​ນີ້ ທ່ານ ບຸນ​ຖອງ ດີ​ວິ​ໄຊ ກໍ​ໄດ້​ລາຍ​ງານ​ວ່າ: ປັດ­ຈຸ­ບັນ​ແຂວງ​ຈຳ­ປາ​ສັກ ໄດ້​ຮັບ​ການ​ຊ່ວຍ­ເຫຼືອ​ຈາກ ADB ຫຼາຍ​ໂຄງ­ການ ເປັນ­ຕົ້ນ ໂຄງ­ການ​ກໍ່­ສ້າງ​ປ້ອງ​ກັນ​ຕາ­ຝັ່ງ​ເຈື່ອນ​ແຄມ​ເຊ​ໂດນ ໂຄງ­ການ​ປັບ­ປຸງ​ສະພາບ​ແວດ​ລ້ອມ​ໃນ​ຕົວ​ເມືອງ ໂຄງ­ການ​ພັດ­ທະ­ນາ​ຊັບ­ພະ­ຍາ­ກອນ​ມະ­ນຸດ ເຊິ່ງ​ກຳ­ລັງ​ຈັດ​ຕັ້ງ​ປະ­ຕິ­ບັດ​ຢູ່ ນອກ​ນີ້​ຍັງ​ມີ​ໂຄງ­ການ​ຊ່ວຍ­ເຫຼືອ​ຂອງ​ລັດ­ຖະ­ບານ ສ ເກົາ­ຫຼີ ຄື: ໂຄງ­ການ​ປ້ອງ​ກັນ​ຕາ­ຝັ່ງ​ເຈື່ອນ​ແຄມ​ຂອງ ແລະ ອື່ນໆ ຍ້ອນ​ມີ​ການ​ຊ່ວຍ­ເຫຼືອ​ຄື​ແນວ​ນັ້ນ ແຂວງ​ຈຳ­ປາ​ສັກ​ຈຶ່ງ​ມີ​ການ​ພັດ­ທະ­ນາ ແລະ ມີ​ນັກ​ທະ­ລຸ​ກິດ​ຕ່າງ­ປະ­ເທດ​ມາ​ລົງ­ທຶນ​ຢູ່​ແຂວງ​ຈຳ­ປາ​ສັກ 18 ປະ­ເທດ 560 ກວ່າ​ໂຄງ­ການ ມູນ​ຄ່າ​ການ​ລົງ­ທຶນ​ຫຼາຍ​ກວ່າ 4 ຕື້​ໂດ​ລາ​ສະ­ຫະ­ລັດ ຫຼື ປະ­ມານ 35.420,69 ຕື້​ກີບ ເສດ­ຖະ­ກິດ​ຂະ­ຫຍາຍ­ຕົວ​ລະ­ດັບ 8,15% ລາຍ​ຮັບ​ພົນ­ລະ­ເມືອງ 3.500 ໂດ​ລາ​ສະ­ຫະ­ລັດ ຫຼື ປະ­ມານ 30 ລ້ານ​ກີບ​ຕໍ່​ຄົນ​ຕໍ່​ປີ ມີ​ບ້ານ​ທຸກ​ຍາກ 10 ບ້ານ ເທົ່າ​ກັບ 1,5% ຄອບ­ຄົວ​ທີ່​ທຸກ​ຍາກ 500 ຄອບ­ຄົວ ເທົ່າ​ກັບ 0,4%.

    ທ່ານ ຢາ​ຊູ​ຊິ ເນ​ກິ​ຊິ ໄດ້​ເນັ້ນ​ວ່າ: ADB ເລີ່ມ​ໃຫ້­ການ​ສະ­ໜັບ­ສະ­ໜູນ​ໂຄງ­ການ​ສ້າງ​ຄວາມ​ເຂັ້ມ­ແຂງ​ດ້ານ​ຊັບ­ພະ­ຍາ­ກອນ​ມະ­ນຸດ​ຢູ່​ແຂວງ​ຈຳ­ປາ​ສັກ ນັບ​ແຕ່​ປີ 1990 ເປັນ­ຕົ້ນ​ມາ ໂດຍ​ໄດ້​ຊຸກ­ຍູ້​ການ​ຮຽນ-ການ ສອນ​ລະ­ດັບ​ຊັ້ນ​ປະ­ຖົມ ມັດ­ທະ­ຍົມ ແລະ ລະ­ດັບ​ມະ­ຫາ­ວິ­ທະ­ຍາ­ໄລ ເຊິ່ງ​ຂະ­ແໜງ­ການ ADB ແມ່ນ​ໄດ້​ລົງ​ເລິກ​ໃນ 3 ຂະ­ແໜງ­ການ​ຍ່ອຍ ໃນ​ເປົ້າ​ໝາຍ​ການ​ພັດ­ທະ­ນາ​ການ​ສຶກ​ສາ​ຂອງ​ລາວ ນອກ​ນີ້ ຍັງ​ໄດ້​ຊ່ວຍ­ເຫຼືອ ດ້ານ​ການ​ປັບ­ປຸງ​ຫຼັກ­ສູດ​ການ​ຮຽນ-ການ​ສອນ ພ້ອມ​ທັງ​ຍົກ​ລະ­ດັບ​ບຸ​ຄະ­ລາ​ກອນ​ໃຫ້​ມີ​ຄຸນ​ນະ​ພາບ ເພື່ອ​ປະ ກອບ​ສ່ວນ​ພັດ­ທະ­ນາ​ເສດ­ຖະ­ກິດ-ສັງ­ຄົມ​ຂອງ​ແຂວງ ກໍ​ຄື ເຮັດ​ໃຫ້​ປະ­ເທດ​ຊາດ​ຫຼຸດ​ພົ້ນ​ອອກ​ຈາກ​ສະ­ພາບ​ດ້ອຍ​ພັດ­ທະ­ນາ.

ຂ່າວທີ່ກ່ຽວຂ້ອງ