ນຳ​ເອົາ​ຜະລິດ​ຕະ​ພັນ​ປະຊາຊົນ​ມາ​ວາງສະແດງ​ໃນ​ໂອກາດ​ບຸນທາດຫຼວງ

1.200 11 ພ.ຈ. 2019 ຂ່າວໜ້າ​ໜຶ່ງ

    ບ້ານ​ສວນ​ມະນີ​ຈັນ ແລະ ເຄືອ​ຄ່າຍ​ສີ່​ຫຼຽມ​ວັດທະນະທຳ​ລ້ານ​ຊ້າງ ລາວ-ໄທ ນຳ​ເອົາ​ຜະລິດ​ຕະ​ພັນ​ການ​ມີ​ສ່ວນ​ຮ່ວມ​ຂອງ​ປະຊາຊົນ ແລະ ຜະລິດ​ຕະ​ພັນ​ການທ່ອງທ່ຽວ ມາ​ວາງສະແດງ ແລະ ຈຳໜ່າຍ​ໃນ​ງານ​ບຸນ​ນະມັດສະການ​ພະ​ທາດຫຼວງ​ວຽງ​ຈັນ ແລະ ງານ​ວາງສະແດງ​ສິນຄ້າ ປະຈຳ​ປີ 2019 ທີ່​ຈັດ​ຂຶ້ນ​ວັນ​ທີ 5-11 ພະຈິກ ນີ້.

    ທ່ານ​ນາງ ມະນີ​ຈັນ ພັນ​ວາດ​ວົງສາ ປະທານ​ເຄືອ​ຄ່າຍ​ສີ່​ຫຼ່ຽມ​ວັດທະນະທຳ​ລ້ານ​ຊ້າງ​ຝ່າຍ​ລາວ ໃຫ້​ສຳພາດ​ວັນ​ທີ 5 ພະຈິກ 2019 ວ່າ: ບຸນ​ນະມັດສະການ​ພະ​ທາດຫຼວງ​ວຽງ​ຈັນ ປະຈຳ​ປີ 2019 ເປັນ​ປີ​ທີ່​ມີ​ຄວາມ​ສຳຄັນ ຕິດ​ພັນ​ກັບ​ປີ​ທ່ອງ​ທ່ຽວ ລາວ-ຈີນ ເຄືອ​ຄ່າຍ​ສີ່​ຫຼ່ຽມ​ລ້ານ​ຊ້າງ​ແມ່ນ​ກິດຈະກຳ​ໜຶ່ງ​ທີ່​ສົ່ງເສີມ​ການທ່ອງທ່ຽວ​ແບບ​ປະຊາຊົນ​ມີ​ສ່ວນ​ຮ່ວມ​ຂອງ​ສີ່​ແຂວງ ສຳລັບ ​ສປປ ລາວ ຄື: ຊຸມ​ຊົນ​ຕົ້ນ​ກ້າ ແຂວງ​ໄຊ​ຍະ​ບູ​ລີ ຊຸມ​ຊົນ​ບ້ານ​ນາ​ຍາງ ແຂວງ​ຫຼວງ​ພະ​ບາງ ຫັດຖະກຳ​ປ້າ​ຄຳ​ແສນ ແຂວງ​ວຽງ​ຈັນ ແລະ ບ້ານ​ສວນ​ມະນີ​ຈັນ ນະຄອນຫຼວງ​ວຽງ​ຈັນ ໃນ​ນີ້ ໄດ້​ນຳ​ເອົາ​ຜະລິດ​ຕະ​ພັນ​ຂອງ​ປະຊາຊົນ​ມີ​ສ່ວນ​ຮ່ວມ​ໃນ​ສີ່​ກິດຈະກຳ ມາ​ວາງສະແດງ​ໃຫ້​ມວນ​ຊົນ​ທົ່ວ​ປະເທດ​ລາວ​ທີ່​ມາ​ທ່ຽວບຸນ​ນະມັດສະການ​ພະ​ທາດຫຼວງ​ວຽງ​ຈັນ ໄດ້​ຮັບ​ຮູ້​ເຄືອ​ຄ່າຍ​ສີ່​ຫຼ່ຽມ​ລ້ານ​ຊ້າງ​ຫຼາຍ​ຂຶ້ນ​ກວ່າ​ເກົ່າ ພ້ອມ​ນີ້ ດ້ານ​ການທ່ອງທ່ຽວ​ແມ່ນ​ໄດ້​ຮັບ​ການ​ສະໜັບສະໜູນ​ຈາກ​ໂຄງ​ລ່າງ​ພື້ນຖານ​ການ​ພັດທະນາ​ການທ່ອງທ່ຽວ ກົມ​ພັດທະນາ​ການທ່ອງທ່ຽວ ກະຊວງ​ຖະແຫຼງ​ຂ່າວ ວັດທະນະທຳ ແລະ ທ່ອງ​ທ່ຽວ ເຊິ່ງ​ເປັນ​ໜຶ່ງ​ໃນ​ກິດຈະກຳ​ທີ່​ໂດດ​ເດັ່ນ​ໃນ 4 ແຂວງ ເຄືອ​ຄ່າຍ​ສີ່​ຫຼ່ຽມ​ລ້ານ​ຊ້າງ ໄດ້​ລິ​ເລີ່ມ​ປີ 2017 ກິດຈະກຳ​ໄດ້​ມີ​ການ​ຂະຫຍາຍຕົວ​ໃນ​ການ​ສ້າງ​ພາກ​ທຸລະ​ກິດ​ໃຫ້​ປະຊາຊົນ​ມີ​ສ່ວນ​ຮ່ວມ ສົກ​ປີ 2018-2019 ສາມາດ​ສ້າງ​ກິດຈະກຳ​ໄດ້​ສີ່​ແຂວງ​ທີ່​ກ່າວ​ມາ​ນັ້ນ ໂດຍ​ການ​ສຳ​ຫຼວດ​ໃນ​ພື້ນ​ທີ່​ປະຊາຊົນ​ມີ​ສ່ວນ​ຮ່ວມ​ມາ​ເຮັດ​ກິດຈະກຳ ແຕ່​ການ​ເຮັດ​ຕົວ​ຈິງ​ມີ​ບາງ​ຈຳນວນ​ໄດ້​ລິ​ເລີ່ມ ແລະ ຊຸກຍູ້​ໄປ​ໄດ້​ສົມບູນ​ແບບ​ໃນ 4 ແຂວງ​ຂອງ​ໄທ ທີ່​ເປັນ​ສີ່​ຫຼ່ຽມ​ວັດທະນະທຳ​ລ້ານ​ຊ້າງ ຈະ​ມີ​ບົດຮຽນ​ໃຫ້​ຖອດ​ຖອນ ແລະ ຮຽນ​ຮູ້​ປະຊາຊົນ​ມີ​ສ່ວນ​ຮ່ວມ ທີ່​ເອີ້ນ​ວ່າ​ການທ່ອງທ່ຽວ​ແບບ​ຊຸມ​ຊົນ.

    ບ້ານ​ສວນ​ມະນີ​ຈັນ ເປັນ​ໜຶ່ງ​ໃນ​ກິດຈະກຳ​ທີ່​ເຮັດ​ໃຫ້​ນະຄອນຫຼວງ​ວຽງ​ຈັນ ມີ​ສີສັນ​ໃນ​ການ​ຕ້ອນຮັບ​ປີ​ທ່ອງ​ທ່ຽວ ລາວ-ຈີນ 2019 ການ​ປະກອບສ່ວນ​ໃນ​ງານ​ຄັ້ງ​ນີ້ ໄດ້​ເອົາ​ສິນຄ້າ​ຂອງ​ປະຊາຊົນ​ທີ່​ມີ​ສ່ວນ​ຮ່ວມ​ໃນ​ສີ່​ກິດຈະກຳ​ຂອງ​ເຄືອ​ຄ່າຍ​ສີ່​ຫຼ່ຽມ​ລ້ານ​ຊ້າງ​ລາວ ມາ​ວາງສະແດງ ແລະ ຈຳໜ່າຍ ເຊິ່ງ​ບ້ານ​ສວນ​ມະນີ​ຈັນ​ສ້າງຕັ້ງ​ປີ 2015 ໃນ​ເນື້ອທີ່ 4 ໄລ່ ປະກອບ​ມີ​ກິດຈະກຳ ການ​ທ່ຽວ​ຊົມ​ຕົ້ນໄມ້​ທີ່​ຫາ​ຍາກ ແລະ ໃກ້​ຈະ​ສູນພັນ ການ​ປຸງ​ແຕ່ງອາຫານ​ລາວ ການ​ແລກປ່ຽນ​ໂປຣ​ແກມ​ການທ່ອງທ່ຽວ ການ​ຫາ​ໜໍ່ໄມ້​ໃນ​ສວນ​ປ່າ​ໄຜ່ ແລະ ການ​ນຳ​ໄມ້ໄຜ່​ມາ​ສ້າງ​ແປ​ຮູບ​ເຄື່ອງໃຊ້​ອະເນກ​ປະສົງ ພິເສດ​ພາຍ​ໃນ​ສວນ​ໄດ້​ມີ​ການ​ແຕ່ງ​ກາຍ​ຊຸດ​ໄທ​ແດງ ແນໃສ່​ອະນຸ​ຮັກ ຮັກສາ​ວັດທະນະທຳ​ທີ່​ເປັນ​ເອກະລັກ​ຂອງ​ຊົນເຜົ່າ​ໃຫ້​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງປະເທດ​ໄດ້​ຮັບ​ຮູ້​ວິຖີ​ການ​ດຳລົງ​ຊີວິດ​ຂອງ​ຄົນ​ລາວ ສະເພາະ​ປີ 2018 ຍ້ອນ​ຖືກ​ວິ​ກິດ​ຈາກ​ອຸ​ທົກ​ກະ​ໄພ ຈຶ່ງ​ໄດ້​ເລີ່ມ​ຮັບ​ນັກ​ທ່ອງ​ທ່ຽວ​ເດືອນ​ສິງຫາ-ເດືອນ​ກັນຍາ ມີ​ນັກ​ທ່ອງ​ທ່ຽວ​ເຂົ້າ​ທ່ຽວ​ຊົມ 300 ຄົນ ສ່ວນ​ປີ 2019 ນັກ​ທ່ອງ​ທ່ຽວ​ໄດ້​ມີ​ການ​ເພີ່ມ​ທ່ຽວ​ເປັນ​ກຸ່ມ​ຫຼາຍ​ຂຶ້ນ ຈຶ່ງ​ຂໍ​ເຊີນຊວນ​ນັກ​ທ່ອງ​ທ່ຽວ​ທັງ​ພາຍ​ໃນ ແລະ ຕ່າງປະເທດ​ເຂົ້າ​ມາ​ຮຽນ​ຮູ້​ກິດຈະກຳ​ຕ່າງໆ ສຳຜັດ​ວິຖີ​ຊີວິດ​ຂອງ​ຄົນ​ລາວ ກິນ​ອາຫານ​ປອດ​ສານພິດ ຢູ່​ທີ່​ບ້ານ​ສວນ​ມະນີ​ຈັນ. 

ຂ່າວທີ່ກ່ຽວຂ້ອງ