ສົ່ງເສີມການຜະລິດ ແລະ ຊື້-ຂາຍພືດຜັກ ໃຫ້ເປັນລະບົບ

706 12 ພ.ຈ. 2019 ຂ່າວໜ້າ​ໜຶ່ງ
ສົ່ງເສີມການຜະລິດ ແລະ ຊື້-ຂາຍພືດຜັກ ໃຫ້ເປັນລະບົບ

   ໃນ​ອາ­ທິດ​ຜ່ານ​ມາ ໜ່ວຍ​ງານ​ສົ່ງ­ເສີມ​ການ​ຜະ­ລິດ ຈຳ­ໜ່າຍ ຄຸ້ມ​ຄອງ​ຕະ­ຫຼາດ ແລະ ສົ່ງ­ເສີມ​ການ​ຊົມ­ໃຊ້​ສິນ­ຄ້າ​ທີ່​ຜະ­ລິດ​ຢູ່​ພາຍ​ໃນ​ແບບ​ເປັນ​ລະ­ບົບ​ຕ່ອງ​ໂສ້​ຄົບ​ຊຸດ​ໄດ້​ລົງ​ພົບ​ປະ​ຜູ້​ປະ­ກອບ​ການ​ຊື້-ຂາຍ​ພືດ​ຜັກ​ຢູ່​ຕະ­ຫຼາດ​ລາວ-ອົດ​ຊີ ເມືອງ​ສີ​ໂຄດ​ຕະ­ບອງ ນະ­ຄອນ­ຫຼວງ​ວຽງ​ຈັນ ເພື່ອ​ລົງ​ເກັບ​ກຳ​ຂໍ້​ມູນ​ສະ­ພາບ​ການ​ຊື້-ຂາຍ​ຕົວ​ຈິງ ແລະ ບັນ­ຫາ​ຕ່າງໆ​ຂອງ​ຜູ້​ປະ­ກອບ​ການ​ຢູ່​ໃນ​ຕະ­ຫຼາດ​ດັ່ງ­ກ່າວ.

   ເພື່ອ​ຊອກ​ຫາ​ບັນ­ຫາ​ຕ່າງໆ​ຂອງ​ຜູ້​ປະ­ກອບ​ການ​ກຳ­ລັງ​ປະ​ເຊີນ ເພື່ອ​ກ້າວ​ໄປ​ສູ່​ກົນ​ໄກ​ການ​ຈັບ​ຄູ່​ກັນ​ລະ ຫວ່າງ​ຜູ້​ຊື້ ແລະ ຜູ້​ຜະ­ລິດ ແນ­ໃສ່​ຊຸກ­ຍູ້​ສົ່ງ­ເສີມ​ການ​ຜະ­ລິດ​ພືດ​ຜັກ​ໃຫ້​ເປັນ​ສິນ­ຄ້າ​ຢູ່​ພາຍ​ໃນ​ຢ່າງ​ແຂງ­ແຮງ ມີ​ຄຸນ​ນະ​ພາບ ແທດ­ເໝາະ​ກັບ​ຄວາມ​ຕ້ອງ­ການ​ຂອງ​ຕະ­ຫຼາດ ແລະ ຫຼຸດ­ຜ່ອນ​ການ​ນຳ​ເຂົ້າ​ທີ່​ບໍ່​ຖືກ­ຕ້ອງ​ຈາກ​ຕ່າງ­ປະ­ເທດ.

   ໂອ­ກາດ​ນີ້ ທ່ານ ພວງ​ປາ​ຣີ​ສັກ ປຣະ​ວົງ​ວຽງ​ຄຳ ຮອງ​ລັດ­ຖະ­ມົນ­ຕີ​ກະ­ຊວງ​ກະ­ສິ­ກຳ ແລະ ປ່າ­ໄມ້ ກ່າວ​ວ່າ: ການ​ມາ​ພົບ​ປະ­ກັນ​ຄັ້ງ​ນີ້ ກໍ​ເພື່ອ​ມາ​ສົນ­ທະ­ນາ ແລະ ປຶກ­ສາ​ຫາ­ລື​ກັນ ເພື່ອ​ເຮັດ​ແນວ­ໃດ​ໃຫ້​ຜູ້​ປະ­ກອບ​ການ ແລະ ຜູ້​ຜະ­ລິດ ສາ­ມາດ​ເຊື່ອມ​ຈອດ​ກັນ ເຂົ້າ​ເຖິງ​ກັນ ແລະ ກັນ ເພາະ­ວ່າ ໃນ​ໄລ­ຍະ​ຜ່ານ​ມາ ແມ່ນ​ຕ່າງ​ຝ່າຍ​ຕ່າງ​ເຮັດ ເຊິ່ງ​ເຮັດ​ໃຫ້­ການ​ຜະ­ລິດ ແລະ ການ​ຊື້-ຂາຍ ບໍ່​ເປັນ​ລະ­ບົບ​ຕ່ອງ​ໂສ້​ແບບ​ຄົບ​ຊຸດ ມີ​ຜູ້​ໄດ້​ປຽບ​ເສຍ­ປຽບ ລາ­ຄາ​ມີ​ການ​ເໜັງ​ຕີງ​ຕະ­ຫຼອດ ແລະ ມີ​ບັນ­ຫາ​ການ​ສະ­ໜອງ​ສິນ­ຄ້າ​ບໍ່​ພຽງ­ພໍ ແລະ ແທດ­ເໝາະ​ກັບ​ຄວາມ​ຕ້ອງ­ການ​ຕະ­ຫຼາດ ທັງໆ​ທີ່​ປະ­ເທດ​ເຮົາ​ມີ​ທ່າ­ແຮງ ແລະ ຄວາມ​ອຸ­ດົມ­ສົມ­ບູນ.

   ບັນ­ຫາ​ທີ່​ເກີດ​ຂຶ້ນ​ໃນ​ໄລ­ຍະ​ຜ່ານ​ມາ​ປະ­ກອບ​ມີ: ການ​ປູກ​ພືດ​ທີ່​ບໍ່​ແທດ­ເໝາະ​ກັບ​ຄວາມ​ຕ້ອງ­ການ ແລະ ປູກ​ພ້ອມ​ກັນ​ເປັນ​ຈຳ­ນວນ​ຫຼາຍ ຈຶ່ງ​ເຮັດ​ໃຫ້​ລາ­ຄາ​ຕົກ­ຕ່ຳ ພໍ່­ຄ້າ-ແມ່​ຄ້າ​ຄົນ​ກາງ​ມີ​ຫຼາຍ​ຕໍ່ ເຮັດ​ໃຫ້­ການ​ຊື້-ຂາຍ​ຢູ່​ສວນ​ມີ​ລາ­ຄາ​ຕ່ຳ ຄຸນ​ນະ​ພາບ ແລະ ມາດ­ຕະ­ຖານ​ບໍ່​ໄດ້​ຕາມ​ຄວາມ​ຕ້ອງ­ການ​ຂອງ​ຕະ­ຫຼາດ ເພາະ​ຕ່າງ​ຝ່າຍ​ຕ່າງ​ເຮັດ​ບໍ່​ໄດ້​ມີ​ການ​ປະ­ສານ​ງານ​ກັນ ຜູ້​ຜະ­ລິດ​ບໍ່​ສາ­ມາດ​ເຂົ້າ​ເຖິງ​ຕະ­ຫຼາດ ໂດຍ​ສະ­ເພາະ​ແມ່ນ​ຕ່າງ​ແຂວງ ການ​ກຳ­ນົດ​ລາ­ຄາ​ແມ່ນ​ອີງ​ຕາມ​ສະ­ພາບ​ການ ການ​ເຂົ້າ​ເຖິງ​ແຫຼ່ງ​ທຶນ​ທີ່​ມີ​ດອກ​ເບ້ຍ​ຕ່ຳ ແລະ ສິ່ງ​ທ້າ​ທາຍ​ອື່ນໆ​ອີກ.

   ພາຍ­ຫຼັງ​ມີ​ການ​ຈັບ​ຄູ່​ກັນ​ແລ້ວ ກໍ​ຈະ​ເຮັດ​ໃຫ້​ຊາວ​ກະ­ສິ­ກອນ​ມີ​ຕະ­ຫຼາດ​ຮອງ​ຮັບ​ທີ່​ແນ່­ນອນ ແລະ ພຽງ­ພໍ ບໍ່​ຖືກ​ເອົາ​ປຽບ​ດ້ານ​ລາ­ຄາ ເຂົ້າ­ໃຈ​ກ່ຽວ​ກັບ​ມາດ­ຕະ­ຖານ​ຂອງ​ສິນ­ຄ້າ ພ້ອມ​ດຽວ​ກັນ​ນັ້ນ ກໍ​ຈະ​ເຮັດ​ໃຫ້​ພໍ່­ຄ້າ-ແມ່​ຄ້າ​ຄົນ​ກາງ ສາ­ມາດ​ເຂົ້າ​ເຖິງ​ສິນ­ຄ້າ​ທີ່​ໄດ້​ຄຸນ​ນະ​ພາບ ແລະ ມາດ­ຕະ­ຖານ​ຂອງ​ຕະ­ຫຼາດ ລວມ​ທັງ​ຫຼຸດ­ຜ່ອນ​ບັນ­ຫາ​ການ​ຂາດ­ແຄນ​ສິນ­ຄ້າ​ນຳ​ອີກ.

   ພ້ອມ​ດຽວ​ກັນ ກໍ​ຈະ​ເປັນ​ການ​ຊຸກ­ຍູ້​ສົ່ງ­ເສີມ​ການ​ປູກ​ພືດ​ໃຫ້​ເປັນ​ສິນ­ຄ້າ​ທີ່​ສະ­ອາດ​ຢູ່​ພາຍ​ໃນ​ປະ­ເທດ ທີ່​ເປັນ​ລະ­ບົບ​ຄົບ​ຊຸດ​ໃຫ້​ມີ​ຄວາມ​ແຂງ­ແຮງ ຍືນ​ຍົງ ແລະ ເປັນ​ຂະ​ບວນ​ຟົດ­ຟື້ນ ແນ­ໃສ່​ຫຼຸດ­ຜ່ອນ​ການ​ນຳ​ເຂົ້າ​ຈາກ​ປະ­ເທດ​ເພື່ອນ​ບ້ານ​ທີ່​ບໍ່​ສະ­ອາດ ແລະ ບໍ່​ຖືກ­ຕ້ອງ​ຕາມ​ກົດ­ໝາຍ ທັງ​ເປັນ​ການ​ຮັບ­ປະ­ກັນ​ໃຫ້​ຜູ້​ຜະ­ລິດ ແລະ ຜູ້​ປະ­ກອບ​ການ​ມີ​ລາຍ​ຮັບ​ທີ່​ໝັ້ນ­ຄົງ.

ຂ່າວທີ່ກ່ຽວຂ້ອງ