ກອງປະຊຸມ (FEALAC) ຄັ້ງທີ 9 ຮັບຮອງເອົາຖະແຫຼງການຊານໂຕ ໂດມິງໂກ

740 12 ພ.ຈ. 2019 ຂ່າວໜ້າ​ໜຶ່ງ
ກອງປະຊຸມ (FEALAC) ຄັ້ງທີ 9 ຮັບຮອງເອົາຖະແຫຼງການຊານໂຕ ໂດມິງໂກ

   ວັນ​ທີ 8-9 ພະ­ຈິກ 2019 ທ່ານ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີກະ­ຊວງ​ການ​ຕ່າງ­ປະ­ເທດ ໄດ້​ນຳ­ພາ​ຄະ­ນະ​ຜູ້​ແທນ ສປປ ລາວ ເຂົ້າ​ຮ່ວມ​ກອງ​ປະ­ຊຸມ​ລັດ­ຖະ­ມົນ­ຕີ​ຕ່າງ­ປະ­ເທດ ຂອບ​ການ​ຮ່ວມ​ມື​ອາ­ຊີ​ຕາ­ເວັນ​ອອກ ແລະ ອາ​ເມ​ຣິ​ກາ​ລາ​ຕິນ (FEALAC) ຄັ້ງ​ທີ 9 ແລະ ກອງ​ປະ­ຊຸມ​ປິ່ນ​ອ້ອມ​ອື່ນໆ ທີ່​ຊານ​ໂຕ ໂດ​ມິງ​ໂກ ສາ­ທາ­ລະ­ນະ​ລັດ ໂດ​ມິ​ນິ​ກັນ.

   ເພື່ອ​ກະ­ກຽມ​ໃຫ້​ແກ່​ກອງ​ປະ­ຊຸມ​ລັດ­ຖະ­ມົນ­ຕີ​ຄັ້ງ​ນີ້ ໄດ້​ມີ​ກອງ​ປະ­ຊຸມ​ປິ່ນ​ອ້ອມ​ທີ່​ສຳ­ຄັນ​ຕ່າງໆ ຄື: ກອງ​ປະ­ຊຸມ​ປະ­ເທດ​ປະ­ສານ​ງານ​ພາກ​ພື້ນ ກອງ​ປະ­ຊຸມ​ປະ­ເທດ​ປະ­ສານ​ງານ​ພາກ​ພື້ນ​ອາ­ຊີ​ຕາ­ເວັນ​ອອກ ກອງ​ປະ­ຊຸມ​ປະ­ເທດ​ປະ­ສານ​ງານ​ພາກ​ພື້ນ​ອາ​ເມ​ຣິ​ກາ​ລາ​ຕິນ ກອງ​ປະ­ຊຸມ​ປະ­ເທດ​ປະ­ສານ​ງານ ກອງ​ປະ­ຊຸມ​ເຈົ້າ​ໜ້າ­ທີ່​ອາ­ວຸ­ໂສ ຟິ​ແລັກ ຄັ້ງ​ທີ 20 ກອງ​ປະ­ຊຸມ​ຄະ­ນະ​ກຳ­ມະ­ການ​ຮ່ວມ​ກອງ​ທຶນ FEALAC ຄັ້ງ​ທີ 3 ກອງ​ປະ­ຊຸມ​ເວ­ທີ​ປຶກ­ສາ​ຫາ­ລື​ນະ​ວັດ­ຕະ​ນະ​ກຳ​ດ້ານ​ທຸ­ລະ​ກິດ ແລະ ກອງ​ປະ­ຊຸມ​ສີ່​ໜ່ວຍ​ງານ​ວິ­ຊາ​ການ​ຂອງ FEALAC ເຊັ່ນ: 1. ໜ່ວຍ​ງານ​ການ​ຮ່ວມ​ມື​ດ້ານ​ການ​ຮ່ວມ​ມື​ທາງ​ສັງ­ຄົມ-ການ­ເມືອງ ແລະ ການ​ພັດ­ທະ­ນາ​ແບບ​ຍືນ​ຍົງ 2. ໜ່ວຍ​ງານ​ການ​ຮ່ວມ​ມື​ດ້ານ​ການ​ຄ້າ ການ​ລົງ­ທຶນ ການ­ທ່ອງ­ທ່ຽວ ຈຸ​ລະ­ວິ​ສາ​ຫະ​ກິດ ແລະ ວິ​ສາ​ຫະ​ກິດ​ຂະ­ໜາດ​ນ້ອຍ ແລະ ຂະ­ໜາດ​ກາງ 3. ໜ່ວຍ​ງານ​ການ​ຮ່ວມ​ມື​ດ້ານ​ວັດ­ທະ­ນະ­ທຳ ຊາວ​ໜຸ່ມ ແລະ ກີ­ລາ ໜ່ວຍ​ງານ​ການ​ຮ່ວມ​ມື​ດ້ານ​ວິ­ທະ­ຍາ­ສາດ ເຕັກ​ໂນ​ໂລ​ຊີ ນະ​ວັດ­ຕະ​ກຳ ແລະ ການ​ສຶກ​ສາ ເພື່ອ​ເປັນ​ການ​ກະ­ກຽມ​ໃຫ້​ກອງ​ປະ­ຊຸມ​ລັດ­ຖະ­ມົນ­ຕີ FEALAC ໃນ​ຄັ້ງ​ນີ້.

   ນອກ­ຈາກ​ນີ້ ກອງ​ປະ­ຊຸມ​ລັດ­ຖະ­ມົນ­ຕີ​ຄັ້ງ​ນີ້​ຍັງ​ໄດ້​ເຫັນ​ດີ​ຮັບ­ຮອງ​ເອົາ​ຖະ­ແຫຼງ­ການ​ຊານ​ໂຕ ໂດ​ມິງ​ໂກ ເພື່ອ​ເປັນ​ພື້ນ­ຖານ​ໃນ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ໃນ­ຕໍ່­ໜ້າ ໃນ​ໂອ­ກາດ​ນີ້ ໃນ​ວັນ​ທີ 8 ພະ­ຈິກ 2019 ທ່ານ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ແລະ ທ່ານ ມີ​ເກັນ ວາ​ຣ​ກັດ​ສ ລັດ­ຖະ­ມົນ­ຕີ​ຕ່າງ­ປະ­ເທດ ໂດ​ມິ​ນິ​ກັນ ຍັງ​ໄດ້​ຮ່ວມ​ລົງ​ນາມ​ໃນ​ບົດ​ບັນ­ທຶກ​ຄວາມ​ເຂົ້າ­ໃຈ ວ່າ​ດ້ວຍ​ການ​ປຶກ­ສາ​ຫາ­ລື​ທາງ​ດ້ານ​ການ­ເມືອງ ລະ­ຫວ່າງ ກະ­ຊວງ​ການ​ຕ່າງ ປະ­ເທດ ແຫ່ງ ສາ­ທາ­ລະ­ນະ​ລັດ ປະ­ຊາ­ທິ­ປະ­ໄຕ ປະ­ຊາ­ຊົນ​ລາວ ແລະ ກະ­ຊວງ​ການ​ຕ່າງ­ປະ­ເທດ ແຫ່ງ ສາ­ທາ­ລະ­ນະ​ລັດ ໂດ​ມີ​ນີ​ກັນ ເພື່ອ​ຮັດ​ແໜ້ນ​ມິດ­ຕະ­ພາບ ແລະ ການ​ຮ່ວມ​ມື ລະ­ຫວ່າງ ສອງ​ປະ­ເທດ ນອກ­ຈາກ​ນີ້ ໃນ​ວັນ​ທີ 9 ພະ­ຈິກ 2019 ທ່ານ ສະ­ເຫຼີມ​ໄຊ ກົມ​ມະ​ສິດ ລັດ­ຖະ­ມົນ­ຕີ​ກະ­ຊວງ​ການ​ຕ່າງ­ປະ­ເທດ ກໍ​ໄດ້​ເຂົ້າ​ຮ່ວມ​ພົບ​ປະ​ສອງ​ຝ່າຍ ກັບ​ຫົວ­ໜ້າ​ຄະ­ນະ​ຜູ້​ແທນ ສ ກູ​ບາ ແລະ ຍີ່­ປຸ່ນ.

ຂ່າວທີ່ກ່ຽວຂ້ອງ