ມຈ ໄດ້ຮັບທຶນຈາກ ADB ໃນການສ້າງຄວາມເຂັ້ມແຂງດ້ານການສຶກສາ

1.130 12 ພ.ຈ. 2019 ຂ່າວໜ້າ​ໜຶ່ງ

   ມະ­ຫາ­ວິ­ທະ­ຍາ­ໄລ​ຈຳ­ປາ​ສັກ (ມຈ) ໄດ້​ເອົາ­ໃຈ­ໃສ່​ຈັດ​ຕັ້ງ​ປະ­ຕິ­ບັດ​ໂຄງ­ການ​ສ້າງ​ຄວາມ​ເຂັ້ມ­ແຂງ​ໃຫ້​ວຽກ​ງານ​ການ​ສຶກ​ສາ​ຊັ້ນ​ສູງ ທີ່​ໄດ້​ຮັບ​ທຶນ​ຊ່ວຍ­ເຫຼືອ​ຈາກ​ທະ­ນາ­ຄານ​ພັດ­ທະ­ນາ​ອາ­ຊີ (ADB) ໃນ​ຂະ­ແໜງ­ການ​ຕ່າງໆ​ຂອງ ມຈ ເຊິ່ງ​ໂຄງ­ການ​ໄລ­ຍະ​ທີ 1 ໄດ້​ຈັດ​ຕັ້ງ​ປະ­ຕິ­ບັດ​ແຕ່​ປີ 2009-2016 ເປັນ­ຕົ້ນ​ມາ ໂດຍ​ເລັ່ງ​ໃສ່​ການ​ກໍ່­ສ້າງ​ພື້ນ­ຖານ​ໂຄງ​ລ່າງ​ຕ່າງໆ ເຊັ່ນ: ສ້າງ​ຫ້ອງ​ສະ­ໝຸດ ຫ້ອງ​ທົດ​ລອງ ສູນ​ຂໍ້​ມູນ​ຂ່າວ­ສານ ແລະ ສະ ໜອງ​ວັດ­ຖຸ​ອຸ­ປະ­ກອນ​ດ້ານ​ການ​ສຶກ​ສາ ແລະ ອື່ນໆ ມູນ​ຄ່າ 13 ລ້ານ​ກວ່າ​ໂດ​ລາ​ສະ­ຫະ­ລັດ ຫຼື ປະ­ມານ 115 ຕື້​ກີບ ປັດ­ຈຸ­ບັນ ກິດ­ຈະ­ກຳ​ດັ່ງ­ກ່າວ​ໄດ້​ມີ​ຜົນ­ສຳ­ເລັດ​ເປັນ​ກ້າວໆ.

   ທ່ານ​ນາງ ພອນ​ສະ­ຫວັນ ເທບ​ພະ­ສຸ​ລິ​ທອນ ຮອງ​ອະ­ທິ­ການ​ບໍ­ດີ ມຈ ວັນ​ທີ 7 ພະ­ຈິກ 2019 ວ່າ: ໂຄງ ການ​ສ້າງ​ຄວາມ​ເຂັ້ມ­ແຂງ​ໃຫ້​ວຽກ​ງານ​ການ​ສຶກ​ສາ​ຊັ້ນ​ສູງ ພາຍ​ໃຕ້​ທຶນ​ການ​ຊ່ວຍ­ເຫຼືອ​ຂອງ ADB ໃຫ້ ມຈ ໄລ­ຍະ​ທີ 1 ໄດ້​ສຳ­ເລັດ​ການ​ກໍ່­ສ້າງ​ພື້ນ­ຖານ​ໂຄງ​ລ່າງ​ຕ່າງໆ ເຊັ່ນ: ສ້າງ​ລະ­ບົບ​ເສັ້ນ­ທາງ​ຍາວ 7 ກິ­ໂລ­ແມັດ ພາຍ​ໃນ ມຈ ຫ້ອງ​ສະ­ໝຸດ ຫ້ອງ​ທົດ​ລອງ ສູນ​ຂໍ້​ມູນ​ຂ່າວ­ສານ ຫໍ​ພັກ​ນັກ​ສຶກ​ສາ ການ​ປະ­ກອບ​ວັດ­ຖຸ​ອຸ­ປະ­ກອນ​ການ​ສຶກ​ສາ ແລະ ອື່ນໆ ປັດ­ຈຸ­ບັນ​ແມ່ນ​ຄວາມ​ຄືບ​ໜ້າ ແລະ ສາ­ມາດ​ເປີດ​ນຳ​ໃຊ້​ໄດ້​ແລ້ວ ສຳ­ເລັດ​ການ​ເຝິກ ອົບ­ຮົມ​ຄູ-ອາ­ຈານ ເພື່ອ​ໃຫ້​ແທດ­ເໝາະ​ກັບ​ການ​ສິດ­ສອນ​ຍຸກ​ໃໝ່ ເຊິ່ງ​ນຳ​ໃຊ້​ໃນ​ການ­ຈັດ­ຕັ້ງ​ປະ­ຕິ­ບັດ​ວຽກ​ງານ​ມູນ​ຄ່າ 600 ລ້ານ​ກວ່າ​ກີບ ນອກ​ນີ້ ຍັງ​ສຳ­ເລັດ​ການ​ຄົ້ນ­ຄວ້າ​ວິ­ໄຈ​ວຽກ​ງານ​ການ​ສຶກ​ສາ​ປີ 2014 ຈຳ­ນວນ 6 ຫົວ​ບົດ ປີ 2015 ຄົ້ນ­ຄວ້າ​ໄດ້ 18 ຫົວ​ບົດ ນຳ​ໃຊ້​ທຶນ 500 ລ້ານ​ກວ່າ​ກີບ ແລະ ໄດ້​ໃຫ້​ທຶນ​ຍົກ​ລະ­ດັບ​ພະ ນັກ​ງານ​ຄູ-ອາ­ຈານ ເພື່ອ​ໄປ​ສຶກ​ສາ​ຕໍ່ 50 ທຶນ ຍິງ 18 ທຶນ ກໍ່­ສ້າງ​ປະ­ຕູ­ໂຂງ​ທາງ​ເຂົ້າ ມຈ ມູນ​ຄ່າ 150 ລ້ານ​ກີບ ກໍ່­ສ້າງ​ເສົາ​ທຸງ​ໜ້າ​ອາ­ຄານ​ອະ­ທິ­ການ​ບໍ­ດີ ມູນ​ຄ່າ 50 ລ້ານ​ກີບ ປັບ­ປຸງ​ຮົ້ວ​ກັ້ນ ແລະ ອ້ອມ​ຫໍ​ພັກ​ຍິງ​ມູນ​ຄ່າ 120 ລ້ານ​ກີບ ຮົ້ວ​ກັ້ນ​ຫ້ອງ​ນ້ຳ 9 ຫຼັງ ມູນ​ຄ່າ 80 ລ້ານ​ກີບ.

   ທ່ານ ສຸກ​ສັນ ວິ­ໄລ​ວົງ ຫົວ­ໜ້າ​ສູນ​ຂໍ້​ມູນ​ຂ່າວ­ສານ ມຈ ກ່າວ​ວ່າ: ໂຄງ­ການ​ຊ່ວຍ­ເຫຼືອ​ຂອງ ADB ມີ​ຄວາມ​ສຳ­ຄັນ​ຫຼາຍ ເພາະ​ສູນ​ຂໍ້​ມູນ​ຂ່າວ­ສານ​ເມື່ອ​ກ່ອນ ມີ​ຄອມ​ພິວ​ເຕີ​ໄວ້​ສິດ­ສອນ​ໃຫ້​ຄູ-ອາ­ຈານ​ໃນ​ພາກ​ວິ­ຊາ​ຕ່າງໆ ແລະ ນັກ​ສຶກ​ສາ​ພຽງ​ແຕ່ 25 ເຄື່ອງ ພາຍ­ຫຼັງ ADB ໃຫ້­ການ​ຊ່ວຍ­ເຫຼືອ​ໄດ້​ປະ­ກອນ​ຄອນ​ພິວ​ເຕີ ໃຫ້​ສູນ​ພວກ​ເຮົາ 168 ເຄື່ອງ ເຊິ່ງ​ເປັນ​ບ່ອນ​ສອນ​ຄອມ​ພິວ​ເຕີ​ໃຫ້​ພາກ​ວິ­ຊາ​ຕ່າງໆ ພ້ອມ​ທັງ​ຄູ-ອາ­ຈານ ເຊິ່ງ​ສາ ມາດ​ຍົກ​ລະ­ດັບ​ການ​ຮຽນ-ການ​ສອນ​ໃຫ້​ຄູ-ອາ­ຈານ ແລະ ນັກ​ສຶກ​ສາ​ໄດ້​ເປັນ​ຢ່າງ​ດີ ທຽບ­ໃສ່​ກ່ອນ​ໜ້າ­ທີ່​ບໍ່​ໄດ້​ຮັບ​ທຶນ​ຈາກ ADB ແມ່ນ​ໄດ້​ສິດ­ສອນ​ຕາມ​ຕຳ­ລາ ພາຍ­ຫຼັງ​ໄດ້​ຮັບ​ທຶນ​ກໍ​ໄດ້​ໃຊ້​ອິນ​ເຕີ​ເນັດ​ເຂົ້າ​ໃນ​ການ​ຊອກ​ຫາ​ຂໍ້​ມູນ​ທີ່​ສຳ­ຄັນ​ໃນ​ການ​ສອນ​ໃຫ້​ມີ​ຄຸນ​ນະ​ພາບ​ດີ​ຂຶ້ນ​ກວ່າ​ເກົ່າ ປັດ­ຈຸ­ບັນ​ໄດ້​ຮັບ​ຄວາມ​ສົນ­ໃຈ​ຈາກ​ນັກ​ສຶກ​ສາ​ເປັນ​ຈຳ­ນວນ​ຫຼາຍ ເຮັດ​ໃຫ້​ອຸ­ປະ­ກອນ​ການ​ຮຽນ-ການ​ສອນ ໂດຍ​ສະ­ເພາະ​ຄອມ​ພິວ​ເຕີ​ບໍ່​ພຽງ­ພໍ ຈຶ່ງ​ຢາກ​ສະ­ເໜີ ADB ສະ­ໜັບ­ສະ­ໜູນ​ອຸ­ປະ­ກອນ​ການ​ຮຽນ-ການ​ສອນ ແກ່ ມຈ ຕື່ມ​ອີກ.

ຂ່າວທີ່ກ່ຽວຂ້ອງ