ຮອງປະທານປະເທດ ໄດ້ຮັບຫຼຽນລະດັບຊາດຂອງຍີ່ປຸ່ນ

1.175 12 ພ.ຈ. 2019 ຂ່າວໜ້າ​ໜຶ່ງ

   ໃນ​ວັນ​ທີ 7 ພະ­ຈິກ 2019 ຢູ່​ສຳ­ນັກ​ພະ​ລາ­ຊະ​ວັງ​ຍີ່­ປຸ່ນ ທ່ານ ພັນ​ຄຳ ວິ­ພາ​ວັນ ຮອງ​ປະ­ທານ​ປະ­ເທດ ແຫ່ງ ສາ­ທາ­ລະ­ນະ​ລັດ ປະ­ຊາ­ທິ­ປະ­ໄຕ ປະ­ຊາ­ຊົນ​ລາວ ໄດ້​ເຂົ້າ​ຮັບ​ຫຼຽນ Grand Cordon of the Order of the Rising Sun ຈາກ​ເຈົ້າ​ຈັກ­ກະ­ພັດ ນາ​ຣຸ​ຮິ​ໂຕະ ແຫ່ງ​ຍີ່­ປຸ່ນ ເຊິ່ງ​ແມ່ນ​ຫຼຽນ​ລະ­ດັບ​ຊາດ ຂັ້ນ​ສູງ​ສຸດ​ຂອງ​ຍີ່­ປຸ່ນ ທີ່​ມອບ​ໃຫ້​ຊາວ​ຕ່າງ​ຊາດ.

   ທ່ານ ພັນ​ຄຳ ວິ­ພາ​ວັນ ໄດ້​ມີ​ຜົນ­ງານ​ຫຼາຍ​ດ້ານ​ໃນ​ການ​ປະ­ກອບ­ສ່ວນ ເຂົ້າ​ໃນ​ການ​ພົວ­ພັນ​ຮ່ວມ​ມື​ລະ­ຫວ່າງ​ລາວ-ຍີ່­ປຸ່ນ ໃນ​ໄລ­ຍະ​ດຳ­ລົງ​ຕຳ­ແໜ່ງ​ລັດ­ຖະ­ມົນ­ຕີ​ກະ­ຊວງ​ສຶກ​ສາ​ທິ​ການ ແລະ ກີ­ລາ ໂດຍ​ລວມ​ແລ້ວ ທ່ານ​ຮອງ​ປະ­ທານ​ປະ­ເທດ ສປປ ລາວ ໃຫ້​ຄວາມ​ສຳ­ຄັນ​ຕໍ່​ການ​ພົວ­ພັນ​ຮ່ວມ​ມື​ກັບ​ຍີ່­ປຸ່ນ ໃນ​ຂະ­ແໜງ­ການ​ສຶກ​ສາ ກີ­ລາ ວັດ­ທະ­ນະ­ທຳ ແລະ ສັງ­ຄົມ ຕະ­ຫຼອດ​ມາ ສະ­ເພາະ​ໄລ­ຍະ​ຫຼັງ​ນີ້ ທ່ານ​ໄດ້​ສະ­ໜັບ­ສະ­ໜູນ ຍີ່­ປຸ່ນ ລົງ​ສະ­ໝັກ​ເປັນ​ເຈົ້າ­ພາບ​ຈັດ​ງານ​ແຂ່ງ­ຂັນ​ກີ­ລາ ໂອ­ແລັມ­ປິກ 2020 ເຊິ່ງ ສປປ ລາວ ເປັນ​ປະ­ເທດ​ອັນ​ດັບ​ຕົ້ນ ທີ່​ແຈ້ງ​ໃຫ້­ການ​ສະ­ໜັບ­ສະ­ໜູນ​ຍີ່­ປຸ່ນ ແລະ ຍີ່­ປຸ່ນ ໄດ້​ຮັບ​ເລືອກ​ຕັ້ງ.

   ພ້ອມ​ນັ້ນ ຍັງ​ສົ່ງ­ເສີມ​ການ​ຮ່ວມ​ມື​ດ້ານ​ກີ­ລາ ລາວ ແລະ ຍີ່­ປຸ່ນ ໂດຍ​ສະ­ເພາະ ການ­ເຝິກ­ແອບ​ນັກ­ກີ­ລາ​ລາວ ທີ່​ຈະ​ເຂົ້າ​ຮ່ວມ​ງານ​ມະ​ຫະ​ກຳ​ກີ­ລາ ໂອ­ແລັມ­ປິກ 2020 ທີ່ ໂຕ​ກຽວ ສະ­ໜັບ­ສະ­ໜູນ​ການ​ສ້າງ­ຕັ້ງ​ຫ້ອງ­ການ​ຜູ້­ຕາງ­ໜ້າ​ສູນ​ອາ­ຊີ​ມູນ​ນິ­ທິ​ຍີ່­ປຸ່ນ ປະ­ຈຳ ສປປ ລາວ ປັດ­ຈຸ­ບັນ ຫ້ອງ­ການ​ດັ່ງ­ກ່າວ ໄດ້​ປະ­ຕິ­ບັດ​ໜ້າ­ທີ່​ຢ່າງ​ຕັ້ງ­ໜ້າ​ໃນ​ການ​ສົ່ງ­ເສີມ​ການ​ແລກ­ປ່ຽນ​ທາງ​ດ້ານ​ວັດ­ທະ­ນະ­ທຳ ແລະ ສັງ­ຄົມ​ຂອງ​ສອງ​ປະ­ເທດ​ໄດ້​ເປັນ​ຢ່າງ​ດີ ທັງ​ແລກ­ປ່ຽນ​ຄຳ​ຄິດ​ເຫັນ​ຢ່າງ​ຕັ້ງ­ໜ້າ ແລະ ຮ່ວມ​ກັບ​ທ່ານ ຕາ​ເກ​ໂອະ ຄາ​ວາ​ມູ​ຣະ ປະ­ທານ​ສະ­ມາ­ຄົມ​ມິດ­ຕະ­ພາບ ຍີ່­ປຸ່ນ-ລາວ ຝ່າຍ​ສະ­ພາ ເຂົ້າ​ຮ່ວມ​ພິ­ທີ​ປູກ​ຕົ້ນ​ຊາ​ກູ​ຣະ (ປະ­ມານ 220 ຕົ້ນ) ໃນ​ປີ 2015 ທີ່ ແຂວງ​ຫົວ­ພັນ ເຊິ່ງ​ແມ່ນ​ກິດ­ຈະ­ກຳ​ສະ­ເຫຼີມ­ສະ­ຫຼອງ​ວັນ​ສ້າງ­ຕັ້ງ​ສາຍ​ພົວ­ພັນ​ການ​ທູດ ລາວ ແລະ ຍີ່­ປຸ່ນ ຄົບ­ຮອບ 60 ປີ ແລະ ໄດ້​ມີ​ການ​ພັດ­ທະ­ນາ​ສະ­ຖານ­ທີ່​ປູກ​ຕົ້ນ​ຊາ​ກູ​ຣະ​ດັ່ງ­ກ່າວ ໃຫ້​ເປັນ​ສວນ​ສາ­ທາ­ລະ­ນະ ຕົ້ນ​ຊາ​ກູ​ຣະ​ມິດ­ຕະ­ພາບ ລາວ ແລະ ຍີ່­ປຸ່ນ.

   ຫລຽນ Order of the Rising Sun ແມ່ນ​ຫຼຽນ​ລະ­ດັບ​ຊາດ ທີ່​ລັດ­ຖະ­ບານ​ຍີ່­ປຸ່ນ​ມອບ​ໃຫ້​ແກ່​ຊາວ​ຕ່າງ​ຊາດ ເລີ່ມ​ແຕ່​ປີ 1875 ເປັນ­ຕົ້ນ​ມາ ໂດຍ​ປະ­ດັບ​ໃຫ້​ແກ່​ຜູ້​ທີ່​ມີ​ຜົນ­ງານ​ດີ­ເດັ່ນ​ໃນ​ຂົງ­ເຂດ​ວຽກ​ງານ​ການ​ທູດ ການ​ພົວ­ພັນ​ສອງ​ຝ່າຍ ດ້ານ​ເສດ­ຖະ­ກິດ ວັດ­ທະ­ນະ­ທຳ-ສັງ­ຄົມ ການ​ຮັກ­ສາ​ສິ່ງ­ແວ­ດລ້ອມ ແລະ ອື່ນໆ ໂດຍ​ແມ່ນ​ເຈົ້າ​ຈັກ­ກະ­ພັດ​ຍີ່­ປຸ່ນ​ເປັນ​ຜູ້​ມອບ 2 ຄັ້ງ ຕໍ່​ປີ (ລະ­ດູ​ໃບ​ໄມ້​ປົ່ງ ຕົ້ນ​ປີ ແລະ ລະ­ດູ​ໃບ​ໄມ້​ຫຼົ່ນ ທ້າຍ​ປີ) ເຊິ່ງ​ປະ­ກອບ​ມີ 6 ຂັ້ນ.

ຂ່າວທີ່ກ່ຽວຂ້ອງ