ນາຍົກ ເນັ້ນໃຫ້ເອົາໃຈໃສ່ພັດທະນາ ແລະ ປົກປ້ອງເດັກໃຫ້ມີຄວາມປອດໄພ

715 12 ພ.ຈ. 2019 ຂ່າວໜ້າ​ໜຶ່ງ
ນາຍົກ ເນັ້ນໃຫ້ເອົາໃຈໃສ່ພັດທະນາ ແລະ ປົກປ້ອງເດັກໃຫ້ມີຄວາມປອດໄພ

   ກອງ​ປະ­ຊຸມ​ລະ­ດັບ​ສູງ​ໃນ​ໂອ­ກາດ​ວັນ​ຄົບ­ຮອບ 30 ປີ ສົນ­ທິ­ສັນ­ຍາ​ວ່າ​ດ້ວຍ​ສິດ­ທິ​ເດັກ ຈັດ​ຂຶ້ນ​ວັນ​ທີ 11 ພະ­ຈິກ 2019 ທີ່​ຫໍ​ປະ­ຊຸມ​ແຫ່ງ​ຊາດ ເປັນ​ກຽດ​ເຂົ້າ​ຮ່ວມ​ຂອງ​ທ່ານ ທອງ​ລຸນ ສີ​ສຸ​ລິດ ນາ­ຍົກ­ລັດ­ຖະ­ມົນ­ຕີ ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ແຜນ­ການ ແລະ ການ​ລົງ­ທຶນ ປະ­ທານ​ກຳ­ມາ​ທິ​ການ​ແຫ່ງ​ຊາດ​ເພື່ອ​ຄວາມ​ກ້າວ­ໜ້າ​ຂອງ​ແມ່­ຍິງ ແມ່ ແລະ ເດັກ ທ່ານ​ນາງ ກາ​ຣິນ ຮຸນ​ຊອບ ຜູ້­ຕາງ­ໜ້າ​ອົງ­ການ​ຢູ​ນີ​ເຊບ​ປະ­ຈຳ​ພາກ​ພື້ນ​ອາ­ຊີ ແລະ ປາ​ຊີ​ຟິກ ພ້ອມ​ດ້ວຍ​ເອກ​ອັກ​ຄະ​ລັດ​ຖະ​ທູດ ຜູ້­ຕາງ­ໜ້າ​ອົງ​ການ­ຈັດ­ຕັ້ງ​ສາ­ກົນ ບັນ­ດາ​ຄູ່​ຮ່ວມ​ພັດ­ທະ­ນາ ແລະ ພາກ­ສ່ວນ​ກ່ຽວ­ຂ້ອງ ເຂົ້າ​ຮ່ວມ.

   ທ່ານ ທອງ​ລຸນ ສີ​ສຸ​ລິດ ກ່າວ​ວ່າ: 30 ປີ​ກ່ອນ​ໜ້າ​ນີ້ ອົງ­ການ​ສະ­ຫະ​ປະ­ຊາ​ຊາດ​ໄດ້​ຮັບ­ຮອງ​ເອົາ​ສົນ­ທິ­ສັນ­ຍາ​ວ່າ​ດ້ວຍ​ສິດ­ທິ​ເດັກ ນັບ​ແຕ່​ນັ້ນ​ມາ​ສົນ­ທິ­ສັນ­ຍາ​ດັ່ງ­ກ່າວ​ໄດ້​ກາຍ­ເປັນ​ສົນ­ທິ­ສັນ­ຍາ​ສິດ­ທິ​ມະ­ນຸດ​ທີ່​ມີ​ຈຳ­ນວນ​ປະ­ເທດ​ສະ­ມາ­ຊິກ​ເປັນ​ພາ­ຄີ​ຫຼາຍ​ທີ່​ສຸດ​ໃນ​ປະ­ຫວັດ­ສາດ ມີ 196 ປະ­ເທດ ສົນ­ທິ­ສັນ­ຍາ​ດັ່ງ­ກ່າວ​ໄດ້​ປະ­ກອບ­ສ່ວນ​ວາງ​ຮາກ​ຖານ ແລະ ກຳ­ນົດ​ມາດ­ຕະ­ຖານ​ດ້ານ​ການ​ສຶກ​ສາ ສຸ­ຂະ­ພາບ ແລະ ການ​ບໍ­ລິ­ການ​ສັງ­ຄົມ ພ້ອມ​ທັງ​ໃຫ້​ສິດ​ແກ່​ເດັກ​ໃນ​ການ​ສະ­ເໜີ​ຄຳ​ຄິດ​ເຫັນ​ຕໍ່​ນະ­ໂຍ­ບາຍ ແລະ ນິ­ຕິ​ກຳ​ທີ່​ມີ​ຜົນ​ກະ­ທົບ​ຕໍ່­ໜ້າ ສປປ ລາວ ກໍ​ຄື​ປະ­ເທດ​ຕ່າງໆ​ໃນ​ທົ່ວ​ໂລກ ເຊິ່ງ​ຍາມ​ໃດ​ກໍ​ໃຫ້​ຄວາມ​ສຳ­ຄັນ​ຕໍ່​ການ​ເບິ່ງ­ແຍງ​ດູ​ແລ ແລະ ພັດ­ທະ­ນາ​ເດັກ ກ່ອນ​ການ​ເຂົ້າ​ເປັນ​ພາ­ຄີ​ຂອງ​ສົນ­ທິ­ສັນ­ຍາ​ວ່າ​ດ້ວຍ​ສິດ­ທິ​ເດັກ ລາວ​ກໍ​ມີ​ຫຼາຍ​ການ­ຈັດ­ຕັ້ງ​ທີ່​ເຮັດ​ໜ້າ­ທີ່​ປົກ​ປ້ອງ​ສິດ ແລະ ພັດ­ທະ­ນາ​ເດັກ ການ­ຈັດ­ຕັ້ງ​ທີ່​ເປັນ​ແກນ​ກາງ​ໃນ​ວຽກ​ງານ​ດັ່ງ­ກ່າວ ລວມ​ເຖິງ​ການ­ຈັດ­ຕັ້ງ​ຂອງ​ຄະ­ນະ​ຊາວ​ໜຸ່ມ ສະ­ຫະ­ພັນ​ແມ່­ຍິງ ສະ​ຖາ​ບັນ​ການ​ສຶກ​ສາ​ສາ­ມັນ ການ­ຈັດ­ຕັ້ງ​ທາງ​ສາ­ສະ­ໜາ (ວັດ) ສະ​ຖາ​ບັນ​ຄອບ­ຄົວ​ທີ່​ມີ​ເຄືອ​ຄ່າຍ​ຢັ່ງ­ຢາຍ​ຢູ່​ທົ່ວ​ປະ­ເທດ ທັງ​ສູນ​ກາງ ແລະ ທ້ອງ­ຖິ່ນ ພາຍ­ຫຼັງ​ທີ່​ລາວ​ໄດ້​ເຂົ້າ​ເປັນ​ພາ­ຄີ​ຂອງ​ສົນ­ທິ­ສັນ­ຍາ​ດັ່ງ­ກ່າວ ແລະ ມີ​ຄະ­ນະ​ກຳ­ມາ​ທິ​ການ​ເພື່ອ​ຄວາມ​ກ້າວ­ໜ້າ​ຂອງ​ແມ່­ຍິງ  ແມ່ ແລະ ເດັກ ວຽກ​ງານ​ສິດ­ທິ​ເດັກ​ຍິ່ງ​ໄດ້​ຮັບ​ການ​ຍົກ​ມາດ­ຕະ­ຖານ ແລະ ຄຸນ​ນະ​ພາບ​ສູງ​ຂຶ້ນ​ຕື່ມ.

   ຕະ­ຫຼອດ​ໄລ­ຍະ 28 ປີ ທີ່ ສປປ ລາວ ເຂົ້າ​ເປັນ​ພາ­ຄີ​ຂອງ​ສົນ­ທິ­ສັນ­ຍາ​ວ່າ​ດ້ວຍ​ສິດ­ທິ​ເດັກ ພວກ​ເຮົາ​ມີ​ຄວາມ​ພາກ­ພູມ​ໃຈ​ທີ່​ສາ­ມາດ​ຍາດ​ໄດ້​ຜົນ­ສຳ­ເລັດ​ໃນ​ການ​ປົກ​ປ້ອງ ແລະ ພັດ­ທະ­ນາ​ເດັກ­ນ້ອຍ​ລາວ​ບັນ­ດາ­ເຜົ່າ​ເປັນ​ກ້າວໆ​ມາ ໃນ​ນີ້ ວຽກ​ງານ​ທີ່​ເຮັດ​ໄດ້​ດີ​ລວມ​ເຖິງ​ການ​ປົກ​ປ້ອງ​ສິດ­ທິ​ເດັກ ການ​ສະ­ກັດ​ກັ້ນ ແລະ ປາບ​ປາມ​ການ​ຄ້າ­ຂາຍ​ເດັກ ແລະ ຄ້າ​ປະ­ເວ­ນີ​ເດັກ ການ​ກວດ­ກາ ແລະ ປາບ​ປາມ​ການ​ແຜ່​ສື່​ລາ­ມົກ​ອາ­ນາ​ຈານ ກ່ຽວ​ກັບ​ເດັກ ການ​ປ້ອງ​ກັນ ຕ້ານ ແລະ ແກ້​ໄຂ​ບັນ­ຫາ​ການ​ໃຊ້​ຄວາມ​ຮຸນ​ແຮງ​ຕໍ່​ເດັກ ການ​ສົ່ງ­ເສີມ ສິດ ແລະ ຜົນ​ປະ­ໂຫຍດ​ຂອງ​ເດັກ ການ​ລຶ­ບລ້າງ​ທຸກ​ຮູບ​ແບບ​ຂອງ​ການ​ຈຳ­ແນກ ແລະ ການ​ໃຊ້​ຄວາມ​ຮຸນ​ແຮງ​ຕໍ່​ເດັກ ແລະ ວຽກ​ງານ​ອື່ນໆ ທີ່​ຕິດ​ພັນ​ກັບ​ການ​ປະ­ຕິ­ບັດ​ພັນ­ທະ ແລະ ສົນ­ທິ­ສັນ­ຍາ​ສາ­ກົນ​ກ່ຽວ​ກັບ​ເດັກ.

   ກອງ​ປະ­ຊຸມ​ຄັ້ງ​ນີ້ ມີ​ການ​ທົບ​ທວນ ລາຍ​ງານ ແລະ ແລກ­ປ່ຽນ​ຄຳ​ຄິດ​ຄຳ​ເຫັນ​ກ່ຽວ​ກັບ​ວຽກ​ງານ​ສິດ­ທິ​ເດັກ ການ​ສະ ເໜີ​ກ່ຽວ​ກັບ​ວິ­ໄສ​ທັດ​ສິ່ງ​ທ້າ​ທາຍ ແລະ ທິດ​ທາງ​ແກ້​ໄຂ​ບັນ­ຫາ​ສິດ­ທິ​ເດັກ ບັນ­ຫາ​ສຳ­ຄັນ​ອື່ນໆ  ພ້ອມ​ກັນ​ນັ້ນ ກໍ​ໄດ້​ປະ­ກອບ​ຄຳ​ເຫັນ ແລະ ຮັບ­ຮອງ​ເອົາ​ຄວາມ​ໝາຍ​ໝັ້ນ​ຂອງ ສປປ ລາວ ຕໍ່​ວຽກ​ສິດ­ທິ​ເດັກ ແລະ ມີ​ການ​ເຊັນ​ແຜ່ນ​ປ້າຍ​ຄວາມ​ໝາຍ​ໝັ້ນ​ຂອງ ສປປ ລາວ ຕໍ່​ວຽກ​ງານ​ສິດ­ທິ​ເດັກ  ຜົນ­ສຳ­ເລັດ​ດັ່ງ­ກ່າວ​ເກີດ​ຂຶ້ນ​ໄດ້​ກໍ​ຍ້ອນ​ຄວາມ​ເອົາ­ໃຈ­ໃສ່​ຂອງ​ລັດ­ຖະ­ບານ ແລະ ການ­ຈັດ­ຕັ້ງ​ທາງ​ສັງ­ຄົມ​ທຸກ​ພາກ­ສ່ວນ ຍ້ອນ​ໄດ້​ຮັບ​ການ​ສະ­ໜັບ­ສະ­ໜູນ ແລະ ຊ່ວຍ­ເຫຼືອ​ຂອງ​ອົງ­ການ​ສະ­ຫະ​ປະ­ຊາ​ຊາດ ບັນ­ດາ​ອົງ​ການ­ຈັດ­ຕັ້ງ​ເພື່ອນ​ມິດ­ສາ​ກົນ ບັນ­ດາ​ຄູ່​ຮ່ວມ​ພັດ­ທະ­ນາ ແລະ ບັນ­ດາ​ອົງ​ການ­ຈັດ­ຕັ້ງ​ບໍ່​ສັງ­ກັດ​ລັດ­ຖະ­ບານ ແລະ ການ​ປະ­ກອບ­ສ່ວນ​ຢ່າງ​ຕັ້ງ­ໜ້າ​ຂອງ​ປະ­ຊາ­ຊົນ ພົນ­ລະ­ເມືອງ​ລາວ​ທຸກ​ເຜົ່າ​ຊົນ ໃນ​ທົ່ວ​ສັງ­ຄົມ.

ຂ່າວທີ່ກ່ຽວຂ້ອງ