ພຸດທະສາສະນິກະຊົນ ຮ່ວມໃສ່ບາດໂອກາດບຸນພະທາດຫຼວງ

731 12 ພ.ຈ. 2019 ຂ່າວໜ້າ​ໜຶ່ງ
ພຸດທະສາສະນິກະຊົນ ຮ່ວມໃສ່ບາດໂອກາດບຸນພະທາດຫຼວງ

   ພິ­ທີ​ສະ­ຫຼຸບ​ຜົນ­ສຳ­ເລັດ​ໂຄງ­ການ​ປະ­ຕິ­ສັງ­ຂອນ​ພິ​ພິ​ທະ​ພັນ​ພະ​ທາດ­ຫຼວງ​ວຽງ​ຈັນ ຄັ້ງ​ທີ IV ບຸນ​ນະ​ມັດສະ­ການ​ພະ​ທາດ­ຫຼວງ​ວຽງ​ຈັນ ແລະ ວາງ­ສະ­ແດງ​ສິນ­ຄ້າ ປະ­ຈຳ​ປີ 2019 ໄດ້​ຄົບ­ງັນ​ຕາມ​ຮີດ­ຄອງ​ປະ­ເພ­ນີ ທີ່​ເຄີຍ​ປະ­ຕິ­ບັດ​ກັນ ແຕ່​ວັນ​ທີ 5 ພະ­ຈິກ 2019 ເປັນ­ຕົ້ນ​ມາ ມາ​ຮອດ​ຕອນ​ເຊົ້າ​ວັນ​ທີ 11 ພະ­ຈິກ 2019 ກົງ​ກັບ​ມື້​ຂຶ້ນ 15 ຄ່ຳ ເດືອນ 12 ປີ​ກຸນ ພສ 2562 ກໍ​ໄດ້​ມີ​ພິ­ທີ​ໃສ່​ບາດ​ຖວາຍ​ສັງ­ຄະ​ທານ​ແດ່​ພະ­ສົງ ສຳ​ມະ​ເນນ 1.000 ກວ່າ​ອົງ ໂດຍ​ມີ​ທ່ານ​ນາງ ປາ­ນີ ຢາ​ທໍ່​ຕູ້ ປະ­ທານ​ສະ­ພາ​ແຫ່ງ​ຊາດ ທ່ານ ພັນ​ຄຳ ວິ­ພາ​ວັນ ຮອງ​ປະ­ທານ​ປະ­ເທດ ທ່ານ ສອນ​ໄຊ ສີ​ພັນ​ດອນ ຮອງ​ນາ­ຍົກ­ລັດ­ຖະ­ມົນ­ຕີ ລັດ­ຖະ­ມົນ­ຕີ​ກະ­ຊວງ​ແຜນການ ແລະ ການ​ລົງ­ທຶນ ແລະ ທ່ານ ສິນ​ລະ​ວົງ ຄຸດ​ໄພ­ທູນ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ພ້ອມ​ດ້ວຍ​ອະ­ດີດ​ການ​ນຳ ພັນ​ລະ​ຍາ​ການ​ນຳ ການ​ນຳ​ນະ­ຄອນ­ຫຼວງ​ວຽງ​ຈັນ ແຂວງ​ຕ່າງໆ ແລະ ພຸດ​ທະ​ສາ​ສະ​ນິ​ກະ​ຊົນ ເຂົ້າ​ຮ່ວມ.

   ພິ­ທີ​ໃສ່​ບາດ​ຖວາຍ​ສັງ­ຄະ​ທານ​ໃນ​ບຸນ​ພະ​ທາດ­ຫຼວງ​ແມ່ນ​ຈັດ​ຂຶ້ນ​ທຸກ​ປີ ເຊິ່ງ​ປີ​ນີ້​ເປັນ​ປີ​ທີ່​ມີ​ຄວາມ​ໝາຍສຳ­ຄັນ ເນື່ອງ​ຈາກ​ພັກ-ລັດ ກໍ​ຄື​ນະ­ຄອນ­ຫຼວງ​ວຽງ​ຈັນ ໄດ້​ສະ­ຫຼຸບ​ຜົນ­ສຳ­ເລັດ​ໂຄງ­ການ​ປະ­ຕິ­ສັງ­ຂອນ​ພິ​ພິ​ທະ​ພັນ​ພະ​ທາດ­ຫຼວງ​ວຽງ​ຈັນ ຄັ້ງ​ທີ IV ມີ​ທັງ​ແຂກ​ພາຍ​ໃນ ແລະ ຕ່າງ­ປະ­ເທດ ຊາວ​ພຸດ​ທະ​ສາ​ສະ​ນິ​ກະ​ຊົນ​ທົ່ວ​ປະ­ເທດ ​ເຂົ້າ​ມາ​ຮ່ວມ​ເປັນ​ຫຼາຍ​ພັນ​ຄົນ ເຮັດ​ໃຫ້​ບັນ­ຍາ­ກາດ​ການ​ໃສ່​ບາດ​ມີ​ຄວາມ​ຄຶກ­ຄື້ນ ທັງ​ເປັນ​ການ​ເຕົ້າ­ໂຮມ​ຄວາມ​ສາ­ມັກ­ຄີ​ໃຫ້​ເປັນ​ປຶກ​ແຜ່ນ ຮັກ­ສາ​ໄດ້​ວັດ­ທະ­ນະ­ທຳ ຮີດ­ຄອງ​ປະ­ເພ­ນີ​ອັນ​ດີ­ງາມ​ຂອງ​ຊາດ​ລາວ ທີ່​ເຄີຍ​ສືບ​ທອດ​ກັນ​ມາ​ແຕ່​ດຶກ​ດຳ​ບັນ​ໃຫ້​ຢູ່​ຄຽງ​ຄູ່​ກັບ​ຄົນ​ລາວ ໃຫ້​ຜູ້​ທີ່​ເກີດ​ໃໝ່​ໃຫຍ່​ລຸນ​ໄດ້​ສືບ​ທອດ ແລະ ເສີມ​ຂະ­ຫຍາຍ​ມູນ­ເຊື້ອ​ດັ່ງ­ກ່າວ ມີ​ຄວາມ​ຍືນ​ຍົງ​ຕະ­ຫຼອດ​ໄປ​ຊົ່ວ​ເຊັ່ນ​ລູກ​ເຊັ່ນ​ຫຼານ.

   ສຳ­ລັບ​ຕອນ​ບ່າຍ​ຂອງ​ວັນ​ດຽວ​ກັນ ຢູ່​ທີ່​ເດີ່ນ​ສະ­ໜາມ​ຫຼວງ​ໄດ້​ມີ​ການ​ແຂ່ງ­ຂັນ​ກີ­ລາ​ພື້ນ­ເມືອງ​ຕີ­ຄີ ລະ­ຫວ່າງທີມ​ການ​ນຳ​ພັກ-ລັດ ໂດຍ​ສະ­ເພາະ​ການ​ນຳ​ນະ­ຄອນ­ຫຼວງ​ວຽງ​ຈັນກັບ​ທີມ​ປະ­ຊາ­ຊົນ​ບ້ານ​ອ້ອມ​ຂ້າງ​ພະ​ທາດ­ຫຼວງ​ຄື: ບ້ານ​ທາດ­ຫຼວງ​ເໜືອ ທາດ­ຫຼວງ​ກາງ ຫຼາດ​ຫຼວງ​ໃຕ້ ບ້ານ​ຮ່ອງ​ແກ ແລະ ບ້ານ​ໂພນ​ສະ­ອາດ.

   ສ່ວນ​ເວ­ລາ 19:00 ໂມງ ກໍ​ໄດ້​ມີ​ພິ­ທີ​ວຽນ­ທຽນ​ອົງ​ພະ​ທາດ­ຫຼວງ 3 ຮອບ ພ້ອມ​ຈູດ​ທູບ​ທຽນ​ບູ­ຊາ​ອ້ອມ​ພະ​ທາດ­ຫຼວງ ຈູດ​ບັ້ງ­ໄຟ​ສັກ­ກະ​ລະ​ບູ­ຊາ​ພະ​ທາດ­ຫຼວງ ແລະ ມີ​ການ​ຄົບ­ງັນ​ຕາມ​ປະ­ເພ­ນີ ເຊິ່ງ​ເປັນ​ກິດ­ຈະ­ກຳ​ສຸດ​ທ້າຍ​ຂອງ​ບຸນ​ນະ­ມັດ­ສະ­ການ​ພະ​ທາດ­ຫຼວງ ປະ­ຈຳ​ປີ 2019

ຂ່າວທີ່ກ່ຽວຂ້ອງ