ເບິ່ງບ້ານເຂົາເອົາບົດຮຽນ 12-11-2019

2.431 12 ພ.ຈ. 2019 ຫົວຂໍ້ຂ່າວອື່ນໆ

    ຄໍ​ລຳ​ປະ­ຈຳ​ວັນ​ນີ້ ມີ​ເລື່ອງ​ນະ­ໂຍ­ບາຍ​ທີ່​ດິນ​ໃນ​ອາ​ຟຣິ​ກາ​ໃຕ້ ຕໍ່​ໃສ່​ກົດ­ໝາຍ​ກຳ­ນົດ​ອາ­ຍຸ​ຕ່ຳ​ສຸດ ສຳ­ລັບ​ແຕ່ງ­ດອງ​ຢູ່​ອິນ​ໂດ​ເນ​ເຊຍ ແລະ ສຸດ​ທ້າຍ​ແມ່ນ​ກ່ຽວ​ກັບ​ກົດ­ໝາຍ​ບັງ­ຄັບ​ໃຫ້​ນັກ­ຮຽນ ນັກ​ສຶກ​ສາ ປູກ​ຕົ້ນ­ໄມ້​ຢູ່​ຟິ​ລິບ​ປິນ.

    ທີ່ ອາ​ຟຣິ​ກາ​ໃຕ້: ໃນ​ປີ 2015 ລັດ­ຖະ­ບານ​ອາ​ຟຣິ​ກາ​ໃຕ້ ໄດ້​ອອກ​ກົດ­ໝາຍ​ຫ້າມ​ຄົນ​ຕ່າງ­ປະ­ເທດ ມີ​ສິດ​ເປັນ​ເຈົ້າ​ຂອງ​ທີ່​ດິນ ນອກ­ຈາກ​ຕັດ​ສິດ​ຄົນ​ຕ່າງ­ປະ­ເທດ​ໃນ​ການ​ເປັນ​ເຈົ້າ​ຂອງ​ທີ່​ດິນ​ແລ້ວ ກົດ­ໝາຍ​ຍັງ​ໄດ້​ກຳ­ນົດ​ຫ້າມ​ພົນ­ລະ­ເມືອງ​ສາ­ມັນ​ທຳ​ມະ​ດາ ຖື​ກຳ­ມະ­ສິດ​ທີ່​ດິນ​ເກີນ 12.000 ເຮັກ­ຕາ ຫຼື ເທົ່າໆ​ກັບ​ພື້ນ​ທີ່​ຟາມ 2 ແຫ່ງ ໂຮມ​ເຂົ້າ­ກັນ​ກົດ­ໝາຍ​ບໍ່​ອະ­ນຸ­ຍາດ​ໃຫ້​ບໍ­ລິ­ສັດ​ເອ­ກະ​ຊົນ​ມີ​ສິດ​ເຊົ່າ​ດິນ ໃນ​ໄລ­ຍະ​ຍາວ​ກວ່າ 30-50 ປີ ສຳ­ລັບ​ບຸກ­ຄົນ​ທີ່​ມີ​ທີ່​ດິນ​ເກີນ 12.000 ເຮັກ­ຕາ ນັ້ນ​ທາງ​ການ​ຈະ​ຖື​ສິດ​ເຂົ້າ​ຊື້​ເນື້ອ­ທີ່​ດິນ​ສ່ວນ​ເກີນ ເພື່ອ​ເອົາ​ໄປ​ແຈກ​ຢາຍ​ໃຫ້​ບຸກ­ຄົນ ຫຼື ພາກ­ສ່ວນ​ອື່ນ​ນຳ​ໃຊ້​ກົດ­ໝາຍ​ສະ­ບັບ​ນີ້ ບໍ່​ມີ​ຜົນ​ສັກ­ສິດ​ຢ້ອນ​ຫຼັງ ຍ້ອນ​ເພາະ​ມັນ​ຈະ​ຂັດ​ກັບ​ເນື້ອ​ໃນ​ຂອງ​ລັດ​ຖະ​ທຳ​ມະ­ນູນ ໃນ​ປີ 1994 ອາ​ຟຣິ​ກາ​ໃຕ້ ສາ­ມາດ​ໂຄ່ນ​ລົ້ມ​ລະ­ບອບ​ແອກ​ຄອບ​ຄອງ​ຂອງ​ຄົນ​ຜິວ​ຂາວ​ກຸ່ມ​ນ້ອຍ​ທີ່​ເອີ້ນ​ກັນ​ວ່າ ລະ­ບອບ​ແບ່ງ​ແຍກ​ສີ​ຜິວ ພາຍ​ໃຕ້​ລະ­ບອບ​ຄົນ​ຜິວ​ຂາວ​ສ່ວນ​ນ້ອຍ​ເປັນ​ນາຍ​ນັ້ນ ພື້ນ​ທີ່​ດິນ​ສ່ວນ​ໃຫຍ່​ຂອງ​ປະ­ເທດ ຕົກ​ຢູ່​ໃນ​ກຳ­ມື​ຂອງ​ພວກ​ຜິວ​ຂາວ ດັ່ງ­ນັ້ນ ເມື່ອ​ລະ­ບອບ​ແບ່ງ​ແຍກ​ສີ​ຜິວ​ລົ້ມ​ສະ­ຫຼາຍ​ລົງ ລັດ­ຖະ­ບານ​ຈຶ່ງ​ໄດ້​ສືບ­ຕໍ່​ປັບ­ປຸງ​ກົດ­ໝາຍ​ທີ່​ດິນ ເພື່ອ​ໃຫ້​ຄົນ​ສ່ວນ​ໃຫຍ່ (ຜິວ​ດຳ) ມີ​ສິດ​ສະ­ເໝີ­ພາບ​ໃນ​ການ​ເປັນ​ເຈົ້າ​ຂອງ​ທີ່​ດິນ.

    ທີ່ ອິນ​ໂດ​ເນ​ເຊຍ: ຂ່າວ​ຕ່າງ­ປະ­ເທດ​ໃນ​ກາງ​ເດືອນ​ກັນ­ຍາ​ປີ​ນີ້ ໃຫ້​ຮູ້​ວ່າ ອິນ​ໂດ​ເນ​ເຊຍ ໄດ້​ຕົກ­ລົງ​ແກ້​ໄຂ​ກົດ­ໝາຍ​ວ່າ​ດ້ວຍ​ການ​ແຕ່ງ­ດອງ ໂດຍ​ໄດ້​ກຳ­ນົດ​ອາ­ຍຸ​ຂັ້ນ​ຕ່ຳ​ສຸດ​ເປັນ 19 ປີ ສຳ­ລັບ​ທັງ​ເພດ​ຊາຍ ແລະ ເພດ​ຍິງ ກ່ອນ​ໜ້າ​ນັ້ນ ຍິງ-ຊາຍ ອິນ​ໂດ​ເນ​ເຊຍ ສາ­ມາດ​ເອົາ­ກັນ​ເປັນ​ຜົວ-ເມຍ ໄດ້​ໃນ​ເກນ​ອາ­ຍຸ​ພຽງ 16 ປີ ຫຼື ຕ່ຳ​ກວ່າ​ນັ້ນ ຖ້າ ພໍ່-ແມ່ ຫຼື ຜູ້​ປົກ­ຄອງ​ຂອງ​ພວກ​ເຂົາ­ເຈົ້າ​ເຫັນ​ດີ ຈາກ​ບ່ອນ​ບໍ່​ມີ​ການ​ກຳ­ນົດ​ອາ­ຍຸ​ຕ່ຳ​ສຸດ ສຳ­ລັບ​ການ​ແຕ່ງ­ດອງ ຈຶ່ງ​ເຮັດ​ໃຫ້​ອິນ​ໂດ​ເນ​ເຊຍ ເປັນ 1 ໃນ 10 ປະ­ເທດ ທີ່​ມີ​ເຈົ້າ​ສາວ​ອາ­ຍຸ​ນ້ອຍ​ທີ່​ສຸດ​ຂອງ​ໂລກ ໃນ​ໄລ­ຍະ​ຜ່ານ​ມາ ຄະ­ນະ​ກຳ­ມະ­ການ​ຕໍ່­ຕ້ານ​ການ​ໃຊ້​ຄວາມ​ຮຸນ​ແຮງ​ຕໍ່​ເດັກ­ນ້ອຍ​ໄດ້​ຕໍ່­ສູ້​ໃຫ້​ມີ​ການ​ປ່ຽນ­ແປງ ແນວ​ຄິດ​ຕາຍ​ຕົວ​ແບບ​ຄຳ​ພີ ທີ່​ຖື​ວ່າ​ເດັກ​ຍິງ​ຕ້ອງ​ຮີບ​ແຕ່ງ­ດອງ​ແຕ່​ຍັງ​ນ້ອຍ​ເພື່ອ​ບໍ່​ໃຫ້ “ຄ້າງ​ໂຄກ !” ຄະ­ນະ​ກຳ­ມະ­ການ​ດັ່ງ­ກ່າວ​ໄດ້​ສະ­ເໜີ​ເກນ​ອາ­ຍຸ​ຕ່ຳ​ສຸດ​ທີ່ ຊາຍ-ຍິງ ສາ­ມາດ​ແຕ່ງ­ດອງ​ກັນ​ໄດ້​ຢູ່​ໃນ​ຂັ້ນ 21 ປີ ແຕ່​ທາງ​ລັດ​ຖະ​ສະ­ພາ​ໄດ້​ຕົກ­ລົງ​ເອົາ​ເກນ​ອາ­ຍຸ 19 ປີ ຂ່າວ​ບອກ​ວ່າ ຄວາມ​ພະ­ຍາ­ຍາມ​ແກ້​ໄຂ​ກົດ­ໝາຍ​ການ​ແຕ່ງ­ດອງ​ສະ­ບັບ​ເກົ່າ​ນັ້ນ ໄດ້­ແກ່​ຍາວ​ມາ​ເປັນ​ເວ­ລາ​ກວ່າ 45 ປີ ໄດ້​ຮັບ​ຜົນ­ສຳ­ເລັດ​ໃນ​ທີ່​ສຸດ.

    ທີ່ ຟິ​ລິບ​ປິນ: ໃນ​ວັນ​ທີ 30 ພຶດ­ສະ­ພາ​ປີ​ນີ້ ປະ­ເທດ​ຟີ​ລິບ​ປິນ ໄດ້​ຮັບ­ຮອງ​ເອົາ​ກົດ­ໝາຍ​ກຳ­ນົດ​ໃຫ້​ນັກ­ຮຽນ​ຂັ້ນ​ມັດ­ທະ­ຍົມ ແລະ ນັກ​ສຶກ​ສາ​ຂັ້ນ​ມະ­ຫາ​ວະ​ທິ​ຍາ​ໄລ ແຕ່­ລະ­ຄົນ ປູກ​ຕົ້ນ­ໄມ້​ໃຫ້​ໄດ້​ຢ່າງ​ໜ້ອຍ 10 ຕົ້ນ (ນັບ​ແຕ່​ມື້​ເຂົ້າ​ຮຽນ​ຮອດ​ເວ­ລາ​ຮຽນ​ຈົບ) ກົດ­ໝາຍ​ສະ­ບັບ​ນີ້ ເລັ່ງ​ເປົ້າ​ໝາຍ​ປູກ​ຕົ້ນ­ໄມ້​ໃນ​ທົ່ວ​ປະ­ເທດ​ໃຫ້​ໄດ້​ຈຳ­ນວນ 175 ລ້ານ​ຕົ້ນ​ຕໍ່​ປີ ຟິ​ລິບ​ປິນ ມີ​ນັກ­ຮຽນ​ຂັ້ນ​ມັດ­ທະ­ຍົມ ຈຳ­ນວນ 5 ລ້ານ​ຄົນ ແລະ ຂັ້ນ​ມະ­ຫາ­ວິ­ທະ­ຍາ­ໄລ​ປະ­ມານ 5 ແສນ​ຄົນ ກົດ­ໝາຍ​ທີ່​ໃຊ້​ສະ­ເພາະ​ກັບ​ໂຮງ­ຮຽນ​ສະ­ບັບ​ນີ້ ໄດ້​ກຳ­ນົດ​ໃຫ້​ນັກ­ຮຽນ-ນັກ​ສຶກ​ສາ ປູກ​ຕົ້ນ­ໄມ້​ຕາມ​ພື້ນ​ທີ່​ປ່າ ພື້ນ​ທີ່​ຄຸ້ມ​ຄອງ​ບາງ​ແຫ່ງ​ພື້ນ​ທີ່​ສຳ­ລັບ​ທະ­ຫານ​ເໝືອງ​ແຮ່​ໂຕ ແລະ ໃນ​ເຂດ​ຕົວ​ເມືອງ ພັນ​ໄມ້​ຈະ​ປູກ​ຕ້ອງ​ໃຫ້​ເໝາະ​ສົມ​ກັບ​ສະ­ພາບ​ອາ­ກາດ ແລະ ພື້ນ​ທີ່​ແຕ່​ລະ​ບ່ອນ.

ຂ່າວທີ່ກ່ຽວຂ້ອງ