ເບິ່ງບ້ານເຂົາເອົາບົດຮຽນ 13-11-2019

2.419 13 ພ.ຈ. 2019 ຫົວຂໍ້ຂ່າວອື່ນໆ

   ເລື່ອງ​ທີ່​ສັນ​ຫາ​ມາ​ເວົ້າ​ສູ່​ຟັງ​ປະ­ຈຳ​ວັນ​ນີ້ ລວມ​ມີ​ເລື່ອງ​ມາດ​ຕະ­ການ​ປະ­ຢັດ​ຮັດ​ສາຍ­ແອວ​ຢູ່​ປະ­ເທດ​ກາ​ນາ ເລື່ອງ​ອິນ​ໂດ​ເນ​ເຊຍ ຊຸກ­ຍູ້​ການ​ລົງ­ທຶນ​ພາກ​ເອ­ກະ​ຊົນ ເພື່ອ​ຫຼຸດ­ຜ່ອນ​ການ​ໃຊ້​ຈ່າຍ​ງົບ­ປະ­ມານ​ຂອງ​ລັດ ແລະ ວິ­ທີ​ການ​ດຶງ​ດູດ​ຄົນ​ເກ່ງ​ເຂົ້າ​ປະ­ເທດ ດ້ວຍ​ການ​ອອກ​ວີ​ຊາ​ພິ­ເສດ​ຂອງ​ອົດ​ສະ​ຕຣາ​ລີ.

   ທີ່ ກາ​ນາ: ເມື່ອ​ເຖິງ​ຄາວ​ປະ­ຢັດ​ຮັດ​ສາຍ­ແອວ ຜູ້­ນຳ​ປະ­ເທດ​ກາ​ນາ (ອາ​ຟຣິ​ກາ) ກໍ​ນຳ​ໃຊ້​ມາດ​ຕະ­ການ​ເດັດ­ຂາດ ເຮັດ​ທຸກ​ຢ່າງ​ເພື່ອ​ກຳ​ຈັດ­ການ​ໃຊ້​ຈ່າຍ​ຟຸມ​ເຟືອຍ ອັນ​ບໍ່​ຈຳ­ເປັນ ດັ່ງ​ໃນ​ທ້າຍ​ປີ 2015 ທ່ານ ຈອນ ດຼາ​ມາ​ນີ ມາ​ຮາ​ມາ (John Dramani Mahama) ປະ­ທາ­ນາ­ທິ­ບໍ­ດີ ຂອງ​ປະ­ເທດ​ນີ້ ກໍ​ໄດ້​ອອກ​ຄຳ​ສັ່ງ​ຫ້າມ​ພະ­ນັກ­ງານ​ລັດ ໂດຍ­ສານ​ດ້ວຍ​ປີ້​ເຄື່ອງ​ບິນ​ຊັ້ນ​ທີ 1 (First Class) ຄຳ​ສັ່ງ​ນີ້​ມີ​ຂຶ້ນ​ໃນ​ຂະ­ນະ​ທີ່​ກາ​ນາ ຕ້ອງ​ໄດ້​ປະ­ຕິ­ບັດ​ຕາມ​ຂໍ້​ຕົກ­ລົງ​ຊ່ວຍ­ເຫຼືອ​ຂອງ​ກອງ​ທຶນ​ລະ­ຫວ່າງ​ປະ­ເທດ (IMF) ເພື່ອ​ຟື້ນ​ຟູ​ເສດ­ຖະ­ກິດ​ແຫ່ງ​ຊາດ​ທີ່​ໄດ້​ຮັບ​ຜົນ​ກະ­ທົບ​ຢ່າງ​ໜັກ​ຈາກ​ສະ­ພາບ​ເງິນ​ເຟີ້ ໃນ​ໄລ­ຍະ​ຜ່ານ​ມາ ຝ່າຍ​ຄ້ານ​ໄດ້​ກ່າວ​ຫາ​ວ່າ ບັນ­ດາ​ລັດ­ຖະ­ມົນ­ຕີ​ໃນ​ຄະ­ນະ​ລັດ­ຖະ­ບານ​ມີ​ການ​ໃຊ້​ຈ່າຍ​ຟຸມ​ເຟືອຍ ທີ່​ບໍ່​ສົມ​ເຫດ​ສົມ​ຜົນ ນອກ­ຈາກ​ສັ່ງ​ຫ້າມ​ພະ­ນັກ­ງານ​ຂັ້ນ​ສູງ​ເດີນ­ທາງ​ດ້ວຍ​ເຄື່ອງ​ບິນ​ໃນ​ຊັ້ນ​ທີ 1 ແລ້ວ ທ່ານ​ປະ­ທາ­ນາ­ທິ­ບໍ­ດີ ຍັງ​ໄດ້​ຮຽກ­ຮ້ອງ​ໃຫ້​ພະ­ນັກ­ງານ​ການ​ນຳ​ທຸກ​ຄົນ ຫຼີກ​ລ່ຽງ​ການ​ເດີນ­ທາງ​ໄປ​ຕ່າງ­ປະ­ເທດ​ທີ່​ຂາດ​ເຫດ­ຜົນ​ພຽງ­ພໍ ໃນ​ໄລ­ຍະ​ຫຼັງໆ​ມາ​ນີ້ ລາຍ​ໄດ້​ຂອງ​ກາ​ນາ ຈາກ​ການ​ສັ່ງ​ອອກ​ໂກ​ໂກ ຄຳ ແລະ ນ້ຳ­ມັນ ຂອງ​ປະ­ເທດ​ເລີ່ມ​ຕົກ­ຕ່ຳ ເຮັດ​ໃຫ້​ເກີດ​ພາ­ວະ​ຂາດ­ດູນ​ການ​ຄ້າ​ສູງ ໜີ້​ສາ­ທາ­ລະ­ນະ​ເພີ່ມ​ຂຶ້ນ ແລະ ສະ­ກຸນ​ເງິນ​ພາຍ​ໃນ​ຂອງ​ກາ​ນາ​ປະ​ເຊີນ​ກັບ​ສະ­ພາບ​ສັ່ນ​ຄອນ ດັ່ງ­ນັ້ນ ຈຶ່ງ​ຈຳ­ເປັນ​ຕ້ອງ​ປະ­ຕິ­ບັດ​ໂຄງ­ການ​ກູ້​ຢືມ​ເງິນ​ຈາກ IMF ນອກ­ຈາກ​ມາດ​ຕະ­ການ​ປະ­ຢັດ​ດັ່ງ­ກ່າວ​ມາ​ຂ້າງ​ເທິງ​ແລ້ວ ກາ​ນາ ຍັງ​ໄດ້​ອອກ​ກົດ­ໝາຍ​ວ່າ​ດ້ວຍ​ຄວາມ​ຮັບ­ຜິດ­ຊອບ​ທາງ​ການ​ເງິນ ຊຶ່ງ​ໄດ້​ກຳ­ນົດ​ບົດ​ລົງ­ໂທດ​ເຖິງ​ຂັ້ນ​ໄລ່​ອອກ​ການ ຫຼື ຈຳ​ຄຸກ​ພະ­ນັກ­ງານ​ລັດ​ຄົນ​ໃດ​ທີ່​ລະ­ເມີດ​ກົດ­ໝາຍ​ດັ່ງ­ກ່າວ.

   ທີ່ ອິນ​ໂດ​ເນ​ເຊຍ: ໃນ​ປີ 2017 ທະ­ນາ­ຄານ​ພັດ­ທະ­ນາ​ອາ­ຊີ (ADB-ເອ​ດີ​ບີ) ໄດ້​ຊີ້​ອອກ​ວ່າ ອິນ​ໂດ​ເນ​ເຊຍ ຕ້ອງ­ການ​ເງິນ​ຈຳ­ນວນ 1,15 ພັນ​ຕື້​ໂດ​ລາ​ສະ­ຫະ­ລັດ ເພື່ອ​ການ​ລົງ­ທຶນ ນັບ​ແຕ່​ປີ 2016 ເຖິງ​ປີ 2030 ຖ້າ​ຕ້ອງ­ການ​ໃຫ້​ຍອດ​ຜະ­ລິດ​ຕະ​ພັນ​ພາຍ​ໃນ​ເພີ່ມ​ຂຶ້ນ​ໃນ​ລະ­ດັບ 4,5% ເພື່ອ​ບັນ­ລຸ​ເປົ້າ​ໝາຍ​ດັ່ງ­ກ່າວ ອິນ​ໂດ​ເນ​ເຊຍ ຕ້ອງ​ໄດ້​ລົງ­ທຶນ​ໃນ​ຈຳ­ນວນ​ເງິນ 70 ຕື້​ໂດ​ລາ​ສະ­ຫະ­ລັດ​ຕໍ່​ປີ ແຕ່​ໃນ​ຕົວ​ຈິງ​ຜັດ​ສາ­ມາດ​ສະ­ໜອງ​ໄດ້​ພຽງ 23 ຕື້ (ຍັງ​ຂາດ 47 ຕື້​ໂດ​ລາ​ສະ­ຫະ­ລັດ) ຍ້ອນ​ແນວ​ນີ້​ເອງ ທາງ​ການ​ອິນ​ໂດ​ເນ​ເຊຍ ຈຶ່ງ​ຕ້ອງ​ໄດ້​ສືບ­ຕໍ່​ປັບ­ປຸງ​ນະ­ໂຍ­ບາຍ​ຕ່າງໆ ເພື່ອ​ດຶງ​ດູດ​ການ​ລົງ­ທຶນ​ຈາກ​ພາກ​ເອ­ກະ​ຊົນ​ໃຫ້​ໄດ້​ເພີ່ມ​ຂຶ້ນ ເພາະ​ຈະ​ອາ­ໄສ​ແຕ່​ທຶນ​ຂອງ​ລັດ​ແມ່ນ​ເປັນ​ໄປ​ບໍ່​ໄດ້ ລະ­ບຽບ​ການ​ທີ່​ຕ້ອງ​ໄດ້​ປັບ­ປຸງ​ດ່ວນ ແມ່ນ​ລະ­ບຽບ​ການ​ວ່າ​ດ້ວຍ​ພັນ­ທະ​ພາບ​ລະ­ຫວ່າງ​ລັດ​ກັບ​ເອ­ກະ​ຊົນ ແລະ ລະ­ບຽບ​ການ​ວ່າ​ດ້ວຍ​ໂຄງ​ລ່າງ​ການ​ສະ­ໜອງ​ທຶນ​ຈາກ​ກອງ​ທຶນ​ທີ່​ບໍ່​ແມ່ນ​ຂອງ​ລັດ ນອກ­ຈາກ​ນັ້ນ ລັດ­ຖະ­ບານ​ອິນ​ໂດ​ເນ​ເຊຍ ຍັງ​ໄດ້​ປຸກ​ສ້າງ​ສິ່ງ​ເອື້ອ​ອຳ­ນວຍ​ຄວາມ​ສະ­ດວກ​ຕ່າງໆ​ສຳ­ລັບ​ການ​ລົງ­ທຶນ​ໃນ​ມູນ​ຄ່າ 352,9 ຕື້​ໂດ​ລາ​ສະ­ຫະ­ລັດ ໃນ​ນັ້ນ ມາ​ຈາກ​ງົບ­ປະ­ມານ​ຂອງ​ລັດ 40% ສ່ວນ​ເຫຼືອ​ໄດ້​ມາ​ຈາກ​ບັນ­ດາ​ລັດ​ວິ​ສາ​ຫະ​ກິດ ແລະ ບໍ­ລິ­ສັດ​ເອ­ກະ​ຊົນ (ຂໍ້​ມູນ​ຈາກ​ວຽງ​ຈັນ​ທາມ 23 ມີ­ນາ 2017).

   ທີ່ ອົດ​ສະ​ຕຣາ​ລີ: ໃນ​ວັນ​ທີ 19 ມີ­ນາ ປີ 2018 ລັດ­ຖະ­ບານ​ອົດ​ສະ​ຕຣາ​ລີ ໄດ້​ປະ­ກາດ​ວ່າ ຈະ​ນຳ​ໃຊ້​ວີ​ຊາ​ປະ­ເພດ​ໃໝ່ ເພື່ອ​ດຶງ​ດູດ​ຄົນ​ຕ່າງ­ປະ­ເທດ​ທີ່​ເກ່ງ​ກ້າ​ສາ­ມາດ​ດ້ານ​ເຕັກ​ໂນ​ໂລ​ຊີ ເຂົ້າ​ໄປ​ເຮັດ​ວຽກ​ຢູ່​ອົດ​ສະ​ຕຣາ​ລີ ໂດຍ​ອະ­ນຸ­ຍາດ​ໃຫ້​ບັນ­ດາ​ບໍ­ລິ­ສັດ​ຢູ່​ພາຍ​ໃນ​ສາ​ມາ­ດວ່າ​ຈ້າງ​ແຮງ​ງານ​ຕ່າງ­ປະ­ເທດ ທີ່​ມີ​ສີ​ດີ­ເດັ່ນ​ດ້ານ​ເຕັກ​ໂນ​ໂລ​ຊີ​ເຂົ້າ​ໄປ​ເຮັດ​ວຽກ​ໃນ​ຕຳ­ແໜ່ງ​ງານ​ທີ່​ມີ​ລາຍ​ຮັບ​ສູງ​ເຖິງ 180.000 ໂດ​ລາ​ສະ­ຫະ­ລັດ​ຕໍ່​ປີ ນອກ­ຈາກ​ນັ້ນ ກໍ​ຍັງ​ວີ​ຊາ​ອີກ​ປະ­ເພດ​ໜຶ່ງ​ທີ່​ໃຊ້​ໃຫ້​ບໍ­ລິ­ສັດ​ປະ­ກອບ​ການ​ໃໝ່ ໃນ​ການ​ຮັບ​ສະ­ໝັກ​ວີ​ຊາ​ການ​ຕ່າງ­ປະ­ເທດ​ດ້ານ​ເຕັກ­ນິກ ແລະ ຄະ­ນິດ­ສາດ​ການ​ແພດ ສາ­ຂາ​ຊີ­ວະ​ພາບ ແລະ ເຕັກ​ໂນ​ໂລ​ຊີ​ກະ­ສິ­ກຳ ຊາວ​ຕ່າງ­ປະ­ເທດ​ທີ່​ມີ​ເງື່ອນ­ໄຂ​ຂໍ​ວີ​ຊາ​ນີ້ ຕ້ອງ​ມີ​ປະ­ສົບ​ການ​ຕົວ​ຈິງ​ເປັນ​ເວ­ລາ 3 ປີ​ໃນ​ຂົງ­ເຂດ​ກ່ຽວ­ຂ້ອງ.

ຂ່າວທີ່ກ່ຽວຂ້ອງ